Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) APRILI 2013

Mona ouwa pauyadi mokulesha Ombibeli

Mona ouwa pauyadi mokulesha Ombibeli

“Onda dimina nehafo omhango yaKalunga.” — ROM. 7:22.

1-3. Okulesha Ombibeli nokudulika kwaasho tai hongo oku na omauwa elipi?

OMUMWAMEME umwe omunamido okwa ti: “Ohandi pandula Jehova ongula keshe eshi ha kwafele nge ndi ude ko Ombibeli.” Omumwameme oo okwa mana ko Ombibeli lwoikando i dulife po 40 nota twikile natango. Omumwameme umwe omunyasha okwa popya kutya okulesha Ombibeli okwe mu kwafela a mone kutya Jehova oko e li shili naasho oshe mu kwafela a ehene popepi elela naye. Okwa ti: “Paife onda hafa neenghono shi dulife nale.”

2 Omuyapostoli Petrus okwe tu ladipika tu kale twa ‘hala shili omashini omeendjovo inamu ya sha.’ (1 Pet. 2:2) Ovo hava wanifa po ehalo la tya ngaho mokukonakona Ombibeli nokutula moilonga osho tai hongo ove na eliudo la koshoka nelalakano monghalamwenyo. Ohai va kwafele va pange oukaume muwa novanhu ovo navo ve hole Kalunga kashili nohave mu longele. Aeshe oo omatomheno mawa kutya omolwashike tu na okukala twa ‘hafela omhango yaKalunga.’ (Rom. 7:22) Ashike okukonakona Ombibeli ohaku etifa omauwa amwe vali. Omauwa oo oelipi?

3 Apa ngoo pe fike okulihonga kwoye kombinga yaJehova nOmona, opo ngoo tapa ka kala pe fike ohole yoye yoku va hola noyokuhola ovanhu vakweni tai hapupala. Okukala neshiivo lashili lopamishangwa otaku ku kwafele u mone nghee Kalunga ta ka xupifa ovanhu ovaduliki monghalelo ei yoinima i li pokuxula po. Onghee hano, oto dulu okulombwela vamwe onghundana oyo iwa moukalele. Jehova ote ke ku nangeka noupuna eshi to hongo vamwe kombinga yoinima oyo we lihonga eshi wa lesha Eendjovo daye.

LESHA NOKUDILONGA

4. Okulesha Ombibeli “nondaka yopedu” otashi ti shike?

4 Jehova ina hala ovapiya vaye va kale hava lesha Ombibeli shimha ashike va lesha. Okwa li a lombwela Josua ta ti: ‘Embo lomhango ei i ha dje mo mokanya koye, ndelenee i [lesha  nondaka yopedu, NW] omutenya noufiku.’ (Jos. 1:8; Eps. 1:2) Mbela eshi osha hala okutya otu na okumana ko Ombibeli hatu lesha nondaka yopedu ile hatu nyongofola? Hasho nandenande! Ndele osha hala okutya, ou na okulesha ponhapo oyo tai ku kwafele u dule okudilonga kwaasho wa lesha. Okulesha Ombibeli “nondaka yopedu” otaku ke ku kwafela u yandje elitulemo keevelishe odo tadi ti sha unene kwoove notadi ku tu omukumo. Ngeenge owa hange outumbulilo, ovelishe ile ehokololo olo tali ku tu omukumo, li lesha to ende kanini, to tumbula oitya nondaka yopedu. Kungaho, osho to lesha otashi ka hanga omutima woye. Omolwashike sha fimana okuninga ngaho? Omolwaashi ngeenge owa kendabala okuuda ko omayele aKalunga, otashi ke ku linyengifa u a tule moilonga.

5-7. Yandja oihopaenenwa oyo tai ulike nghee okulesha Eendjovo daKalunga nondaka yopedu tashi dulu oku ku kwafela (a) u dulike keemhango daKalunga; (b) u ungaunga nawa navamwe; (c) u kale we lineekela muJehova nokuli nopomafimbo madjuu.

5 Okulesha Ombibeli hatu ende kanini nonoukeka otashi ke tu kwafela ngeenge hatu lesha omambo Ombibeli oo madjuu kufye okuuda ko. Pashihopaenenwa, diladila keenghalo edi dopatatu. Yotete, diladila kombinga yomumwatate oo ha lesha Ombibeli paumwene nokwa fika pembo laHosea. Konima eshi a lesha etukulwa 4 ovelishe 11-13, okwa kanghama po manga ta dilonga. (Lesha Hosea 4:11-13.) Omolwashike mbela? Okwa li ta yandje elitulemo keevelishe odo molwaashi okwa kala ta yelekwa kofikola a ninge oinima oyo inai koshoka. Okwa dilonga shi na sha neevelishe odo, nokwa ti: ‘Jehova oku wete oinima ii aishe oyo ovanhu tava ningi nokuli naayo tava ningi meholeko. Inandi hala okuudifa nai Jehova.’ Omumwatate oo okwa li a tokola toko okudulika keemhango daJehova di na sha noukoshoki wopaenghedi.

6 Onghalo onhivali, natu tye nee omumwameme ota lesha embo laJoel nokwa fika petukulwa 2, ovelishe 13. (Lesha Joel 2:13.) Eshi a lesha ovelishe oyo nondaka yopedu, okwa dilonga kombinga yanghee e na okuhopaenena Jehova, oo e li “omunefilonghenda nomunanghenda nomunanheni nomunene mouwanghenda.” Okwa li a tokola okuninga po omalunduluko molwaashi omafimbo amwe oha ula nai nokungwenyaukila omushamane waye nosho yo ovanhu vamwe.

7 Onghalo onhinhatu, diladila shi na sha nomushamane Omukriste oo a kanifa oilonga note lipula shi na sha nonghalonawa yomukulukadi nounona vaye. Okwa lesha nondaka yopedu Nahum 1:7 omo mwa popiwa kutya Jehova oku “shii ovo have mu lineekele” nohe va amene ngaashi “ehondameno mefimbo loudjuu.” Ediladilo olo ola li le mu hekeleka. Okwa li a didilika kutya Jehova oku na ko nasha navo noina kala vali te lipula unene. Opo nee, okwa lesha ovelishe 15 nondaka yopedu. (Lesha Nahum 1:15.) Omumwatate oo okwa li a mona kutya ngeenge okwa kala ta udifa pomafimbo madjuu, ota ulike kutya okwe lineekela muJehova. Onghee hano, osho oshe mu linyengifa a kale ha i moilonga yomomapya mokati koshivike, ofimbo ta kongo oilonga yokulikongela omboloto.

8. Hokolola pauxupi oshinima shonhumba osho we lihonga melesho loye lOmbibeli.

8 Oitwa oyo twa kundafana metetekelo oyo ya li ya kwafela vamwe, oya dja momambo Ombibeli oo vamwe tashi dulika va kale tava diladila kutya omadjuu okuudiwa ko. Eshi to ka konakona embo laHosea, Joel nolaNahum nelalakano lokulihonga, oto ka kala wa hala okulesha eevelishe dimwe dao nondaka yopedu. Diladila ashike kounongo nosho yo kehekeleko olo to ka mona ngeenge owa lesha omambo oo. Ongahelipi shi na sha nomambo makwao Ombibeli? Eendjovo daKalunga oda fa omina i yadi okawe. Konga noukeka okawe momina oyo yopafaneko. Eshi to lesha Ombibeli aishe, twikila okukonga ewiliko laKalunga nosho yo etwomukumo.

KENDABALA OKUUDA KO ESHI TO LESHA

9. Oshike tu na okuninga opo tu ude ko nawa Ombibeli?

9 Osha fimana okulesha Ombibeli efiku keshe nosho yo okuuda ko osho wa lesha. Onghee hano, kala ho longifa oishangomwa yehangano laJehova  opo u konge ouyelele u na sha nonakudiwa yovanhu, eenhele nosho yo oiningwanima oyo to lesha kombinga yayo. Ile ngeenge ku shii nghee u na okutula moilonga oshinima shonhumba osho wa lesha mOmbibeli, oto dulu okukonga ekwafo komukulunhuongalo ile kOmukriste wonhumba a pyokoka. Opo tu ude ko kutya osha fimana shi fike peni okuhapupalifa eudeko letu, natu ka taleni koshihopaenenwa shOmukriste umwe womefelemudo lotete wedina Apollos oo a li a kendabala okuninga ngaho.

10, 11. (a) Apollos okwa li a kwafelwa ngahelipi opo a kale omuudifi wonghundana iwa a pyokoka? (b) Oshike hatu lihongo mehokololo li na sha naApollos? (Tala oshimhungu shi na oshipalanyole, “Oho hongo ngoo ouyelele u li pefimbo?”)

10 Apollos okwa li Omukriste Omujuda oo a li “omunaendunge womomishangwa,” ile tu tye, e shii nawa omishangwa nokwa li e na ‘exwamo.’ Embo lOilonga ola ti kutya okwa “hepaulula shili Jesus, ndele [eninginifo, NW] laJohannes olo alike a shiiva.” Apollos ka li e shi didilika mo kutya ota hongo ovanhu ouyelele uhe li pefimbo u na sha neninginifo. Eshi ovalihomboli Ovakriste, Akuila naPriskilla, va uda Apollos ta hongo ovanhu muEfeso, ova li ve mu yelifila “shili ondjila yaKalunga.” (Oil. 18:24-26) Osho osha li sha kwafela ngahelipi Apollos?

11 Konima eshi Apollos a udifila muEfeso, okwa li a ya kuAkaia. Ombibeli oya ti: “Eshi a fika ko, okonghenda okwa kwafa unene ovo va itavela. Osheshi ye okwa tomha neenghono eemhata dOvajuda moipafi, eshi e va ulikila momishangwa nokutya, Jesus Oye Kristus.” (Oil. 18:27, 28) Pefimbo opo, Apollos okwa li ta dulu okuyelifa mondjila eityo leninginifo lopaKriste. Molwaashi eudeko laye ola li la hapupala, okwa li a “kwafa unene” ovo vape melongelokalunga lashili va ninge exumokomesho. Oshike hatu lihongo mehokololo olo? Ngaashi Apollos, natu kendabaleni okuuda ko osho hatu lesha mOmbibeli. Ndele ngeenge omwiitaveli mukwetu a pyokoka okwe tu pe eetepo li na sha nanghee hatu dulu  okuxwepopaleka onghedi yetu yokuhonga, natu tambule ko ekwafo la tya ngaho nelininipiko nonolupandu. Ngeenge otwa ningi ngaho, ohatu ka xwepopaleka onghedi yetu yokuhonga.

KWAFELA VAMWE NAASHO WE LIHONGA

12, 13. Yelifa nghee okulongifa Omishangwa nelungi taku dulu okukwafela ovakonakonimbibeli va ninge exumokomesho.

12 Ngaashi Akuila, Priskilla naApollos, nafye ohatu dulu okukwafela ovanhu vakwetu. Oto ka kala u udite ngahelipi ngeenge owa kwafele omunhu oo e na ohokwe a ninge omalunduluko onhumba opo a dule okuninga exumokomesho lopamhepo? Ile ngeenge ou li omukulunhuongalo, oto ka kala u udite ngahelipi ngeenge omulongelikalunga mukweni okwe ku pandula eshi we mu pa omayele opamishangwa oo e mu kwafela a pite mefimbo lidjuu? Nopehe na omalimbililo, ngeenge otwa longifa Eendjovo daKalunga opo tu kwafele vamwe va xwepopaleke onghalamwenyo yavo, ohatu ka kala tu udite twa wanenwa notwa hafa. * Natu ka taleni kutya ongahelipi hatu dulu okuninga ngaho.

13 Ovaisrael vahapu vopefimbo laElia kava li va hoolola kutya otava kala melongelokalunga lashili ile oloipupulu. Omayele oo Elia a li a pa oshiwana osho otaa dulu okukwafela omukonakonimbibeli oo ta ongaonga okuninga exumokomesho lopamhepo. (Lesha 1 Eehamba 18:21.) Diladila vali konghalo ei: Ngeenge omunhu oo e na ohokwe ota ongaonga okukatuka eenghatu molwaashi a tila ookaume ile ovapambele vaye, oto dulu oku mu kwafela a kale a tokola toko okulongela Jehova mokukundafana naye omushangwa waJesaja 51:12, 13. — Lesha.

14. Oshike tashi dulu oku ku kwafela u dimbuluke Omishangwa pefimbo opo we di pumbwa opo u kwafele vamwe?

14 Osha yela kutya mOmbibeli omu na eendjovo dihapu odo tadi tu omukumo, tadi pukulula ile tadi pameke ovo have i lesha. Ndele otashi dulika u lipule to ti, ‘Ongahelipi handi dulu okushiiva kutya omishangwa dilipi nda pumbwa okulongifa pomhito yonhumba? Kala ho lesha Ombibeli efiku keshe nokudilonga kwaasho wa lesha. Kungaho, oto ka shiiva nawa Ombibeli kanini nakanini, na Jehova ota ka longifa omhepo yaye iyapuki i ku kwafele u dimbuluke omishangwa pefimbo opo we di pumbwa. — Mark. 13:11; lesha Johannes 14:26. *

15. Oshike tashi ke ku kwafela u ude ko nawa Eendjovo daKalunga?

15 Ngaashi ohamba Salomo, natu ilikane kuJehova e tu pe ounongo opo tu wanife po oinakuwanifwa mehangano laye. (2 Omaf. 1:7-10) Natu hopaeneneni ovaprofeti vopefimbo lonale mokukala hatu konakona noukeka Eendjovo daKalunga, naasho otashi ke tu kwafela tu shiive oshili kombinga yaJehova nehalo laye. (1 Pet. 1:10-12) Omuyapostoli Paulus okwa li a ladipika Timoteus e lipalule “neendjovo deitavelo nodelongo la yuka.” (1 Tim. 4:6) Ngeenge naave owa ningi ngaho, oto ka dula okukwafela vamwe pamhepo. Ndele pefimbo opo tuu opo, oto ka tunga eitavelo loye.

EENDJOVO DAKALUNGA OTADI TU AMENE

16. (a) ‘Okukonakona omishangwa omafiku aeshe,’ okwa li kwa kwafela ngahelipi Ovaberea? (b) Omolwashike sha fimanenena kufye okukala hatu lesha Ombibeli efiku keshe?

16 Ovajuda vomoshilando shedina Berea shomuMakedonia ova li ve na onghedindjikilile ‘yokukonakona omishangwa omafiku aeshe.’ Eshi Paulus a li ta udifile Ovajuda ovo onghundana iwa, ova li va yelekanifa osho e va honga naasho ve shii nale mOmishangwa. Oshidjemo osha li shike? Vahapu vomuvo ova li va tomhwa kutya ote va hongo oshili nova li va “ninga ovaitaveli.” (Oil. 17:10-12) Osho otashi ulike kutya okulesha  Ombibeli efiku keshe ohashi tu kwafele tu kale tu na eitavelo la kola muJehova. Eitavelo olo li li “elineekelo la pama okulineekela osho tashi teelelwa,” ola fimanenena ngeenge otwa hala okuya mounyuni mupe waKalunga. — Heb. 11:1.

17, 18. (a) Ongahelipi eitavelo la kola nosho yo ohole hai amene omutima wopafaneko wOmukriste? (b) Ongahelipi eteelelo hali tu amene?

17 Paulus okwa li e na etomheno liwa eshi a ti: “Ava vomutenya, tu kaleni tu nelidiliko ndele twa djala oipakotolwa yoivela yeitavelo noyohole nembale loshivela leteelelo lexupifo.” (1 Tes. 5:8) Omukwaita okwa pumbwa oshikelelifo opo a amene omutima waye. Sha faafana, omutima wopafaneko wOmukriste owa pumbwa okwaamenwa uha nwefwe mo koulunde. Oshike tashi ka ningwa po ngeenge omupiya waJehova oku na eitavelo la kola momaudaneko aKalunga nosho yo ohole yoku mu hola noyokuhola ovanhu vakwao? Omupiya a tya ngaho, ota amene omutima waye wopafaneko noita ka ninga nande osha osho tashi mu ningifa aha kale vali a hokiwa kuKalunga.

18 Paulus okwa tumbula yo embale loshivela “leteelelo lexupifo.” Ngeenge omukwaita wopefimbo lOmbibeli okwa kala ina amena omutwe waye ota dulu okudipawa noupu molwoodi. Ndele ngeenge okwa djala embale loshivela, ota dulu okwaamena omutwe waye uha yashwe. Ngeenge otwa kala hatu konakona Eendjovo daJehova otashi ke tu kwafela tu kale tu na eteelelo kutya ota dulu oku tu xupifa. Okukala tu na eteelelo la twa ohashi tu kwafele tu henuke ovashunimonima notu livangeke ‘eendjovo davo da nyata.’ (2 Tim. 2:16-19) Eteelelo otali ke tu pameka yo tu kondjife ovo va hala oku tu ningifa oinima oyo ya tokolwa kuJehova.

OKULESHA OMBIBELI OTAKU KE KU XUPIFIFA

19, 20. Omolwashike tu na okukala twa lenga neenghono Eendjovo daKalunga, nongahelipi hatu dulu okuulika kutya otu na olupandu omolwado? (Tala okamhungu, “Jehova okwa pa nge osho nda li nda pumbwa.”)

19 Eshi exulilo lounyuni ou tali ehene popepi elela, otwa pumbwa okukala twe lineekela filufilu Eendjovo daJehova. Omayele ado otae ke tu kwafela tu efe po eenghedindjikilile dii nokukondjifa eamo letu loulunde. Otadi ke tu hekeleka yo noku tu twa omukumo opo tu dule okupita momayeleko aSatana nosho yo ounyuni waye. Ewiliko olo Jehova te tu pe okupitila mEendjovo daye otali ke tu kwafela tu kale mondjila oyo tai twala komwenyo.

20 Dimbuluka kutya Kalunga okwa hala “ovanhu aveshe va xupifwe.” “Ovanhu aveshe” ova kwatela mo ovapiya vaJehova nosho yo ovanhu ovo hava pwilikine ngeenge hatu va udifile noku va honga kombinga yonghundana iwa. Ashike aveshe ovo va hala oku ka xupifwa ove na okumona ‘eshiivo loshili.’ (1 Tim. 2:4) Onghee hano, opo tu ka xupe pexulilo lounyuni, otu na okukala hatu leshe Ombibeli nokutula moilonga omalombwelo ayo a nwefwa mo. Ngeenge otwa kala hatu lesha Ombibeli efiku keshe, ohatu ka ulika kutya otwa lenga neenghono Eendjovo doshili daJehova di na ondilo. — Joh. 17:17.

^ okat. 12 Katu na okukala hatu longifa Omishangwa opo tu fininike ovanhu va ninge omalunduluko ile tu va tokole. Otu na okuungaunga nelididimiko nonolukeno novakonakonimbibeli vetu, ngaashi Jehova ha ungaunga nafye. — Eps. 103:8.

^ okat. 14 Ongahelipi ngeenge owa dimbwa embo, etukulwa nosho yo ovelishe, ndele oto dimbuluka ashike enenediladilo lovelishe oyo? Oto dulu okumona omushangwa oo ngeenge owa kongo oitya yonhumba moshuuliki osho shi li kexulilo lEembibeli dimwe, mo-Watchtower Library, ile oshuulikifo shoitya oyo ya longifwa mo-New World Translation.