Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JUNI 2013

Kala wa lenga omaukwatya aJehova pauyadi

Kala wa lenga omaukwatya aJehova pauyadi

“Ningeni hano [ovahopaeleli] vaKalunga ngaashi ovana ovaholike.” — EF. 5:1.

1. (a) Omaukwatya aJehova elipi Omukriste tashi dulika a diladila kuo? (b) Ongahelipi hatu dulu okumona ouwa mokukonakona omaukwatya aKalunga?

NGEENGE to diladila shi na sha naJehova, omaukwatya elipi ha e uya momadiladilo oye? Vahapu vomufye otashi dulika tu diladile komaukwatya ngaashi, ohole, ouyuki, ounongo neenghono. Ashike otu shii kutya Jehova oku na omaukwatya amwe vali mahokwifa. Oule womido da pita, moishangomwa yetu omwa kundafanwa omaukwatya aJehova e lili noku lili e dulife po 40. Diladila ashike keshiivo olo to ka mona ngeenge owa konakona paumwene ile mu li oukwaneumbo kombinga yomaukwatya aJehova. Omeenghedi dilipi hatu dulu okumona ouwa mokukonakona kwa tya ngaho? Otaku ke tu kwafela tu kale twa lenga neenghono omaukwatya aTate yetu womeulu. Oshidjemo, ohatu ka kala twa halelela oku mu hopaenena nokupanga oukaume wopofingo naye. — Jos. 23:8; Eps. 73:28.

2. (a) Yelifa to longifa oshihopaenenwa nghee hatu dulu okukala twa lenga neenghono omaukwatya aJehova. (b) Oshike hatu ka kundafana moshitukulwa eshi nosho yo muikwao ivali ya landula ko?

2 Ongahelipi to dulu okulihonga okukala wa lenga neenghono oshinima shonhumba? Natu tye nee ngeno owa hala okuhetekela okuteleka oikulya yonhumba. Tete owa mona kutya ohai nyika nawa. Opo nee, to i makele nowa mona kutya oi na omulyo muwa. Nolwanima, owe ke litelekela oikulya oyo ove mwene. Sha faafana, ohatu ka kala twa lenga neenghono oukwatya wonhumba waJehova ngeenge otwe lihongo tete shi na sha nao, opo nee, hatu dilonga kuo nolwanima hatu u hopaenene mokukalamwenyo kwetu. (Ef. 5:1) Elalakano loshitukulwa eshi nosho yo ikwao ivali ya landula ko olo oku tu kwafela tu kale twa lenga neenghono omaukwatya aKalunga oo tashi dulika ihatu diladila lela kombinga yao mokuyelekanifa namakwao oo a tongomana. Ohatu ka kundafana kutya oukwatya keshe otau ti shike, ongahelipi Jehova he u ulike nosho yo kutya ongahelipi  hatu dulu okuhopaenena Jehova mokuulika oukwatya oo.

JEHOVA OHA POPIWA NAYE NOUPU

3, 4. (a) Okukala ho popiwa naave noupu otashi ti shike? (b) Ongahelipi Jehova e tu shilipaleka kutya oha popiwa naye noupu?

3 Tete natu ka konakone kutya okukala ho popiwa naave noupu otashi ti shike. Otashi ti okukala u na olukeno nowe lilongekida okupopiwa naave. Oto dulu okumona kutya omunhu oha popiwa naye noupu okupitila mokupopya kwaye, momalinyengo olutu laye, okoshipala nosho yo amwe vali.

4 Jehova oha ulike ngahelipi kutya oha popiwa naye noupu? Nonande Jehova oku li Omushiti munenenene weshito alishe, okwe tu shilipaleka kutya okwa halelela okupwilikina komailikano etu noku a nyamukula. (Lesha Epsalme 145:18; Jesaja 30:18, 19.) Ohatu dulu okupopya naye efimbo keshe oule wefimbo olo twa hala noponhele keshe. Ohatu dulu yo okupopya naye twa manguluka, tu shii kutya ita ka kala a kenyanana. (Eps. 65:3; Jak. 1:5) Ombibeli oya hokolola Jehova monghedi oyo tai ulike kutya oha popiwa naye noupu. Pashihopaenenwa, omupsalme David okwa ti kutya, ‘omesho Omwene okwe e tu talifa’ nosho yo kutya ‘eke laye lokolulyo otali tu pameke.’ (Eps. 34:16; 63:9) Omuprofeti Jesaja okwa faafanifa Jehova nomufita weedi eshi a ti: ‘Ota ongele oudjona momaoko aye ndee te va upatele ponhulo yaye, neenyali ote di findaeke nawa.’ (Jes. 40:11) Diladila ashike kwaashi, Jehova okwa hala tu ehene popepi elela naye ngaashi okadjona ka upatelwa ponhulo yomufita omunahole. Kashi hafifa tuu okukala tu na Tate yetu ha popiwa naye noupu! Ongahelipi hatu dulu okuhopaenena Jehova mokuulika oukwatya oo?

OUKWATYA WA FIMANENENA KOVAKULUNHUONGALO

5. Omolwashike sha fimana kovakulunhuongalo okukala hava popiwa navo noupu?

5 Omafimbo opo a di ko, Eendombwedi diladi dokomanenedu a yoolokafana oda li da pulwa taku ti: “Oukwatya ulipi wa hala unene omukulunhuongalo a kale e na?” Dihapu domudo oda nyamukula tadi ti, “Okukala ha popiwa naye noupu.” Oshoshili kutya Ovakriste aveshe ova pumbwa okukulika oukwatya oo, ndele owa fimana  unene tuu kovakulunhuongalo. (Jes. 32:1, 2) Omumwameme umwe okwa yandja etomheno kutya omolwashike ta tile kutya oukwatya oo owa fimanenena eshi a ti: “Ngeenge omukulunhuongalo oha popiwa naye noupu, opo ashike hatu ka dula okumona ouwa momaukwatya makwao mawa oo e na.” Osho sha popiwa komumwameme oo oshoshili. Ndele mbela oshike hashi ningifa omunhu a kale ha popiwa naye noupu?

6. Oshike tashi dulu oku tu kwafela tu kale hatu popiwa nafye noupu?

6 Opo omunhu a kale ha popiwa naye noupu oku na okukala e na ko nasha shili navamwe. Ngeenge omukulunhuongalo oku na ko nasha navamwe noku na ehalo lokupwilikina kuvo, ovamwaxe, mwa kwatela novanyasha, otava ka kala va manguluka okupopya naye. (Mark. 10:13-16) Carlos oo e na omido 12 okwa ti: “Ohandi mono ovakulunhuongalo tave limemesha pokwoongala novanalukeno, naasho osha ningifa nge ndi kale ndi va hole.” Ashike inashi wana ashike komukulunhuongalo okupopya kutya okwe lilongekida okupwilikina nokukwafela vamwe, ndele oku na oku shi ulika. (1 Joh. 3:18) Ngahelipi mbela?

7. Omolwashike okudjala oukalata voshoongalele haku ningifa ovanhu va kale va hala okukundafana nafye, naasho otashi tu hongo shike?

7 Diladila kwaashi: Omafimbo opo a di ko, omumwatate umwe okwa li a enda a djala okakalata kaye koshoongalele modila eshi ta di koshoongalele ta shuna keumbo. Eshi omuyakuli womodila a mona kokakalata oko kwa shangwa, “Ouhamba waKalunga nau uye!,” okwa lombwela omumwatate oo ta ti, “Heeno, nau uye shili, onda hala tu popye shihapu kombinga yaasho.” Lwanima ova ka kundafana shi na sha naasho, nokwa li a tambula oifo nehafo. Vahapu vomufye otu na oimoniwa ya yukila kwaasho. Ndele mbela omolwashike oukalata voshoongalele luhapu hava ningifa ovanhu va kale va hala okukundafana nafye? Omolwaashi ngeenge owa djala okakalata, owa fa to lombwele ovanhu to ti: “Omwa manguluka okupopya naame. Pulei nge kutya ohandi i peni.” Oukalata ove li edidiliko olo tali ulikile ovanhu kutya otwa manguluka okupopya navo kombinga yeitavelo letu. Sha faafana, ovakulunhuongalo Ovakriste ove na okuulikila ovamwaxe kutya ova manguluka okupopya navo. Ndele mbela omeenghedi dilipi ovakulunhuongalo tava dulu okuninga ngaho?

8. Ongahelipi ovakulunhuongalo tava dulu okuulika kutya ove na ko nasha shili navamwe, naasho ohashi kumu ngahelipi eongalo?

8 Omaputuko okwa yoolokafana moshilongo noshilongo, ndele oto dulu okuulikila ovamwaxo kutya ou na ko nasha shili navo mokukala ho limemesha, ho va minike noku va popifa nohamu. Ndele mbela olyelye e na okukatuka tete onghatu oyo? Diladila koshihopaenenwa shaJesus. Mateus okwa popya shi na sha naye eshi a li a ongala pamwe novahongwa vaye a ti kutya, ‘Jesus okwe uya kuvo nokwe va lombwela.’ (Mat. 28:18) Sha faafana, ovakulunhuongalo kunena ove na okukendabala okuya kovamwaxe nokupopya navo. Osho otashi ka kuma ngahelipi eongalo? Omumwameme umwe womukokolindjila womido 88 okwa ti: “Eshi ovakulunhuongalo have limemesha nokutwa nge omukumo ngeenge handi uya mOlupale lOuhamba osha ningifa nge ndi kale ndi va hole.” Omumwameme umwe omudiinini okwa weda ko ta ti: “Otashi dulika shi talike ko sha fa oshinima shanafangwa, ndele ngeenge omukulunhuongalo okwa tale nge te limemesha eshi handi uya pokwoongala ohashi kumu nge neenghono.”

KALA HO KONGO OMHITO YOKUKUNDAFANA NOVAMWAXO

9, 10. (a) Jehova okwa tula po oshihopaenenwa shiwa shilipi? (b) Ongahelipi ovakulunhuongalo tava dulu okukonga omhito yokupopya navamwe?

 9 Ovanhu itava dulu okukala va manguluka okupopya nafye ngeenge katu na efimbo lokupopya navo. Jehova okwe tu tulila po oshihopaenenwa shiwa moshinima osho. Ombibeli oya ti: “Ina kala kokule nafye nande oumwe.” (Oil. 17:27) Onghedi imwe omo ovakulunhuongalo tava dulu okuhopaenena Jehova omokukala hava kongo  omhito yokukundafana novamwaxe ovanyasha novakulunhu, komesho nokonima yokwoongala. Omumwatate umwe omukokolindjila okwa ti: “Ngeenge omukulunhuongalo okwa pula nge kutya oinima otai ende ngahelipi ndele ta kanghama a pwilikine kenyamukulo lange, ohandi kala ndi udite kutya oku na ko nasha naame.” Omumwameme umwe oo a longela Jehova oule womido hanga 50 okwa ti: “Ovakulunhuongalo ovo hava popi naame konima yokwoongala ohava ningifa nge ndi kale ndi udite di na oshilonga.”

10 Oshoshili kutya ovakulunhuongalo ova pumbwa okuwanifa po oinakuwanifwa yavo. Ndele nande ongaho, ngeenge ve li pokwoongala ove na okulitulila po elalakano lokuyandja tete elitulemo kovamwaxe.

JEHOVA KE NONHONDO

11, 12. (a) Okuhenonhondo okwa kwatela mo shike? (b) Ongahelipi Jehova e tu tulila po oshihopaenenwa shokuhenonhondo?

11 Okuhenonhondo oku li oukwatya umwe waJehova wa denga mbada. Okuhenonhondo otashi ti shike? Okuhenonhondo otashi ti okuninga oinima pauyuki nokukala uhe na olwaamambinga. Okwa kwatela mo oinima ivali: oikala yetu nosho yo eenghatu detu. Omolwashike oinima oyo yopavali ya pumbiwa? Omolwaashi omunhu ngeenge ke na onhondo opo ashike ta ka ungaunga novanhu aveshe nopehenonhondo. MOmishangwa dopaKriste dOshigreka, ‘okuhakala nonhondo,’ (NW) otashi ti lelalela omunhu oo iha “tale ovanhu koipala,” sha hala okutya, iha kala a lenga omunhu wonhumba komesho yavakwao omolweholokepo laye lokoshipala. (Oil 10:34, Kingdom Interlinear) Ovo vehe na onhondo ihava tale keholokepo lomunhu lokombada nosho yo keenghalo, ndele ohava yandje elitulemo komaukwatya aye.

12 Jehova okwe tu tulila po oshihopaenenwa sha denga mbada shokuhenonhondo. Eendjovo daye oda ti kutya “iha tale omunhu kombada” nosho yo kutya “iha tale oshipala shomunhu.” (Lesha Oilonga 10:34, 35; Deutoronomion 10:17.) Onghalo yonhumba oyo ya li ya holoka po pefimbo laMoses otai koleke oushili woshinima osho.

Ovanakadona vaSelofhad ova li va lenga oukwatya waKalunga wokuhenonhondo (Tala okatendo 13, 14)

13, 14. (a) Ovanakadona vatano vaSelofhad ova li va taalela onghalo ilipi? (b) Jehova okwa li a ulika ngahelipi kutya ke na onhondo?

 13 Eshi Ovaisrael va li ve li pokuya mEdu lEudaneko, ovanakadona vatano vaSelofhad ova li va taalela onghalo idjuu. Onghalo oyo oilipi? Oukadona ovo ova li ve shii kutya ngaashi omapata aeshe aIsrael, epata lavo nalo oli na okupewa oshitukulwa shedu osho sha li sha nuninwa xe. (Num. 26:52-55) Ashike xe Selofhad womepata laManasse okwa fya. Pamhango, ovanamati vaSelofhad ovo ashike ngeno ve na oufemba wokufyuulula po edu olo, ashike ka li e na ovanamati. (Num. 26:33) Ndele molwaashi ka li e na ovanamati, mbela edu olo ola li tali ka fyuululwa po kovapambele ndele ovanakadona vaye tava kala vehe na sha?

14 Oukadona ovo vatano ova ya kuMoses nove mu pula tava ti: “Omolwashike edina latate tali ka dimwa po mepata laye, shaashi ye okwa li e he novana ovamati?” Nova indila tava ti: “Tu peni  oshitukulwa mokati kovamwaina vatate ovalumenhu.” Mbela Moses okwa li e va nyamukula ta ti, ‘Ame itandi dulu oku mu kwafela molwaashi omhango hasho tai ti ngaho?’ Ahowe, Moses “okwa twala eendjovo davo koshipala shOmwene.” (Num. 27:2-5) Jehova okwa li e mu nyamukula ngahelipi? Okwa lombwela Moses ta ti: “Ovana oukadona vaSelofhad ova popya da yuka. Ove u noku va pa shili oshitukulwafyuululo mokati kovamwaina vaxe ovalumenhu [noshitukulwafyuululo] shaxe nashi ninge shavo.” Jehova okwa weda mo vali eendjovo dimwe mOmhango, eshi a lombwela Moses ta ti: “Umwe ngenge ta fi e he nomona omumati, nye mu nokupa omona okakadona oshitukulwafyuululo shaye.” (Num. 27:6-8; Jos. 17:1-6) Okudja opo, ovakainhu Ovaisrael aveshe ovo va li tave ke lihanga monghalo ya tya ngaho ova li tava ka pewa oshitukulwafyuululo.

15. (a) Jehova oha ungaunga ngahelipi novapiya vaye, naunene tuu ovo vehe na ekwafo lasha? (b) Omahokololo amwe omOmbibeli elipi taa ulike kutya Jehova ke na onhondo?

15 Olo kala li tuu etokolo lopahole notali ulike okuhenonhondo! Jehova okwa li a ungaunga nefimaneko novakainhu ovo va li vehe na ekwafo lasha, ngaashi a ungaunga nOvaisrael vakwao. (Eps. 68:6) Olo oli li ashike limwe lomomahokololo mahapu omOmbibeli oo taa ulike kutya Jehova oha ungaunga novapiya vaye aveshe nopehe nonhondo. — 1 Sam. 16:1-13; Oil. 10:30-35, 44-48.

NATU HOPAENENENI JEHOVA

16. Ongahelipi hatu dulu okukala tuhe na onhondo ngaashi Jehova?

16 Ongahelipi hatu dulu okukala tuhe nonhondo ngaashi Jehova? Dimbuluka kutya okuhenonhondo okwa kwatela mo oinima ivali. Ngeenge katu na onhondo, opo ashike hatu ka dula okuungaunga navamwe nopehe nonhondo. Atusheni oshi na oupu tu diladile kutya otwa mangulukila keshe umwe nokatu na onhondo. Ashike otashi dulika u dimine kutya haalushe hashi kala shipu okushiiva kutya ohatu kala lela tu uditile ngahelipi vamwe. Ndele mbela oshike tu na okuninga po opo tu shiive kutya katu na shili onhondo? Eshi Jesus a li a hala okuuda kutya ovanhu ohave mu tile ngahelipi, okwa li a pula ookaume kaye ovalineekelwa ta ti: ‘Ovanhu ohava ti Omona wOmunhu Oye olyelye?’ (Mat. 16:13, 14) Omolwashike itatu hopaenene Jesus moshinima sha tya ngaho? Oto dulu okupula kaume koye omulineekelwa ngeenge owa shiivikila oukwatya wokuhenonhondo ile hasho. Ngeenge okwe ku lombwele kutya omafimbo amwe oho ungaunga nawa novanhu vomuhoko wonhumba, ile ovo ve na oiniwe ihapu ile ovahongwanhu shi dulife vamwe, oto ka ninga po shike? Ilikana kuJehova wa mana mo shi na sha nomaliudo oye, to mu indile e ku kwafele u lundulule oikala yoye opo u kale uhe nonhondo nandenande ngaashi ye. — Mat. 7:7; Kol. 3:10, 11.

17. Omeenghedi dilipi hatu dulu okuungaunga navamwe nopehe nonhondo?

 17 Meongalo lopaKriste, ohatu ka ulika kutya otwa hala okuhopaenena oukwatya waJehova wokuhenonhondo mokuungaunga novamwatate novamwameme aveshe nefimaneko nonolukeno. Pashihopaenenwa, ngeenge hatu shivi ovamwatate novamwameme komaumbo etu, natu kaleni hatu shivi ovanhu vomaputuko aeshe, mwa kwatelwa ovakwanaluhepo, eefiye ile ovo va filwa ookaume kopahombo. (Lesha Ovagalati 2:10; Jakob 1:27.) Shimwe vali, ngeenge tu li moilonga yokuudifa, natu kaleni hatu udifile ovanhu vomaputuko aeshe onghundana iwa, mwa kwatelwa ovanailongo. Otwa hafa eshi tu na oishangomwa yopaMbibeli momalaka 600 lwaapo. Onghee hano, otu na omhito yokuulika kutya katu na onhondo.

18. Ongahelipi to dulu okuulika kutya owa lenga oukwatya waJehova wokupopiwa naye noupu nowokuhenonhondo?

18 Ngeenge otwa kala hatu dilonga kombinga yanghee Jehova ha popiwa naye noupu nosho yo yokuhenonhondo kwaye, ohatu ka kala twa lenga neenghono omaukwatya oo. Oshidjemo, ohatu ka kala twa hala okuhopaenena omaukwatya aye pauyadi, hatu shi ulike monghedi omo hatu ungaunga novaitaveli vakwetu nosho yo ovo hatu udifile.

“Omwene oku li popepi naaveshe, have mu ifana.” — Eps. 145:18 (Tala okatendo 9)

‘Omwene Kalunga keni, iha tale oshipala shomunhu.’ — Deut. 10:17 (Tala okatendo 17)