Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) AUGUSTE 2013

Omapulo a dja kovaleshi

Omapulo a dja kovaleshi

Osha wapala tuu ovadali Ovakriste va kale omutumba mokwoongala kweongalo pamwe nokaana kavo oko ka kondwa?

Kape na etomheno lokukala hatu lipula unene naapo omunhu oo a kondwa e na okukala omutumba mOlupale lOuhamba. Oshifo eshi osha kala tashi ladipike ovadali Ovakriste va kwafele ovana vavo pamhepo ovo va kondwa nove li navo natango meumbo, ngeenge ove wete sha pumbiwa. Ngaashi sha kundafanwa pepandja 19 neti-20 lOshungonangelo yOshiingilisha yo 15 Novemba 1988, ovadali otava dulu okukonakona Ombibeli nokaana kavo kanini oko ka kondwa ngeenge oke li navo natango meumbo. Osho otashi ke ka kwafela ka mone etwomukumo olo ka pumbwa opo ka dule okuwapeka epuko lako.

Ngeenge tashi uya pokukala omutumba mOlupale lOuhamba, kashi na oupyakadi ngeenge okaana oko ka kondwa taka kala omutumba pamwe novadali vako ka ngungumana. Molwaashi kape na omhango oyo tai ufa kutya omunhu oo a kondwa oku na okukala omutumba konima, kape na yo oupyakadi ngeenge okaana oko ka kondwa oka kala omutumba povadali vako, kashi na nee mbudi kutya ove li omutumba peni molupale. Molwaashi ovadali ove na ko nasha noupamhepo wokaana, otava ka shilipaleka kutya otaka pwilikine mokwoongala opo ka mone mo ouwa. Ashike opo va dule okuninga ngaho, ove na okukala omutumba nako ponhele yoku ka efa ka kale kuko vene.

Ndele ongahelipi ngeenge okaana oko ka kondwa kake li vali novadali vako meumbo? Mbela osho osha hala okutya itava dulu okukala omutumba nako mokwoongala? Monakudiwa, oshifo eshi osha li sha yelifa nawa kutya Omukriste oku na okuninga po shike ngeenge tashi uya pokweendafana nomupambele oo a kondwa oo ihadi meumbo lavo. * Ashike okweefa omunhu oo a kondwa a kale omutumba pamwe novapambele vaye mokwoongala osha yooloka ko filufilu kokweendafana owina naye. Ngeenge oilyo youkwaneumbo oyo idiinini oi na etaleko la yuka li na sha nomupambele oo a kondwa nohai kendabala okudulika komayele Ombibeli e na sha nokuhaendafana naye, katu na okukala hatu lipula shi na sha noshinima osho. — 1 Kor. 5:11, 13; 2 Joh. 11.

Kutya nee omunhu oo a kondwa oku li omutumba pamwe novapambele vaye ile pamwe noshilyo shimwe sheongalo, katu na okukala hatu lipula shi na sha nasho shimha ashike te lihumbata nawa. Okutula po omangabeko e na sha naapo oo a kondwa e na okukala omutumba otaku dulu okweetifa omaupyakadi e lili noku lili, she likolelela keenghalo. Ngeenge keshe umwe, mwa kwatelwa ovapambele ovadiinini, ota kendabala okudulika komafinamhango Ombibeli e na sha nokukondwa, inashi pumbiwa okulipula unene naapo umwe e na okukala omutumba mokwoongala kweongalo ngeenge itashi pundukifa ovamwatate. *

^ okat. 5 Tala Oshungonangelo yOshiingilisha yo 15 Septemba 1981, epandja 29 neti-30.

^ okat. 6 Ouyelele ou owa pepaleka oo u li mOshungonangelo yOshiingilisha ye 1 Aprili 1953, epandja 223.