Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2012

Omapulo a dja kovaleshi

Omapulo a dja kovaleshi

Mbela eendjovo daJesus odo tadi hangwa muMateus 19:10-12 oda hala kutya ovanhu ovo inava hombola ile inava hombolwa nova hafa oshi li oshipewa shavo?

Diladila kutya Jesus okwa li a popya eendjovo odo monghalo ya tya ngahelipi. Eshi Ovafarisai va li ve uya kuye noku mu pula shi na sha neteyohombo, okwa li e va yelifila nawa omifikamhango daJehova di na sha nohombo. Omhango oya li ya pitika omushamane a shangele omukulukadi waye ombapila yehengano ngeenge “okwa mona sha muye showii,” ndele hasho sha li ngaho pehovelo. (Deut. 24:1, 2) Opo nee okwa ti: “Ou ta henge po omukainhu waye oshinima shimwe shi he fi oluhaelo, ndele ta hombola umwe, oye ta haele; naau ta hombola po omuhengwa, ye ota haele.” — Mat. 19:3-9.

Ovahongwa eshi va uda ngaho ova tya: “Ngenge okukala kwomulumenhu nomukainhu waye kwa tya ngaha, okuhombola inaku wapala.” Ndele ye okwa tya kuvo: ‘Haaveshe ve udite eendjovo odo, ndelenee ovo tuu aveke ve shi pewa. Osheshi ope na ovalutulwa ava ve shi dalwa, nghee va dja medimo laina, ndele ope na vali ovalutulwa, ava ve shi ningwa kovanhu, ndele ope na vali ovalutulwa ava ve shi lininga vovene omolwouhamba wokeulu. Ou ta dulu oku shi tambula, ne shi tambule.’ — Mat. 19:10-12.

Ovanhu vamwe ova lutulwa meityo olo kutya ova dalwa ve na oshipo, vamwe otashi dulika va mona oshiponga, vo vamwe ova lutulwa owina kuvamwe. Ndele ope na ovo va hoolola okukala va fa ovalutulwa. Nonande ova wana okuhombola ile okuhombolwa, ove na elipangelo nohava kala inava ya mohombo “omolwouhamba wokeulu.” Ohava hoolola okukala inava hombola ngaashi Jesus, opo va dule okulonga shihapu moilonga yOuhamba. Inava dalwa noshali yokuhahombola ile yokuhahombolwa noinava pewa oshali ya tya ngaho, ndele ova hoolola ashike okukala ngaho.

Omuyapostoli Paulus okwa li a yelifa metwokumwe neendjovo daJesus kutya Ovakriste aveshe, kutya nee ove li mohombo ile hasho, otava dulu okulongela Kalunga, ndele ovo inava hombola nova ‘pama komitima davo’ omolwonghalo yavo, ove ‘dule venya.’ Ngahelipi mbela? Ovo va hombola ove na okulongifa efimbo neenghono davo opo va wapalele nokufila oshisho ookaume kavo kopahombo. Mepingafano naasho, Ovakriste ovo inava hombola ile inava hombolwa otava dulu okulonga oilonga yOmwene nopehe na oshinakuwanifwa osho. Ova tala ko onghalo yavo i li “oshali” ya dja kuKalunga. — 1 Kor. 7:7, 32-38.

Ombibeli oya popya kutya Omukriste oo ta hafele okukala ina hombola ile ina hombolwa kaku fi oshali yopashikumwifilonga. Ponhele yaasho, oha lalakanene okuhaya mohombo opo a xumife komesho oinima yOuhamba nopehe na omapiyaano. Vahapu kunena ova tokola momitima davo okukala inava hombola ile inava hombolwa omolwetomheno olo, onghee hano, otu na oku va twa omukumo.