Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2012

‘Honge nge ndi ninge eshi we shi hokwa’

‘Honge nge ndi ninge eshi we shi hokwa’

‘Honge nge, ndi ninge eshi we shi hokwa, osheshi Oove Kalunga kange.’ — EPS. 143:10.

1, 2. Okulonga ehalo laKalunga ohaku tu etele ouwa ulipi, noshike hatu lihongo kohamba David moshinima osho?

MBELA owa longifa ngoo nande onale okaalita ngeenge to i molweendo opo u tale kutya onhele oko wa hala okuya oya ama peni? Okulongifa okaalita ohaku kwafele omunhu a mone noupu ondjila oyo e na okuya nayo koima oko a yuka. Sha faafana, ngeenge otwa kala hatu konakona omifikamhango daKalunga mOmbibeli, otashi ke tu kwafela eshi hatu ningi omatokolo a fimana. Okukala tu na etaleko la fa lOmushiti olo la denga mbada, otashi ke tu kwafela tu ‘ende mondjila’ oyo ta hokwa. — Jes. 30:21.

2 David, ohamba yaIsrael shonale oya tula po oshihopaenenwa sha tongomana shokulonga alushe ehalo laKalunga monghalamwenyo yayo. Natu ka kundafaneni oiningwanima imwe yomonghalamwenyo yaDavid notu lihonge kuye, osheshi okwa kala alushe e lineekela Jehova Kalunga nomutima aushe. — 1 Eeh. 11:4.

DAVID OKWA LI A LENGA EDINA LAJEHOVA

3, 4. (a) Oshike sha li she linyengifa David a lwife Goljat? (b) David okwa li a tala ko ngahelipi edina laKalunga?

3 Natu ka kundafaneni shi na sha naashi David a li e na okutaalela Omufilisti Goljat, ofule moita. Oshike sha li she linyengifa omunyasha David a palamene omutongolume oo a li e lihomateka noku na hanga oule weemeta 3? (1 Sam. 17:4) Mbela ouladi waye? Ile pamwe eitavelo laye muKalunga? Omaukwatya oo avali okwa dana onghandangala ya fimanenena moku mu kwafela a katuke eenghatu noupenda. Ndele okukala a lenga Jehova nedina laYe linene oko unene kwa li kwe mu kwafela a kale e na ouladi wokupalamena omutongolume oo. David okwa li a pula a handuka a ti: “Omufilisti ou ina pita etanda, omushike ngeno, eshi ta sheke omatanga ovakwaita vaKalunga omunamwenyo?” — 1 Sam. 17:26.

4 Omunyasha David eshi a li a taalela Goljat, okwe mu lombwela ta ti: “Ove to uya kuame u neongamukonda neonga  nomukonda, ndelenee ame handi uya kuove medina lOmwene womatanga ovakwaita, Kalunga komatanga Ovaisrael, ou we mu sheka.” (1 Sam. 17:45) Molwaashi David okwa li e lineekela muKalunga kashili, okwa dipaa Omufilisti ofule nokamanya oko a umba nokafuta. David okwa li alushe e lineekela muJehova nokwa li a lenga neenghono edina laYe linene monghalamwenyo yaye aishe, ndele hapomhito ashike oyo. Okwa li a ladipika Ovaisrael vakwao va ‘tumbaleke edina laKalunga liyapuki,’ ile tu tye, ve litangele edina laJehova liyapuki. — Lesha 1 Omafimbo 16:8-10.

5. Onghalo ilipi tashi dulika u shakeneke oyo tai dulu okufaafanifwa nomasheko aGoljat?

5 Mbela ou udite ngoo etumba eshi Jehova oye Kalunga koye? (Jer. 9:24) Oho linyenge ngahelipi ngeenge ovashiinda, ovanailonga pamwe naave, ovanafikola vakweni ile ovapambele tava popile Jehova mowii notava yolo Eendombwedi daye? Mbela oho popile ngoo Jehova nouladi ngeenge edina laye tali shekwa, we lineekela kutya ote ke ku yambidida? Oshoshili kutya ope na “efimbo lokumwena,” ndele inatu kala twa fya ohoni eshi tu li Eendombwedi daJehova novashikuli vaJesus. (Omuud. 3:1, 7; Mark. 8:38) Nonande otu na okukala tu na elungi nefimaneko eshi hatu ungaunga novanhu ovo ihava pwilikine ketumwalaka letu, inatu kaleni twa fa Ovaisrael ovo ‘va li va haluka nova tila unene’ eshi va uda Goljat te va sheke. (1 Sam. 17:11) Ndele ponhele yaasho, natu katukeni pandunge opo tu yapulife edina laJehova Kalunga. Otwa halelela okukwafela ovanhu va shiive Jehova Kalunga kutya oye lyelye lela. Ohatu longifa Eendjovo daye tu kwafele vamwe va mone kutya osha fimana okweehena popepi naKalunga. — Jak. 4:8.

6. Omolwashike David a li a hala okulwifa Goljat, noshike tu na okukala twa halelela okuninga?

6 Ehokololo laDavid naGoljat otali tu hongo oshilihongomwa shimwe vali sha fimanenena. Eshi David a li e uya konhele yolwoodi ta tondoka, okwa li a pula a ti: “Omulumenhu ou ta dipaa Omufilisti ou, ndee ta kombo po ohoni muIsrael, ota ka pewa shike?” Ovanhu ova li va nyamukula tava endulula eendjovo odo va li va popya nale va ti: ‘Ohamba tai ka yandja komulumenhu ou ta dipaa Goljat oupuna muhapu. Ndee tai mu pe omona wayo okakadona a ninge omwalikadi waye.’ (1 Sam. 17:25-27) Ashike David ka li te lipula unene nokupewa ondjabi. Opa li oshinima shimwe osho sha fimanenena kuye. David okwa li a hala okutumbalekifa Kalunga kashili. (Lesha 1 Samuel 17:46, 47.) Ongahelipi shi na sha nafye? Mbela otwa halelela okuliningila edina mokuliongelela omamona mahapu nokukala twa tumbala mounyuni? Kape na omalimbililo, otwa hala okukala twa fa David oo a imba a ti: “Hambeleleni Omwene pamwe naame; fye atusheni tu panduleni edina laye.” (Eps. 34:4) Natu kale twe lineekela muKalunga nokutumbalekifa edina laye ponhele yomadina etu vene. — Mat. 6:9.

7. Ongahelipi hatu dulu okupameka eitavelo letu olo tali tu kwafele tu dule okuungaunga naavo vehe na ohokwe metumwalaka olo hatu udifa?

7 Ouladi waDavid wokulwifa Goljat owa li tau pula a kale e lineekela muJehova nomutima aushe. Omunyasha David okwa li e na eitavelo la pama. Onghedi imwe omo a li a pameka eitavelo laye omokulineekela muKalunga filufilu eshi a li omufita. (1 Sam. 17:34-37) Nafye otwa pumbwa eitavelo la pama opo tu twikile okuudifa, naunene tuu ngeenge hatu shakeneke vamwe ovo inava hala okutambula ko etumwalaka letu. Ndele opo tu kale neitavelo la tya ngaho, otwa pumbwa okukala twe lineekela Jehova filufilu momalipyakidilo etu akeshe efiku. Pashihopaenenwa, ohatu dulu okuhovela eenghundafana kombinga yoshili yOmbibeli novanhu ovo tu li omutumba pamwe navo moyeendifo yaaveshe. Omolwashike itatu udifile yo ovo hatu shakeneke momapandavanda eshi hatu longo eumbo neumbo? — Oil. 20:20, 21.

 DAVID OKWA LI HA EFELE OINIMA MOMAKE AJEHOVA

Oshike sha li sha kwafela David aha dipae Saul nonande okwa li e na omhito yoku shi ninga?

8, 9. David okwa li a ulika ngahelipi kutya okwa pitifa komesho ehalo laJehova, eshi a li ta ungaunga nohamba Saul?

8 Oshihopaenenwa vali shimwe osho tashi ulike kutya David okwa li a halelela okukala e lineekela muJehova oshi na sha nanghee a li a ungaunga naSaul, ohamba yotete yaIsrael. Omunandubo Saul okwa li a hala oku mu twila kumwe nekuma neonga lwoikando itatu, ashike David okwa li alushe ha yepa, noine mu shunifila nande owii washa. Lwanima, okwa ka ya Saul onhapo. (1 Sam. 18:7-11; 19:10) Okudja opo Saul okwa ka hoolola mOvaisrael ovalumenhu 3 000 ndele ta i navo a ka konge David mombuwa. (1 Sam. 24:3) Xuuninwa, Saul okwa ka ya mekololo omo mwa li David novakwaita vaye noineshinongela. David okwa li ta dulu okulongifa omhito oyo a dipae ohamba oyo ya kala ya hala oku mu dipaa. Kakele kaasho, Kalunga oye a li a hala David a ninge ohamba yaIsrael noku pingene po Saul. (1 Sam. 16:1, 13) Doshili, ngeno David okwa pwilikinine komayele ovakwaita vaye, ngeno ohamba oya dipawa ashike. Ndele okwa li e va lombwela a ti: “Omwene na amene nge, ndi ha ningile omuvaekwa wOmwene, omwene wange sha, ndi mu kume neke lange. Osheshi ye omuvaekwa wOmwene.” (Lesha 1 Samuel 24:5-8.) Saul okwa li natango e li ohamba oyo ya nangekwa po kuKalunga. David ka li a hala okunyeka Saul ouhamba molwaashi Jehova ka li e u mu kufa natango. Eshi David a li a teta ko okavando koshikutu Saul shokombada, okwa li a ulika kutya ina hala oku mu ningila owii washa. — 1 Sam. 24:12.

9 David okwa li natango a ulika kutya okwa fimaneka omuvaekwa waKalunga eshi a li a mona ohamba oshikando shaxuuninwa. Pomhito opo, okwa li a ya naAbisai konhele oko Saul a li a honga onhanda nova hanga a kofa. Nonande Abisai okwa li a fika pexulifodiladilo kutya Kalunga okwa yandja omutondi oo momake aDavid nokwa li a pula opo a twe Saul neonga, David ka li e mu pitika a ninge ngaho. (1 Sam. 26:8-11) Molwaashi David okwa kala alushe ha kongo ewiliko kuKalunga, ka li a ongaonga okukatuka metwokumwe nehalo laJehova nonande Abisai okwa li te mu ladipike a ninge shimwe shi lili.

10. Onghalo i li eshongo ilipi tashi dulika tu shakeneke pauhandimwe, noshike tashi ke tu kwafela tu pondole?

10 Nafye otashi dulika tu shakeneke onghalo omo vamwe va hala tu ninge osho tava diladila kutya osho sha denga mbada ponhele yoku tu yambidida tu longe ehalo laJehova. Ngaashi Abisai, vamwe otashi dulika nokuli ve tu ladipike tu katuke eenghatu donhumba nopehe na okukonakona kutya ehalo laKalunga olilipi moshinima sha tya ngaho. Opo tu pondole meenghalo da tya ngaho, otu na okukala tu shii kutya Jehova okwa tala ko ngahelipi oshinima sha tya ngaho nokukala twa tokola toko okukanyatela ketaleko laye.

11. Oshike we lihonga kuDavid shi na sha nokupitifa alushe komesho ehalo laKalunga?

11 David okwa li a ilikana kuJehova Kalunga a ti: ‘Honge nge, ndi ninge eshi we shi hokwa.’  (Lesha Epsalme 143:5, 8, 10.) Ponhele yokulineekela meendunge daye mwene ile okupwilikina kuvamwe, David okwa li a halelela okuhongwa kuKalunga. Okwa li ha ‘shipulula oilonga aishe yaKalunga nokushipaashipa okulonga kwaye akushe.’ Nafye ohatu dulu okushiiva ehalo laKalunga mokukonakona Ombibeli nokudilonga komahokololo mahapu opaMbibeli e na sha nanghee Jehova ha ungaunga novanhu.

DAVID OKWA LI HA TULA MOILONGA OMAFINAMHANGO

12, 13. Omolwashike David a li a tilashi omeva oo a etelwa kovakwaita vaye vatatu?

12 Oshiwa yo okulandula oshihopaenenwa shaDavid oo a li ha tula moilonga omafinamhango oo a kwatelwa mOmhango nokwa li a halelela okukala metwokumwe nao. Natu ka konakoneni kutya oshike sha li sha ningwa po eshi David a li a halelela ‘omeva okunwa omondungu oyo ya li poshivelo shaBetlehem.’ Ovakwaita vaye vatatu ova li va panukila moshilando osho sha li shi yadi Ovafilisti pefimbo opo nokuteka omeva. Ashike ‘David ka li a hala oku a nwa, ndele te a tileshi koshipala shOmwene.’ Omolwashike mbela? Okwa ti: ‘Kalunga kange na amene nge, ndihe shi ninge! Ndi nwe ngeno ohonde yovalumenhu ava? Vo va kaa talele ko mokweekelashi eemwenyo davo.’ — 1 Omaf. 11:15-19.

Oshike hatu lihongo kuDavid eshi a li a anya okunwa omeva oo a li a etelwa kovakwaita vaye?

13 David okwa li e lihonga mOmhango kutya ohonde kai na okuliwa ndele oi na okutilwashi koshipala shaJehova. Okwa li yo e udite ko kutya omolwashike osho shi na okuningwa. David okwa li e shii kutya ‘omwenyo wombelela ou li mohonde.’ Ndele osho a li a tilashi omeva, hahonde. Omolwashike a li a anya okunwa omeva oo? Okwa li a ninga ngaho molwaashi okwa li e lihonga efinamhango momhango li na sha nohonde. David okwa li a tala ko omeva oo e na ondilo ngaashi ashike ohonde yovalumenhu ovo vatatu. Onghee hano, kasha li sha yuka kuye okunwa omeva oo. Ponhele yoku a nwa, okwa li a tokola oku a tilashi. — Lev. 17:11; Deut. 12:23, 24.

14. Oshike sha li sha kwafela David a kale e na etaleko la fa laJehova?

14 David okwa li ha kendabala okudulika nomutima aushe komhango yaKalunga. Okwa imba ta ti: “Kalunga kange, okuwanifa ehalo loye, osho otashi nyakula nge, nomhango yoye  oyo ya nyolelwa moule womwenyo wange.” (Eps. 40:9) David okwa li ha konakona omhango yaKalunga nokwa li ha dilonga moule shi na sha nayo. Okwa li e na elineekelo kutya otashi ke mu etela ouwa ngeenge okwa dulika koipango yaJehova. Oshidjemo, ka li ashike he lipula unene naasho sha shangwa mOmhango yaMoses, ndele okwa li yo he lipula nomafinamhango oo a kwatelwa mo. Ngeenge hatu konakona Ombibeli, oshi li pandunge okudilonga kwaasho hatu lesha noku shi tuvikila momitima detu opo tu kale tu shii osho tashi hafifa Jehova.

15. Ongahelipi Salomo a li a dopa okuulika kutya okwa fimaneka Omhango yaKalunga?

15 Omona waDavid Salomo okwa li a hokiwa neenghono kuJehova Kalunga. Ndele mokweendela ko kwefimbo, Salomo okwa li a dopa okuulika kutya okwa fimaneka Omhango yaKalunga. Ka li a dulika koshipango shaJehova osho kutya ohamba yOvaisrael kai na ‘okulikongela ovalikadi vahapu.’ (Deut. 17:17) Salomo okwa li a hombola ovakainhu vahapu ovanailongo. Eshi a kulupa, “ovalikadi vaye va hongaula omutima waye okushikula ookalunga vamwe.” Kashi na nee mbudi kutya okwa li ta tomhafana ngahelipi, ‘Salomo okwa li a ninga osho inashi wapala momesho Omwene, ndele ina diinina okushikula Omwene ngaashi xe David.’ (1 Eeh. 11:1-6) Inashi fimana tuu okudulika keemhango nokomafinamhango oo e li mEendjovo daKalunga! Pashihopaenenwa, osho osha fimanenena ngeenge umwe ta diladila oku ya mohombo.

16. Ongahelipi okuuda ko nawa oshipango shokuhombola ashike “mOmwene” taku dulu okukwafela ovo tava lalakanene ohombo?

16 Ngeenge omunhu ehe fi omwiitaveli ta kendabala oku ku kokela moihole, oho linyenge ngahelipi? Mbela oho katuka monghedi oyo tai ulike kutya oho tale ko oinima ngaashi David ile ongaashi Salomo? Ovalongelikalunga vashili ova lombwelwa va hombole ashike “mOmwene.” (1 Kor. 7:39) Ngeenge Omukriste okwa hala oku ya mohombo, oku na ashike okuhombola ile okuhombolwa komwiitaveli mukwao. Ngeenge otu udite ko nawa oshiteelelwa osho shopamishangwa, itatu ka anya ashike okuhombola nomunhu oo ehe fi omwiitaveli, ndele ohatu ka henuka yo omunhu oo ta kendabala oku tu kokela moihole.

17. Oshike tashi ke tu kwafela tu henuke okuyulwa komwiyo wokutala omafano oipala?

17 Oshihopaenenwa shaDavid shokukonga nomutima aushe ewiliko laKalunga otashi tu kwafele yo tu kondjife eyeleko lokutala omafano oipala. Lesha omishangwa tadi landula, diladila kombinga yomafinamhango oo e li mo nokukendabala okutala kutya ehalo laJehova olilipi moshinima osho. (Lesha Epsalme 119:37; Mateus 5:28, 29; Ovakolossi 3:5.) Okudilonga komifikamhango daye da denga mbada otaku ke tu kwafela tuha yulwe komwiyo wokutala omafano oipala.

KENDABALA ALUSHE U KALE HO TALE KO OINIMA NGAASHI JEHOVA

18, 19. (a) Oshike sha li sha kwafela David a kale a hokiwa kuKalunga nonande ka li a wanenena? (b) Owa tokola toko okuninga shike?

18 Nonande David oku li oshihopaenenwa shiwa meenghedi dihapu, okwa li a nyona lwoikando omanyono a kwatwa moiti. (2 Sam. 11:2-4, 14, 15, 22-27; 1 Omaf. 21:1, 7) Ndele okwa li a ulika monghalamwenyo yaye aishe kutya okwe livela ombedi omolwomanyono aye. Okwa li a enda pamwe naKalunga “nomutima aushe nomouyuki,” ile tu tye, moudiinini womutima waye. (1 Eeh. 9:4) Omolwashike hatu dulu okutya ngaho? Omolwaashi David okwa li ha kendabala a katuke metwokumwe nehalo laJehova.

19 Nonande inatu wanenena, ohatu dulu okukala twa hokiwa kuJehova. Tu na oushili oo momadiladilo, natu konakoneni Eendjovo daKalunga noukeka, hatu dilonga moule kwaasho hatu lihongo mo nokukatuka pandunge she likolelela kwaasho twa tuvikila momitima detu. Kungaho, ohatu ka dula okwiilikana kuJehova ngaashi omupsalme oo a pula nelininipiko a ti: ‘Honge nge, ndi ninge eshi we shi hokwa.’