Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Omolwashike tu na ‘okutwikila okwiima oiimati ihapu’?

Omolwashike tu na ‘okutwikila okwiima oiimati ihapu’?

“Opo tuu opo Tate ta fimanekwa ngeenge tamu imi shihapu, ndele tamu ningi ovalongwa vange.” — JOH. 15:8.

OMAIMBILO: 53, 60

1, 2. (a) Jesus okwa li a kundafana shike novayapostoli vaye ofimbo ina fya? (Tala efano pehovelo loshitukulwa.) (b) Omolwashike sha fimana kufye okukaleka momadiladilo kutya omolwashike hatu udifa? (c) Oshike hatu ka kundafana?

MOUFIKU wa xuuninwa ofimbo Jesus ina fya, okwa li a kundafana novayapostoli vaye efimbo lile te va lombwele kutya oku va hole unene. Okwa li yo e va lombwela efaneko lomuviinyu, ngaashi twe shi kundafana moshitukulwa sha tetekela. Jesus okwa li a twa ovahongwa vaye omukumo okupitila mefaneko olo kutya nava ‘twikile okwiima oiimati ihapu’ nokulididimika eshi tava udifa etumwalaka lOuhamba. — Joh. 15:8.

2 Jesus ka li ashike a lombwela ovahongwa vaye osho va pumbwa okuninga ndele okwa li yo e va lombwela kutya omolwashike ve na oku shi ninga. Okwa li e va pa omatomheno okuudifa. Omolwashike sha fimana kufye okukonakona omatomheno oo? Ngeenge otwa kaleke momadiladilo kutya omolwashike twa pumbwa okutwikila okuudifa, otashi ke tu linyengifa tu lididimike eshi hatu yandje ‘oundombwedi koiwana aishe.’ (Mat. 24:13, 14) Natu ka kundafaneni omatomheno anhe opamishangwa e na sha nokuudifa. Ohatu ka kundafana yo eeshali nhe da dja kuJehova odo tadi tu kwafele tu lididimike eshi hatu imi oiimati.

 OHATU FIMANEKIFA JEHOVA

3. (a) Etomheno li na sha nokuudifa lilipi tali hangwa muJohannes 15:8? (b) Oiimati oyo i li mefaneko laJesus otai faneke shike? nomolwashike efaneko olo tali wapalele?

3 Etomheno la denga mbada eshi hatu kufa ombinga moilonga yokuudifa olo okufimanekifa Jehova nokuyapulifa edina laye moipafi yovanhu. (Lesha Johannes 15:1, 8.) Didilika kutya Jesus okwa faafanifa Xe, Jehova, nomulongi oo ha kunu omiviinyu. Jesus okwe lifaafanifa nomuviinyu ile nefina, ofimbo ovashikuli vaye e va faafanifa noitai. (Joh. 15:5) Oiimati yao otai faneke oiimati yOuhamba oyo hai imikwa kovashikuli vaKristus. Jesus okwa li a lombwela ovayapostoli vaye a ti: ‘Opo tuu opo Tate ta fimanekwa ngeenge tamu imi oiimati ihapu.’ Ngaashi ashike omuviinyu hau imi oiimati iwa oyo hai fimanekifa omulongi, nafye ohatu fimanekifa, ile hatu tumbalekifa Jehova ngeenge hatu udifa etumwalaka lOuhamba ngaashi hatu dulu. — Mat. 25:20-23.

4. (a) Omeenghedi dilipi hatu yapulifa edina laKalunga? (b) Ou udite ngahelipi eshi u na oufembanghenda wokuyapulifa edina laKalunga?

4 Omonghedi ilipi oilonga yetu yokuudifa hai yapulifa edina laKalunga? Itatu dulu okuningifa edina laKalunga li kale liyapuki unene, molwaashi oliyapuki nale, ile ola koshoka filufilu. Ashike didilika kutya omuprofeti Jesaja okwa ti: “Omwene Kalunga womatanga ovakwaita, Oye mu noku mu yapula.” (Jes. 8:13) Ohatu yapulifa edina laKalunga, pashihopaenenwa eshi hatu li tale ko li dule omadina aeshe nosho yo eshi hatu kwafele vamwe va shiive kutya oliyapuki. (Mat. 6:9) Ngeenge hatu udifa oshili kombinga yomaukwatya aye mahokwifa nosho yo elalakano laye li na sha novanhu olo ihali lunduluka, ohatu popile edina laKalunga eshi hatu nyaneke pomutenya oipupulu yaSatana nomapukifo aye. (Gen. 3:1-5) Natango, eshi hatu kwafele ovanhu moshitukulwa shetu va mone kutya Jehova okwa wana “okutambula efimano nefimaneko nepangelo,” ohatu yapulifa edina laye. (Eh. 4:11) Rune, oo a kala ta kokola ondjila oule womido 16, okwa ti: “Okushiiva kutya onda pewa omhito yokuyandja oundombwedi kombinga yOmushiti weshito alishe osha ningifa nge ndi kale ndi na olupandu. Ohashi kwafele nge ndi kale ndi na ehalo lokutwikila okuudifa.”

OTU HOLE JEHOVA NOSHO YO OMONA WAYE

5. (a) Etomheno li na sha nokuudifa lilipi la tumbulwa muJohannes 15:9, 10? (b) Jesus okwa divilika ngahelipi kutya otwa pumbwa elididimiko?

5 Lesha Johannes 15:9, 10. Ohole yetu yokuhola Jehova nosho yo Jesus nomutima aushe oi li etomheno la fimana kutya omolwashike hatu udifa etumwalaka lOuhamba. (Mark. 12:30; Joh. 14:15) Jesus okwa li a lombwela ovahongwa vaye kutya nava ‘kale mohole yaye.’ Omolwashike mbela? Omolwaashi okukala omuhongwa washili waKristus eedula dihapu otashi pula elididimiko. Jesus okwa popya kutya otwa pumbwa elididimiko eshi a longifa oshitya “kala” lwoikando muJohannes 15:4-10.

6. Ohatu ulike ngahelipi kutya otwa hala okukala mohole yaKristus?

6 Ohatu ulike ngahelipi kutya otwa hala okukala mohole yaKristus nokukala twa hokiwa kuye? Omokudulika koipango yaye. Jesus okwe tu lombwela kutya, ‘Natu kale hatu dulika kuye.’ Ote tu pula ashike tu ninge osho a li a ninga, okwa ti yo: “Ngaashi Ame nda diinina oipango yaTate ndele handi kala mohole yaye.” Okwe tu tulila po oshihopaenenwa. — Joh. 13:15.

7. Eduliko nohole oya pambafana ngahelipi?

7 Molwaashi eduliko nohole oya pambafana, Jesus okwa li a lombwela ovayapostoli vaye pehovelo a ti: “Ou e noipango yange ndele te i diinine, oye tuu ou e hole nge.” (Joh. 14:21) Shikwao vali, eshi hatu wanifa po oshipango shaJesus shi na sha nokuudifa, ohatu ulike ohole  yetu yokuhola Kalunga molwaashi oipango yaJesus oi li metwokumwe nehalo laXe. (Mat. 17:5; Joh. 8:28) Eshi hatu ulikile Jehova naJesus ohole, navo ohava kala ve tu hole.

OHATU LONDWELE OVANHU

8, 9. (a) Etomheno lilipi vali tu na li na sha nokuudifa? (b) Omolwashike Eendjovo daJehova odo tadi hangwa muHesekiel 3:18, 19; 18:23 hadi tu linyengifa tu twikile okuudifa?

8 Otu na vali etomheno limwe olo hali tu kwafele tu twikile noilonga yetu yokuudifa. Ohatu udifa opo tu londwele ovanhu. Noa okwa popiwa mOmbiibeli e li “omuudifi wouyuki.” (Lesha 2 Petrus 2:5.) Oilonga yaye yokuudifa ofimbo Eyelu inali uya oya li ya kwatela mo elondwelo lehanauno olo la li tali ke uya. Omolwashike hatu dulu okufika pexulifodiladilo olo? Didilika osho Jesus a ti: “Osheshi ngaashi ovanhu va li pomafiku enya a tetekela eyelu: kwa li hava li nohava nu, hava hombola nohava hombolifa, fiyo efiku olo Noa a ya monguluwato, ndele vo inave shi shiiva, fiyo eyelu le uya nole va hanauna po aveshe; hano osho taku ningi yo pokuuya kwOmona wOmunhu.” (Mat. 24:38, 39) Noa okwa kala ta udifa noudiinini etumwalaka lelondwelo olo a li a pewa nonande ovanhu ova kala ihava pwilikine.

9 Kunena, ohatu udifa etumwalaka lOuhamba opo tu kwafele ovanhu ve lihonge elalakano laKalunga li na sha novanhu. Ngaashi Jehova, nafye ohatu kala twa halelela ovanhu va pwilikine ketumwalaka nova ‘kale nomwenyo.’ (Hes. 18:23) Pefimbo opo tuu opo, eshi hatu udifa eumbo neumbo nosho yo meenhele daaveshe, ohatu londwele ovanhu vahapu ngaashi tashi dulika kutya Ouhamba waKalunga otau ke uya nokuxulifa po ounyuni ou wa kolokosha. — Hes. 3:18, 19; Dan. 2:44; Eh. 14:6, 7.

OTU HOLE OVANHU VAKWETU

10. (a) Etomheno li na sha nokuudifa lilipi la tumbulwa muMateus 22:39? (b) Yelifa nghee Paulus naSilas va li va kwafela omukeleli wodolongo muFilippi.

10 Apa otapa shikula vali etomheno limwe olo hali tu kwafele tu twikile noilonga yetu yokuudifa: Ohatu udifa molwaashi otu hole ovanhu vakwetu. (Mat. 22:39) Ohole ya tya ngaho ohai tu linyengifa tu lididimike moilonga yetu, nokudiladila kutya ovanhu ovo otashi dulika va ka lunduluke ngeenge eenghalo davo oda lunduluka. Diladila koshimoniwa shomuyapostoli Paulus nosho yo omweendi pamwe naye, Silas. Ovapataneki ova li ve va tulifa modolongo moshilando shaFilippi. Mokati koufiku, opa li pa tukuluka ekakamo ledu linene, odolongo oya li ya kakama noivelo aishe oya li ya yeuluka. Omukeleli wodolongo okwa li a tila kutya ovanadolongo ova ya onhapo nokwa li e li pokulidipaa. Ashike Paulus okwa li a ingida mokule ta ti: “Ino liningila owii nande owa sha.” Omukeleli wodolongo oo a li a tila unene okwa li a pula a ti: “Ondi nokuninga ngahelipi ndi xupifwe?” Ova li ve mu lombwela va ti: “Itavela Omwene Jesus Kristus, opo to ka xupifwa.” — Oil. 16:25-34.

Ohole yokuhola Jehova, Jesus nosho yo ovanhu vakwetu ohai tu linyengifa tu udife (Tala okatendo 5, 10)

11, 12. (a) Ehokololo lomukeleli wodolongo ola pambafana ngahelipi noilonga yetu yokuudifa? (b) Omolwashike twa hala okutwikila noilonga yetu yokuudifa?

11 Ehokololo lomukeleli wodolongo ola pambafana ngahelipi noilonga yetu yokuudifa? Diladila kwaashi: Omukeleli wodolongo okwa li a ninga omalunduluko nokwa li a pula ekwafo konima ashike eshi ekakamo ledu la ningwa. Sha faafana, oohandimwe ovo ihava pwilikine  shito ketumwalaka lOmbiibeli otashi dulika va ninge omalunduluko nokukonga ekwafo ngeenge ova hangwa koiponga yopaushitwe. Pashihopaenenwa, vamwe moshitukulwa shetu otashi dulika va kanife oilonga inave shi teelela notashi dulika shi kume onghalamwenyo yavo. Vamwe otashi dulika va nyemata keehombo davo odo opo da teka. Natango, vamwe otashi dulika va monika omikifi da kwata moiti, ile tashi dulika omitima davo da tekauka omolwefyo lovaholike vavo. Ngeenge oinima ya tya ngaho oye va ningilwa, oohandimwe ovo va wililwa po otashi dulika va pule omapulo kombinga yeityo longhalamwenyo osho va li vehe hole okuninga. Otashi dulika nokuli ve lipule kutya, ‘Oshike ndi na okuninga opo ndi xupifwe?’ Ngeenge otwa shakene navo, otashi dulika va pwilikine ketumwalaka leteelelo oshikando shotete monghalamwenyo yavo.

12 Onghee hano, ngeenge otwa twikile noudiinini noilonga yetu yokuudifa, ohatu ka dula okuhekeleka ovanhu pefimbo opo tashi dulika tava ka kala va hala okupwilikina. (Jes. 61:1) Charlotte, oo a kala moilonga yefimbo li yadi oule womido 38, okwa ti: “Ovanhu kunena ova lyalyakana. Ova pumbwa okuuda onghundana iwa.” Ejvor, oo kala omukokolindjila oule womido 34, okwa ti: “Kunena, ovanhu vahapu ova polimana shi dulife nale. Onda halelela oku va kwafela. Osho ohashi linyengifa nge ndi udife.” Ohole yokuhola ovanhu vakwetu ka i li tuu etomheno tali ti sha olo hali tu kwafele tu twikile noilonga yetu yokuudifa!

EESHALI ODO HADI TU KWAFELE TU LIDIDIMIKE

13, 14. (a) Oshali ilipi ya tumbulwa muJohannes 15:11? (b) Ongahelipi ehafo laJesus tali ka kala mufye? (c) Ehafo ohali kumu ngahelipi oukalele wetu?

13 Jesus okwa li a lombwela ovayapostoli vaye moufiku oo wa tetekela efyo laye kombinga yeeshali odo tadi ke va kwafela ve lididimike eshi tava imi oiimati. Eeshali edi odilipi, nongahelipi hatu dulu okumona mo ouwa mudo?

14 Oshali yehafo. Mbela okudulika koshipango shaJesus shokuudifa oku li omutengi? Ahowe. Konima eshi Jesus a yandja efaneko laye li na sha nomuviinyu, okwa ti kutya tu li ovaudifi vOuhamba, ohatu ka mona ehafo. (Lesha Johannes 15:11.) Okwa li e tu shilipaleka kutya ehafo laye otali ka kala mufye. Ngahelipi mbela? Ngaashi sha tumbulwa metetekelo, Jesus okwe lifaafanifa nomuviinyu, novahongwa vaye okwe va faafanifa noitai. Oitai ohai kala ye likolelela komuviinyu. Oitai oyo ya kwatafana nomuviinyu ohai mono omeva noikulya. Sha faafana, eshi hatu twikile okukala tu na ekwatafano naKristus mokulandula oshihopaenenwa shaye, ohatu ka mona ehafo la fa olo a mona mokulonga ehalo laXe. (Joh. 4:34; 17:13; 1 Pet. 2:21) Hanne, oo a kala omukokolindjila oule womido da konda 40, okwa ti: “Ehafo olo handi mono alushe ngeenge nda di moukalele ohali linyengifa nge ndi twikile okulongela Jehova.” Ehafo ohali tu nghonopaleke tu twikile nokuli nomoitukulwa omo mu na ovanhu ihava pwilikine. — Mat. 5:10-12.

15. (a) Oshali ilipi ya tumbulwa muJohannes 14:27? (b) Omolwashike ombili hai tu kwafele tu twikile okwiima oiimati?

15 Oshali yombili. (Lesha Johannes 14:27.) Jesus okwa li a lombwela ovayapostoli vaye moufiku waye wa xuunina ofimbo ina fya a ti: “Ombili yange ohandi i mu pe.” Ombili yaJesus ohai tu kwafele ngahelipi tu ime oiimati? Eshi hatu twikile okuudifa, ohatu mono ombili tai kalelele molwaashi otu shii kutya Jehova naJesus ove tu hokwa. (Eps. 149:4; Rom. 5:3, 4; Kol. 3:15) Ulf, oo a kala moilonga yefimbo li yadi oule womido 45, okwa ti: “Oilonga yokuudifa ohai lolola nge, ashike ohai etele nge ombili yashili nohai kwafele nge ndi kale nonghalamwenyo i na eityo lolela.” Inatu pandula tuu eshi twa nangekwa noupuna nombili yokomutima tai kalelele!

16. (a) Oshali ilipi ya tumbulwa muJohannes 15:15? (b) Ongahelipi ovayapostoli va li tava dulu okukala ookaume kaJesus?

 16 Oshali youkaume. Konima eshi Jesus a lombwela ovayapostoli kutya otava dulu okumona ‘ehafo la wanenena,’ okwe va yelifila kutya omolwashike sha fimana okuninga omaliyambo nehalo liwa. (Joh. 15:11-13) Okwa weda ko a ti: “Onde mu ifana ookaume.” Kai fi tuu oshali ya denga mbada okukala kaume kaJesus! Ovayapostoli ova li ve na okuninga shike opo va kale ookaume kaye? Ova li ve na ‘okuya nokutwikila okwiima oiimati.’ (Lesha Johannes 15:14-16.) Omido mbali da tetekela, Jesus okwa li a lombwela ovayapostoli vaye a ti: “Ndele keshe apa tamu ende, va lombweleni mu tye: ouhamba weulu wa ehena popepi.” (Mat. 10:7) Onghee hano, okwa li e va twa omukumo moufiku waye wa xuunina ve lididimike moilonga oyo va li va hovela. (Mat. 24:13; Mark. 3:14) Kasha li shipu okuwanifa po oshipango shaJesus, ashike ova li tava dulu okupondola nokukala ookaume kaye. Ngahelipi mbela? Okekwafo loshali imwe vali.

17, 18. (a) Oshali ilipi ya tumbulwa Johannes 15:16? (b) Oshali oyo oya li ya kwafela ngahelipi ovahongwa vaJesus? (c) Eeshali dilipi hadi tu kwafele kunena?

17 Oshali yomailikano oo haa nyamukulwa. Jesus okwa ti: “Keshe tuu eshi tamu shi indile Tate medina lange, Oye te shi mu pe.” (Joh. 15:16) Eudaneko olo kala li tuu la pameka ovayapostoli! * Nonande kava li ve udite ko filufilu eudaneko olo, Omuwiliki wavo okwa li e li pokufya, ndele kava li tava ka kala vehe na ekwafo lasha. Jehova okwa li e lilongekida okunyamukula omailikano avo noku va pa ekwafo olo va pumbwa opo va wanife po oshipango osho shokuudifa etumwalaka lOuhamba. Diva ashike konima yaasho, ova li va mona nghee Jehova a nyamukula omailikano avo noku va pa ekwafo. — Oil. 4:29, 31.

Ohatu dulu okukala noushili kutya Jehova oha nyamukula omailikano etu nohe tu kwafele (Tala okatendo 18)

18 Nokunena, osho osha faafana. Eshi hatu twikile okwiima oiimati, ohatu hafele oukaume naJesus. Shikwao vali, ohatu dulu okukala noushili kutya Jehova okwe lilongekida okunyamukula omailikano etu noku tu kwafela tu finde omaupyakadi oo tashi dulika tu shakeneke eshi hatu udifa onghundana iwa yOuhamba. (Fil. 4:13) Inatu pandula tuu eshi omailikano etu haa nyamukulwa nosho yo okukala tu li ookaume kaJesus! Eeshali odo da dja kuJehova ohadi tu kwafele tu twikile okwiima oiimati. — Jak. 1:17.

19. (a) Omolwashike hatu twikile okukufa ombinga moilonga yokuudifa? (b) Oshike tashi tu kwafele tu manife oilonga yaKalunga?

19 Ngaashi twe shi kundafana moshitukulwa eshi, ohatu kufa ombinga moilonga yokuudifa opo tu fimanekife Jehova nokuyapulifa edina laye, tu ulike ohole yetu yokuhola Jehova nosho yo Jesus, tu londwele vamwe nosho yo tu ulike ohole yetu yokuhola ovanhu vakwetu. Shikwao vali, oshali yehafo, yombili, youkaume noyomailikano oo haa nyamukulwa ohai tu kwafele tu manife oilonga yaKalunga. Mbela Jehova iha kala tuu a hafa eshi e wete hatu ningi eenghendabala da mana mo opo tu ‘twikile okwiima oiimati ihapu’!

^ okat. 17 Jesus okwa li a shilipaleka ovayapostoli vaye kutya omailikano avo otaa ka nyamukulwa eshi a li ta popi navo. — Joh. 14:13; 15:7, 16; 16:23.