Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) SEPTEMBA 2016

Mbela onghedi yoye yokudjala otai fimanekifa ngoo Kalunga?

Mbela onghedi yoye yokudjala otai fimanekifa ngoo Kalunga?

“Ashishe shi ningeni okufimanekifa Kalunga.” — 1 KOR. 10:31.

OMAIMBILO: 34, 61

1, 2. Omolwashike Eendombwedi daJehova hadi diinine omifikamhango di na sha nokudjala? (Tala efano pehovelo loshitukulwa.)

OSHIFOKUNDANEKI shOshidutch osho sha popya kombinga yoshoongalele shovawiliki vomalongelokalunga osha ti: “Ohatu mono ovanhu vahapu va djala omidjalo inadi filwa oshisho unene tuu ngeenge ku na oupyu. Ashike poyoongalele yEendombwedi daJehova hasho hashi kala ngaho. . . . Ovamati novashamane ohava djala eeshuta neetaye, ofimbo oukadona novakulukadi hava djala eefulukweva dile . . . di shi okuya pokati kovanhu notadi monika nawa.” Oshoshili kutya Eendombwedi daJehova ohadi pandulwa luhapu ‘omolweenghedi diwa nokuliwapeka noshishohoni noukoshoki, noilonga iwa ei tai wapalele ovo tave lihepaulula kutya, vo oonakutilakalunga.’ (1 Tim. 2:9, 10) Omuyapostoli Paulus okwa li ta popi kombinga yovakainhu, ashike efinamhango olo otali longo yo nokovalumenhu Ovakriste.

2 Omafinamhango e na sha nokudjala nawa okwa fimanenena kufye tu li oshiwana shaJehova nosho yo kuJehova oo hatu longele. (Gen. 3:21) Osho Omishangwa da popya kombinga yokudjala nokuliwapeka otashi ulike lela kutya Omupangeli weshito alishe okwa tulila po ovalongeli vaye vashili omifikamhango diwa di na sha  nokudjala. Onghee hano, ngeenge hatu hoolola oidjalomwa ile onghedi yokuliwapeka, kai na okukala ye likolelela ashike kwaashi tu hole, ile osho tashi tu wapalele. Ashike oi na yo okukala tai fimanekifa Omunamapangelo aeshe, Jehova.

3. Oshike hatu lihonga mOmhango yaKalunga oyo a li a pa Ovaisrael i na sha nomidjalo?

3 Pashihopaenenwa, Omhango yaKalunga oyo ya li ya pewa Ovaisrael oya li ye va amena keenghedi inadi koshoka doiwana oyo ya li ye va dingilila. Omhango oya li ya ulika nghee Jehova a li e uditile omidjalo odo itadi ulike eyooloko pokati kovalumenhu novakainhu, odo da talika ko kunena kutya otadi dulu okudjalwa komunhu woukashike kookanhu keshe. (Lesha Deuteronomion 22:5.) Onghedi omo Kalunga a popya kombinga yokudjala oya ulika lela kutya iha hokwa onghedi yokudjala oyo hai ningifa ovalumenhu va kale tava monika va fa ovakainhu, ile ovakainhu va kale tava monika va fa ovalumenhu, ile hai shi ningifa shidjuu okuyoolola pokati komulumenhu nomukainhu.

4. Oshike tashi dulu okukwafela Ovakriste va ninge omatokolo e li mondjila e na sha nokudjala?

4 MEendjovo daKalunga omu na omafinamhango oo haa kwafele Ovakriste va ninge omatokolo e li mondjila e na sha nanghee ve na okudjala, kashi na neembudi kutya ove li peni, ova dja momaputuko elipi, ile ove li momudingonoko u na onghalo yomhepo ya tya ngahelipi. Inatu pumbwa omusholondodo woikutu oyo tu na okudjala naayo tuhe na okudjala. Ponhele yaasho, ohatu wilikwa komafinamhango Ombiibeli oo hae tu pe emanguluko lokuninga omatokolo pauhandimwe. Natu ka taleni komafinamhango amwe Ombiibeli oo taa dulu oku tu kwafela tu kale tu shi okukonakona kutya “ehalo laKalunga lilipi, naashi shiwa, sha wapalela nosha wana” ngeenge hatu hoolola osho hatu djala. — Rom. 12:1, 2.

“OHATU LIHOLOLA OFYE OVAYAKULI VAKALUNGA”

5, 6. Omidjalo detu odi na okukuma vamwe ngahelipi?

5 Omuyapostoli Paulus okwa li a nwefwa mo opo a divilike efinamhango la fimana olo li li mo 2 Ovakorinto 6:4. (Lesha.) Eholokepo letu ohali holola shihapu kombinga yetu. Ovanhu vahapu ohava fiki pexulifodiladilo kombinga yetu molwaashi ohava “tale osho shokombada.” (1 Sam. 16:7) Onghee hano, tu li ovakalelipo vaKalunga ihatu djala ashike oikutu oyo tu hole molwaashi tu wete tu li mo nawa. Omafinamhango Ombiibeli oku na oku tu linyengifa tu henuke okudjala oikutu ya pama kolutu, hai limonikila, ile tai pendula omahalo opamilele. Naasho otashi ke tu kwafela tu henuke okudjala oikutu oyo tai ulike ile ya tenda ko oilyo yolutu. Oidjalomwa yetu kai na okuningifa vamwe va kale va fya ohoni oku tu tala.

6 Ngeenge otwa koshoka, twa djala nawa notwe liwapeka nawa, ovanhu otave ke tu fimaneka tu li ovakalelipo vOmwene Omunamapangelo aeshe Jehova, notashi dulika va ka nanenwe kuye. Ndele natango omidjalo detu diwa otadi ka yandja efano liwa li na sha nehangano olo tu lile po. Oshidjemo, vamwe otashi dulika va kale va hala okupwilikina ketumwalaka letu lexupifo.

7, 8. Opeemhito dilipi unene twa pumbwa okudjala oikutu tai wapalele?

7 Molwaashi otwa humbata etumwalaka olo tali fimanekifa Kalunga, otwa pumbwa okudjala nawa omolwaKalunga ketu omuyapuki, nomolwovamwatate novamwameme nosho yo ovanhu ovo ve li moshitukulwa omo hatu udifile. (Rom. 13:8-10) Otu na okukala hatu djala nawa unene tuu ngeenge hatu kufa ombinga momalipyakidilo opaKriste ngaashi okuya kokwoongala ile ngeenge hatu i moilonga yokuudifa. Otu na okudjala monghedi oyo “tai wapalele [ovanhu] ovo otave lihepaulula kutya, vo oonakutilakalunga.” (1 Tim. 2:10) Oshoshili kutya oikutu imwe otashi dulika i kale tai wapalele okudjalwa peenhele  dimwe ofimbo imwe itai wapalele. Onghee hano, oshiwana shaJehova mounyuni aushe ohashi kaleke momadiladilo osho sha tambulwa ko moshitukulwa opo vaha pundukife vamwe.

Mbela onghedi yoye yokudjala otai ka fimanekifa ngoo Kalunga u li omukalelipo waye? (Tala okatendo 7, 8)

8 Lesha 1 Ovakorinto 10:31. Ngeenge hatu i koyoongalele, otu na okukala hatu djala oikutu tai wapalele noi li pandjele, ponhele yokudjala oikutu oyo tai xumifa komesho omhepo younyuni. Nongeenge tu li mohotela ile pefimbo lomalihafifo, otu na okuhenuka okudjala monghedi oyo tai ulike okuhenakonasha. Nokungaho itatu ka kala twa fya ohoni okuliholola kutya fye Eendombwedi daJehova, ndele ohatu ka kala twa manguluka okuyandja oundombwedi wohangelela.

9, 10. Ongahelipi hatu dulu okutula moilonga Ovafilippi 2:4 ngeenge tashi uya pokudjala kwetu?

9 Lesha Ovafilippi 2:4. Omolwashike Ovakriste ve na okukaleka momadiladilo kutya onghedi yavo yokudjala ohai kumu vamwe? Etomheno limwe ololo kutya oshiwana shaKalunga ohashi longo noudiinini opo shi tule moilonga efinamhango olo tali ti: “Dipaeni hano oinhimbu yeni yopadu: oluhaelo, onyata, olwisho loipala.” (Kol. 3:2, 5) Inatu hala oku shi ningifa shidjuu kovaitaveli vakwetu va kale hava dulika komayele oo. Ovamwatate novamwameme ovo va efa po oluhaelo otashi dulika natango tava kondjo neamo loulunde. (1 Kor. 6:9, 10) Mbela otwa hala oku va ningifa va kale tava kondjo noudjuu?

10 Ngeenge tu li novamwatate novamwameme, kashi na nee mbudi kutya otu li pokwoongala ile opamwe pelili, onghedi yetu yokudjala oi na okukala tai holola kutya otwa hala okukaleka eongalo la koshoka paenghedi. Atusheni otu na emanguluko lokuhoolola osho twa hala djala.  Ashike nande ongaho, otu na oshinakuwanifwa shokudjala oikutu oyo tai ningifa vamwe va twikile okukala va koshoka nokukala va kanyatela omifikamhango daKalunga di na sha nokukala ovakoshoki momadiladilo, meendjovo nomelihumbato. (1 Pet. 1:15, 16) Ohole yashili “ihai holoka nai, ihai kongo shayo vene.” — 1 Kor. 13:4, 5.

NATU DJALE OMIDJALO TADI WAPALELE ONHELE NEFIMBO

11, 12. Oshike tu na okukaleka momadiladilo ngeenge hatu hoolola osho hatu djala?

11 Ngenge hatu ningi omatokolo e na sha nomidjalo detu, tu li ovapiya vaKalunga ohatu kaleke momadiladilo eendjovo odo tadi ti: “Oku nefimbo loshinima keshe noloshilonga keshe.” (Omuud. 3:1, 17) Oshi shii okuudiwa ko kutya onghalo yomhepo, omafimbo omudo, omidingonoko nosho yo ouxupilo ohai nwefa mo onghedi yetu yokudjala. Ashike omifikamhango daJehova ihadi lunduluka ngaashi onghalo yomhepo. — Mal. 3:6.

12 Moitukulwa omo mu na oupyu otashi dulika shi kale shi li eshongo ngeenge tashi uya pokushilipaleka kutya omidjalo detu otadi ulike ngoo efimaneko nodi li pandjele. Ndele nande ongaho, ovamwatate novamwameme ohave shi pandula neenghono eshi hatu henuka okudjala oikutu oyo ya kwata unene kolutu ile ya kula unene notai limonikila. (Job 31:1) Nongeenge hatu ka yowa komunghulofuta ile keenhele dokuyowela, oinima oyo twa djala yokuyowa oi na okukala tai fimanekifa Jehova. (Omayel. 11:2, 20) Nonande ovanhu mounyuni ohava djala oinima oyo tai ulike omalutu avo ngee tava yoo, fye itatu ke shi ninga molwaashi otu hole Jehova notwa hala oku mu fimanekifa.

13. Ongahelipi hatu dulu oku tula moilonga 1 Ovakorinto 10:32, 33 ngeenge hatu hoolola oidjalomwa?

13 Ope na vali efinamhango limwe la fimana olo hali tu kwafele tu hoolole oikutu oyo tai wapalele. Efinamhango olo oli na sha nokuyavelela omaliudo ovaitaveli vakwetu nosho yo aavo vehe fi ovaitaveli. (Lesha 1 Ovakorinto 10: 3233.) Otu na okuhenuka filufilu okudjala oikutu oyo tai dulu okupundukifa vamwe. Paulus okwa popya a ti: “Keshe womufye na wapalele mukwao oku mu yakula mouwa opo a tungwe.” Okwa weda ko a ti: “Osheshi naKristus yo ine liwapalela Ye mwene.” (Rom. 15:2, 3) Jesus okwa li a pitifa komesho okuyakula vamwe, ndele hauwa waye mwene, nokungaho okwa li ta wanifa po ehalo laKalunga. Onghee hano, ohatu ka henuka okudjala oikutu oyo tu hole tashi dulika ya hondjwa monghedi ya kitakana notai dulu okwiimba ovanhu ovo twa hala okuudifila va pwilikine.

14. Ongahelipi ovadali tava dulu okudeula ovana va kale hava fimaneke Jehova monghedi omo hava djala?

14 Ovadali Ovakriste ove na oshinakuwanifwa shokuhonga omaukwaneumbo avo a kale haa tula moilonga omafinamhango Ombiibeli. Osho osha kwatela mo okukala hava shilipaleke kutya vo novana vavo otava kendabala okuhafifa omutima waJehova mokukala hava djala nokuliwapeka nawa. (Omayel. 22:6; 27:11) Ovadali otava dulu okuhonga ovana vavo va kale va fimaneka Jehova, moku va tulila po oshihopaenenwa shiwa, moku va pukulula pahole noku va pa omayele taa longo. Oshiwa ngeenge ovadali ova hongo ovana vavo kutya openi nongahelipi tava dulu okumona oikutu i li nawa noi shi okuya pokati kovanhu. Ounona kave na ashike okuhoolola oikutu oyo ve hole, ndele ove na yo okutala ngeenge oikutu oyo otai ka fimanekifa Jehova eshi tava wanifa po oshinakuwanifwa shavo ve li ovakalelipo vaye.

LONGIFA EMANGULUKO LOYE LOKUNINGA OMATOKOLO PANDUNGE

15. Oshike tashi ke tu kwafela eshi hatu ningi omatokolo kombinga yomidjalo detu?

15 Eendjovo daKalunga odi na omayele taa longo oo taa dulu oku tu kwafela opo tu ninge omatokolo opandunge oo tae mu fimanekifa.  Ashike, omidjalo detu ohadi holola osho tu hole. Otu hole oinima ya yoolokafana, noyuuyemo yetu oya yoolokafana yo. Ndele nande ongaho, oikutu yetu oi na okukala alushe ya yela nawa, tai ulike elininipiko, tai wapalele onhele nefimbo noya tambulwa ko momudingonoko.

16. Omolwashike sha fimana okuninga eenghendabala opo tu kale hatu djala nawa?

16 Otu na okudimina kutya ihashi kala alushe shipu okuninga omatokolo opandunge, e li pandjele, ile taa ulike kutya otwa wanifa po oiteelelwa aishe oyo twa dja nokukundafana. Ohashi pula efimbo lihapu neenghendabala opo u mone eefulukweva odo di na oule u li nawa, eehema, oumbidja ile eeshuta neembulukweva odo inadi pama unene kolutu molwaashi meefitola dihapu ohamu kala ashike oinima oyo tai fininike ovanhu va landule omoode. Ovaitaveli vakwetu otave ke shi didilika mo notave ke tu pandula eshi hatu ningi eenghendabala da mana mo opo tu mone oikutu iwa notai wapalele. Ohatu kala twa hafa eshi hatu fimanekifa Tate yetu womeulu omunahole, nonande ohashi kala shidjuu okumona oikutu oyo tai wapalele.

17. Oinima ilipi tai dulu okuufa ngeenge osha wapala komumwatate a kale e na eendjedi ile hasho?

17 Ongahelipi ngeenge tashi uya pokukala neendjedi? Omhango yaMoses oya li ya pitika ovalumenhu va kale ve na eendjedi dile. Ndele Ovakriste kave li koshi yOmhango yaMoses, noinava teelelwa va kale hava dulika kuyo. (Lev. 19:27; 21:5; Gal. 3:24, 25) Momaputuko amwe, osha tambulwa ko ngeenge omulumenhu oku na eendjedi da yela noda kululwa nawa, notashi dulika ihashi imbi ovanhu va pwilikine ketumwalaka lOuhamba. Ope na nokuli ovamwatate vamwe voshinakuwanifwa ovo ve na eendjedi dile. Ndele ovamwatate vamwe otashi dulika va hoolole okukulula ko eendjedi davo filufilu. (1 Kor. 8:9, 13; 10:32) Momihoko ile momidingonoko dimwe okukala neendjedi kashi fi omukalondjikilile noinashi tambulwa ko ovalumenhu Ovakriste va kale ve na eendjedi. Okukala u na eendjedi momidingonoko da tya ngaho otaku dulu okuningifa omumwatate aha fimanekife Kalunga monghedi yaye yokudjala nokuliwapeka notashi dulika ita ka talwa ko e li omuhenoshipo. — Rom. 15:1-3; 1 Tim. 3:2, 7.

18, 19. Ongahelipi Mika 6:8 ta dulu oku tu kwafela eshi hatu kendabala okudjala nokuliwapeka monghedi oyo tai hafifa Kalunga?

18 Inatu pandula tuu eshi Jehova ine tu twika omutengi mudjuu u na sha nomusholondodo wanghee tu na okudjala nokuliwapeka. Ponhele yaasho, okwe tu pa emanguluko lokuninga omatokolo opandunge noku li pandjele, oo e na okuwilikwa komafinamhango Ombiibeli. Onghedi yetu yokudjala nokuliwapeka otai ka ulika kutya otwa hala ‘okweenda nelininipiko pamwe naKalunga ketu.’ — Mika 6:8.

19 Otu na okulikonakona nelininipiko tu tale ngeenge otu li ngoo metwokumwe noukoshoki nouyapuki waJehova, molwaashi oye ashike ta dulu oku tu pa ewiliko la denga mbada. Elininipiko ola kwatela mo yo okukala twa fimaneka omaliudo nomataleko avamwe. Onghee hano, ohatu ‘ende nelininipiko pamwe naKalunga ketu’ eshi hatu lundulula onghalamwenyo yetu i kale i li metwokumwe nomifikamhango daye nokukala twa fimaneka omaliudo avamwe.

20. Okudjala nokuliwapeka kwetu oku na okukala haku kumu vamwe ngahelipi?

20 Onghedi yetu yokudjala nai kale tai ningifa ovanhu va fike pexulifodiladilo kutya fye ovalongeli vaJehova. Ovamwatate novamwameme nosho yo ovanhu vamwe nava kale ve shi liwetele kutya ohatu fimanekifa Kalunga ketu omuyapuki oo tu lile po. Omifikamhango daJehova oda denga mbada, nohatu kala twa hafa eshi hatu kendabala okukala metwokumwe nado. Ovamwatate novamwameme ovo ve na eholokepo nelihumbato liwa, olo hali nane ovanamitimadiwa va tambule ko etumwalaka lOmbiibeli olo tali xupifa eemwenyo notali tumbalekifa Jehova, otava pandulwa. Okukala hatu ningi omatokolo opandunge kombinga yaasho hatu djala otashi ka tumbalekifa Jehova oo a djala “efimano noshinge.” — Eps. 104:1, 2.