Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Ouwa — Ongahelipi hatu dulu oku u kulika?

Ouwa — Ongahelipi hatu dulu oku u kulika?

ATUSHENI otwa hala ovanhu va kale ve tu tala ko tu li ovanhu vawa. Ashike kunena oshidjuu okukala omunhu muwa, molwaashi ovanhu vahapu “ovatondi vouwa.” (2 Tim. 3:3) Ohava henuka omifikamhango daJehova. Osho Jehova a ti oshiwa, ohava ti ‘oshii,’ naasho a ti oshii, ohava ti ‘oshiwa.’ (Jes. 5:20) Natango oshidjuu okukala ovanhu vawa, tashi dulika omolwonakudiwa yetu nomolwoulunde wetu. Onghee hano, otashi dulika tu kale tu udite ngaashi Anne, * oo a longela Jehova efimbo lile. Okwa ti: “Oshidjuu kwaame okwiitavela kutya ohandi dulu okukala omunhu muwa.”

Atushe ohatu dulu okukala ovanhu vawa. Ouwa ou li oshiimati shomhepo iyapuki yaKalunga, nomhepo yaye oi na eenghono i dule omashongo aeshe oo tashi dulika tu shakeneke. Ohatu ka konakona kutya ouwa oshike nanghee hatu dulu oku u kulika pauyadi.

OUWA OSHIKE?

Oku shi popya paunafangwa, ouwa oo oukwatya wokukala ho longo osho shiwa. Owa kwatela mo okukala neenghedi diwa nokulonga ouwa ponhele yokulonga owii. Omunhu muwa oha kongo alushe omhito a kwafele vamwe noku va ningila oinima iwa.

Otashi dulika ho mono vamwe hava ningile ouwa omaukwaneumbo avo nosho yo ookaume kavo, ndele mbela ovo ashike ve na okuningilwa ouwa? Kape na oo ta dulu okulonga ouwa efimbo keshe, molwaashi Ombiibeli oya ti kutya “kombada yedu kape na nande omunhu omuyuki, ou ha ningi ngeno ouwa auke, ndele ita nyono.” (Omuud. 7:20) Omuyapostoli Paulus okwa popya a ti: “Ondi shi shii mwaame, nokutya, mombelela yange kamu na ouwa nande washa.” (Rom. 7:18) Onghee hano, osha yela kutya otwa pumbwa okulihonga kuJehova nghee hatu dulu okukulika oukwatya oo.

“KALUNGA OMUWA”

Jehova Kalunga okwa tula po omifikamhango daasho shiwa. Ombiibeli oya popya kombinga yaye ya ti: “Oove u muwa, ndele ho longo ouwa; longe nge eenghedimhango doye.” (Eps. 119:68) Natu ka konakoneni oinima ivali ya tumbulwa movelishe oyo, i na sha nouwa waJehova.

Kalunga omuwa. Kalunga omuwa unene noiha dopa okulonga ouwa. Omaukwatya aye aeshe okwa pambafana nouwa waye. Diladila kwaasho sha li sha ningwa po eshi Jehova a li a lombwela Moses a ti: “Oshingepangelo ashishe shange Ame ohandi ke shi koyifa po pwoove.” Jehova okwa li a ulikila Moses efimano laYe mwa kwatelwa ouwa waye. Moses okwa li a uda ondaka tai popi kombinga yaJehova tai ti: “Omwene Kalunga omunefilonghenda, Kalunga omunanghenda, omunanheni, nomunene mouwanghenda nomoudiinini, nouwanghenda waye te u diinine kovanhu omayovi, ou ta dimi po omanyonauno nomatauluko nomatimba, ndelenee Ye ita efa okuhandukila nokukongolola omanyonauno.” (Ex. 33:19; 34:6, 7) Osho otashi ulike kutya Jehova oha longo alushe ouwa. Nonande Jesus okwa li ha longo ouwa e dule ovanhu aveshe kombada yedu, okwa tile: “Kape na nande umwe muwa, Kalunga Oye aeke.” — Luk. 18:19.

Ouwa waJehova ou liwetikile meshito

Oilonga yaKalunga oiwa. Keshe osho ha longo  oshiwa. “Kalunga omuwa kwaaveshe, nohole yaye ya nyananana kovashitwa vaye aveshe.” (Eps. 145:9) Molwaashi Jehova omuwa noke na onhondo, oha pe ovanhu aveshe omwenyo nosho yo osho va pumbwa opo va kale nomwenyo. (Oil. 14:17) Oha ulike yo kutya omuwa eshi he tu dimine po. Omupsalme okwa shanga a ti: “Omwene, Ove u nonghedi iwa, u yadi ekufilo.” (Eps. 86:5) Ohatu dulu okukala noushili kutya Jehova “ava tava ende moshili, ite va kelele nande osha shiwa.” — Eps. 84:11.

“LILONGENI OKUNINGA OUWA”

Molwaashi otwa shitwa oshifeka shaKalunga, ohatu dulu okukala ovanhu vawa nokulonga ouwa. (Gen. 1:27) Ashike nande ongaho, Eendjovo daKalunga otadi ladipike ovapiya vaye ve ‘lihonge okuninga ouwa.’ (Jes. 1:17) Ndele mbela ongahelipi hatu dulu okulihonga okuninga ouwa? Natu ka konakoneni eenghedi nhatu omo hatu dulu okuninga ngaho.

Yotete, natu indile tu pewe omhepo iyapuki oyo hai kwafele Ovakriste va longe ouwa. (Gal. 5:22) Omhepo yaKalunga otai dulu oku tu kwafela tu hole eshi shiwa notu tonde eshi shii. (Rom. 12:9) Ombiibeli oya ti kutya Jehova ota dulu oku tu pamekela “meendjovo adishe diwa nomoilonga aishe iwa.” — 2 Tes. 2:16, 17.

Onhivali, natu leshe Eendjovo daKalunga da nwefwa mo. Eshi hatu lesha Ombiibeli, Jehova ote tu hongo “ondjila keshe youwa” note tu longekidile “oshilonga keshe shiwa.” (Omayel. 2:9; 2 Tim. 3:17) Ngeenge hatu lesha Ombiibeli nokudilonga kwaasho twa lesha, ohatu yadifa omutima wetu noinima iwa kombinga yaKalunga nosho yo ehalo laye. Kungaho, ohatu weda mo memona letu olo tali ke tu kwafela konahiya. — Luk. 6:45; Ef. 5:9.

Onhinhatu, natu kendabale ‘okushikula ouwa.’ (3 Joh. 11) MOmbiibeli omu na oihopaenenwa oyo hatu dulu okushikula. Jehova naJesus ove li oihopaenenwa ya denga mbada. Ashike natu ka konakoneni yavamwe ovo va li va shiivikila ouwa. Otashi dulika tu diladile kombinga yovanhu vavali, Tabita naBarnabas. (Oil. 9:36; 11:22-24) Oto dulu okumona ouwa moshihopaenenwa shavo shiwa, ngeenge owa konakona osho Ombiibeli ya popya kombinga yavo. Eshi to konakona, didilika osho va ninga opo va kwafele vamwe. Diladila kwaasho to dulu okuninga opo u kwafele vamwe moukwaneumbo, ile meongalo. Didilika yo osho sha li sha ningilwa Tabita naBarnabas omolwokuningila vamwe ouwa. Ngaashi vo, naave oto dulu okumona ouwa.

Ohatu dulu yo okudiladila kombinga yovanhu vopefimbo letu ovo hava longo ouwa. Pashihopaenenwa, diladila kovakulunhuongalo hava longo  noudiinini meongalo ovo ‘ve hole ouwa.’ Ino dimbwa yo ovamwameme ovadiinini meendjovo nomoilonga ovo ve li “ovalongi vomwaashi shiwa.” (Tit. 1:8; 2:3) Omumwameme wedina Roslyn okwa ti: “Kaume kange oha ningi eenghendabala a kwafele noku twe omukumo vamwe meongalo. Oha diladila kombinga yeenghalo davo naluhapu ohe va pe eeshali di li paunafangwa ile e va kwafele meenghedi dimwe vali. Ondi wete kutya oku li omunhu muwa.”

Jehova okwa ladipika oshiwana shaye shi ‘konge eshi shiwa.’ (Amos 5:14) Ngeenge otwa ningi ngaho, otashi ke tu kwafela tu kale tu hole osho Jehova a ti oshiwa notu kale twa hala okuninga osho shiwa.

Ohatu kendabala okukala ovanhu vawa nosho yo okulonga ouwa

Opo tu kale ovanhu vawa, inatu pumbwa okuningila vamwe oinima inene, ile oku va pa eeshali dondilo. Oku shi faneka: Mbela omufaneki ota ka longifa ashike okabrasha kamwe ile vavali opo a painde efano? Ahowe. Ponhele yaasho, ota ka longifa oubrasha vahapu opo a painde efano laye. Sha faafana, ouwa wetu otau dulu okulimonikila meenghedi dihapu.

Ombiibeli otai tu ladipike tu ‘lilongekide’ okulonga ouwa. (2 Tim. 2:21; Tit. 3:1) Ngeenge otwa kala tu shii kutya oshike tashi ningilwa vamwe, otashi dulika tu konge eenghedi omo hatu dulu ‘oku va yakula mouwa opo va tungwe.’ (Rom. 15:2) Osho osha kwatela mo oku va pa osho tu na. (Omayel. 3:27) Ohatu dulu okushiva vamwe tu lye pamwe navo, ile tu kale tu neendafano tali tungu. Ngeenge otu shii umwe oo ta yahama, ohatu dulu oku mu shangela okakalata, oku mu talela po, ile tu mu dengele ongodi. Otashi dulika tu mone eemhito dihapu omo hatu dulu okupopya eendjovo “diwa dokutungafana, da wapala okupwilikina.” — Ef. 4:29.

Ngaashi Jehova, nafye ohatu lalakanene okuningila ovanhu aveshe ouwa. Onghee ihatu ungaunga novanhu nonhondo. Onghedi imwe hatu dulu okuninga ngaho, omokuudifila ovanhu aveshe onghundana iwa yOuhamba. Ngaashi Jesus a popya, ohatu lalakanene okuningila ouwa nokuli novatondi vetu. (Luk. 6:27) Inashi puka okukenukila nokuningila vamwe ouwa, molwaashi “kape na omhango i nondubo noilonga ya tya ngaho.” (Gal. 5:22, 23) Ngeenge hatu ningi ouwa nokuli nonande ovanhu otava ungaunga nafye nai, otashi dulika tu kwafele vamwe ve uye moshili nova fimaneke Kalunga. — 1 Pet. 3:16, 17.

OHATU MONO OUWA NGEENGE HATU LONGO OUWA

“Omulumenhu muwa muye mwene,” ile tu tye omunhu muwa ota mono ondjabi omolwoilonga yaye. (Omayel. 14:14) Ondjabi oyo ta dulu okumona ongaashi shike? Ngeenge ohatu ningile vamwe ouwa, navo otashi dulika va ungaunge nawa nafye. (Omayel. 14:22) Nonande ovanhu itava ungaunga nawa nafye, natu twikile oku va ningila ouwa. Oshidjemo, otashi dulika va lundulule oikala yavo, ndele tava hovele okuungaunga nawa nafye. — Rom. 12:20.

Vahapu ova popya nghee va mona ouwa eshi hatu va ningile ouwa nova efa po okulonga owii. Diladila koshimoniwa shaNancy. Okwa ti: “Kanda li ndi na ko nasha, ndi na eenghedi dii, noihandi fimaneke vamwe. Ashike onda li handi kala nda hafa, eshi nde lihonga nokutula moilonga omifikamhango daKalunga di na sha naasho shiwa. Paife ohandi fimaneke vamwe.”

Etomheno letu la denga mbada lokukulika ouwa olo okuhafifa Jehova. Nonande ovanhu vahapu ihava mono osho hatu ningi, Jehova ohe shi mono. Oilonga nomadiladilo etu mawa oku a shii. (Ef. 6:7, 8) Ohe tu pe ondjabi ngahelipi? “Ou muwa ta hokiwa kOmwene.” (Omayel. 12:2) Onghee natu twikileni okukulika ouwa. Jehova okwa udaneka kutya, “oshinge nefimano nombili okukeshe tuu ou ta wanifa ouwa.” — Rom. 2:10.

^ par. 2 Omadina oo hao ovanhu ovo lelalela.