Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OSHITUKULWA SHOKUKONAKONWA 35

Jehova okwa lenga ovapiya vaye ovalininipiki

Jehova okwa lenga ovapiya vaye ovalininipiki

‘Omwene ota yavelele omudinwa.’ — EPS. 138:6.

EIMBILO 48 Enda alushe pamwe naJehova

EXUKU LOSHITUKULWA *

1. Jehova oha kala e uditile ngahelipi ovalininipiki? Shi yelifa.

JEHOVA oku hole ovalininipiki. Ovo ve li shili ovalininipiki ovo ashike tava dulu okukala nekwatafano lopofingo naJehova. Ndele “ovalituliko ohe va dimbulukile kokule.” (Eps. 138:6) Atusheni otwa hala okuhafifa Jehova notwa hala a kale e tu hole, onghee osha fimana okukala ovalininipiki.

2. Ohatu ka kundafana shike moshitukulwa eshi?

2 Moshitukulwa eshi, ohatu ka kundafana omanyamukulo omapulo atatu taa landula: (1) Elininipiko oshike? (2) Omolwashike twa pumbwa okukala ovalininipiki? (3) Eenghalo dilipi tadi dulu okuyeleka elininipiko letu? Ngaashi hatu ke shi mona, ngeenge otwa kala ovalininipiki ohatu ka hafifa omutima waJehova notashi ke tu etela yo ouwa. — Omayel. 27:11; Jes. 48:17.

ELININIPIKO OSHIKE?

3. Elininipiko oshike?

3 Elininipiko olo okukala uhe na ounhwa ile elinenepeko. Ombiibeli oya ulika kutya omunhu oo omulininipiki oku na etaleko liwa li na sha nekwatafano laye naJehova Kalunga nosho yo novanhu vakwao. Omulininipiki okwa dimina kutya ovanhu aveshe ove mu dule monghedi yonhumba. — Fil. 2:3, 4.

4-5. Omolwashike omunhu oo ta monika a fa omulininipiki itashi ti kutya omulininipiki shili?

4 Ovanhu vamwe ohava monika ashike va fa ovalininipiki tashi dulika molwaashi va mwena ile ve na eehoni. Ile tashi dulika va hongwa kovadali vavo va kale va fimaneka ovanhu nove na eenghedi diwa. Ndele otashi dulika ve na ounhwa momitima  davo. Otashi dulika lwanima va ka holole kutya ove na omitima da tya ngahelipi. — Luk. 6:45.

5 Ovanhu vamwe ohava monika va fa ve na omukumo ile vehe na eehoni, ndele osho itashi ti kutya ove na ounhwa. (Joh. 1:46, 47) Ashike ovanhu ovo vehe na eehoni ove na okulungama filufilu vaha kale ve lineekela mokudula kwavo. Kashi na nee mbudi kutya otu na eehoni ile hasho, atusheni otu na okukendabala tu kale ovalininipiki.

Omuyapostoli Paulus okwa li omulininipiki (Tala okatendo 6) *

6. Ngaashi sha ulikwa mo 1 Ovakorinto 15:10, oshike hatu lihongo moshihopaenenwa shomuyapostoli Paulus?

6 Natu taleni koshihopaenenwa shomuyapostoli Paulus. Okwa li a longifwa kuJehova a tote po omaongalo mape moilando i lili noku lili. Okwa li yo a pondola shihapu moukalele e dule ovayapostoli vakwao vaJesus Kristus. Ashike nande ongaho, Paulus ka li e litala ko a fimana e dule ovamwaxe. Okwa popya nelininipiko ta ti: “Ame ondi dulike kovayapostoli aveshe, inandi wana okwiifanwa omuyapostoli, osheshi ame nda taataele eongalo laKalunga.” (1 Kor. 15:9) Paulus okwa li a popya mondjila eshi a ti kutya oku na ekwatafano lopofingo naJehova, ashike hamolwoilonga ile omaukwatya aye mawa, ndele omolwefilonghenda laKalunga. (Lesha 1 Ovakorinto 15:10.) Paulus ine tu tulila po tuu oshihopaenenwa shiwa shelininipiko monhumwafo yaye oyo a shangela Ovakorinto, unene tuu eshi tu shii kutya vamwe meongalo ova li ve litala ko ve mu dule! — 2 Kor. 10:10.

Karl F. Klein, omumwatate omulininipiki oo a li oshilyo sholutuwiliki (Tala okatendo 7)

7. Ongahelipi ovamwatate vamwe voshinakuwanifwa vokunena va ulika elininipiko? Yandja oshihopaenenwa.

7 Vahapu vomoshiwana shaJehova ohava tuwa omukumo kondjokonona yonghalamwenyo yomumwatate Karl F. Klein, oo a li oshilyo shOlutuwiliki. Omumwatate Klein okwa popya nelininipiko mondjokonona yonghalamwenyo yaye kombinga yomaunghundi aye  nomaupyakadi oo a shakeneka monghalamwenyo yaye. Pashihopaenenwa, mo 1920, okwa li e wete oilonga yokuudifa eumbo neumbo idjuu nokwa li a ninga oule womido mbali e i efa po. Lwanima, eshi a li ta longo koBetel okwa li a handuka oule wefimbo konima eshi a li a pewa omayele. Okwa li a kwatwa koupyakadi wopamadiladilo, oo lwanima wa ka dja po. Kakele kaasho, okwa li yo ha hafele omaufembanghenda a denga mbada. Osha li tashi pula lela elininipiko opo omumwatate oo a li e shiivike nawa a dimine omaunghundi aye. Ovamwatate novamwameme vahapu ohava dimbuluka nehafo ondjokonona yonghalamwenyo i li paushili yomumwatate Klein. *

OMOLWASHIKE TWA PUMBWA OKUKALA OVALININIPIKI?

8. Ongahelipi 1 Petrus 5:6, te tu kwafele tu mone kutya okukala omulininipiki ohashi hafifa Jehova?

8 Etomheno la fimanenena molwaashi tu na okukala ovalininipiki ololo kutya ohashi hafifa Jehova. Omuyapostoli Petrus okwe shi yelifa nawa. (Lesha 1 Petrus 5:6.) Embo “Ila, u shikule nge” ola kundafana osho Petrus a popya la ti: “Elinenepeko ola fa oudiyo. Oidjemo yalo otai dulu okukala ii. Olo oukwatya oo tau dulu okuningifa omunhu oo e na ounghulungu wa denga mbada a kale ehe fi sha kuJehova. Ndele elininipiko, otali dulu okuningifa nokuli nomudinwa a kale e na ongushu momesho aJehova. . . . Kalunga ketu ota ka kala . . . a hafa oku ku pa ondjabi omolwelininipiko loye.” * Kape na vali oshinima shimwe sha denga mbada osho hatu dulu okuninga shi dulife okuhafifa omutima waJehova! — Omayel. 23:15.

9. Ongahelipi elininipiko hali nanene vamwe popepi nafye?

9 Kakele kokuhafifa Jehova, ohatu mono omauwa mahapu ngeenge otu li ovalininipiki. Elininipiko ohali nanene vamwe popepi nafye. Opo u shi ude ko nawa, diladila kutya oho hafele okukala novanhu velipi po. (Mat. 7:12) Ihatu hafele okukala novanhu ovo ve hole ashike oinima tai ningwa monghedi yavo noihava pwilikine komaetepo avamwe. Mepingafano naasho, ohatu hafele okukala pamwe novaitaveli vakwetu ovo ve na ‘omukoo umwe, hava filafana onghenda, ve hole ovamwatate, ve na olukeno nelininipiko.’ (1 Pet. 3:8) Ngeenge ohatu nanenwa kovalininipiki, navo otava ka nanenwa kufye ngeenge otwe lininipika.

10. Omolwashike hashi kala shipu kovalininipiki okulididimikila omaudjuu?

10 Elininipiko ohali shi ningifa shipu okulididimikila  omaudjuu. Omafimbo amwe ohatu mono ile hatu shakeneke oinima oyo hatu diladila kutya kai li pauyuki. Omulumenhu omunaendunge, ohamba Salomo, okwa ti: “Ame nda mona ovapika va londa eenghambe, ndelenee eehamba da enda ngaashi ovapiya kolupadi pedu.” (Omuud. 10:7) Ovanhu ovo ve na owino muhapu haalushe hava tangwa ile hava fimanekwa. Ndele ovo vehe na owino muhapu omafimbo amwe ohava tumbalekwa nove holike. Ohamba Salomo oya mona kutya otwa pumbwa okutambula ko onghalamwenyo i li ngaashi i li, ndele katu na okukala twa nyematela osho i li. (Omuud. 6:9) Ngeenge otwe lininipika, ohatu ka tambula ko onghalamwenyo i li ngaashi i li, ndele itatu ka diladila i kale ngaashi twa hala.

EENGHALO DILIPI TADI DULU OKUYELEKA ELININIPIKO LETU?

How can situations such as this one test our humility? (See paragraphs 11-12) *

11. Otu na okulinyenga ngahelipi ngeenge hatu pewa omayele?

11 Efiku keshe ohatu kala tu na eemhito dokuulika elininipiko. Natu ka taleni keenghalo donhumba. Ngeenge hatu pewa omayele. Otu na okudimbuluka kutya ngeenge umwe a katuka onghatu e tu pe omayele, otashi ulike kutya otwa ninga epuko la kwata moiti inatu shi didilika. Ndele otashi dulika potete tu kale inatu hala okutambula ko omayele oo. Otashi dulika tu kembaule omunhu oo e tu pa omayele ile onghedi omo e a yandja. Ashike ngeenge otwe lininipika, ohatu ka kendabala tu kale tu na etaleko la yuka.

12. Metwokumwe nOmayeletumbulo 27:5, 6, omolwashike tu na okupandula oo e tu pa omayele? Shi yelifa.

12 Omulininipiki oha pandula ngeenge a pewa omayele. Oku shi faneka: Natu tye nee ngeno ou li pokwoongala kwopaKriste. Konima eshi wa popya novaitaveli vakweni vonhumba, umwe okwe ku ifana po, ndele te ku lombwele nelungi kutya ou na oikulya momayoo. Nopehe na omalimbililo, oto ka kala wa fya ohoni. Ndele mbela ito ka kala yo we mu pandula eshi e ku lombwela? Otashi dulika u diladile kutya ngeno owa lombwelelwe diva. Sha faafana, otu na okupandula nelininipiko omwiitaveli mukwetu oo a katuka onghatu nouladi e tu pe omayele oo twa pumbwa. Otu na okutala ko omunhu oo e li kaume ketu, ndele ke fi omutondi wetu. — Lesha Omayeletumbulo 27:5, 6; Gal. 4:16.

Omolwashike twa pumbwa elininipiko ngeenge vamwe va pewa oinakuwanifwa meongalo? (Tala okatendo 13-14)) *

13. Ongahelipi hatu dulu okuulika elininipiko ngeenge vamwe va pewa oinakuwanifwa meongalo?

13 Ngeenge vamwe va pewa oinakuwanifwa meongalo. Omukulunhuongalo wedina Jason okwa ti: “Ngeenge nda mono vamwe va pewa oinakuwanifwa meongalo, omafimbo amwe onda li handi lipula kutya omolwashike aame  inandi i pewa.” Mbela naave osho ho kala u udite ngaho? Inashi puka okukala wa “hala” oinakuwanifwa meongalo. (1 Tim. 3:1) Ndele otu na okulungamena osho hatu diladila. Ngeenge inatu lungama, ohatu dulu okweefa ounhwa u mene omidi momitima detu. Pashihopaenenwa, omulumenhu Omukriste otashi dulika a hovele okudiladila kutya oye a wana unene okulonga oilonga yonhumba meongalo. Ile omukulukadi Omukriste otashi dulika a tye, ‘Omushamane wange oku na owino muhapu e dule ngadi!’ Ashike ngeenge otwe lininipika shili, ohatu ka henuka omhepo ya tya ngaho younhwa.

14. Oshike hatu lihongo monghedi omo Moses a li e linyenga eshi vamwe va li va pewa oinakuwanifwa?

14 Ohatu dulu okulihonga konghedi omo Moses a li e linyenga eshi vamwe va li va pewa oinakuwanifwa. Moses okwa li a lenga neenghono oshinakuwanifwa shaye shokuwilika oshiwana shaIsrael. Ndele mbela okwa li e linyenga ngahelipi eshi Jehova a yandja po oilonga imwe kuvamwe? Ka li a twa ondubo. (Num. 11:24-29) Ashike okwa li a efa vamwe nelininipiko ve mu kwafele moshilonga shokutokola ovanhu. (Ex. 18:13-24) Kungaho, Ovaisrael ova li tava ka mona diva eyakulo olo va pumbwa. Osho otashi ulike kutya Moses okwa li a pitifa komesho ouwa woshiwana ponhele yokupitifa komesho oinakuwanifwa yaye. Osho kashi fi tuu oshihopaenenwa shiwa kufye! Natu dimbuluke kutya ngeenge otwa hala okulongifwa kuJehova, okukala ovalininipiki osho sha fimanenena, ndele hawino wetu. Nonande ‘Omwene Oye a tumbala, ota yavelele omudinwa.’ — Eps. 138:6.

15. Ongahelipi eenghalo dovamwatate novamwameme vahapu da lunduluka?

15 Ngeenge twa taalela eenghalo dipe. Omido opo da di ko, ovamwatate novamwameme vahapu ovo va longela Jehova omido dihapu ova pewa oinakuwanifwa imwe. Pashihopaenenwa, mo 2014, ovapashukili voitukulwa nosho yo ovakulukadi vavo ova pulwa va ka longe moilonga  imwe vali yefimbo li yadi. Okuhovela momudo oo, omupashukilishikandjo ngeenge okwa wanifa omido 70 ita twikile vali noshilonga osho. Ovamwatate ovo ve na omido 80 ile ve dule po itava longo vali momaongalo ve li ovaunganeki volutu lovakulunhuongalo. Kakele kaasho, omido donhumba da pita, Ovabetel vahapu ova tuminwa moukalele. Vamwe ova efa po oilonga yefimbo li yadi ye likalekelwa omolwokuhe na oukolele, oinakuwanifwa youkwaneumbo, ile eenghalo dimwe vali dopaumwene.

16. Ongahelipi ovamwatate novamwameme va ulika elininipiko eshi tava tambula ko eenghalo davo dipe?

16 Osha li shidjuu kovamwatate novamwameme ovo okuninga omalunduluko a tya ngaho. Ova li ve hole oinakuwanifwa yavo ikulu oyo vamwe va longe oule womido. Vamwe ova kala va nyika oluhodi eshi tava ende tava ikilile eenghalo davo dipe. Ndele mokweendela ko kwefimbo ove ke di tambula ko. Omolwashike mbela? Omolwaashi ove hole Jehova. Ove shi shii kutya ove liyapulila Kalunga, ndele handodo ile oilonga yonhumba. (Kol. 3:23) Otava twikile okulongela Jehova oshilonga keshe tave shi ningi nehafo nonelininipiko. Otave ‘mu dike oisho yavo,’ molwaashi ove shi shii kutya ote va file oshisho. — 1 Pet. 5:6, 7.

17. Omolwashike tu na okukala twa hafa eshi Ombiibeli tai tu ladipike tu kale ovalininipiki?

17 Mbela inatu hafa eshi Ombiibeli tai tu ladipike tu kale ovalininipiki? Ngeenge otwa kulike oukwatya oo wa denga mbada, otashi tu etela ouwa nosho yo vamwe. Ohatu ka dula okulididimikila omaupyakadi monghalamwenyo. Naasho sha fimanenena, ohatu ka ehena popepi elela naTate yetu womeulu. Inatu hafa tuu eshi tu shii kutya nonande Jehova ‘Omufimanekwa ou ha kala moukwaalushe’ oku hole nokwa lenga ovapiya vaye ovalininipiki! — Jes. 57:15.

EIMBILO 45 Omadilongo omomutima wange

^ par. 5 Elininipiko olimwe lomomaukwatya a fimanenena oo twa pumbwa okukulika. Elininipiko oshike? Omolwashike twa pumbwa okukala ovalininipiki? Eenghalo dilipi tadi dulu okuyeleka elininipiko letu? Ohatu ka kundafana omapulo oo a fimana moshitukulwa eshi.

^ par. 7 Tala oshitukulwa Jehovah Has Dealt Rewardingly With MemOshungonangelo yOshiingilisha ye 1 Oktoba 1984.

^ par. 8 Tala Etuk. 3, okat. 23.

^ par. 53 OMASHANGELO OMAFANO: Omuyapostoli Paulus e li meumbo lomumwatate umwe ta hafele nelininipiko eendafano novaitaveli vakwao, mwa kwatelwa ovanyasha.

^ par. 57 OMASHANGELO OMAFANO: Omumwatate ta tambula ko omayele a kanghamena kOmbiibeli oo ta pewa komumwatate omunyasha.

^ par. 59 OMASHANGELO OMAFANO: Omumwatate omunamido ina twila ondubo omumwatate omunyasha oo ta hafele oshinakuwanifwa shonhumba meongalo.