Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) APRILI 2013

‘Inatu lolokeni’

‘Inatu lolokeni’

“Mokulonga ouwa inatu lolokeni.” — GAL. 6:9.

1, 2. Ongahelipi okudiladila kombinga yehangano laJehova lomeshito alishe taku tu kwafele tu kale tu na elineekelo?

OHASHI kala shihokwifa okudiladila kutya otu li oshitukulwa shehangano la kula lomeshito alishe. Omamoniko oo e li muHesekiel etukulwa 1 nosho yo Daniel etukulwa 7 okwa yelifa nawa nghee Jehova ta yukifa oinima opo a wanife po elalakano laye. Jesus ota wilike oshitukulwa shehangano laJehova shokombada yedu opo shi yandje elitulemo kokuudifa onghundana iwa, okufila oshisho pamhepo ovo tava longo oshilonga osho nosho yo okukwafela vamwe va ninge ovalongeli vaJehova. Osho otashi tu linyengifa tu kale twe lineekela ehangano laJehova. — Mat. 24:45.

2 Oho shikula ngoo oshihopaenenwa shehangano olo likumwifi? Owe lipyakidila ngoo natango moilonga yaKalunga ile owa teka omukumo? Ngeenge otwe lipula omapulo oo, otashi dulika tu ka mone kutya ohatu ende hatu loloka ile hatu kanifa ouladi. Osho otashi dulu oku tu ningilwa. Omuyapostoli Paulus okwa li a kumaida Ovakriste vakwao vomefelemudo lotete va shikule oshihopaenenwa shaJesus shouladi. Okwa ti kutya osho otashi ke va kwafela vaha ‘loloke neemwenyo davo diha fye ounye.’ (Heb. 12:3) Sha faafana, ngeenge otwa konakona noukeka oshitukulwa sha tetekela, osho sha kundafana shi na sha nanghee ehangano laJehova la pondola, otashi ke tu kwafela tu kale ovaladi novalididimiki.

3. Otwa pumbwa okuninga shike opo tuha loloke, noshike hatu ka kundafana moshitukulwa eshi?

3 Paulus okwa ulika kutya otwa pumbwa okuninga shihapu opo tuha loloke. Okwa ti kutya otwa pumbwa okukala hatu ‘longo ouwa.’ (Gal. 6:9) Onghee hano, otwa pumbwa okukatuka eenghatu. Natu ka kundafaneni kombinga yoinima itano oyo tu na okuninga opo tu twikile okukala ovaladi nokushikula ewiliko lehangano laJehova. Opo nee hatu tale ngeenge fye nomaukwaneumbo etu otwa pumbwa okuyandja elitulemo lihapu kuimwe yomuyo.

 OHATU ONGALA OPO TU TWAAFANE OMUKUMO NOTU LONGELE KALUNGA

4. Omolwashike hatu dulu okutya okwoongala pamwe oku li oshitukulwa sha fimanenena shelongelokalunga letu?

4 Okwoongala pamwe okwa kala alushe kwa fimanenena kovapiya vaKalunga. Jehova okwa kala ha ongala pamwe novaengeli meulu. (1 Eeh. 22:19; Job 1:6; 2:1; Dan. 7:10) Oshiwana shaIsrael shonale nasho osha li hashi ongala opo shi “shiive okuuda nokulongwa.” (Deut. 31:10-12) Ovajuda vomefelemudo lotete ova li hava i pandjikilile koinagoga opo va ka leshe Omishangwa. (Luk. 4:16; Oil. 15:21) Kakele kaasho, okwoongala pamwe okwa twikila fiyo osheshi eongalo lopaKriste la ka totwa po, noku li natango oshitukulwa sha fimana shelongelokalunga letu. Onghee hano, Ovakriste vashili ohava ‘filafana oshisho nohava twaafana omukumo mohole nomoilonga iwa.’ Otwa pumbwa yo okukala hatu ‘kumaidafana, unene eshi hatu mono efiku [laJehova] tali ehene popepi.’ — Heb. 10:24, 25.

5. Ongahelipi hatu dulu okutwaafana omukumo pokwoongala?

5 Onghedi imwe ya fimana omo hatu dulu okutwaafana omukumo oyo okuyandja omilombo pokwoongala. Ohatu dulu okuhepaulula eitavelo letu moipafi mokunyamukula omapulo outendo, mokuninga omatyekosha e na sha nomishangwa, mokuhokolola oimoniwa i li pauxupi oyo tai ulike kutya oshi li pandunge okushikula omafinamhango Ombibeli, ile meenghedi dimwe vali. (Eps. 22:23; 40:10) Kashi na nee mbudi kutya owa kala ho i kokwoongala oule womido di fike peni, natango oto dimine kutya ohashi kala odjo yetwomukumo okupwilikina komilombo tadi di komutima dovamwatate novamwameme, ovakulunhu nounona.

6. Okwoongala ohaku tu kwafele meenghedi dilipi?

6 Kalunga okwa hala tu kala hatu ongala pamwe omolwomatomheno amwe elipi? Okwoongala nosho yo oyoongalele ohai tu kwafele tu kale hatu popi nouladi notu lididimikile omapataneko ile ngeenge ovanhu inava hala okupwilikina kufye moitukulwa yetu. (Oil. 4:23, 31) Oipopiwa nosho yo oitukulwa ikwao ya kanghamena kOmbibeli ohai pameke eitavelo letu. (Oil. 15:32; Rom. 1:11, 12) Omahongo nosho yo omilombo tadi tu omukumo odo hatu udu pokwoongala ohadi tu etele ehafo lashili nohadi tu ‘tulumukifa momafiku madjuu.’ (Eps. 94:12, 13) Okomitiye yOkuhonga yOlutuwiliki ohai unganeke oinima aishe oyo hai kundafanwa pokwoongala kwoshiwana shaJehova mounyuni aushe. Inatu pandula tuu neenghono ehongo la denga mbada olo hatu pewa pokwoongala oshivike keshe!

7, 8. (a) Etomheno la fimanenena lokwoongala kweongalo olilipi? (b) Ongahelipi okwoongala kwe ku kwafela pamhepo?

7 Ope na vali oshinima shimwe sha fimanenena shi dulife omauwa oo hatu mono paumwene pokwoongala. Elalakano la fimanenena lokwoongala pamwe olo okulongela Jehova. (Lesha Epsalme 95:6.) Kau fi tuu oufembanghenda munene okutanga Kalunga ketu mukumwifi! (Kol. 3:16) Jehova okwa wana shili okulongelwa kufye mokukala hatu kala pokwoongala nokukufa ombinga muko. (Eh. 4:11) Onghee hano, itashi kumwifa eshi twa kumaidwa “tuha efe po okwoongala pamwe, ngaashi vamwe ve na ondjikilile yoku shi ninga.” — Heb. 10:25, NW.

8 Ohatu tale ko ngoo okwoongala kwopaKriste ku li efiloshisho olo tali tu kwafele tu lididimike fiyo osheshi Jehova ta ka katukila onghatu ounyuni ou woukolokoshi? Ngeenge osho, otu na oku ku tala ko ku li shimwe ‘shomoinima oyo ya fimanenena’ oyo tu na okupitifa komesho, nonande otwe lipyakidila mokukalamwenyo kwetu. (Fil. 1:10, NW) Katu na okukala hatu faula okwoongala, okuninga sha po pe na oupyakadi wa kwata moiti.

 KONGA OVANAMITIMADIWA

9. Otu shi shii ngahelipi kutya oilonga yokuudifa oya fimana?

9 Okukala hatu kufa ombinga pauyadi moilonga yokuudifa ohashi tu kwafele yo tu shikule ewiliko lehangano laJehova. Jesus oye a li a hovela oilonga oyo eshi a li kombada yedu. (Mat. 28:19, 20) Okudja opo, ehangano laJehova alishe ola kala tali yandje elitulemo le likalekelwa koilonga yokuudifa Ouhamba noyokuninga ovanhu ovahongwa. Oimoniwa ihapu yokunena otai yandje oumbangi kutya ovaengeli otava yambidida oilonga yokuudifa nohave tu wilike tu ye kwaavo “va halelela oku ka mona omwenyo waalushe.” (Oil. 13:48, NW; Eh. 14:6, 7) Oshitukulwa shehangano laJehova shokombada yedu ohashi unganeke nokuyambidida oilonga oyo ya fimanenena. Mbela naave owa pitifa ngoo komesho oilonga yokuudifa?

10. (a) Oshike sha li sha kwafela omumwatate umwe a kale e hole oshili nohole yomoule? (b) Oukalele owe ku kwafela ngahelipi u kale u hole oshili nohole yomoule?

10 Okukala ovaladi moukalele ohashi tu kwafele tu kale tu hole oshili nohole yomoule. Natu ka tale kwaasho Mitchel a popya, oo a kala omukulunhuongalo nomukokolindjila oule womido dihapu. Okwa ti: “Ondi hole okulombwela ovanhu kombinga yoshili. Ohandi lesha oitukulwa ipe oyo i li mOshungonangelo ile mo-Awake! nohandi kala nda kuminwa ounongo nomayele oo e li mo. Ohandi kala yo nda kuminwa nghee ouyelele oo u li moshitukulwa keshe wa unganekwa nawa. Opo nee, ohandi kala nda hala okuya moukalele ndi ka tale kutya ovanhu otave ke linyenga ngahelipi kouyelele oo,  nonghee handi dulu okupendula ohokwe yavo.” Mitchel okwa ti vali kutya oukalele ohau mu kwafele a kale a pitifa komesho oinima oyo ya fimanenena monghalamwenyo yaye noiha efa nande osha shi mu imbe okuya moukalele. Sha faafana, ngeenge otwa kala twe lipyakidila moilonga yetu iyapuki otashi ke tu kwafela tu kale ovadiinini momafiku aa axuuninwa. — Lesha 1 Ovakorinto 15:58.

KALA HO LI EENDJA DOPAMHEPO

11. Ongahelipi hatu dulu okulongifa pauyadi eendja dopamhepo odo hatu pewa kuJehova?

11 Jehova okwa longekida eendja dihapu dopamhepo moishangomwa opo di tu pameke. Otashi dulika to dimbuluka efimbo lonhumba eshi wa lesha oshishangomwa ndele to diladila to ti: ‘Eshi osho naanaa nda pumbwa! Jehova okwa fa ashike aame e shi shangela!’ Ou na etomheno lokukala u udite ngaho, molwaashi Jehova ohe tu hongo noku tu wilika okupitila moishangomwa. Okwa ti: “Onda hala ndi ku longe, ndi ku udikile ondjila, ei u nokweenda nayo.” (Eps. 32:8) Ohatu kendabala ngoo okulesha oishangomwa aishe oyo twa pewa nokudilonga kwaasho twa lesha? Okuninga ngaho otashi ke tu kwafela tu twikile okwiimika oiimati notuha fye pamhepo momafiku aa axuuninwa madjuu. — Lesha Epsalme 1:1-3; 35:28; 119:97.

12. Oshike tashi dulu oku tu kwafela tuha kwate okahetengi omafiloshisho opamhepo?

12 Ngeenge otwa diladila koilonga aishe oyo hai longwa opo ku nyanyangidwe oishangomwa yetu, ohatu ka kala twe i lenga neenghono. Okomitiye yOkushanga yOlutuwiliki ohai pashukile oilonga yokukonga omauyelele, okushanga, okuleshulula, okuhoolola omafano oo haa longifwa moishangomwa, okutoloka oishangomwa nosho yo ouyelele oo hatu tula kointaneta. Oitaimbelewa oyo hai pilinda ohai tumine oishangomwa komaongalo opopepi naao okokule. Mbela oilonga aishe oyo ohai longwa nelalakano lashike? Ohai longwa nelalakano lokupalula nawa pamhepo oshiwana shaJehova. (Jes. 65:13) Onghee hano, natu kaleni hatu lipalula nawa neendja dopamhepo odo hatu pewa kehangano laJehova. — Eps. 119:27.

YAMBIDIDA OMALONGEKIDO EHANGANO

13, 14. Oolyelye hava yambidida omalongekido aJehova meulu, nongahelipi nafye hatu dulu oku a yambidida kombada yedu?

13 Johannes okwa li a mona memoniko Jesus a londa konghambe itoka ta ka lwifa ovo va tukulila Jehova oshibofa. (Eh. 19:11-15) Itashi pameke tuu eitavelo okushiiva kutya memoniko olo Jesus okwa monika ta shikulwa kovaengeli ovadiinini noku li pamwe novavaekwa ovo va nyumunwa koufi nova pewa ondjabi yavo meulu! (Eh. 2:26, 27) Osho kashi fi tuu oshihopaenenwa sha tongomana shi na sha nokuyambidida omalongekido aJehova!

14 Sha faafana, ongudu inene ohai yambidida pauyadi ovamwaxe vaKristus ovavaekwa ovo ve li natango kombada yedu notava kwatele komesho ehangano Jehova kunena. (Lesha Sakaria 8:23.) Ongahelipi hatu dulu okuulika pauhandimwe kutya ohatu yambidida omalongekido aJehova? Onghedi imwe omo hatu dulu oku shi ninga omokukala hatu dulika kwaavo tava kwatele komesho. (Heb. 13:7, 17) Osho otu na oku shi ulika tete meongalo letu. Osho hatu popi shi na sha novakulunhuongalo ohashi ningifa ngoo vamwe va kale ve va fimaneka nosho yo oilonga yavo? Ohatu ladipike ngoo ovana vetu va kale va fimaneka ovalumenhu ovo ovadiinini nokukala hava kongo omayele opamishangwa kuvo? Kakele kaasho, mbela oukwaneumbo wetu ohau kundafana ngoo nghee u na okulongifa oiniwe yao opo u yambidide oilonga yokuudifa yomounyuni aushe? (Omayel. 3:9; 1 Kor. 16:2; 2 Kor. 8:12) Oho shi tale ko ngoo shi li oufembanghenda okufila oshisho nokuwapaleka Olupale lOuhamba? Ngeenge otu na efimaneko notu li moukumwe, omhepo yaJehova otai ka kunguluka nawa mokati ketu. Omhepo oyo ohai tu kwafele tuha loloke momafiku aa axuuninwa. — Jes. 40:29-31.

 KALA METWOKUMWE NETUMWALAKA OLO HO UDIFA

15. Omolwashike tu na okukondja alushe opo tu kale metwokumwe nelalakano laJehova la tumbala?

15 Opo tu dule okulididimika nokushikula ewiliko lehangano laJehova, otu na okukala metwokumwe netumwalaka olo hatu udifa mokukala hatu ‘shipaashipa eshi tashi wapalele Omwene.’ (Ef. 5:10, 11) Ndele alushe otu na okukondjifa enwefemo lii mokukalamwenyo kwetu omolwokuhawanenena kwetu nosho yo eenghendabala daSatana nounyuni waye woukolokoshi. Vamwe vomunye ovamwatate novamwameme ovaholike ohamu kondjo efiku keshe opo mu kaleke po ekwatafano leni naJehova. Jehova oku mu hole omolweenghendabala odo tamu ningi. Inamu sholola nandenande! Okukala metwokumwe nelalakano laJehova otashi tu kwafele tu kale tu udite twa wanenwa shili notu kale tu shii kutya okulongela Kalunga kwetu kaku fi oshimha. — 1 Kor. 9:24-27.

Kwafela vamwe nouladi va mone kutya navo otava dulu okukala oshitukulwa shehangano laJehova linenenene

16, 17. (a) Otu na okuninga po shike ngeenge otwa nyona enyono la kwata moiti? (b) Ongahelipi hatu dulu okumona ouwa moshihopaenenwa shaAnne?

16 Ndele mbela oshike u na okuninga po ngeenge owa nyona enyono la kwata moiti? Ou na okukonga ekwafo diva ngaashi tashi dulika. Ngeenge owa holeke enyono loye, oto ka naipika ashike onghalo yoye. Dimbuluka kutya David okwa ti kutya eshi a li a mwenena omanyono aye, ‘omakipa aye okwa li a tekauka molweemhata odo da li meni laye efiku alishe.’ (Eps. 32:3) Onghee hano, okuholeka omanyono etu otashi ke tu lolola ashike pamaliudo nosho yo pamhepo, ndele “ou te a hepaulula ndee te a efa, ota ka filwa onghenda.” — Omayel. 28:13.

17 Natu ka taleni koshihopaenenwa shaAnne. * Anne okwa li a ninga omukokolindjila eshi a li e na omido omulongo nasha. Ndele lwanima, okwa ka kala ta nyono meholeko. Osho osha li she mu ningifa a kale e udite etimba. Okwa ti: “Efimbo keshe onda li handi kala nda nyemata nonda polimana.” Ndele mbela okwa li a ninga po shike? Okwa ti kutya efiku limwe pokwoongala opa li pa kundafanwa Jakob 5:14, 15. Opo nee, okwa li a mona kutya okwa pumbwa ekwafo nokwa li a ka konga ekwafo kovakulunhuongalo. Okwa ti: “Omushangwa oo owa li ashike wa fa omuti oo nda shangelwa kuJehova opo u hakule nge pamhepo. Kasha li shipu okunwa omuti oo, ashike owa hakula nge. Onda li nda dulika komayele oo e li momishangwa nosha kwafela nge.” Osho osha li sha ningwa omido donhumba da ka pita, na Anne paife ota longele Jehova e na eliudo la koshoka.

18. Otu na okukala twa tokola toko okuninga shike?

18 Kashi fi tuu oufembanghenda okukala tu li oshitukulwa shehangano laJehova likumwifi momafiku aa axuuninwa! Natu kale twa tokola toko tuha kwate okahetengi osho tu na. Ndele ponhele yaasho, natu kaleni hatu longele kumwe tu li oukwaneumbo mokukala hatu kala pokwoongala pandjikilile, hatu kongo ovanamitimadiwa moshitukulwa shetu nokukala hatu li pandjikilile eendja dopamhepo odo hatu pewa. Natu yambidideni yo ovo hava kwatele komesho nokukala metwokumwe netumwalaka olo hatu udifa. Ngeenge otwa ningi ngaho, ohatu ka shikula ewiliko lehangano laJehova noitatu ka loloka okulonga ouwa.

^ okat. 17 Edina olo halo lomunhu oo lelalela.