Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Omapulo a dja kovaleshi

Omapulo a dja kovaleshi

Omolwashike Eendombwedi daJehova hadi faneke Paulus e na ongwala?

Oushili oyo kutya kape na omunhu kunena e shii eholokepo lo vene laPaulus. Omafano aPaulus oo e li moishangomwa yetu okwe mu kalela po ashike, ndele inae likolelela kwaasho sha monika kovalafululi voikulunima.

Kakele kaasho, ope na oinima imwe oyo tai ulike kutya okwa li e na eholokepo la tya ngahelipi. Pashihopaenenwa, oshifo sho Zion’s Watch Tower she 1 Marsa 1902 osha tumbula oshinima shimwe sha ti: “Shi na sha neholokepo laPaulus: . . . Embo ledina ‘Acts of Paul and Thecla,’ . . . olo la shangelwe mo 150 lwaapo konima yefyo laKristus, ola yelifa eholokepo laPaulus olo tashi dulika li li mondjila nole mu yeleka. Membo omo okwa hokololwa kutya okwa li ‘muxupi, e na ongwala, iikomboulu, oshipombolutu, eemafu da shakena nosho yo eyulu lile.’”

Emboitya The Oxford Dictionary of the Christian Church (enyanyangido lomo 1997) ola popya shi na sha nembo olo, la ti: “Otashi shiiva embo olo ledina ‘Acts of Paul and Thecla’ li na oinima imwe yopandjokonona i li paushili.” Embo olo ola li la fimanekwa neenghono momafelemido onale, naasho osha kolekwa komaumbangi 80 oo e li momashangelo Oshigreka nosho yo momalaka amwe. Onghee hano, omafano aPaulus, oo e li moishangomwa yetu, oku li metwokumwe nomashangelo onale oo a popya shi na sha neholokepo laye.

Kaleka momadiladilo kutya ope na oinima imwe oyo ya fimana i dule eholokepo laPaulus. Eshi Paulus a li ta wanifa po oshilonga shaye shokuudifa, ovapataneki vamwe ova li tava ti kutya “okuholoka kwaye kwopalutu okwa nyika oungone nokupopya kwaye kaku noshilonga.” (2 Kor. 10:10) Ndele nande ongaho, okwa ninga Omukriste omolwoshikumwifilonga osho Jesus a li a longa. Dimbuluka yo osho Paulus a wanifa po e li “oshilongifo [shaKristus] sha hoololwa shokuhumbatela edina [laJesus] koiwana.” (Oil. 9:3-5, 15; 22:6-8) Diladila yo komauwa oo hatu dulu okumona momambo Ombiibeli oo Jehova a li a nwefa mo Paulus a shange.

Paulus ka li he litangele oinima oyo a pondola fimbo ina ninga Omukriste, noina popya sha shi na sha neholokepo laye. (Oil. 26:4, 5; Fil. 3:4-6) Okwa tile nokuli: “Ame ondi dulike kovayapostoli aveshe, inandi wana okwiifanwa omuyapostoli.” (1 Kor. 15:9) Lwanima, okwa shanga a ti: “Aame ou omunini ndi dulike kovayapuki aveshe onda pewa efilonghenda eli, okuudifila ovapaani evaengeli loupuna waKristus uhe fi okukonakonwa.” (Ef. 3:8) Etumwalaka olo ola fimanenena li dulife omalipulo aeshe e na sha neholokepo laPaulus.