Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Kala ho kenukile “ovanhu aveshe”

Kala ho kenukile “ovanhu aveshe”

ESHI Jesus a honga ovahongwa vaye nghee ve na okuudifa onghundana iwa, okwa li e shii kutya haalushe etumwalaka olo lOuhamba tali ka tambulwa ko. (Luk. 10:3, 5, 6) Otashi dulika moukalele tu shakeneke vamwe ovo itave tu tambula ko nawa. Okulinyenga kwavo kwa tya ngaho otaku dulu oku shi ninga shidjuu kufye okukenukila ovo hatu udifile.

Omunhu oo e na olukeno oha mono eemhumbwe nomaupyakadi avamwe; ohe va udile oukwao wananghali noha kala a hala oku va kwafela. Ashike ngeenge otwa kala ihatu kenukile ovo hatu shakeneke moukalele, otashi dulika tuha kale vali ovaladi notuha pondole. Kakele kaasho, ngaashi ashike omunhu ha tula oikuni pediko opo omundilo u kale wa tema, nafye ngeenge otwa kala ovanalukeno ohatu ka kala ovaladi moukalele. — 1 Tes. 5:19.

Ongahelipi hatu dulu okuulika olukeno nonande kashipu okuninga ngaho? Natu ka konakoneni oihopaenenwa itatu oyo hatu dulu okuhopaenena, shaJehova, shaJesus nosho yo shomuyapostoli Paulus.

HOPAENENA OLUKENO LAJEHOVA

Jehova okwa kala te lididimike oule womido omayovi eshi edina laye la kala tali shekwa. Okwa kala e na “onheni naava vehe shii okupandula naava vai.” (Luk. 6:35) Okulididimika kwaye otaku ulike kutya oku na olukeno. Jehova okwa hala “ovanhu aveshe” va xupifwe. (1 Tim. 2:3, 4) Nonande Jehova oku tonde owii, oha tale ko ovanhu ve na ondilo noina hala pa kane nande oumwe. — 2 Pet. 3:9.

Jehova oku shii nghee Satana a twikifa filufilu ovanhu ovo vehe na eitavelo. (2 Kor. 4:3, 4) Vahapu ovahongwa omahongo a puka nosho yo eenghedi dii okudja kounona wavo, naasho ohashi shi ningifa shidjuu kuvo okutambula ko oshili. Jehova okwa halelela okukwafela ovanhu va tya ngaho. Otu shi shii ngahelipi?

Diladila kunghee Jehova a li a tala ko ovanhu ovo va li muNinive shonale. Nonande ova li ve na elihumbato lii, Jehova okwa li a lombwela Jona a ti: “Ndelenee Ame ohandi kala ngahelipi ngeno, ndiha yehamene Ninive, oshilando shinene shi novanhu ve dule omayovi efele nomafele omilongo mbali vehe shii okutongola eke lolulyo nolumosho?” (Jona 4:11) Jehova okwa li a tala ko Ovaninive va hepa pamhepo, nonghenda yaye oya li ye mu linyengifa a tume ko Jona opo e ke va londwele.

Ngaashi Jehova, otwa tala ko ovanhu ve na ondilo. Ohatu dulu okuhopaenena Jehova mokukala twa hala okukwafela ovo tashi dulika va hala okupwilikina, nokuli nonande otava monika va fa inava hala okupwilikina.

HOPAENENA OLUKENO LAJESUS

Ngaashi Xe, Jesus okwa li a etela onghenda ovo ve shii omhumbwe yavo yopamhepo. “Ndele eshi a tala eengudu dovanhu okwe di uditila onghenda, osheshi ovo va li va hepekwa, ndele va loloka va fa eedi dihe na omufita.” (Mat. 9:36) Molwaashi Jesus iha tale kombada, okwa li a mona kutya ovo ve uya okupwilikina kuye ova li va hongwa omahongo a puka nova li hava ungaungiwa navo nai kovawiliki vomalongelokalunga. Nonande Jesus okwa li e shii kutya vahapu otava ka efa omaupyakadi avo e va imbe okupwilikina nelitulemo, okwa twikila oku “va longa oinima ihapu.” — Mark. 4:1-9.

Ino nyemata ngeenge umwe potete ina ulika ohokwe

Eenghalo ohadi lunduluka, onghee etaleko lomunhu li na sha noshili otali dulu okulunduluka

Ngeenge ovanhu inava tambula ko etumwalaka letu, otwa pumbwa okuuda ko kutya  omolwashike omunhu oo ina hala okupwilikina. Otashi dulika vamwe ve na etaleko lii li na sha nOmbiibeli ile nOukriste omolwoihopaenenwa ii yaavo have liti Ovakriste. Otashi dulika vamwe va lombwelwa oipupulu kombinga yeitavelo letu. Vamwe otashi dulika va ungaungiwe navo nai kovanhu vomomudingonoko ile koilyo youkwaneumbo wavo ngeenge ove tu tambula ko nawa.

Vamwe ovo hatu shakeneke moukalele otashi dulika vaha tambule ko etumwalaka omolwoiningwanima ihalukifa oyo ye va piyaaneka. Omutumwa wedina Kim, okwa ti: “Kombinga imwe moshitukulwa shetu, vahapu ova ninga oihakanwa yoita nova kanifila mo omaliko avo mahapu. Kave na eteelelo lolela li na sha nonakwiiwa. Ohava kala va nyemata noihava kala ve na elineekelo lasha. Moshitukulwa osho, ohatu shakeneke luhapu ovo ve li omhinge netumwalaka letu. Pomhito imwe, onda li nda dengwa ofimbo handi udifa.”

Kim okwa li a ulika ngahelipi olukeno eshi a li a ungaungiwa naye ngaho? Okwa ti: “Ngeenge onda ungaungiwa naame nai, ohandi kendabala okukaleka momadiladilo Omayeletumbulo 19:11, oo a ti: ‘Eendunge domunhu tadi mu pe outalanheni.’ Okudimbuluka onakudiwa yaavo ve li moshitukulwa shetu ohaku kwafele nge ndi va ulikile olukeno. Haaveshe ovo hatu shakeneke have linyenge monghedi ii. Moshitukulwa osho tuu osho, otu na mo omalishuneko mawa.”

Otashi dulika tu lipule kutya, ‘Ngeno aame nda li ovanhu ovo handi udifile, ngeno ohandi linyenge ngahelipi ketumwalaka lOuhamba?’ Pashihopaenenwa, ongahelipi mbela ngeenge otwa kala hatu lombwelwa oipupulu kombinga yEendombwedi daJehova? Meenghalo da tya ngaho, otashi dulika tu linyenge nai notwa pumbwa okukenukilwa. Ngeenge otwa dimbuluka oshipango shaJesus osho kutya natu ungaunge navakwetu ngaashi twa hala va ungaunge nafye, otashi ke tu linyengifa tu va udile oukwao wananghali nonande ohashi kala shidjuu okuninga ngaho. — Mat. 7:12.

HOPAENENA OLUKENO LAPAULUS

Omuyapostoli Paulus okwa li a kenukila nokuli novapataneki ovakwanyanya. Omolwashike mbela? Ka li a dimbwa onakudiwa yaye. Okwa ti: ‘Onda li nale omusheki nomutaatai nomuhepeki. Ndele onda filwa onghenda, osheshi ame nde shi ningile mokuhashiiva sha nomokuhaitavela.’ (1 Tim. 1:13) Okwa li e shii kutya Jehova naJesus ove mu fila onghenda inene. Naye okwa li naanaa monghalo ya fa yaavo a li a udifila.

Peemhito dimwe, Paulus okwa li ha shakene naavo va li va hongwa unene omahongo  a puka. Okwa li e linyenga ngahelipi? Oilonga 17:16 oya popya kutya eshi Paulus a li muAtena, “omhepo yaye oya tukulukila muye, eshi a mona oshilando sha li shi yadi oiyelekela yoikalunga.” Ndele nande ongaho, okwa li a longifa omhito keshe a yandje oundombwedi nawanawa. (Oil. 17:22, 23) Okwa li a longifa eenghedi dihapu dokuudifa opo a udifile ovanhu vomomaputuko a yoolokafana ‘opo a xupife vamwe.’ — 1 Kor. 9:20-23.

Ohatu dulu okuhopaenena Paulus mokukwafela ovanhu ovo hatu shakeneke ve na eenghedi dii nosho yo va hongwa omahongo oipupulu moku va lombwela nelungi “ondaka iwa.” (Jes. 52:7) Omumwameme wedina Dorothy okwa ti: “Moshitukulwa shetu, ovanhu vahapu ovahongwa kutya Kalunga omukwanyanya noha tokola ovanhu. Onda li nda pandula ovanhu va tya ngaho omolweitavelo lavo la pama muKalunga nonda li nde va kwafela va yandje elitulemo kwaasho Ombiibeli tai ti kombinga yomaukwatya aJehova opahole nosho yo omaudaneko aye omonakwiiwa.”

“DULA OWII ONOUWA”

Eshi ‘omafiku axuuninwa’ a yuka komesho, otwa teelela vamwe ovo hatu udifile va ‘ehene komesho mowii nokupukifa nokupuka.’ (2 Tim. 3:1, 13) Ashike inatu efa osho shi tu efife po olukeno letu ile shi tu kanifife ehafo letu. Jehova ota dulu oku tu pa eenghono tu ‘dule owii nouwa.’ (Rom. 12:21) Omukokolindjila wedina Jessica okwa ti: “Luhapu ohandi shakeneke ovanhu ovo vehe na elininipiko nove tu yemba nosho yo etumwalaka letu. Osho otashi dulu oku tu udifa nai. Ngeenge nda hovele eenghundafana nomunhu, ohandi ilikana momutima kuJehova a kwafele nge opo ndi tale ko omunhu oo ngaashi ye he mu tale ko. Osho ohashi kwafele nge ndiha yandje elitulemo komaliudo ange nohashi kwafele nge ndi diladile nghee ndi na okukwafela omunhu oo.”

Ohatu twikile okukonga ovo va halelela oku ka mona omwenyo waalushe

Vamwe ohave tu tambula ko eshi hatu kendabala nelididimiko oku va kwafela pamhepo

Otwa pumbwa okutala nghee hatu dulu okutwa Ovakriste vakwetu omukumo. Jessica okwa ti: “Ngeenge umwe womufye oku na oshimoniwa shii, ohandi kendabala ndiha yandje elitulemo kusho. Ponhele yaasho, ohandi lundululile eenghundafana koikundafanwa iwa, ngaashi oinima iwa oyo twa pondola moukalele wetu nonande vamwe ihave linyenge nawa.”

Jehova oku shii omaupyakadi aeshe oo hatu shakeneke moukalele. Mbela iha kala tuu a hafa ngeenge hatu hopaenene onghenda yaye! (Luk. 6:36) Jehova ita ka twikila okuulika onghenda yaye. Ohatu dulu okukala nelineekelo kutya oku shii efimbo la wapala lokuxulifa po onghalelo ei yoinima. Onghee hano, okuudifa kwetu okwa endelela. (2 Tim. 4:2) Natu twikileni okuwanifa po oshilonga shetu nouladi nokukala hatu kenukile “ovanhu aveshe.”