Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Mei 2016

Nghee to dulu okuninga omatokolo opaumwene

Nghee to dulu okuninga omatokolo opaumwene

‘Shiiveni ehalo lOmwene kutya olilipi.’ — OVAEFESO 5:17.

OMAIMBILO: 6957

1. Eemhango dimwe dopaMbiibeli odilipi, nongahelipi okudulika kudo taku dulu oku tu etela ouwa?

JEHOVA okwe tu pa eemhango di li mOmbiibeli odo de tu lombwela sha yela shi na sha naasho a hala tu ninge. Pashihopaenenwa, okwe tu lombwela tuha longele oikalunga, tuha vake notuha ninge oinima ya nyika omilele. (1 Ovakorinto 6:9, 10) Jesus Omona waKalunga naye okwa yandja elombwelo lokondadalunde kovashikuli vaye, a ti: ‘Indeni hano ka ningeni ovanhu aveshe ovahongwa vange, noku va [ninginifa, NW] medina laXe nolOmona nolomhepo iyapuki, noku va honga okudiinina aishe ei nde i mu lombwela. Ndele tala, Ame ondi li pamwe nanye omafiku aeshe fiyo okexulilo lefimbo lounyuni.’ (Mateus 28:19, 20) Keshe osho Jehova naJesus tave tu lombwele tu ninge, oshi na sha nouwa wetu. Eemhango daJehova otadi tu hongo nghee tu na okulifila oshisho nosho yo omaukwaneumbo etu notadi tu kwafele tu kale tu na oukolele u li xwepo notwa hafa. Osho sha fimanenena, ngeenge hatu dulika keemhango daJehova mwa kwatelwa  oshipango shokuudifa, oha kala a hafa nohe tu nangeke noupuna.

2, 3. (a) Omolwashike Ombiibeli inai yandja eemhango dokondadalunde moshinima keshe monghalamwenyo? (b) Ohatu ka kundafana omapulo elipi moshitukulwa eshi? (Tala efano pehovelo loshitukulwa.)

2 Ombiibeli inai tu pa eemhango dokondadalunde di na sha noshinima keshe monghalamwenyo. Pashihopaenenwa, inai yandja eemhango dokondadalunde di na sha naasho tu na okudjala. Osho otashi ulike kutya Jehova omunaendunge. Nonande omoode yoinima ohai lunduluka efimbo nefimbo novanhu mounyuni ohava djala meenghedi da yoolokafana, Ombiibeli ihai di momoode. Natango, kai na eemhango dihapu dokondadalunde di na sha noilonga ile nomalihafifo oo tu na okuhoolola ile osho tu na okuninga opo tu kale noukolele u li xwepo. Jehova okwa efa ovanhu, mwa kwatelwa omitwe domaukwaneumbo, va ninge omatokolo kombinga yoinima oyo.

3 Ngeenge hatu ningi omatokolo a fimana oo taa dulu okukuma onghalamwenyo yetu, ndele mOmbiibeli kamu na omhango yokondadalunde ina sha naasho, ohatu dulu okulipula kutya: ‘Mbela Jehova oku na ko ngoo nasha netokolo lange? Mbela ota ka hafela ngoo etokolo keshe handi ningi shimha ashike inandi tauluka omhango yaye oyo i li mOmbiibeli? Ondi shi shii ngahelipi kutya ota ka kala a hafela etokolo olo handi ningi?’

OMATOKOLO ETU OHAE TU KUMU NOHAA KUMU OVANHU VAKWETU

4, 5. Ongahelipi omatokolo etu hae tu kumu nosho yo ovanhu vakwetu?

4 Ovanhu vamwe ohava diladila kutya otava dulu okuninga keshe osho va hala. Ashike fye otwa hala okuninga osho tashi hafifa Jehova. Onghee hano, fimbo inatu ninga etokolo, otwa pumbwa okudiladila shi na sha naasho Ombiibeli tai ti, ndele hatu dulika kuyo. Pashihopaenenwa, Ombiibeli otai tu lombwele nghee Kalunga ha tale ko ohonde, hano otu na okudulika kwaasho tai ti. (Genesis 9:4; Oilonga 15:28, 29) Ohatu dulu okwiilikana kuye e tu kwafele tu ninge omatokolo oo tae mu hafifa.

5 Omatokolo etu ohae tu kumu. Ngeenge otwa ningi etokolo li li pandunge otali dulu oku tu kwafela tu ehene popepi naJehova. Etokolo lihe li pandunge otali dulu okunyona po ekwatafano letu naye. Omatokolo etu otaa dulu yo okukuma ovanhu vakwetu. Inatu hala okuninga oshinima osho tashi dulu okuhandukifa Ovakriste vakwetu ile okunghundipaleka eitavelo lavo. Inatu hala yo okweeta omaupyakadi pokati kovamwatate meongalo. Onghee hano, osha fimana okukala hatu ningi omatokolo e li pandunge. — Lesha Ovaroma 14:19; Ovagalati 6:7.

6. Oshike shi na oku tu wilika ngeenge hatu ningi omatokolo?

6 Ongahelipi hatu dulu okuninga omatokolo e li pandunge ngeenge Ombiibeli inai yandja eemhango dokondadalunde moshinima shonhumba? Ponhele yokutokola osho twa hala, otu na okudiladila noukeka shi na sha nonghalo yetu, ndele hatu ningi etokolo olo tali ka hafifa Jehova. Ngeenge otwa ningi ngaho, ohatu ka kala noushili kutya ote ke tu kwafela tu mone oidjemo iwa. — Lesha Epsalme 37:5.

JEHOVA OSHIKE A TEELELA NDI NINGE?

7. Ngeenge mOmbiibeli kamu na omhango yokondadalunde moshinima shonhumba, ongahelipi hatu dulu okumona kutya Jehova okwa hala tu ninge shike monghalo oyo?

7 Ongahelipi hatu dulu okushiiva osho tashi ka hafifa Jehova? Ombiibeli mOvaefeso 5:17 oya ti: ‘Shiiveni ehalo lOmwene kutya olilipi.’ Ngeenge mOmbiibeli kamu na omhango yokondadalunde  moshinima shonhumba, otwa pumbwa okukonakona ile okushiiva kutya Jehova okwa hala tu ninge shike monghalo oyo. Ongahelipi hatu dulu okuninga ngaho? Otwa pumbwa okwiilikana kuye nokupitika omhepo iyapuki i tu wilike.

8. Jesus okwa li a ulika ngahelipi kutya oku shii osho Jehova a hala a ninge? Yandja oshihopaenenwa.

8 Jesus okwa li ha tale kutya oshike Jehova a hala a ninge. Pashihopaenenwa, oikando ivali eshi eemhunga dovanhu da li da fya ondjala, Jesus okwa li a ilikana ndele te di palula pashikumwifilonga. (Mateus 14:17-20; 15:34-37) Ashike eshi a li a fya ondjala mombuwa, ndele Ondiaboli tai mu hongaula a shitukife omamanya omingome, Jesus okwa li e shi anya. (Lesha Mateus 4:2-4.) Molwaashi Jesus okwa li e shii Xe filufilu, okwa li e shii kutya Jehova ita ka pitika Jesus a longife omhepo iyapuki omolweemhumbwe daye dopaumwene. Jesus okwa li e shii nawa kutya Xe ota dulu oku mu wilika noku mu pa oikulya ngeenge e i pumbwa.

9, 10. Oshike tashi ke tu kwafela tu ninge omatokolo e li pandunge? Shi yelifa.

9 Ngaashi Jesus, nafye ohatu dulu okuninga omatokolo e li pandunge ngeenge otwa kala hatu kongo ewiliko nokulineekela muJehova. Ombiibeli oya ti: “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye. Ino kala omunongo momesho oye mwene. Tila Omwene, ndee kanduka mo mowii.” (Omayeletumbulo 3:5-7) Ngeenge hatu konakona Ombiibeli nokulihonga kombinga yanghee Jehova ha tale ko oinima, otashi ke tu kwafela tu mone kutya oshike a hala tu ninge monghalo yonhumba yokondadalunde. Eshi ngoo hatu ende hatu lihongo nghee Jehova ha tale ko oinima, osho ngoo tashi ka ninga shipu kufye tu ninge omatokolo oo tae mu hafifa. Kungaho, ohatu ka kala tu na “omutima wonhumba,” sha hala okutya hatu dulika kuJehova noupu. — Hesekiel 11:19.

10 Natu tye nee omukainhu a hombolwa okwa ka landa oinima kofitola, ye ta mono eenghaku diwa e di hala, ashike odi na ondilo. Nonande pomhito oyo ke li nomushamane waye, oku shii kutya omushamane ota ka kala e udite ngahelipi ngeenge okwa lande eenghaku odo dondilo. Mbela omukulukadi oku shi shii ngahelipi? Ova kala mohombo oule wefimbo lonhumba, nomolwaasho oku shii nghee omushamane a hala va longife oimaliwa yavo. Sha faafana, ngeenge otwe lihongo nghee Jehova ha tale ko oinima naasho a ninga monakudiwa, ohatu ka shiiva kutya oshike a hala tu ninge meenghalo di lili noku lili.

ONGAHELIPI TO DULU OKUMONA NGHEE JEHOVA HA TALE KO OINIMA?

11. Omapulo elipi hatu dulu okulipula ngeenge hatu lesha ile hatu konakona Ombiibeli? (Tala oshimhungu “ Ngeenge to konakona Ombiibeli, lipula kutya.”)

11 Ongahelipi to dulu okumona nghee Jehova ha tale ko oinima? Oshinima sha fimanenena osho hatu dulu okuninga, okulesha  nokukonakona Ombiibeli efiku keshe. Eshi hatu ningi ngaho, ohatu dulu okulipula kutya: ‘Omushangwa ou otau hongo nge shike kombinga yaJehova? Omolwashike Jehova a katuka monghedi ya tya ngaha?’ Ngaashi David, nafye ohatu dulu okupula Jehova e tu kwafele tu mu shiive nawa. David okwa ti: “Omwene, ulikile nge eendjila doye, Ove u longe nge omalila oye, ame ndi ende moshili yoye, Ove u longe nge, osheshi Oove Kalunga, omukwafi wange, ohandi ku teelele efiku alishe. (Epsalme 25:4, 5) Ngeenge otwe lihongo sha kombinga yaJehova, natu diladile keenghalo donhumba omo hatu dulu okulongifa ouyelele oo. Mbela itatu dulu okukala hatu longifa ouyelele wa tya ngaho moukwaneumbo, koilonga, kofikola nosho yo moilonga yokuudifa? Ngeenge otwa kala hatu diladila konghalo yonhumba yokondadalunde, otashi ka kala shipu tu shiive nghee Jehova a hala tu longife ouyelele oo.

Opo tu mone nghee Jehova ha tale ko oinima, otu na okulesha nokukonakona Ombiibeli efiku keshe

12. Ongahelipi oishangomwa yetu nosho yo okwoongala hai tu kwafele tu shiive nawa nghee Jehova ha tale ko oinima i lili noku lili?

12 Onghedi imwe omo hatu dulu okushiiva nghee Jehova ha tale ko oinima, omokukala hatu yandje elitulemo kwaasho ehangano laye tali tu hongo kombinga yaye. Pashihopaenenwa,  ngeenge hatu ningi omatokolo, O-Watch Tower Publications Index nosho yo Elongifwambo lokukonga Omauyelele mOishangomwa yEendombwedi daJehova otai dulu oku tu kwafela tu shiive nghee Jehova ha tale ko oinima. Ohatu dulu yo okumona ouwa pokwoongala ngeenge ohatu pwilikine nawa nokuyandja omatyekosha nokudilonga kwaasho hatu hongwa. Osho otashi ke tu kwafela tu diladile monghedi omo Jehova ha tale ko oinima. Nokungaho, ohatu ka dula okuninga omatokolo oo taa hafifa Jehova note ke a nangeka noupuna.

KONAKONA ETALEKO LAJEHOVA MANGA INO NINGA ETOKOLO

13. Yandja oshihopaenenwa shanghee hatu dulu okuninga omatokolo e li pandunge ngeenge otwa shiiva nghee Jehova ha tale ko oinima.

13 Natu ka taleni koshihopaenenwa shi na sha nanghee hatu dulu okuninga etokolo lopandunge ngeenge otwa konakona onghedi omo Jehova ha diladila. Natu tye nee kutya owa hala okukala omukokolindjila. Otashi dulika wa ninga omalunduluko monghalamwenyo yoye opo u kale ho longifa efimbo lihapu moukalele. Ashike ku shii naanaa ngeenge oto ka kala ngoo wa hafa eshi u na oimaliwa noipumbiwa inini. Oshoshili kutya Ombiibeli inai tya ohatu dulu ashike okulongela Jehova ngeenge tu li ovakokolindjila. Ohatu dulu oku mu longela noudiinini tu li ovaudifi. Ashike mepingafano naasho, Jesus okwa ti kutya Jehova oha nangeke noupuna ovo tava ningi omaliyambo omolwOuhamba. (Lesha Lukas 18:29, 30.) Ombiibeli oya ti yo kutya Jehova oha kala a hafa ngeenge hatu ningi ngaashi hatu dulu tu mu tange, nokwa hala tu kale twa hafa eshi hatu mu longele. (Epsalme 119:108; 2 Ovakorinto 9:7) Ngeenge otwa ilikana shi na sha noinima oyo nokudilonga kuyo, ohatu ka ninga etokolo olo tali ke tu kwafela monghalamwenyo yetu, naJehova ote ke tu nangeka noupuna.

14. Ongahelipi to dulu okumona ngeenge omidjalo donhumba oda hokiwa kuJehova?

14 Natu ka taleni vali koshihopaenenwa shimwe: Natu tye nee ou hole neenghono oikutu yoludi lonhumba, ndele ou shii kutya Ovakriste vamwe meongalo otashi dulika va ude nai ngeenge owe i djala. Ombiibeli inai yandja eemhango dokondadalunde di na sha noludi loikutu oyo ina okudjalwa. Mbela ongahelipi to ka shiiva etaleko laJehova moshinima osho? Ombiibeli otai ti: “Ovakainhu nava djale oikutu tai wapala eenghedi diwa nokuliwapeka noshishohoni noukoshoki, haneexwiki da vindwa ile noulenga woshingoldo ile noshilanda ile noikutu youkengeli ei tai landwa nondilo, ndelenee onoilonga iwa ei tai wapalele ovakainhu ovo otave lihepaulula kutya, vo oonakutilakalunga.” (1 Timoteus 2:9, 10) Nopehe na omalimbililo, eendjovo odo otadi hongo ovapiya vaJehova aveshe, mwa kwatelwa ovalumenhu. Ngeenge otu li ovalininipiki, ohatu ka diladila nghee omidjalo detu tashi dulika di ka kume vamwe. Molwaashi otu hole yo Ovakriste vakwetu, ohatu ka henuka oku va handukifa ile oku va udifa nai. (1 Ovakorinto 10:23, 24; Ovafilippi 3:17) Onghee hano, ngeenge otwa kala hatu konakona osho Ombiibeli tai ti nonghee Jehova ha tale ko oinima, otashi ke tu kwafela tu ninge omatokolo oo tae mu hafifa.

15, 16. (a) Mbele Jehova ota ka kala e udite ngahelipi ngeenge otwa kala hatu diladila oinima ya nyika omilelele? (b) Ongahelipi hatu dulu okushiiva kutya oshike tashi ka hafifa Jehova ngeenge hatu hoolola omalihafifo? (c) Omatokolo oo a kwata moiti oku na okuningwa ngahelipi?

15 Otwe lihonga mOmbiibeli kutya Jehova oha yahama nokunyemata ngeenge ovanhu tava longo owii nokudiladila kombinga yoinima ii. (Lesha Genesis 6:5, 6.) Osho otashi  ulike lela kutya Jehova ina hala tu kale hatu faneke momadiladilo etu oinima yopamilele. Ngeenge otwa kala hatu diladila oinima oyo, ohatu ke lihanga hatu i ningi. Mepingafano naasho, Jehova okwa hala tu diladile oinima oyo ya koshoka noiwa. Omuhongwa Jakob okwa shanga kutya ounongo waJehova ‘tete owa yela nopo nee u nombili nou nolukeno nowiitaveleli nou yadi onghenda noiimati iwa; kau nomalimbililo ile oihelele.’ (Jakob 3:17) Onghee hano, Ombiibeli otai tu hongo kutya otu na okuhenuka omalihafifo oo taa dulu oku tu ningifa tu faneke momadiladilo ile tu kale twa hala oinima inai koshoka ile ii. Ngeenge otwa kala tu shii nawa osho Jehova e hole naasho e tonde, ohatu ka shiiva noupu kutya omambo, eefilima ile omaudano elipi tu na okuhoolola. Onghee hano, itatu ka pumbwa okupula ovanhu vakwetu kutya natu ninge po shike.

16 Ngeenge hatu ningi etokolo, luhapu ohapa kala eemhito dokuhoolola osho tashi hafifa Jehova. Ndele ngeenge ohatu ningi etokolo la fimanenena, otashi dulika shiwa okupula omukulunhuongalo ile omumwatate ile omumwameme a pyokoka opo e tu pe omayele. (Titus 2:3-5; Jakob 5:13 -15) Oshoshili kutya katu na okupula omumwatate ile omumwameme a tya ngaho e tu ningile ko etokolo. Ponhele yaasho, otu na okudiladila nawa shi na sha naasho tu shii mOmbiibeli opo nee hatu ningi omatokolo kufye vene. (Ovaheberi 5:14) Omuyapostoli Paulus okwa ti: “Keshe tuu oku nokuhumbata omutengi waye mwene.”— Ovagalati 6:5.

17. Ouwa ulipi hatu mono ngeenge otwa ningi omatokolo oo taa hafifa Jehova?

17 Ngeenge otwa kala hatu ningi omatokolo oo taa hafifa Jehova, ohatu ka ehena popepi naye nota ka kala e tu hokwa noku tu nangeka noupuna. (Jakob 4:8) Naasho otashi ka pameka eitavelo letu muJehova. Onghee hano, natu kaleni hatu dilonga kwaasho hatu lesha mOmbiibeli opo tu ude ko nghee Jehova ha tale ko oinima. Oshoshili kutya ohatu ka kala nokulihonga oinima ipe kombinga yaJehova. (Job 26:14) Ashike ngeenge otwa longo noudiinini tu lihonge kombinga yaye paife, ohatu ka kala ovanaendunge nohatu ka ninga omatokolo e li pandunge. (Omayeletumbulo 2:1-5) Eendunge neemhangela dovanhu ohadi lunduluka, ashike Jehova iha lunduluka. Omupsalme okwa ti: “Omhangela yOmwene otai kalelele, nomadiladilo omutima waye okomapupi nomapupi.” (Epsalme 33:11) Nopehe na omalimbililo, ohatu dulu okuninga omatokolo a denga mbada ngeenge otwe lihongo nghee Jehova ha tale ko oinima nokuninga osho tashi mu hafifa.