Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Juni 2013

Kala wa lenga oukwatya waJehova wondjele nowokuyandja nehalo liwa

Kala wa lenga oukwatya waJehova wondjele nowokuyandja nehalo liwa

“Kalunga omuwa kuaveshe, nohole yaye ya nyananana kovashitwa vaye aveshe.” — EPS. 145:9.

1, 2. Oshike hatu ka dula okuninga fiyo alushe?

OMUKRISTE umwe wedina Monika okwa ti: “Otwa kala twa hombola oule womido hanga 35. Ame nomushamane wange otu shaafane nawa. Ashike nonande opa pita omido adishe odo, keshe umwe oku na omaukwatya amwe oo mukwao ina shiiva, nohatu twikile oku e lihonga.” Nopehe na omalimbililo, osho osho naanaa shi li ngaho kovalihomboli nokookaume vahapu.

2 Ohatu kala twa hala okushiiva nawa ovo tu hole. Ndele ohatu kala twa hala unene okulihonga kombinga yaJehova oo ta dulu okukala Kaume ketu fiyo alushe. Itatu dulu okushiiva keshe shimwe kombinga yaye. (Rom. 11:33) Ashike monakwiiwa ohatu ka dula okulihonga kombinga yomaukwatya aye fiyo alushe nokukala twe a lenga pauyadi. — Omuud. 3:11.

3. Oshike hatu ka kundafana moshitukulwa eshi?

3 Oshitukulwa sha tetekela oshe tu kwafela tu kale twa lenga neenghono oukwatya waKalunga wokupopiwa naye noupu nosho yo wokuhe na onhondo. Moshitukulwa eshi ohatu ke lihonga shi na sha nondjele yaJehova nosho yo okuyandja nehalo liwa. Osho otashi ke tu kwafela tu ude ko nawa kutya ‘Kalunga omuwa kuaveshe, nohole yaye oya nyananana kovashitwa vaye aveshe.’ — Eps. 145:9.

JEHOVA OHA YANDJE NEHALO LIWA

4. Okuyandja nehalo liwa osha hala okutya shike?

4 Okuyandja nehalo liwa osha hala okutya shike? Enyamukulo kepulo olo ohatu li hange mOilonga 20:35 oyo tai ti: “Okuyandja oku nelao komesho yokutambula.” Eendjovo odo daJesus otadi ulike kokuyandja kwashili. Omunhu  oo ha yandje oha longifa nehalo liwa efimbo laye, eenghono daye nosho yo oiniwe yaye opo a kwafele vamwe, te shi ningi nehafo. Okuyandja kwomunhu ihaku hololwa kouhapu waasho a yandja, ndele okwaasho she mu linyengifa a yandje. (Lesha 2 Ovakorinto 9:7.) Kape na oo ha yandje nehalo liwa e dule Kalunga ketu, Jehova.

5. Omeenghedi dilipi Jehova ha ulike kutya oha yandje nehalo liwa?

5 Jehova oha ulike ngahelipi kutya oha yandje nehalo liwa? Oha kwafele ovanhu aveshe meemhumbwe davo, naavo ihave mu longele. Nopehe na omalimbililo, ‘Kalunga omuwa kuaveshe.’ “Etango laye ote li pitifile ava vaii naava vawa, nodula ote i lokifile ovayuki naava ve he fi ovayuki.” (Mat. 5:45) Nomolwaasho, omuyapostoli Paulus eshi a li ta popi navamwe ovo vehe fi ovaitaveli okwe va lombwela ta ti kutya Jehova “okwe mu monifila ouwa, eshi e mu lokifila odula meulu nokwe mu pa omafimbo oshishipo nokwa yadifa omitima deni oipalwifa nehafo.” (Oil. 14:17) Osho otashi ulike kutya Jehova oha yandje kukeshe umwe nehalo liwa. — Luk. 6:35.

6, 7. (a) Jehova oha hafele unene okukwafela oolyelye? (b) Yandja oshihopaenenwa shanghee Jehova ha kwafele ovapiya vaye ovadiinini.

6 Jehova oha kala unene tuu a hafa ngeenge ta wanifa po eemhumbwe dovalongeli vaye ovadiinini. Ohamba David oya ti: “Nghee nda li omumati fiyo [nda] kulupa, omuyuki inandi mu mona nande a efuwa, ile oludalo laye tali ehela oshifima.” (Eps. 37:25) Ovakriste vahapu ovadiinini ove shi limonena kutya Jehova ohe tu file shili oshisho. Natu ka taleni koshihopaenenwa shimwe.

7 Omido donhumba da pita, omukokolindjila wedina Nancy okwa li e lihanga monghalo idjuu. Okwa ti: “Onda li nda pumbwa eeranda 570 dokufuta onhele opo handi di, nonda li ndi na oku di futa ngomongula. Kanda li ndi shii kutya ohandi di hange peni. Onda li nda ilikana shi na sha nasho, ndele handi i koilonga yange yokuyakula ovalandi morestoulanda. Fiku olo kanda li nda teelela ndi pewe oimaliwa ihapu oyo ovalandi hava pe ovanailonga vomeerestoulanda omolweyakulo lavo, molwaashi shito mefiku olo ihapa kala lela ovanhu vahapu. Ndele efiku olo ope ke uya ovalandi vahapu inatu shi teelela. Eshi nda ka dimbuka ndele handi valula oyo nda pewa, aishe kumwe oya li eeranda 570.” Nancy okwa li a tomhwa kutya Jehova okwe mu pa nehalo liwa osho a pumbwa. — Mat. 6:33.

8. Oshali imwe ilipi oyo Jehova a yandja?

8 Oshali imwe oyo Jehova a yandja nehalo liwa okwe i yandja kukeshe umwe. Oshali oyo oilipi? Ekuliloyambo lOmona waye. Jesus okwa ti: “Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Joh. 3:16) Pomhito ei, “ounyuni” otau ulike kovanhu. Onghee hano, oshali oyo oya nuninwa keshe umwe oo te i tambula ko. Ovo ve na eitavelo muJesus otava ka mona omwenyo waalushe. (Joh. 10:10)  Osho otashi ulike shili kutya Jehova oha yandje nehalo liwa.

KALA HO YANDJE NEHALO LIWA NGAASHI JEHOVA

Ovaisrael ova li va ladipikwa va kale hava yandje nehalo liwa ngaashi Jehova (Tala okatendo 9)

9. Ongahelipi hatu dulu okuhopaenena Jehova mokukala hatu yandje nehalo liwa?

 9 Ongahelipi hatu dulu okukala hatu yandje nehalo liwa ngaashi Jehova? Ngaashi ashike Jehova ‘he tu pe pauyadi aishe yoku tu hafifa,’ nafye otu “nokutukulilafana” navamwe osho tu na, naasho otashi ke va etela ehafo. (1 Tim. 6:17-19) Ohatu pe ovaholike vetu eeshali nohatu kwafele ovo ve na omhumbwe, hatu shi ningi nehafo. (Lesha Deuteronomion 15:7.) Oshike tashi dulu oku tu kwafela tu dimbuluke okukala hatu yandje nehalo liwa? Ovakriste vamwe ohava ningi ngaha: Ngeenge ova pewa eeshali kuumwe, ohava kongo omhito navo va yandje eeshali kuumwe e lili. Omaongalo opaKriste okwa nangekwa noupuna eshi mu na ovamwatate novamwameme vahapu ovo hava yandje nehalo liwa.

10. Onghedi ya denga mbada ilipi omo hatu dulu okuyandja nehalo liwa?

10 Onghedi imwe ya denga mbada omo hatu dulu okuyandja nehalo liwa omokulongifa efimbo neenghono detu mokukwafela vamwe noku va twa omukumo. (Gal. 6:10) Mbela naave oho yandje nehalo liwa monghedi ya faafana? Oto dulu okulipula kutya: ‘Mbela ohandi ulike ngoo kutya onda hala okupwilikina kuvamwe? Ngeenge umwe okwa pula nge ndi mu kwafele moshinima shonhumba, mbela ohandi kala ngoo nda hala oku shi ninga? Onaini nde lixula okupandula oshilyo shoukwaneumbo ile sheongalo?’ Ngeenge otwa kala hatu ‘yandje,’ ohatu ka kala tu na ekwatafano liwa naJehova nosho yo nookaume ketu. — Luk. 6:38; Omayel. 19:17.

11. Omeenghedi dilipi hatu dulu okuyandja kuJehova nehalo liwa?

 11 Ohatu dulu yo okuyandja nehalo liwa kuJehova. Omishangwa ode tu ladipika tadi ti: “Omwene mu fimaneka neliko loye.” (Omayel. 3:9) ‘Eliko’ olo ola kwatela mo efimbo letu, eenghono noiniwe yetu oyo hatu dulu okulongifa  moilonga yaJehova. Nokuli nounona otava dulu okulihonga va kale hava yandje nehalo liwa kuJehova. Omudali umwe wedina Jason okwa ti: “Ngeenge oukwaneumbo wetu tau ka yandja omayambidido kOlupale lOuhamba, ohatu pe ounona navo va ka tule mo moukefa vomayambidido. Osho ohave shi hafele molwaashi, eshi tave i tula mo, otava yandje sha kuJehova.” Ounona ovo hava yandje kuJehova fimbo vanini, ohava ka twikila okuyandja kuye nehalo liwa naashi va kula. — Omayel. 22:6.

JEHOVA OKU NA ONDJELE

12. Okukala nondjele osha hala okutya shike?

12 Oukwatya umwe vali waJehova uhokwifa oo ondjele. Okukala nondjele osha hala okutya ngahelipi? Mo-New World Translation, oshitya shOshigreka osho sha tolokwa “ondjele” otashi ti “okutifuka.” (Tit. 3:1, 2, eshangelo lopedu mo-NW.) Omunhu oo e na ondjele iha komangele ashike omhango, iha kala alushe a kanyatela koshinima shimwe ashike noke na ondudi ile onyanya. Ndele ponhele yaasho, oha ungaunga nawa novanhu vakwao, nokuyavelela vamwe omolweenghalo davo. Oha pwilikine kuvamwe nehalo liwa, ha tifuka noha lundulula oiteelelwa yaye ngeenge osha pumbiwa.

13, 14. (a) Ongahelipi Jehova a ulika kutya oku na ondjele? (b) Oshike hatu lihongo shi na sha nondjele monghedi omo Jehova a ungaunga naLot?

13 Jehova oha ulike ngahelipi kutya oku na ondjele? Oha kala e na ko nasha nomaliudo ovapiya vaye, naluhapu ohe va ningile osho tave mu pula. Pashihopaenenwa, diladila kunghee Jehova a li a ungaunga nomulumenhu omuyuki Lot. Eshi Jehova a li a tokola okuhanauna po Sodom naGomorra, okwa li e mu lombwela monghedi ya yela kutya na ye onhapo keemhunda. Ndele omolwomatomheno onhumba, Lot okwa ka indila Jehova opo a ye onhapo konhele i lili. Diladila ashike kutya, Lot okwa li a pula Jehova a lundulule omalombwelo aye! — Lesha Genesis 19:17-20.

14 Otashi dulika shi kale shipu kuumwe okudiladila kutya Lot okwa li e na eitavelo la nghundipala noiha dulika. Kakele kaasho, Jehova okwa li ta dulu okuxupifa Lot kutya nee oku li peni, nomolwaasho, Lot ka li e na etomheno lokukala a tila. Ndele nande ongaho, Lot okwa li a tila. Na Jehova okwa li a tifuka nokwa li a pitika Lot a ye onhapo konhele oyo nayo ya li i na ngeno okuhanaunwa po. (Lesha Genesis 19:21, 22.) Osho otashi ulike kutya, Jehova kefi kanyamukulwa noke fi omukwanyanya. Oha tifuka noku na ondjele.

15, 16. Ongahelipi Omhango yaMoses ya ulika kutya Jehova oku na ondjele? (Tala efano olo li li pehovelo loshitukulwa)

15 Diladila koshihopaenenwa shimwe vali shi na sha nondjele yaJehova osho tashi hangwa mOmhango yaMoses. Ngeenge Omuisrael okwa hepa noka li ta dulu okuyandja odi ile oshikombo sheyambo, okwa li e na okuyandja omalyamono avali ile eenghutyona mbali. Ndele ongahelipi ngeenge okwa hepa neenghono noita dulu okuyandja eenghutyona mbali? Jehova okwa li e mu pitika a yandje oufila munini. Ndele Jehova ka li ashike a hala oufila keshe. Omhango oya ti kutya ou na okukala “oufila womudiva,” wa nakwa nawa, oo wa li hau telekelwa ovaenda ovo va fimana. (Gen. 18:6) Ongahelipi oshihopaenenwa eshi tashi ulike kutya Jehova oku na ondjele? — Lesha Leviticus 5:7, 11.

16 Kala nee ngeno wa fa oove Omuisrael oo a hepa neenghono. Eshi wa fika petwalihangano wa eta oufila woye munini weyambo, ou wete eshi oipuna ya eta oimuna. Otashi dulika u kale wa fya ohoni eyambo loye olo loufila munini neenghono. Opo nee owa dimbuluka kutya eyambo loye oli na ongushu momesho aJehova. Omolwashike mbela li na ongushu? Omhango yaJehova oya ti kutya oufila nau kale wa nakwa nawa. Kungaho, osha fa ashike Jehova ta lombwele Omuisrael ohepele ta ti: ‘Ondi shii kutya ito dulu okuyandja shihapu ngaashi vamwe, ashike ondi shi shii yo kutya oto pe nge eshi shiwaelela.’ Osho otashi ulike shili kutya Jehova  oha ulike ondjele mokukala e shii omangabeko neenghalo dovapiya vaye. — Eps. 103:14.

17. Jehova oha hokwa okulongelwa monghedi ya tya ngahelipi?

 17 Otashi tu tu omukumo okushiiva kutya Jehova oha tambula ko osho hatu mu longele nomutima aushe omolwondjele yaye. (Kol. 3:23) Omumwameme umwe omunamido Omuitalia wedina Constance, okwa ti: “Onda kala ndi hole unene okulombwela vamwe kombinga yOmushiti wange. Osho osho sha kwafela nge ndi twikile okuudifa nokuninga omakonakonombibeli. Ashike omafimbo amwe ohandi kala nda nyemata eshi itandi dulu okulonga shihapu moilonga yokuudifa omolwokuhe na oukolele. Ndele ondi shi shii kutya Jehova oku shii omangabeko ange nosho yo kutya oku hole nge noha pandula osho handi dulu oku mu longela.”

HOPAENENA ONDJELE YA-JEHOVA

18. Omonghedi ilipi ovadali tava dulu okuhopaenena Jehova?

18 Ongahelipi hatu dulu okuhopaenena ondjele yaJehova? Diladila vali konghedi omo Jehova a li a ungaunga naLot. Jehova oye e na eenghonopangelo, ndele nande ongaho, okwa li a pwilikina nolukeno eshi Lot te mu lombwele omaliudo aye. Okwa li yo a pitika Lot a ye konhele oko a pula a ye. Ngeenge ove ou li omudali, mbela ito dulu okuhopaenena Jehova? Mbela ito dulu okupwilikina kwaasho ounona voye tava pula, nongeenge otashi shiiva to va pe epitikilo? Oshungonangelo 1 Septemba 2007 oya popya kutya ngeenge ovadali vamwe tava tula po eemhango domeumbo, ohava kwatele mo yo ounona meenghundafana nokupwilikina kutya otava ti ngahelipi. Pashihopaenenwa, otashi dulika ovadali va hala okutula po omhango kutya efimbo lilipi ounona ve na okukala va fika meumbo konguloshi. Oshoshili kutya ovadali ove na oufemba wokuninga ngaho, ashike otava dulu okukundafana novana vavo fimbo inava tula moilonga omhango ya tya ngaho. Peemhito dimwe, ovadali otava dulu okulundulula efimbo olo va teelela ounona va kale hava fiki keumbo, shimha ashike osho itashi nyono omafinamhango Ombibeli. Ovadali oshi na oupu va ka mone kutya ngeenge ova kundafana novana vavo fimbo inava tula po eemhango donhumba, ounona ohave di udu ko nawa nohava dulika kudo nehalo liwa.

19. Ongahelipi ovakulunhuongalo tava dulu okuhopaenena ondjele yaJehova?

19 Ovakulunhuongalo ove na okuhopaenena ondjele yaJehova mokukala hava diladila keenghalo dovaitaveli vakwao. Dimbulukweni kutya Jehova okwa li a lenga nokuli nomayambo Ovaisrael ovo va li va hepa neenghono. Sha faafana, ovamwatate novamwameme vamwe ihava dulu okulonga shihapu moukalele, tashi dulika omolwokuhenoukolele ile molwoukulupe. Ongahelipi ngeenge ovaholike vetu va tya ngaho ova nyemata molwomangabeko avo? Ovakulunhuongalo otava dulu oku va shilipaleka kutya Jehova oku va hole molwaashi ohava longo ngaashi tava dulu. — Mark. 12:41-44.

20. Mbela okukala nondjele otashi ti okukala to longo nonyalo moilonga yokulongela Kalunga? Shi yelifa.

20 Okukala nondjele itashi ti kutya okukala noikala yokulietela onghenda, sha hala okutya, to longo nonyalo moilonga yokulongela Kalunga. (Mat 16:22, NW) Inatu hala okukala ovakwandede nokupopila oikala yetu hatu ti kutya otu na ondjele. Ponhele yaasho, atusheni otu na ‘okukondja’ mokuyambidida oinima yOuhamba. (Luk. 13:24) Onghee hano, otu na okukala nondjele mokukala hatu longele Jehova ngaashi hatu dulu, ndele katu na okulonga nondede. Shikwao vali, otu shii kutya Jehova ite ke tu pula shihapu shi dulife pwaasho hatu dulu. Ngeenge otwe mu longele tashi di komitima, ohatu dulu okukala noushili kutya okwa hafela oilonga yetu. Mbela inatu hafa eshi hatu longele Omwene oo e na olupandu noku na ondjele? Moshitukulwa tashi landula ohatu ka kundafana omaukwatya makwao avali aJehova mahokwifa. — Eps. 73:28.

“Omwene mu fimaneka neliko loye.” — Omayel. 3:9 (Tala okatendo 11)

“Keshe eshi tamu shi ningi, shi ningeni komitima deni.” — Kol. 3:23 (Tala okatendo 17)