Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2013

Oshikonga sha unganekwa nawa sha etifa oidjemo iwa

Oshikonga sha unganekwa nawa sha etifa oidjemo iwa

Moshilando San Bernardo moChile osho shi li muAmerika lokOlukadi omu na omuudifi umwe omunyasha omuladi wedina María Isabel. Ye noukwaneumbo wavo ovomuhoko wOvamapuche, eedalele domoshilongo osho. Oukwaneumbo oo aushe owa kala tau yambidida eenghendabala dokutota po eongalo lipe lelaka lOshimapuche, olo hali ifanwa yo Mapudungun.

Eshi kwa li kwa shiivifwa kutya Edimbuluko lefyo laKristus otali ka danenwa yo moMapudungun nosho yo kutya opa nyanyangidwa oufo 2 000 vokushiva ovanhu kEdimbuluko melaka olo, nove na okwaandjakanekwa, osha li sha ningifa María Isabel a pangele omhangela yonhumba. Mbela okwa li ta ka ninga po shike opo a kwafele? Okwa li a dimbuluka oimoniwa yEendombwedi dikwao dinyasha odo da li hadi hafele nohadi pondola mokuudifila ovanafikola vakwao novahongi. Okudja opo, okwa ka kundafana novadali vaye, opo nee aveshe ova li va tokola opo María Isabel a pangele omhangela kutya otaka yandja ngahelipi oufo ovo kofikola. Mbela okwa li a diladila e ke shi ende ngahelipi?

Tete, María Isabel okwa li a pula epitikilo kelelo lofikola opo a tulike okafo keshivo pomuvelo woluumbo lofikola. Ola li le mu pitika a ninge ngaho nole mu pandula omolwonghatu oyo a katuka. Efiku limwe poandaxa yongula, omukulunhufikola okwa li a ninga eshiivifo membako li na sha nokafo keshivo oko ka tulikwa komuvelo.

Lwanima, María Isabel okwa li a pula a talele po ovahongwa meengulu adishe. Eshi a pewa epitikilo kovahongi, okwa li a pula mongulu keshe ngeenge omu na Omumapuche. Okwa ti: “Onda li handi diladila kutya shiimba mofikola aishe omu na ashike Ovamapuche ve li 10 ile 15, ashike omwa li vahapu neenghono, nonda ka yandja oufo vokushiva 150.”

‘OKWA LI A TEELELA A YELIFILWE KOMUKULUNHU’

Omukainhu umwe eshi a mona okafo ka tulikwa pomuvelo wofikola, okwa li a pula kutya olyelye ta dulu oku mu yelifila shi na sha noshiningwanima osho. Okwa li a kumwa eshi ve mu twala kokakadona komido 10 oko ke mu yelifile. María Isabel okwa popya te limemesha ta ti: ‘Okwa li a teelela a yelifilwe komukulunhu.’ Eshi a yandja okafo keshivo komukainhu oo noku mu yelifila pauxupi, María Isabel okwa li e mu pula ondjukifi yaye opo ye novadali vaye ve ke mu talele po nove ke mu yelifile shihapu kombinga yOuhamba waKalunga. Ovaudifi 20 vomeongalo lomoshitukulwa omo hamu popiwa elaka lOshimapudungun ova li va hafa neenghono eshi va mona omukainhu oo nOvamapuche vamwe ovo va li va ulika ohokwe ve li 26 ve uya kEdimbuluko. Ongudu oyo paife oi li eongalo tali xumu nawa komesho.

Kashi na nee mbudi kutya ou na omido ngapi, mbela ito dulu okukatuka onghatu ya fa oyo opo u shive ovanafikola ile ovanailonga vakweni kEdimbuluko, koshipopiwa shomoipafi ile koshoongalele shoshitukulwa? Omolwashike ito kongo oimoniwa moishangomwa yetu oyo tai dulu oku ku kwafela u mone nghee to dulu okuninga omhangela tai pondola? Ilikana yo kuJehova e ku pe omhepo yaye iyapuki i ku kwafele u kale u na ouladi wokupopya kombinga yaye. (Luk. 11:13) Ngeenge owa ningi ngaho, oto ka kala wa hafa noto ka tuwa omukumo neenghono koidjemo yeenghendabala doye dokuninga eemhangela diwa.