Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) OKTOBA 2012

Kala u na omukumo eshi to ungaunga neenghalo didjuu

Kala u na omukumo eshi to ungaunga neenghalo didjuu

“Kalunga Oye ehondamo letu neenghono detu, nekwafo linene li shii kulineekelwa momaudjuu.” — EPS. 46:2.

1, 2. Ovanhu vahapu ova shakeneka eenghalo didjuu dilipi, ndele fye otu na okukala twe lilongekida okuninga shike?

OTU li pefimbo lidjuu neenghono. Kombada yedu otaku ningwa oiponga ya shikulafana. Ovanhu otava mono oixuna neenghono omolwomakakamo edu, oikungulu yomefuta, omapeya, omafundja, omindilo odo hadi kungwa keemhunda, omhepo yoshikungulu nosho tuu. Kakele kaasho, ope na yo omaupyakadi omaukwaneumbo noopaumwene oo haa etele ovanhu oumbada nenyeme. Osho otashi ulike kutya ovanhu ohava ‘yulwa divadiva kefimbo lii,’ sha hala kutya, efimbo nombadilila otai dulu okuhanga keshe umwe womufye. — Omuud. 9:12.

2 Ovapiya vaKalunga ova kala nokuungaunga nomupondo neenghalo didjuu da tya ngaho. Ndele nande ongaho, keshe umwe womufye oku na okukala e lilongekida okuungaunga nonghalo keshe idjuu oyo tashi dulika a ka shakeneke monakwiiwa eshi exulilo longhalelo ei tali ehene popepi. Ongahelipi hatu dulu okuungaunga neenghalo didjuu nopehe na okusholola? Oshike tashi ke tu kwafela tu kale tu na omukumo eshi hatu ungaunga neenghalo didjuu?

LIHONGA KOIHOPAENENWA YAAVO VA KALA VE NA OMUKUMO

3. Metwokumwe nOvaroma 15:4, oshike tashi dulu oku tu hekeleka ngeenge tu na omaupyakadi a kwata moiti?

3 Nonande eenghalo didjuu oda kuma ovanhu vahapu kunena shi dulife nale, omaupyakadi oo haa nyikifa ovanhu oluhodi okwa kala ko nale. Natu ka taleni kutya oshike hatu lihongo kovapiya vaKalunga vamwe vopefimbo la pita ovo va li ve na omukumo nomeenghalo didjuu. — Rom. 15:4.

4. David okwa li e lididimikila omaupyakadi elipi, noshike sha li she mu kwafela?

4 Natu ka taleni koshihopaenenwa shaDavid. Ohamba Saul oya li ya hala oku mu dipaa, ovatondi vaye ova li ve mu ponokela nova li va kufa po ovakulukadi vaye, a li a kengelelwa  kuvamwe vometangakwaita laye, kovaneumbo laye nookaume nokwa li a polimana. (1 Sam. 18:8, 9; 30:1-5; 2 Sam. 17:1-3; 24:15, 17; Eps. 38:5-9) Omahokololo Ombibeli e na sha nonghalamwenyo yaDavid okwa ulika monghedi ya yela kutya eenghalo odo didjuu oda li de mu yahameka. Ndele osho kasha li she mu nghundipaleka pamhepo. Molwaashi okwa li e na eitavelo la pama, okwa ti: “Omwene, Oye ohote yokukalamwenyo kwange; olyelye ta mbadapalifa nge vali?” — Eps. 27:1; lesha Epsalme 27:5, 10.

5. Oshike sha li sha kwafela Abraham naSara ve lididimikile eenghalo didjuu odo va li mudo?

5 Abraham naSara ova kala efimbo lile meefaila ve li ovanailongo. Oinima inai kala alushe tai va endele nawa. Ndele ova li ve na omukumo eshi tava ungaunga noinima ngaashi ondjala nosho yo omaupyakadi oo va li tava etelwa koiwana oyo ya li ye va dingilila. (Gen. 12:10; 14:14-16) Mbela oshike sha li she va kwafela va ninge ngaho? Ombibeli oya ti kutya Abraham ‘okwa li a teelela oshilando shinya shi nomakanghameno a pama, nomutoti nomutungi washo oKalunga.’ (Heb. 11:8-10) Abraham naSara ova kala tava yandje elitulemo koinima oyo Kalunga e va udanekela ponhele yokweefa va wililwe po keenghalo didjuu odo va li mudo.

6. Ongahelipi hatu dulu okuhopaenena Job?

6 Job okwa li a mona oixuna neenghono. Diladila ashike kutya okwa li e udite ngahelipi eshi oinima aishe monghalamwenyo ya li itai mu endele nawa. (Job 3:3, 11) Shikwao vali osho shii, oshosho kutya Job ka li e udite ko filufilu kutya omolwashike oinima ii ya tya ngaho ya li tai mu ningilwa. Ndele nande ongaho, ka li a sholola. Okwa li a kanyatela oudiinini waye nokwa kala e na eitavelo muKalunga. (Lesha Job 27:5.) Osho kashi fi tuu oshihopaenenwa shiwa kufye okulandula!

7. Paulus okwa li a shakeneka eenghalo dilipi eshi ta longele Kalunga, noshike sha li she mu twa omukumo aha sholole?

7 Natu ka taleni yo koshihopaenenwa shomuyapostoli Paulus. Okwa li ‘moudjuu womoilando, moudjuu womombuwa nomoudjuu womefuta. Okwa popya shi na sha ‘nondjala, enota nonghai.’ Paulus okwa popya yo kutya okwa “telaanifwa mefuta omutenya aushe noufiku,” tashi dulika omolwoshikepa ya teka oyo a li muyo. (2 Kor. 11:23-27) Nonande okwa li a pita meenghalo didjuu adishe odo, didilika oikala oyo a li a ulika nopomhito opo hanga a fye omolwokulongela Kalunga, a ti: “Opo tu ha kale twe lineekela fye vene, ndelenee tu lineekele Kalunga, ou ta nyumuna ovafi. Ye okwe tu xupifa mo moshiponga shefyo olo linene, ndele ote tu xupifa nokomesho.” (2 Kor. 1:8-10) Havanhu vahapu va shakeneka eenghalo didjuu da fa odo da li da shakenekwa kuPaulus. Ndele nande ongaho, vahapu vomufye ope na omafimbo amwe hatu kala tu udite ngaashi Paulus. Onghee hano, oshihopaenenwa shaye shokukala e na omukumo otashi dulu oku tu hekeleka.

INO SHOLOLA OMOLWOMAUPYAKADI

8. Omaupyakadi okunena otashi dulika e tu kume ngahelipi? Yandja oshihopaenenwa.

8 Ovanhu vahapu kunena ova wililwa po molwaashi mounyuni omu yadi oiponga, omashongo nosho yo omafininiko. Nokuli nOvakriste vamwe osho va kala ve udite ngaho. Lani, * oo a kala ta hafele oilonga yefimbo li yadi pamwe nomushamane waye moAustralia okwa ti kutya eshi a li a monika okankela yokevele, osha li she mu nyikifa oluhodi noshe mu halukifa neenghono. Okwa ti: “Ouhaku oo nda li nda pewa owa li wa ningifa nge ndi kale handi vele neenghono nondi kale ndi udite ndihe na oshilonga.” Kakele kaasho, okwa li yo e na okufila oshisho omushamane waye oo a li a tandwa mekipa lombuda. Oshike tu na okuninga po ngeenge otwe lihange meenghalo da tya ngaho?

9, 10. (a) Oshike osho tuhe na okweefa Satana a ninge? (b) Oikala ilipi tai dulu oku tu kwafela tu ungaunge nomaudjuu mahapu oo a tumbulwa mOilonga 14:22?

9 Otu na okudimbuluka alushe kutya Satana okwa hala okunghundipaleka eitavelo letu moku tu etela omaupyakadi. Ndele inatu efa nande a ninge ngaho. Omayeletumbulo 24:10 okwa ti:  “Ngenge wa monika wa fya ounye, efiku loluhepo eenghono doye tadi ka ninipala.” Okudilonga koihopaenenwa yopaMbibeli, ngaashi oyo ya tumbulwa metetekelo, otaku ke tu kwafela tu taalele omaupyakadi tu na omukumo.

10 Oshiwa yo okudimbuluka kutya itatu dulu okukufa po omaupyakadi aeshe. Ponhele yaasho, otu na okukala twa teelela oku a shakeneka. (2 Tim. 3:12) Oilonga 14:22 oya ti: “Mokuya mouhamba waKalunga otu nokupitila moudjuu uhapu.” Ponhele yokweefa omaupyakadi e ku teye omukumo, a tala ko e li omhito yokuulika kutya ou na eitavelo meenghono daKalunga doku ku kwafela.

11. Oshike tu na okuninga opo tuha kale twa wililwa po komaupyakadi onghalamwenyo?

11 Otwa pumbwa okukala hatu diladila kombinga yoinima oyo tai tungu. Eendjovo daKalunga oda ti: “Omutima u nehafo tau yelifa oshipala, ndelenee ouyahame womutima tau nyikifa omhepo oluhodi.” (Omayel. 15:13) Eendokotola oda didilika kutya ohashi kwafele omunaudu a xwepopale ngeenge oha diladila kombinga yoinima oyo tai tungu. Ovanaudu vahapu ohava xwepopala ngeenge ova pewa eepela danafangwa tava diladila kutya ova hakulwa nonande paulelalela itadi va hakula shili. Mepingafano naasho, ngeenge omunaudu ota diladila kutya eepela odo ta nu otadi nyono po oukolele waye, ota ka kala e udite ta vele unene. Osho otashi ulike kutya ngeenge ohatu kala ashike hatu diladila kombinga yoinima oyo itatu dulu okulundulula monghalamwenyo yetu, ohatu ka teka omukumo. Mepingafano naasho, Jehova ihe tu pe eepela danafangwa. Ngeenge tu li momafimbo madjuu, ohe tu pe ekwafo lashili nohe tu tu omukumo okupitila mEendjovo daye, mekwafo lovamwatate nosho yo lomhepo iyapuki. Ngeenge owa kala nokudiladila koinima oyo oto ka kala wa hafa shili. Ponhele yokukala to diladila koinima oyo ii monghalamwenyo yoye, ninga keshe osho to dulu opo u ungaunge noupyakadi keshe nokuyandja elitulemo koinima iwa oyo u na. — Omayel. 17:22.

12, 13. (a) Oshike sha li sha kwafela ovapiya vaKalunga ve lididimikile omaupyakadi oo a etifwa koiponga? Yandja oshihopaenenwa. (b) Pefimbo loiponga, ongahelipi hashi kala sha yela mo kutya oshike sha fimanenena monghalamwenyo?

12 Mefimbo opo la di ko, oilongo imwe oya li ya dengwa koiponga inene. Ohatu dulu okulihonga kunghee ovamwatate va li ve lididimikila eenghalo da tya ngaho nonande kasha li shipu kuvo. Pehovelo lo 2010, ekakamo ledu linene noshikungulu moChile osha li sha hanauna po omaumbo ovamwatate vahapu, oiniwe yavo navamwe ova li va kanifa oilonga yavo. Ndele nonande ovamwatate ova li monghalo ya tya ngaho ova kala ve lipyakidila moilonga yaJehova. Samuel oo eumbo laye la li la hanaunwa po filufilu okwa ti: “Nonande otwa li monghalo oyo idjuu, ame nomukulukadi wange inatu efa po okwoongala nokuudifa. Onda dimina kutya osho oshe tu kwafela tuha kale twa wililwa po.” Samuel novamwatate novamwameme vahapu kava li va efa oshiponga osho shi va teye omukumo, ndele ova li va twikila okulongela Jehova nouladi.

13 MuSeptemba 2009, odula inene oya li ya loka noya yelula oshitukulwa shinene shoshilando Manila moFilipine. Omulumenhu umwe oshipuna oo a kanifa oiniwe yaye ihapu okwa ti: “Efundja ola fikifa ovanhu aveshe pamwe nola etela oipuna neehepele oudjuu nokumona oixuna.” Osho otashi tu dimbulukifa omayele aJesus opandunge, oo taa ti: ‘Liongeleleni omamona meulu, omo eenhwishi ile oilemo ihai nyonauna naamu ovalunga ihava fe ndee itava vake.’ (Mat. 6:20) Oimaliwa nosho yo omaliko ohai tuka po diva, naasho ohashi nyemateke alushe ovo ve i pitifa komesho. Oshi li pandunge okupitifa komesho ekwatafano letu naJehova molwaashi ohatu dulu okukala ookaume kaJehova kashi na nee mbudi kutya oshike tashi ningwa po. — Lesha Ovaheberi 13:5, 6.

OTU NA OMATOMHENO OKUKALA TU NA OMUKUMO

14. Otu na omatomheno elipi okukala tu na omukumo?

14 Jesus okwa popya kutya otapa ka kala omaupyakadi  pefimbo lokukala po kwaye, ndele okwa ti: “Inamu tila.” (Luk. 21:9) Otu na omatomheno a denga mbada okukala nomukumo molwaashi ohatu yambididwa kuJesus e li Ohamba nokOmushiti weshito alishe. Paulus okwa li a ladipika Timoteus a ti: “Kalunga ine tu pa omhepo youmbada, ndelenee oyeenghono noyohole noyelididimiko.” — 2 Tim. 1:7.

15. Ovapiya vaKalunga vamwe ova popya shike shi na sha nokulineekela muKalunga, nongahelipi nafye hatu dulu okukala tu na omukumo ngaashi vo?

15 Ombibeli oye tu lombwela kombinga yaasho ovapiya vaKalunga vamwe va popya shi na sha nokulineekela muKalunga. David okwa ti: “Omwene Oye omupameki wange noshikelelifo shange; Oye nde lineekela momutima wange nonda mona ekwafo. Osho nee sha nyakula omutima wange.” (Eps. 28:7) Paulus okwa li a ulika elineekelo laye filufilu eshi a ti: “Muei aishe ohatu findi nokufindilila omolwaau e tu hole.” (Rom. 8:37) Eshi Jesus a li a didilika kutya oku li pokukwatwa po nokudipawa, okwa li a popya sha osho sha li sha ulikila ovapwilikini vaye kutya oku na ekwatafano lopofingo naKalunga, a ti: “Ame kandi li po andike, osheshi Tate oku li naame.” (Joh. 16:32) Omautumbulilo oo a longifwa kovapiya vaKalunga ovo otaa ulike shike? Keshe umwe okwa li a ulika kutya okwe lineekela filufilu muJehova. Ngeenge nafye otwa kala twe lineekela muKalunga ngaashi vo, otashi ke tu kwafela tu taalele oupyakadi keshe kunena tu na omukumo. — Lesha Epsalme 46:2-4.

MONA OUWA MEKWAFO OLO TO PEWA KU-KALUNGA

16. Omolwashike sha fimana kufye okukonakona Eendjovo daKalunga?

16 Omukumo oo twa pumbwa tu li Ovakriste itau di mokukala twe lineekela mufye vene. Ndele ponhele yaasho, otau di mokushiiva kwetu Kalunga nomokukala twe mu lineekela. Ohatu dulu okuninga ngaho mokukala hatu konakona Ombibeli. Omumwameme umwe oo e na oupyakadi wepolimano okwa popya kutya oshike hashi mu kwafele, a ti: “Ohandi lesha lwoikando omishangwa odo tadi hekeleke.” Mbela otwa tula ngoo moilonga elombwelo lokuninga elongelokalunga loukwaneumbo oshivike keshe? Okuninga oinima oyo otaku ke tu kwafela tu kale tu na oikala ya fa yomupsalme oo a ti: “Omhango yoye ondi i hole shi fike peni! Efiku alishe ohandi i dilonga.” — Eps. 119:97.

17. (a) Efiloshisho lilipi tashi dulika li tu kwafele tu kale tu na omukumo? (b) Yandja oshihopaenenwa osho tashi ulike nghee wa li wa kwafelwa komahokololo onghalamwenyo oo e li moifo yetu.

17 Otu na yo oishangomwa ya kanghamena kOmbibeli oyo i na ouyelele oo tau tu kwafele tu kale twe lineekela muJehova. Ovamwatate vahapu ohava kwafelwa komahokololo onghalamwenyo oo haa kala moifo yetu. Omumwameme umwe wokuAsia oo e na epolimano olo hali ningifa omunhu a kale ta tumbu oshinyenu okwa li a hafa eshi a lesha ehokololo longhalamwenyo yomumwatate umwe oo a li omutumwa li na sha nanghee a li a ungaunga nomupondo nonghalo ya fa yaye. Omumwameme oo okwa shanga a ti: “Osha kwafela  nge ndi ude ko oupyakadi wange nosha twa nge omukumo.”

Ngeenge u li meenghalo didjuu, longifa omafiloshisho oo Jehova e tu pa

18. Omolwashike tu na okwiilikana lwoikando ngaashi tashi dulika?

18 Eilikano otali dulu oku tu kwafela monghalo keshe. Omuyapostoli Paulus okwa divilika nghee eilikano la fimana eshi a ti: “Kaleni mu he na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo, nombili yaKalunga ei i dule eendunge adishe, otai ka amena omitima deni nomadiladilo eni muKristus Jesus.” (Fil. 4:6, 7) Ohatu ilikana ngoo luhapu ngaashi tashi dulika tu kwafelwe tu lididimikile eenghalo didjuu? Alex, omumwatate wokuBritania oo a li a kwatwa kepolimano oule wefimbo lile, okwa ti: “Okupopya naJehova meilikano nokupwilikina kuye mokulesha Eendjovo daye osha kwafela nge neenghono.”

19. Otu na okutala ko ngahelipi okukala pokwoongala kwopaKriste?

19 Oshinima shimwe vali sha fimanenena tashi dulu oku tu kwafela osho okwoongala. Omupsalme umwe okwa ti: “Omwenyo wange tau djuulukwa, ndee tau lilile omikala dOmwene.” (Eps. 84:3) Mbela nafye osho tu udite ngaho? Lani, oo a tumbulwa metetekelo okwa popya shi na sha nanghee ha tale ko okwoongala kwopaKriste eshi a ti: “Okukala pokwoongala kakwa li ehoololo kwaame. Onda li ndi shii kutya ondi na okukala pokwoongala ngeenge onda hala Jehova a kwafele nge.”

20. Okukufa ombinga moilonga yokuudifa ohaku tu kwafele ngahelipi?

20 Okukala hatu kufa ombinga moilonga yokuudifa Ouhamba nako otaku tu kwafele tu kale tu na omukumo. (1 Tim. 4:16) Omumwameme umwe wokoAustralia oo a li e na omaupyakadi mahapu okwa ti: “Kanda li naanaa ndi hole oilonga yokuudifa, ndele omukulunhuongalo umwe okwa li a shiva nge tu ka longe pamwe naye nonda li nda ya pamwe naye. Otashi ulike kutya Jehova okwa li ta kwafele nge, molwaashi oshikando keshe handi kufa ombinga moukalele, ohandi kala nda hafa.” (Omayel. 16:20) Vahapu ova didilika kutya ohashi pameke eitavelo lavo eshi tava kwafele vamwe va kale ve na eitavelo muJehova. Mokuninga ngaho, ihava kala vali tava diladila kombinga yomaupyakadi avo nohashi va kwafele va yandje elitulemo koinima oyo ya fimanenena. — Fil. 1:10, 11.

21. Ohatu dulu okukala tu na elineekelo lashike nokuli nongeenge tu na omaupyakadi?

21 Jehova okwe tu pa omafiloshisho mahapu oo tae tu kwafele tu kale tu na omukumo eshi hatu ungaunga neenghalo didjuu kunena. Ngeenge otwa longifa omafiloshisho aeshe oo, hatu dilonga nokulandula oshihopaenenwa shiwa shovapiya vaKalunga ovo va li ve na omukumo, ohatu ka kala nelineekelo kutya ohatu dulu okuungaunga nomupondo neenghalo didjuu. Nonande otashi dulika tu na omaupyakadi mahapu eshi exulilo longhalelo ei tali ehene popepi, ohatu dulu okukala tu udite ngaashi Paulus oo a ti: ‘Otwa natwa poshi, ndele inatu nyonwa po noitatu kanifa ouladi.’ (2 Kor. 4:9, 16) Kekwafo laJehova, ohatu dulu okukala tu na omukumo eshi hatu ungaunga neenghalo didjuu kunena. — Lesha 2 Ovakorinto 4:17, 18.

^ okat. 8 Omadina oo hao ovanhu ovo lelalela.