Inda koshikalimo

Inda koshikalimo

Eendombwedi daJehova

Hoolola elaka Oshikwanyama

‘Eendunge doye nadi nangekwe noupuna’

‘Eendunge doye nadi nangekwe noupuna’

DAVID womuIsrael shonale okwa li a popya eendjovo odo da tumbulwa metetekelo ta tange omukainhu oo a li a shakeneka. Edina laye okwa li Abigail. Mbela oshike sha li she linyengifa David e mu tange, nongahelipi hatu dulu okumona ouwa moshihopaenenwa shaye?

David okwa li a shakena nomukainhu oo a hombolwa eshi a li ta faduka po ohamba Saul. Abigail okwa li a hombolwa kuNabal, omulumenhu oshipuna oo a li e na oufita muhapu moshitukulwalongo sheemhunda daJuda. David novalumenhu vaye ‘ova li ohotekuma’ youfita waNabal. Lwanima David okwa li a tuma ovapiya kuNabal, vaka pule ‘e va pe osho e shi na’ ngaashi oikulya. (1 Sam. 25:8, 15, 16) Okutala kunghee David novapiya vaye va kala tava amene omaliko aNabal, eindilo laye ola li li shii okuudiwa ko.

Ashike Nabal, oo edina laye tali ti “elai”, okwa kala ha katuka metwokumwe nedina laye. Okwa li a nyamukula a handuka nokutukana, eshi a anya eindilo laDavid. David okwa li a ninga omhangela opo a katukile Nabal onghatu omolweenghatu odo a li a katuka dihe li pandunge. Nabal noukwaneumbo waye ova li tava ka kanifa eemwenyo davo omolwoulai waye. — 1 Sam. 25:2-13, 21, 22.

Omolwoilanduliko oyo va li va taalela inyikifa oluhodi, Abigail okwa li a ya mo olunyala. Okwa li a ka yandja ombili kuDavid nelininipiko opo a kaleke po ekwatafano laye naJehova. Ndele te mu longekidile oikulya ya wana, noye a li ta ka ninga ohamba ya shikula ko, nokovalumenhu vaye. Lwanima, David okwa ka didilika kutya Jehova okwa longifa Abigail e mu kelele aha ninge oshinima osho sha li tashi ke mu ningifa a kale e na ondjo kuKalunga. David okwa li a lombwela Abigail a ti: “Neendunge doye nadi nangekwe noupuna, naave mwene u nangekwe noupuna, eshi wa kelela nge nena okutula etimba lohonde.” — 1 Sam. 25:18, 19, 23-35.

Inatu hala nande okukala twa fa Nabal, mokukala tuhe na olupandu omolwoinima iwa oyo twa ningilwa. Shimwe vali, ngeenge opa holoka oupyakadi, ohatu dulu okuninga ngaashi hatu dulu opo tu u pongolole po. Kungaho ohatu ka dula okupopya twa fa omupsalme oo a li a lombwela Kalunga a ti: “Longe nge omayele neendunge.” — Eps. 119:66.

Vamwe otava ka dula okudidilika mo ounongo, ile eendunge detu okupitila meenghatu detu. Kutya nee ohave shi popi ile hasho, otashi dulika va kale ve udite ngaashi David eshi a li a popya, a ti: “Neendunge doye nadi nangekwe noupuna.”