Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2016

Otwa unganekwa metwokumwe nEendjovo daKalunga

Otwa unganekwa metwokumwe nEendjovo daKalunga

“Edu Omwene e li dika nounongo, nokwa pameka omaulu neendunge.” — OMAYEL. 3:19.

OMAIMBILO: 105, 107

1, 2. (a) Ovanhu vamwe ohave linyenge ngahelipi kediladilo olo kutya Kalunga oku na ehangano? (b) Moshitukulwa eshi ohatu ka kundafana shike?

MBELA Kalunga oku na ehangano? Vamwe ohava ti: “Ovanhu inava pumbwa ehangano li kale tali va wilike. Ova pumbwa ashike okukala nekwatafano naKalunga.” Mbela etaleko olo oli li ngoo mondjila? Omaumbangi otaa holola shike?

2 Moshitukulwa eshi, ohatu ka kundafana oumbangi oo tau ulike kutya Jehova, Kalunga kelandulafano, oku li Omuunganeki a shiya ko. Ohatu ka konakona yo kutya otu na okulinyenga ngahelipi kewiliko olo hatu pewa mehangano laYe. (1 Kor. 14:33, 40) Mefelemudo lotete nosho yo pefimbo letu, Omishangwa oda kwafela oshitukulwa shehangano laJehova shokombada yedu opo shi twikile noilonga yokuudifa onghundana iwa. Molwaashi otwe likolelela kOmbiibeli nohatu dulika kewiliko lehangano laYe, ohatu xumifa komesho oukoshoki, ombili nosho yo oukumwe meongalo.

JEHOVA OMUUNGANEKI A SHIYA KO

3. Oshike she ku tomha u itavele kutya Jehova oku li Omuunganeki a shiya ko?

3 Eshito otali ulike kutya Kalunga oku li Omuunganeki a shiya ko. Ombiibeli oya ti: “Edu Omwene e li dika nounongo, nokwa  pameka omaulu neendunge.” (Omayel. 3:19) Otu shii ashike ‘ominghulo adike deendjila daKalunga, ndele fye ohatu udu ko ashike okunongofola kwaye.’ (Job 26:14) Ouyelele munini oo tu shii kombinga yeepulaneta, eenyofi nosho yo omihalavili ohau tu kwafele tu mone kutya oinima oyo oya unganekwa monghedi ikumwifi neenghono. (Eps. 8:4, 5) Omihalavili odi na eenyofi omamiliyona nohadi linyenge melandulafano. Eepulaneta ohadi linyenge tadi dingonoka etango da fa tadi liufa keemhango domopate. Otu na oushili kutya oumbangi mukumwifi oo hatu mono meshito ohau tu kwafele tu mone kutya Jehova, oo “a shita omaulu nounongo waye” nosho yo edu, okwa wana okutumbalekwa nokulongelwa. — Eps. 136:1, 5-9.

4. Omolwashike ounongononi inau dula okunyamukula omapulo mahapu oo ovanhu have lipula?

4 Ounongononi owa holola oinima ihapu kombinga yeshito nosho yo kombinga yedu, naasho oshe tu etela ouwa meenghedi di lili naku lili. Ashike, ope na omapulo mahapu oo ounongononi inau dula okunyamukula. Pashihopaenenwa, ovanongononi veenyofi itava dulu oku tu lombwela kutya oinima oye uya po ngahelipi ile kutya omolwashike kopulaneta yedu oku tu li oko ashike ku na oinima i na omwenyo. Natango, itava dulu okuyelifa kutya omolwashike ovanhu hava kala ve na ehalo lokukala nomwenyo fiyo alushe. (Omuud. 3:11) Omolwashike pe na omapulo mahapu a fimanenena inaa mona natango omanyamukulo? Omafimbo amwe, omolwaashi ovanongononi vahapu ihava popi oinima yopakalunga nohava xumifa komesho ehongo loevolusi. Ashike Jehova okwa nyamukula omapulo aeshe oo ovanhu have lipula, okupitila mOmbiibeli.

5. Omeenghedi dilipi twe likolelela keemhango domeshito?

5 Otwe likolelela keemhango domeshito odo ihadi lunduluka nodi shii okulineekelwa, odo da tulwa po kuJehova. Ovapangeli vomalusheno noveepaipi, ovashingi veedila neendokotola, ove likolelela keemhango domeshito opo va dule okulonga oilonga yavo. Pashihopaenenwa, eendokotola oda kanghamena koumbangi oo kutya oitukulwa yolutu lomunhu ohai kala ashike peenhele da faafana momunhu keshe. Nomolwaashi ihadi kongo noudjuu opo pe na omutima womunaudu. Atusheni ohatu fimaneke eemhango domeshito, nongeenge omunhu ite liufa keemhango da tya ngaho, ngaashi omhango yeenghono dedu, ota dulu okutula omwenyo waye moshiponga.

OINIMA OYO YA UNGANEKWA KUKALUNGA

6. Omolwashike tu na okukala twa teelela ovalongeli vaJehova va kale va unganekwa nawa?

6 Eshito ola unganekwa shili monghedi ikumwifi. Onghee hano, otu na okukala tu shii lelalela kutya Jehova okwa hala ovalongeli vaye va kale va unganekwa nawa, nomolwaasho e tu pa Ombiibeli opo i kale tai tu wilike. Ngeenge ihatu tambula ko ekwafo olo tali di kehangano laKalunga noihatu kala metwokumwe nomifikamhango daye, itatu ka kala twa hafa monghalamwenyo.

7. Oshike tashi ulike kutya Ombiibeli embo la unganekwa nawa?

7 Ombiibeli kai fi ashike omashangelo ongaho Oshijuda ile opaKriste oo itaa tu kumwe. Ponhele yaasho, Ombiibeli embo la nwefwa mo komhepo iyapuki yaKalunga nola unganekwa nawa. Omambo Ombiibeli, okudja kuGenesis fiyo okEhololo, otaa tu kumwe, notaa holola kutya enenediladilo lOmbiibeli olo okuyukipalifwa kwounamapangelo waJehova nokuwanifwa kwelalakano laye li na sha nedu, te shi ningi okupitila mOuhamba waye oo u li meke laKristus, “oludalo” la udanekwa. — Lesha Genesis 3:15; Mateus 6:10; Ehololo 11:15.

8. Omolwashike hatu dulu okutya Ovaisrael ova li va unganekwa nawa?

8 Oshiwana shaIsrael shonale osha li sha tula  po oshihopaenenwa shokukala shi li ehangano. Pashihopaenenwa, koshi yOmhango yaMoses, opa li “ovakainhu ovo va kala nokuyakula poshivelo shetwali leongalo.” (Ex. 38:8) Onhanda yOvaisrael nosho yo etwalihangano oya li hai tembulwa palandulafano. Lwanima, Ohamba David oya li ya unganeka Ovalevi novapristeri meengudu. (1 Omaf. 23:1-6; 24:1-3) Ovaisrael ova li hava kala ve na elandulafano, ombili nosho yo elongelokumwe, ngeenge tava dulika kuJehova. — Deut. 11:26, 27; 28:1-14.

9. Oshike tashi ulike kutya eongalo lopaKriste lomefelemudo lotete ola li la unganekwa?

9 Eongalo lopaKriste lomefelemudo lotete ola li la unganekwa nola li hali mono ouwa mewiliko olo hali pewa kOlutuwiliki olo la li la fikama po movayapostoli. (Oil. 6:1-6) Lwanima, mOlutuwiliki omwa li mwa wedwa ovamwatate vamwe. (Oil. 15:6) Omayele nomalombwelo okwa li yo haa yandjwa okupitila meenhumwafo odo da nwefwa mo, da shangwa kovalumenhu ovo va li oilyo yOlutuwiliki, ile ovo va li have va kwafele mefelemudo lotete. (1 Tim. 3:1-13; Tit. 1:5-9) Ongahelipi omaongalo a li a dula okumona ouwa mokushikula ewiliko olo la li hali yandjwa kOlutuwiliki?

10. Oshidjemo osha li shike eshi omaongalo opehovelo a li haa dulika komaufomhango oo kwa li hava pewa kOlutuwiliki? (Tala efano pehovelo loshitukulwa.)

10 Lesha Oilonga 16:4, 5. Ovamwatate ovo va li hava talele po omaongalo ponhele yoilyo yOlutuwiliki ova li hava yandje “oipango ei ya ufwa kovayapostoli nokovakulunhu vomuJerusalem.” Eshi omaongalo a kala taa dulika komaufomhango oo, okwa “pamekwa meitavelo, nefiku keshe omuvalu wovakwaneongalo owa hapupala.” Mbela ehokololo olo lopaMbiibeli itali tu hongo kutya oshi li pandunge okukala hatu tula moilonga omayele oo hatu pewa kehangano laKalunga kunena?

MBELA OHO SHIKULA NGOO OMALOMBWELO?

11. Ovamwatate ovo va nangekwa po ove na okulinyenga ngahelipi kewiliko olo hava pewa kehangano laJehova?

11 Eekomitiye dOitaimbelewa, Eekomitiye dOilongo, ovapashukilishikandjo nosho yo ovakulunhuongalo, ove na okuninga po shike ngeenge ova pewa ewiliko okudja kehangano laJehova? Ombiibeli otai tu lombwele tu kale hatu dulika nokuliyandja. (Deut. 30:16; Heb. 13:7, 17) Omhepo younashibofa ile oikala yokukembaula inai pumbiwa mehangano laJehova, molwaashi otai dulu okupiyaaneka ohole, ombili nosho yo oukumwe momaongalo. Onghee hano, kape na Omukriste omudiinini ta ka kala a hala okuulika omhepo yokuhenefimaneko noyokukala ehe fi omudiinini ngaashi Diotrefes. (Lesha 3 Johannes 9, 10.) Ohatu dulu okulipula kutya: ‘Mbela ohandi ningi ngoo oinima oyo tai tungu vamwe pamhepo? Mbela ohandi tambula ko ngoo nokukatuka metwokumwe newiliko olo hatu pewa kovamwatate ovo tava kwatele komesho?’

12. Elunduluko lilipi la ningwa po li na sha nanghee ovakulunhuongalo novayakuliongalo ve na okunangekwa po?

12 Natu ka taleni ketokolo olo opo la ningwa kOlutuwiliki. MOshungonangelo yo 15 Novemba 2014, moshitukulwa “Omapulo a dja kovaleshi”, omu na ouyelele mupe u na sha nanghee ovakulunhuongalo novayakuliongalo hava nangekwa po. Oshitukulwa osho osha popya kutya Olutuwiliki lomefelemudo lotete ola li la pitika ovapashukili ovaendi ovo va kale hava nangeke po ovakulunhuongalo novayakuliongalo. Metwokumwe nomulandu oo, okudja mu 1 Septemba 2014, ovapashukilishikandjo ovo va kala tava nangeke po ovakulunhuongalo novayakuliongalo. Ovapashukilishikandjo ohava kendabala okushiiva nawa ovalumenhu ovo tava popilwa kutya otava dulu okunangekwa po moku ka longa pamwe navo moukalele ngeenge omhito tai shi pitike. Oha tale yo koukwaneumbo  womumwatate oo ta talika ngeenge okwa wana. (1 Tim. 3:4, 5) Olutu lovakulunhuongalo nosho yo omupashukilishikandjo ohava tale noukeka koiteelelwa yopamishangwa yovayakuliongalo novakulunhuongalo. — 1 Tim. 3:1-10, 12, 13; 1 Pet. 5:1-3.

13. Ongahelipi hatu dulu okuulika kutya ohatu dulika kewiliko olo hatu pewa kovakulunhuongalo?

13 Otwa pumbwa okukala hatu dulika kewiliko lopaMbiibeli olo hatu pewa kovakulunhuongalo. Ovafita ovadiinini ovo ve li mehangano laKalunga ohava wilikwa komalombwelo ‘mawa’ oo taa hangwa mOmbiibeli. (1 Tim. 6:3) Natu ka taleni komayele aPaulus oo a li a yandja shi na sha naavo va li ovananyalo meongalo. Vamwe ‘kava li ve na eshi tava longo; ova li ashike tava shelemba.’ Ndele nande ongaho, ova li va kumaidwa kovakulunhuongalo, ashike kava li va tambula ko epukululo. Mbela eongalo ola li li na okuungaunga ngahelipi nomunhu oo te lihumbata ngaho? Paulus okwa yandja elombwelo a ti: “Mu didilikeni, nye inamu endafana naye.” Omayele oo okwa li e li pandjele, molwaashi okwa weda ko a ti kutya kave na okutala ko omunhu oo e li omutondi. (2 Tes. 3:11-15) Kunena, ovakulunhuongalo otashi dulika va yandje oshipopiwa shelondwelo kombinga yaumwe oo ta twikile okuninga oshinima osho tashi shekifa eongalo, ngaashi okweendelafana naumwe oo ehe fi omwiitaveli. (1 Kor. 7:39) Mbela oho linyenge ngahelipi ngeenge omukulunhuongalo ta yandje oshipopiwa kombinga yoshinima osho? Ngeenge ou shii umwe oo te lihumbata monghedi oyo tai kundafanwa moshipopiwa, mbela oto ka katuka ngoo onghatu u henuke okweendafana nomunhu a tya ngaho? Okunakonasha kwoye nokukanyatela omufika woye otaku dulu okulinyengifa omunhu oo a lundulule omikalo daye. [1]

KALEKA PO OUKOSHOKI, OMBILI NOUKUMWE

14. Ongahelipi hatu dulu okuxumifa komesho oukoshoki meongalo?

14 Ngeenge otwa kala hatu dulika kewiliko laJehova olo tali hangwa mEendjovo daye Ombiibeli, ohatu ka kaleka eongalo la koshoka pamhepo. Natu ka konakoneni onghalo oyo ya li muKorinto shonale. Paulus okwa li a udifa nokulonga noudiinini moshilando osho, nokwa li e hole ovamwaxe “ovayapuki”. (1 Kor. 1:1, 2) Diladila ashike nghee sha li shidjuu kuye okupopya kombinga yoluhaelo olo la li le lipwililikilwa meongalo olo. Okwa li a lombwela ovakulunhuongalo va yandje omulumenhu omuhaeli momake aSatana, sha hala kutya ve mu konde mo meongalo. Opo va kaleke eongalo la koshoka, ovakulunhuongalo ova li ve na okukufa mo “onhafi.” (1 Kor. 5:1, 5-7, 12) Eshi hatu yambidida etokolo lovakulunhuongalo lokukonda mo omunyoni oo ine livela ombedi, ohatu kwafele eongalo li kale la koshoka, notashi dulika shi ke linyengife omunyoni oo e livele ombedi noku pule a diminwe po kuJehova.

15. Ongahelipi hatu dulu okuxumifa komesho ombili meongalo?

15 Meongalo lomuKorinto omwa li vali mu na oupyakadi oo wa li wa pumbwa okukandulwa po. Ovamwatate vamwe ova li hava twala ovaitaveli vakwao keemhangu. Paulus okwa li e va pula epulo tali va ningifa va diladile moule eshi a ti: “Oshike itamu [efa] mu ningwe nai?” (1 Kor. 6:1-8) Sha faafana, eenghalo odo ohadi holoka po nokunena. Pomhito imwe otashi dulika pokati kovamwatate pa holoke okuhaudafana ngeenge ongeshefa yavo oya ponyo tashi dulika omolwoukengeleledi. Vamwe ohava twala ovamwaxe keemhangu, ashike Ombiibeli otai tu kwafele tu mone kutya oshi li xwepo okukanifa oiniwe yetu ponhele yokushekifa edina laKalunga ile tu nyone po ombili yeongalo. [2] Opo tu kandule po omaupyakadi oo a kwata moiti nokuhaudafana, otwa pumbwa okutula moilonga omayele aJesus. (Lesha Mateus 5:23, 24; 18:15-17.) Ngeenge otwa ningi ngaho, ohatu ka xumifa komesho oukumwe mehangano laJehova.

16. Omolwashike tu na okukala twa teelela oshiwana shaKalunga shi kale sha hangana?

 16 Ombiibeli otai ulike kutya omolwashike oshiwana shaJehova shi na okukala sha hangana. Omupsalme okwa imba a ti: “Taleni, oshiwa nosha wapala shi fike peni, ovamwatate ngenge tava kala kumwe nombili.” (Eps. 133:1) Ovaisrael ova li hava kala va unganekwa nova hangana ngeenge vali tava dulika kuJehova. Kalunga okwa popya kombinga yonakwiiwa yoshiwana shaye eshi a ti: “Ohandi ka ongela oshixupe shaIsrael noku va eta kumwe ngaashi eedi moshiunda.” (Mika 2:12) Natango, okwa xunganeka okupitila momuprofeti Sefanja, a ti: “Ame ohandi ka yandja koiwana omilungu da koshoka, vo aveshe opo va ifane edina lOmwene, ndele ve mu longele, ve nediladilo limwe.” (Sef. 3:9) Kashi fi tuu oufembanghenda okukala hatu longele Jehova moukumwe!

Ovakulunhuongalo, ningeni eenghendabala mu kwafele pamhepo ovo va katuka shihe li pandunge (Tala okatendo 17)

17. Opo eongalo li kale li na oukumwe nola koshoka, ovakulunhuongalo ove na okuungaunga ngahelipi novanyoni?

17 Ovakulunhuongalo ove na okuungaunga noinima yopamhangu noukeka nonohole, opo eongalo li kale li na oukumwe nola koshoka. Paulus okwa li e shi shii kutya ohole yaKalunga ihai wilikwa komaliudo ongaho, noihe lipwililikile ovo tava nyono. (Omayel. 15:3) Nomolwaasho Paulus okwa li a shanga onhumwafo yOvakorinto votete ya kwata moiti, ashike oyopahole. Ovakorinto ovativali ova li va shangwa konima yeemwedi donhumba, osho tashi ulike kutya eongalo ola li la ninga omalunduluko eshi ovakulunhuongalo va tula moilonga omayele omuyapostoli Paulus. Ngeenge Omukriste okwa katuka shihe li pandunge, ovakulunhuongalo ova pumbwa oku mu pukulula tave shi ningi nomhepo yonheni. — Gal. 6:1.

18. (a) Omeenghedi dilipi Eendjovo daKalunga da li kwafela omaongalo omefelemudo lotete? (b) Oshike hatu ka kundafana moshitukulwa tashi landula?

18 Osha yela kutya omayele aKalunga, oo e li mOmbiibeli, okwa li a kwafela Ovakriste vomefelemudo lotete vomuKorinto nomaongalo amwe opo a kaleke po oukoshoki, ombili noukumwe momaongalo avo. (1 Kor. 1:10; Ef. 4:11-13; 1 Pet. 3:8) Oshidjemo, ovamwatate novamwameme ovo ova li va dula okulonga shihapu moukalele. Pomhito imwe, Paulus okwa li a popya kutya onghundana iwa oya “udifilwa ovashitwa aveshe vokoshi yeulu.” (Kol. 1:23) Kunena, ovo ve li oshitukulwa shehangano laJehova la hangana otava udifa moukumwe kombinga yomalalakano aKalunga omonakwiiwa, kongonga yedu alishe. Oshitukulwa tashi landula otashi ka kundafana ouyelele wa wedwa po kombinga yaavo va lenga Ombiibeli nova tokola okufimaneka Omunamapangelo aeshe Jehova. — Eps. 71:15, 16.

^ [1] (okatendo 13) Tala embo Organized to Do Jehovah’s Will, ep. 134-136.

^ [2] (okatendo 15) Opo u mone ouyelele muhapu kutya omeenghalo dilipi Omukriste ta dulu okutokola a kufile onghatu yopaveta Omukriste mukwao, tala embo ‘Likalekeni mohole yaKalunga’ ep. 223, eshangelo lopedu.