Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OSHITUKULWA SHOKUKONAKONWA 27

Lilongekidila omahepeko paife

Lilongekidila omahepeko paife

“Aveshe ovo va hala okukala metilokalunga muKristus Jesus, otava ka hepekwa.” — 2 TIM. 3:12.

EIMBILO 129 Natu twikile okulididimika

EXUKU LOSHITUKULWA *

1. Omolwashike twa pumbwa okulilongekidila omahepeko?

MOUFIKU oo wa tetekela efyo lOmwene wetu Jesus, okwa li a ulika kutya aveshe ovo va hoolola okuninga ovahongwa vaye otava ka kala ve tondike. (Joh. 17:14) Fiyo okunena, Ovakriste ovadiinini otava hepekwa kovanhu ovo ihava longele Jehova. (2 Tim. 3:12) Eshi exulilo longhalelo ei yoinima tali ende tali ehene popepi, otwa teelela ovatondi vetu ve tu pataneke shi dulife nokuli nale. — Mat. 24:9.

2-3. (a) Omolwashike oumbada wa nyika oshiponga? (b) Oshike hatu ka kundafana moshitukulwa eshi?

2 Ongahelipi hatu dulu okulilongekidila okuhepekwa paife? Inatu hala okukala hatu diladila koinima aishe oyo hatu ka ningilwa. Ngeenge otwa kala hatu diladila kuyo, ohatu ka kwatwa koumbada nokoshisho. Ngeenge otwa kala hatu diladila koinima ii oyo tai dulu oku tu ningilwa, otashi dulika tu kwatwe koumbada ndele hatu efa po okulongela Jehova. (Omayel. 12:25; 17:22) Oumbada oo omwiyo u na eenghono oo ‘omutondi wetu, Satana’ ha longifa. (1 Pet. 5:8, 9) Oshike twa pumbwa okuninga paife opo tu lilongekidile okuhepekwa?

3 Moshitukulwa eshi ohatu ka konakona nghee hatu dulu okupameka ekwatafano letu naJehova nosho yo kutya omolwashike sha fimana okuninga ngaho paife. Ohatu ka kundafana yo osho tu na okuninga opo tu kale tu na ouladi. Nohauxuuninwa, ohatu ka konakona osho tu na okuninga ngeenge ovanhu ove tu tonde.

NGHEE TO DULU OKUPAMEKA EKWATAFANO LOYE NAJEHOVA

4. Ovaheberi 13:5, 6 otave tu lombwele shike, nomolwashike sha fimana okuninga ngaho?

4 Kala wa tomhwa kutya Jehova oku ku hole nonokutya ite ku fii po nande. (Lesha Ovaheberi 13:5, 6.) Omido da ka lupuka, Oshungonangelo imwe oya ti: “Omunhu oo e shii Kalunga nawanawa oha kala e mu lineekela unene nopefimbo ta yelekwa.”  Osho oshoshili. Opo tu lididimikile okuhepekwa, otwa pumbwa okukala tu hole Jehova noku mu lineekela nomutima aushe nokuha kala twa limbililwa kutya oku tu hole. — Mat. 22:36-38; Jak. 5:11.

5. Oshike tashi dulu oku ku kwafela u mone kutya Jehova oku ku hole?

5 Lesha Ombiibeli efiku keshe nelalakano lokweehena popepi elela naJehova. (Jak. 4:8) Eshi to lesha, yandja elitulemo komaukwatya mawa aJehova. Kendabala okumona kutya oku ku hole eshi tolesha oinima oyo a popya nokwa ninga. (Ex. 34:6) Vamwe otashi dulika va mone shidjuu okwiitavela kutya Kalunga oku va hole molwaashi inava ulikilwa nande onale ohole. Ngeenge osho u udite ngaho, kendabala okushanga efiku keshe eenghedi omo Jehova e ku fila onghenda nosho yo olukeno. (Eps. 78:38, 39; Rom. 8:32) Eshi to diladila koimoniwa yoye nokudilonga kwaasho wa lesha mEendjovo daKalunga, oto ka dula okushanga oinima ihapu oyo Jehova e ku ningila. Ekwatafano loye naJehova otali ka kala la pama ngeenge owa kala u na olupandu moinima aishe oyo e ku ningila. — Eps. 116:1, 2.

6. She likolelela kEpsalme 94:17-19, ongahelipi okwiilikana tashi di komutima taku dulu oku ku kwafela?

6 Ilikana pandjikilile. Diladila kokamatyona ka papatelwa kuxe omunahole. Ohaka kala ke udite ka amenwa nohaka kala ka manguluka okulombwela xe kombinga yoinima iwa naayo ii oyo ye ka ningilwa efiku olo. Naave oto dulu okukala u na ekwatafano la tya ngaho ngeenge owa ehene popepi naJehova efiku keshe okupitila meilikano tali di komutima. (Lesha Epsalme 94:17-19.) Eshi to ilikana kuJehova, “tilashi omwenyo woye ngaashi omeva” nokulombwela Xo omunahole kombinga yoinima aishe oyo hai ku mbadapaleke nosho yo oisho yoye. (Omaimb.kemo. 2:19) Oshidjemo otashi ka kala shike? Oto ka mona ‘ombili yaKalunga ei i dule eendunge adishe’ oyo ya popiwa mOmbiibeli. (Fil. 4:6, 7) Ngeenge owa ilikana monghedi ya tya ngaho, oto ka kala u udite wa ehena popepi elela naJehova. — Rom. 8:38, 39.

Ohatu dulu okukala ovaladi ngeenge otwa kala neitavelo la kola muJehova nosho yo mOuhamba waye

Stanley Jones okwa li a pamekwa keshiivo laye li na sha nOuhamba waKalunga (Tala okatendo 7)

7. Omolwashike u na okwiitavela kutya omaudaneko aKalunga e na sha nOuhamba waye otaa ka wanifwa po shili?

7 Kala wa tomhwa kutya omaudaneko aKalunga e na sha nOuhamba otaa ka wanifwa shili. (Num. 23:19) Ngeenge eitavelo loye momaudaneko oo ola nghundipala, otashi ka kala shipu kuSatana novayambididi vaye ve ku tilife. (Omayel. 24:10; Heb. 2:15) Ongahelipi to dulu okukala u na elineekelo mOuhamba waKalunga paife? Konga efimbo u konakone omaudaneko aKalunga e na sha nOuhamba waye nosho yo kutya omolwashike wa itavela kutya otaa ka wanifwa shili. Osho otashi ku kwafele ngahelipi? Diladila koshihopaenenwa shaStanley Jones, oo a li modolongo oule womido heyali omolweitavelo laye. * Oshike sha li she mu kwafela e lididimike? Okwa ti: “Onda li nda pamekwa keshiivo li na sha nOuhamba waKalunga,  osho tau ka wanifa noka nda li nda limbililwa, naasho osho sha kwafela nge ndiha tengauke.” Ngeenge owa kala u na eitavelo la pama momaudaneko aKalunga, oto ka ehena popepi elela naye noito ka efa oumbada u ku imbe u mu longele. — Omayel. 3:25, 26.

8. Etaleko letu li na sha nokwoongala ohali ulike shike? Shi yelifa.

8 Kala ho ongala pandjikilile. Okwoongala ohaku tu ehenifa popepi naJehova. Etaleko letu li na sha nokwoongala ohali ulike nghee hatu ka ungaunga nomahepeko monakwiiwa. (Heb. 10:24, 25) Omolwashike hatu tile ngaho? Ngeenge ohatu imbwa koinima yanafangwa paife okukala pokwoongala, ongahelipi hatu ka dula okutula eemwenyo detu moshiponga opo tu dule okukala pamwe novaitaveli vakwetu pefimbo opo nokuli tashi dulika tu tule eemwenyo detu moshiponga? Ngeenge otwa kala hatu ongala pamwe pandjikilile, itatu ke liyandja eshi ovapataneki tava ka kendabala oku tu imba tu ongale pamwe. Paife olo efimbo lokukala hatu ongala pamwe. Ngeenge otwa kala tu hole okwoongala, kape na osho tashi ke tu efifa po okudulika kuKalunga ponhele yokudulika kovanhu, kutya nee omapataneko ile omapangelo. — Oil. 5:29.

Okulihonga omishangwa nosho yo omaimbilo Ouhamba paife, otashi ke ku kwafela u a dimbuluke pefimbo lomahepeko (Tala okatendo 9) *

9. Omolwashike okushiiva omishangwa momutwe ku li onghedi iwa yokulilongekidila omahepeko?

9 Lihonga omishangwa odo u hole momutwe. (Mat. 13:52) Otashi dulika uhe di dimbulukwe, ashike Jehova ota dulu okulongifa omhepo yaye iyapuki e ku dimbulukife omishangwa odo. (Joh. 14:26) Didilika nghee omumwatate umwe oo a li a tulwa modolongo muGermany lokoushilo oye aeke a popya, okwa ti: “Osha li enangekonoupuna molwaashi onda li ndi shii omishangwa dihapu. Nonande onda li nde likalela, onda li handi kala nde lipyakidila nokudilonga komishangwa da yoolokafana.” Omishangwa odo oda li da kwafela omumwatate a ehene popepi naJehova noku lididimike.

(Tala okatendo 10) *

10. Omolwashike tu na okulihonga omaimbilo momutwe?

10 Lihonga momutwe nokwiimba omaimbilo oo taa fimanekifa Jehova. Eshi Paulus naSilas va li modolongo muFilippi ova li va fimaneka Jehova nomaimbilo oo va li ve lihonga. (Oil. 16:25) Sha faafana, ongahelipi ovamwatate vomuSoviet Union va li ve lipameka eshi va li moukwatwa moSiberia? Omumwameme Mariya Fedun okwa ti: “Otwa li twa imba omaimbilo aeshe oo twe lihonga.” Okwa popya a ti kutya omaimbilo oo okwa li e va pameka nokwe va kwafela va kale ve udite va ehena popepi naJehova.  Mbela oho kala u udite wa pamekwa ngeenge to imbi omaimbilo Ouhamba oo u hole? Onghee lihonga omaimbilo oo paife. Tala oshimhungu “ Jehova, pe nge ouladi.”

OSHO TO DULU OKUNINGA OPO U KALE U NA OULADI

11-12. (a) She likolelela ku 1 Samuel 17:37, 45-47, omolwashike David a li e na ouladi? (b) Oshilihongomwa sha fimana shilipi hatu lihongo moshihopaenenwa shaDavid?

11 Owa pumbwa ouladi opo u lididimikile omahepeko. Oshike to dulu okuninga ngeenge ou wete kutya ku na ouladi? Dimbuluka kutya okukala omuladi inashi likolelela kutya ou fike peni, keenghono doye, ile kokudula kwoye. Diladila koshihopaenenwa shomunyasha David eshi a li a lwifa Goliat. Okuyelekanifa nomutongolume oo, David okwa li munini, ehe na eenghono noka li a deulilwa okulwa. Ka li nokuli e na eongamukonda. Ashike okwa li e na ouladi. Okwa li a ka lwifa nouladi omutongolume oo a li e na ounhwa.

12 Omolwashike David a li e na ouladi? Okwa li a itavela filufilu kutya Jehova oku li pamwe naye. (Lesha 1 Samuel 17:37, 45-47.) David ka li ta yandje elitulemo kounene waGoliat okuyelekanifa naye. Ponhele yaasho, okwa li ta yandje elitulemo kunghee Goliat a li munini okuyelekanifa naJehova. Oshike hatu lihongo moshihopaenenwa osho? Ohatu ka kala tu na ouladi ngeenge otu na elineekelo kutya Jehova oku li pamwe nafye notu na oushili kutya ovapataneki vetu ovanini okuyelekanifa naKalunga ketu Omunaenghono adishe. (2 Omaf. 20:15; Eps. 16:8) Ongahelipi hatu dulu okukala tu na ouladi paife ofimbo omahepeko inaa hovela?

13. Ongahelipi hatu dulu okukala ovaladi? Shi yelifa.

13 Ohatu dulu okukala ovaladi paife mokuudifa moipafi onghundana iwa yOuhamba waKalunga. Omolwashike? Omolwaashi okuudifa ohaku tu hongo okulineekela muJehova nokufinda oumbada wokutila ovanhu. (Omayel. 29:25) Ngaashi ashike eenhumba detu hadi kala da pama ngeenge hatu ningi omadeulo, ohatu kala tu na ouladi ngeenge hatu udifa eumbo neumbo, meenhele daaveshe, oundombwedi wohangelela nosho yo pomangeshefelo. Ngeenge otwa kala hatu udifa nouladi paife, ohatu ka kala twe lilongekida okuudifa nokuli nonande oilonga yetu oya shilikwa. — 1 Tes. 2:1, 2.

Nancy Yuen okwa li a anya okweefa po okuudifa onghundana iwa (Tala okatendo 14)

14-15. Oshike hatu lihongo moshihopaenenwa shaNancy Yuen nosho yo shaValentina Garnovskaya?

14 Ohatu lihongo shihapu moshihopaenenwa shovamwameme vavali ovadiinini ovo va li va  ulika ouladi. Nancy Yuen okwa li e na oule wometa 1.5 mofika, ashike ka li ha tilifwa. * Okwa li a anya okweefa po okuudifa onghundana iwa yOuhamba waKalunga. Oshidjemo, okwa li a tulwa modolongo oule womido di dulife 20 moChina. Ovapolifi ovo va li ve mu pulapula ova ti kutya “oye omunhu umwe oo a li e na ekuni” moshilongo shavo.

Valentina Garnovskaya okwa li a tomhwa kutya Jehova oku li pamwe naye (Tala okatendo 15)

15 Sha faafana, Valentina Garnovskaya okwa li a tulwa modolongo moSoviet Union lwoikando itatu oule womido di dulife 21. * Omolwashike? Okwa li a tokola okutwikila okuudifa, novapolifi ova li ve mu tala ko e li “omunhu a nyika oshiponga neenghono.” Oshike sha li sha ningifa ovakainhu ovadiinini ovo vavali va kale ovaladi? Ova li va tomhwa kutya Jehova okwa li pamwe navo.

16. Oshike twa pumbwa opo tu kale ovaladi shili?

16 Opo tu kale ovaladi, inatu pumbwa okulineekela meenghono nosho yo mokudula kwetu. Ponhele yaasho, natu kale tu na elineekelo kutya Jehova oku li pamwe nafye nota lu ponhele yetu. (Deut. 1:29, 30; Sak. 4:6) Osho osho twa pumbwa opo tu kale ovaladi.

OSHO TO DULU OKUNINGA NGEENGE OVANHU VE KU TONDE

17-18. Ngaashi sha shangwa muJohannes 15:18-21, elondwelo lilipi Jesus e tu pa? Shi yelifa.

17 Ohatu kala twa hafa ngeenge ovanhu ve tu fimaneka, ashike inatu diladila kutya otu li ovanhu vongaho ngeenge vamwe kave tu hole. Jesus okwa ti: “Ovanelao nye ovanhu ngeenge tave mu tondo molwedina lOmona wOmunhu ndele have mu kondo mo nohave mu sheke, nedina leni have li dini la fa lii.” (Luk. 6:22) Okwa li a hala okutya shike?

18 Jesus ka li a hala okutya Ovakriste otava ka kala va hafa ngeenge ve tondike. Ponhele yaasho, okwa li te tu londwele shi na sha naasho tashi ke tu ningilwa. Katu fi oshitukulwa shounyuni. Ohatu tula moilonga omahongo aJesus nohatu udifa etumwalaka olo a li ha udifa. Noshidjemo, ounyuni ou tu tonde. (Lesha  Johannes 15:18-21.) Otwa hala okuhafifa Jehova. Ihatu udu nai ngeenge ovanhu ve tu tonde molwaashi tu hole Tate yetu.

19. Ongahelipi hatu dulu okuhopaenena oshihopaenenwa shovayapostoli?

19 Inatu efa nande osha osho ovanhu hava popi ile hava ningi shi tu ningife tu kale twa fya ohoni okukala Eendombwedi daJehova. (Mika 4:5) Ohatu dulu okufinda oumbada wokutila ovanhu ngeenge otwa kala hatu diladila kwaasho ovayapostoli va li va ninga konima eshi Jesus a dipawa. Ova li ve shii kutya ovawiliki vomalongelokalunga Oshijuda ove va tonde. (Oil. 5:17, 18, 27, 28) Ashike nande ongaho, ova li va twikila okuya kotembeli efiku keshe nokuliulika moipafi kutya ove li ovahongwa vaJesus. (Oil. 5:42) Kava li va efa oumbada u va kelele. Nafye ohatu dulu okufinda oumbada wokutila ovanhu ngeenge otwa kala hatu liulike pandjikilile moipafi kutya otu li Eendombwedi daJehova, koilonga, kofikola nosho yo ponhele opo hatu di. — Oil. 4:29; Rom. 1:16.

20. Omolwashike ovayapostoli va li va hafa nonande ova Ii ve tondike?

20 Omolwashike ovayapostoli va li va hafa? Ova li ve shii kutya ove tondike nova li ve shi tala ko shi li efimano okuungaungiwa navo nai omolwokulonga ehalo laJehova. (Luk. 6:23; Oil. 5:41) Lwanima omuyapostoli Petrus okwa ka shanga a ti: “Ndele nande omu hepekelwe ouyuki, onye ovanelao.” (1 Pet. 2:19-21; 3:14.) Ngeenge otu shii kutya otu tondike molwaashi hatu longo ouwa, itatu ka efa okulongela Jehova molwaashi ovanhu ve tu tonde.

OTO KA MONA OUWA NGEENGE OWA KALA HO LILONGEKIDA

21-22. (a) Mbela owa tokola okuninga shike opo u lilongekidile omahepeko? (b) Oshike hatu ka kundafana moshitukulwa tashi landula ko?

21 Katu shii kutya onaini ovanhu tava ka tameka oku tu hepeka ile kutya onaini omapangelo taa ka shilika oilonga yetu. Ndele otu shii kutya ohatu dulu okulilongekida paife mokupameka ekwatafano letu naJehova, okukala tu na ouladi nosho yo okulididimikila outondwe. Ngeenge otwe lilongekida paife, otashi ke tu kwafela tu twikile okulongela Jehova.

22 Ongahelipi ngeenge oilonga yetu oya shilikwa? Moshitukulwa tashi landula ko, ohatu ka kundafana omafinamhango Ombiibeli oo tae tu kwafele tu twikile okulongela Jehova nonande oilonga yetu oya shilikwa.

EIMBILO 118 “Tu wedela eitavelo”

^ par. 5 Inatu hala okukala tu tondike. Ashike atusheni mafiku ohatu ka hepekwa. Oshitukulwa eshi otashi ke tu kwafela tu kale ovaladi notu lilongekidile omahepeko.

^ par. 7 Tala Oshungonangelo yOshiingilisha yo 15 Desemba 1965, ep. 756-767.

^ par. 14 Tala Oshungonangelo yOshiingilisha yo 15 Juli 1979, ep. 4-7. Tala yo okavidio Jehovah’s Name Will Be Made Known ko-JW Broadcasting®. Inda opo pa shangwa INTERVIEWS AND EXPERIENCES.

^ par. 15 Tala o-Yearbook of Jehovah’s Witnesses (Embo lokomudo lEendombwedi daJehova) lomo 2008, ep. 191-192.

^ par. 67 OMASHANGELO OMAFANO: Ovadali tava longifa oukalata opo ova kwafele ovana ve lihonge omishangwa pelongelokalunga loukwaneumbo.

^ par. 70 OMASHANGELO OMAFANO: On the way to a meeting, a family practices singing Kingdom songs in the car.