Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Nghee gaius a kwafela ovamwaxe

Nghee gaius a kwafela ovamwaxe

GAIUS nOvakriste vakwao vomefelemudo lotete ova li va taalela omashongo. Oohandimwe ovo va li tava tandaveleke omahongo oipupulu ova kala tava kendabala okunghundipaleka nokutukaula omaongalo. (1 Joh. 2:18, 19; 2 Joh. 7) Omulumenhu wedina Diotrefes okwa li ha tandavelifa “eendjovo dii” di na sha nomuyapostoli Johannes nosho yo vakwao, noka li ha yakula Ovakriste ovaendi, nokwa li yo ha kendabala opo a hongaule vamwe va shikule oshihopaenenwa shaye. (3 Joh. 9, 10) Onghalo osho ya li ngaho eshi Johannes a shangela Gaius. Onhumwafo yomuyapostoli oyo ya shangwa lwomo 98 O.P., oi li mOmishangwa dopaKriste dOshigreka onga ‘Epistoli Etitatu laJohannes.’

Nonande Gaius okwa shakeneka omashongo, okwa kala ta longele Jehova noudiinini. Ongahelipi a ulika oudiinini waye? Omolwashike twa pumbwa okushikula oshihopaenenwa shaye kunena? Ongahelipi onhumwafo yaJohannes tai dulu oku tu kwafela tu ninge ngaho?

ONHUMWAFO YA SHANGELWA KAUME OMUHOLIKE

Omushangi wepistoli Etitatu laJohannes okwe li ifana mwene “omukulunhu”. Osho okwa li tashi ka kwafela Gaius a dimbulule mo omuyapostoli Johannes. Johannes okwa li a ifana Gaius a ti: “omuholike, ou ndi mu hole moshili.” Opo nee Johannes okwa popya nelineekelo kutya Gaius oku na oukolele muwa ngaashi ashike oupamhepo waye. Kada li tuu eendjovo nomatumbulo olupandu mawa! — 3 Joh. 1, 2, 4.

Otashi dulika Gaius a li omupashukili meongalo, ashike onhumwafo inai shi tumbula kondadalunde. Johannes okwa li a pandula Gaius eshi a yakula ovamwatate nonande ke va shii. Oshinima osho osha li sha pa Johannes oumbangi kutya Gaius omudiinini, molwaashi okuyakula ovaenda oshi li shimwe shomoinima oyo hai didilikifa mo ovapiya vaKalunga. — Gen. 18:1-8; 1 Tim. 3:2; 3 Joh. 5.

Eshi Johannes a pandula Gaius omolwokuyakula ovamwatate, otashi ulike kutya Ovakriste ova kala hava ende pandjikilile pokati konhele oko haku di Johannes neongalo, novaendi ovo ova li va lombwela Johannes osho va mona. Otashi dulika osho sha li sha ningifa Johannes a ude shihapu kombinga yomaongalo oo.

Ovakriste ovaendi okwa li hava kala va hala okukala pamwe novaitaveli vakwao. Eenhele dokunangala odo da li ko kada li monghalo iwa, ka mwa li hamu yakulwa ovanhu nawa nomwa li hamu kala omalihumbato ina koshoka. Onghee hano, omafimbo amwe ovaendi ovanaendunge ova li hava ka kala komaumbo ookaume kavo, nOvakriste ovaendi ova li hava ka kala nOvakriste vakwao.

 “OMOLWEDINA LAKRISTUS OVE LITULA MONDJILA”

Johannes okwa li a ladipika Gaius a twikile okuyakula ovaenda, molwaashi omuyapostoli okwe mu lombwela kutya “ngeenge to va kwafa [ovaendi] molweendo lavo va ehene komesho ngaashi sha wapala koshipala shaKalunga.” Pomhito opo, okulekela ovaenda okwa li sha kwatela mo oku va pa oipumbiwa yomondjila nosho yo keshe osho tava ka kala va pumbwa opo va ka fike oko va yuka. Osha yela kutya Gaius osho a kala ha ningi, molwaashi ovaendi ova kala nokulombwela Johannes kombinga yanghee va yakulwa pahole nosho yo noudiinini. — 3 Joh. 3, 6.

Ovaendi ovo otashi dulika va li ovatumwa, ovakalelipo vaJohannes ile ovapashukili ovaendi. Ova li hava i molweendo omolwonghundana iwa. Johannes okwa ti: “Omolwedina laKristus ove litula mondjila.” (3 Joh. 7) Molwaashi movelishe 7 okwa longifa outumbulilo “omolwedina laKristus” nokwa tumbula yo Kalunga movelishe 6, osha yela kutya ovamwatate ovo a li ta popi ova li oshitukulwa sheongalo lopaKriste nova li va wana okuyakulwa monghedi iwa. Johannes okwa ti: “Otu nokutambula nawa ovanhu ve li ngaha, opo tu ninge ovayakuli pamwe navo omolwoshili.” — 3 Joh. 8.

OKUKWAFA MONGHALO IDJUU

Etomheno laJohannes lokushangela Gaius kala li ashike oku mu pandula. Johannes okwa li yo a hala oku mu kwafela a ungaunge noupyakadi wa kwata moiti. Omolwomatomheno onhumba, oshilyo sheongalo lopaKriste shedina Diotrefes kasha li sha hala okuyakula Ovakriste ovaendi. Osha li nokuli sha kendabala okuningifa vamwe vaha yakule ovaenda. — 3 Joh. 9, 10.

Nopehe na omalimbililo, Ovakriste ovadiinini kava li hava kala va hala okukala naDiotrefes nonande okwa li tashi shiiva . Okwa li e liholele komesho meongalo, ka li a fimaneka Johannes nokwa li ha tandaveleke oipupulu kombinga yomuyapostoli nosho yo vakwao. Nonande Johannes ine mu ifana nande onale omuhongi omunaipupulu, Diotrefes ka li a fimaneka eenghonopangelo daJohannes. Ehalo laDiotrefes lokukala e liholele komesho nosho yo oikala yaye ihe fi yopaKriste oya li ya tulifa oudiinini waye momalimbililo. Onghalo yaDiotrefes otai ulike kunghee omunhu ta dulu okutopola eongalo omolwoikala yaye yokukala e lihalela oinima aishe nosho yo ounhwa. Nomolwaasho Johannes a lombwela Gaius nakeshe umwe womufye a ti: “ino shikula owii.” — 3 Joh. 11.

ETOMHENO LIWA LOKULONGA OUWA

Mepingafano naDiotrefes, Johannes okwa tumbula Omukriste wedina Demetrius oo e li oshihopaenenwa shiwa. Johannes okwa ti: “Demetrius, okwa hepaululwa nawa kwaaveshe, nafye yo osho hatu mu hepaulula nawa ndele ou shi shii, ehepaululo letu oloshili.” (3 Joh. 12) Otashi dulika Demetrius a li a pumbwa ekwafo laGaius, nEpistoli Etitatu laJohannes otashi dulika la li onhumwafo yetwalemo noyepopilo liwa. Otashi dulika Demetrius oye mwene a pa Gaius onhumwafo oyo. Demetrius e li umwe womovakalelipo vaJohannes ile tashi dulika omupashukili omweendi, okwa li ha divilike neenghono osho Johannes a shanga.

Omolwashike Johannes a li a ladipika Gaius a twikile okuyakula vamwe ngeenge osho nale a li ha ningi? Mbela Johannes okwa li e wete Gaius a pumbwa etwomukumo? Mbela omuyapostoli okwa li a limbililwa kutya Gaius otashi dulika a kale ta ongaonga okuyakula vamwe molwaashi Diotrefes okwa li ta kendabala okuta mo Ovakriste ovo va li ve na omhepo yokuyakula meongalo? Kashi na nee mbudi kutya onghalo oya li ngahelipi, Johannes okwa li a shilipaleka Gaius a ti: “Ou ta longo ouwa, oye womuKalunga.” (3 Joh. 11) Olo oli li etomheno liwa lokulonga ouwa nokutwikila okuninga ngaho.

Mbela onhumwafo yaJohannes oya li ye linyengifa Gaius a twikile okuyakula ovaenda? Heeno, molwaashi Epistoli Etitatu laJohannes oko li li fiyo okunena nola twa vamwe omukumo va ‘shikule ouwa.’

 OILIHONGOMWA MEPISTOLI ETITATU LAJOHANNES

Katu na vali ouyelele muhapu kombinga yakaume ketu omuholike, Gaius. Ashike osho twa kundafana shi na sha nonghalamwenyo yaye otashi dulu oku tu honga oilihongomwa ihapu.   

Omeenghedi dilipi hatu dulu okulandula oshihopaenenwa ‘shokuyakula ovaenda’?

Shotete, vahapu vomufye otwa dula okushiiva oshili molwaashi okwa li pe na ovanhu ovadiinini ovo va li have uya opo ve tu honge oshili. Oshoshili kutya hakeshe oshilyo sheongalo lopaKriste kunena hashi i keenhele dokokule omolwonghundana iwa. Ngaashi Gaius, nafye ohatu dulu okukala hatu yambidida nokutwa omukumo ovo hava i momalweendo, ngaashi omupashukilishikandjo nomukulukadi waye. Ile ohatu dulu yo okuyandja ekwafo tali wapalele kovamwatate novamwameme ovo va tembukila koitukulwa imwe moshilongo shavo, ile nokuli koshilongo shimwe oko ku na omhumbwe inene yovaudifi vOuhamba. Onghee hano natu kaleni hatu “yakula ovaenda NW.” — Rom. 12:13; 1 Tim. 5:9, 10.

Oshitivali, kunena ngeenge eenghonopangelo meongalo tadi shongwa inatu kala twa kumwa. Eenghonopangelo daJohannes nodomuyapostoli Paulus nado oda li da shongwa. (2 Kor. 10:7-12; 12:11-13) Mbela otu na okulinyenga ngahelipi ngeenge otwa didilike omaupyakadi a fa oo meongalo? Paulus okwa li a ladipika Timoteus a ti: “Omupiya wOmwene ina wapala okutwa eemhata, oye e nokukala e nonheni naaveshe, omulongi ta shiiva okulonga nokulididimikila owii; ye e nokupukulula ovanandubo e nombili.” Ngeenge otwa kala ovananheni nonande otwa udifwa nai, ohatu dulu okulinyengifa ovo ve na oikala yokukembaula va lundulule. Naasho otashi ka ningifa “Kalunga e va pe elidilululo opo va shiive oshili.” — 2 Tim. 2:24, 25.

Oshititatu, Ovakriste vakwetu ovo hava longele Jehova noudiinini nonande ope na omapataneko ova pumbwa okukala hava pandulwa omolwoilonga yavo youdiinini. Omuyapostoli Johannes okwa li a twa Gaius omukumo noku mu shilipaleka kutya osho kwa li ta ningi oshi li mondjila. Sha faafana, nokunena ovakulunhuongalo otava dulu okulandula oshihopaenenwa shaJohannes mokukala hava tu ovamwatate novamwameme omukumo opo vaha ‘loloke.’ — Jes. 40:31; 1 Tes. 5:11.

Onhumwafo oyo ya dja komuyapostoli Johannes a shangela Gaius oi na ashike oitya 219 mOshigreka, noi li embo lixupielela mOmbiibeli. Oi na yo ongushu kOvakriste vokunena.