Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Omapulo a dja kovaleshi

Omapulo a dja kovaleshi

Mbela otashi wapalele ngoo kOmukriste okukala e noilwifo, ngaashi ondjebo, opo e liamene kovanhu vakwao?

Omayele oo oku li omhinge noilwifo yopashinanena, ngaashi eendjebo ile oilwifo imwe vali, oyo ovanhu hava longifa opo ve liamene kovanhu vakwao. Natu ka kundafaneni oinima imwe oyo tai tu kwafele tu ninge omatokolo e li mondjila:

Momesho aJehova, omwenyo, unene tuu wovanhu, ou li oshinima shiyapuki. Omupsalme David okwa li e shii kutya Jehova oye ‘odjo yomwenyo.’ (Eps. 36:9) Onghee hano, ngeenge Omukriste okwa tokola okuliamena ile a amene eliko laye, oku na okukala a kotoka opo a henuke okudipaa omunhu nokuha kale e na etimba lohonde. — Deut. 22:8; Eps. 51:14.

Nonande okulongifa oinima yonhumba otaku dulu okweetifa etimba lohonde, oshipu okudipaa umwe ombadilila ile owina nondjebo. * Shikwao vali, ngeenge omuponokeli, oo tashi dulika a fufaeka nale, okwa mono kutya omunhu umwe oku na oshilwifo, onghalo oyo otai dulu okunaipala notai dulu okweetifa efyo noupu.

Eshi Jesus a li a lombwela ovashikuli vaye va etelele omaongamukonda avo moufiku waye waxuuninwa kombada yedu, ka li ta diladila eameno. (Luk. 22:36, 38) Ponhele yaasho, Jesus okwa li e va lombwela va etelele omaongamukonda avo opo e va honge vaha longe  oukolokoshi, nokuli nongeenge ova ponokelwa kongudu i na oilwifo. (Luk. 22:52) Konima eshi Petrus a shasha omupiya womupristeri omukulunhu neongamukonda, Jesus okwe mu lombwela a ti: “Shunifa mo eongamukonda loye moshilaleko shalo.” Opo nee Jesus okwa popya oshili ya fimanenena, efinamhango olo hali wilike ovashikuli vaye kunena, a ti: “Aveshe ava tava kwata keongamukonda, otava fi keongamukonda.” — Mat. 26:51, 52.

Metwokumwe naMika 4:3, oshiwana shaKalunga otashi ‘ka hambula omaongamukonda asho omatemo nomaonga asho oikashulifo.’ Oukwatya oo ohau yolola mo Ovakriste vashili nou li metwokumwe nelombwelo laPaulus la nwefwa mo olo tali ti: “Inamu alulila nande omunhu owii waye. . . . . . Ngeenge tashi dulika, kombinga yeni kaleni nombili novanhu aveshe.” (Rom. 12:17, 18) Nonande Paulus okwa mona omaupyakadi mahapu, mwa kwatelwa “omoudjuu mokati kovakolokoshi,” okwa kala metwokumwe neendjovo daye, i ne litulila po nandenande eameno lopaumwene lihe li metwokumwe nomafinamhango opamishangwa. (2 Kor. 11:26) Ponhele yaasho, okwa kala e lineekela muKalunga nosho yo mounongo oo tau hangwa mEendjovo daye, ounongo oo “u dule oilwifo yomoita.” — Omuud. 9:18.

Ovakriste ohava tale ko omwenyo u na ongushu u dulife oinima yopamaliko. “Omwenyo womunhu ihau xupifwa kouhapu weliko laye.” (Luk. 12:15) Onghee hano, ngeenge elaka lombili ola dopa okumweneka omunyeki oo a homata, Omukriste omunaendunge oha dulika kefinamhango olo li li meendjovo daJesus tali ti: “Inamu kondjifa omunawii.” Otashi dulika nokuli tashi pula tu mu efe a ninge osho a hala okuninga. (Mat. 5:39, 40; Luk. 6:29) * Onghedi ya denga mbada oyo okukelela owii. Ngeenge otwa henuka “oifulalala yokukalamwenyo” notu shiivike kovashiinda tu li Eendombwedi daJehova di na ohole, ohatu ka henuka okukala oshishonekwa shominyonena. — 1 Joh. 2:16; Omayel. 18:10.

Ovakriste ohava fimaneke omaliudo avamwe. (Rom. 14:21) Ngeenge Ovakriste vamwe ova shiiva kutya oshilyo shimwe meongalo oshi na ondjebo nelalakano lokuliamena kovanhu vakwao, otashi dulika shi va halukife, ile nokuli shi va pundukife. Ohole ohai tu linyengifa tu pitife ouwa wavamwe komesho ponhele youwa wetu vene, nonande otashi pula tu ninge omaliyambo. — 1 Kor. 10:32, 33; 13:4, 5.

Ovakriste ohava kendabala okukala oshihopaenenwa shiwa. (2 Kor. 4:2; 1 Pet. 5:2, 3) Konima yokupewa omayele opamishangwa, Omukriste oo taa twikile okukala e na ondjebo opo e liamene kovanhu vakwao ita ka kala e li oshihopaenenwa shiwa. Onghee hano, ita ka kala a wana okupewa oinakuwanifwa ile omaufembanghenda e likalekelwa meongalo. Osho otashi longo yo nokOmukriste oo ta twikile okulonga noilwifo koilonga yaye yokulikongela omboloto. Otashi ka kala shi li xwepo okukonga oilonga imwe i lili. *

Ngaashi ashike Omukriste e na okuhoolola nghee te liamene, ta amene oukwaneumbo waye ile omaliko aye, osho shi li oshinima shopaumwene, oku na yo okuhoolola kutya oilonga ilipi ta ka tambula. Omafinamhango Ombiibeli oha holola ounongo waKalunga nohole yaye yoku tu hola. Metwokumwe nomafinamhango oo, Ovakriste ovo va pyokoka pamhepo ohava tokola okukala vehe na oshilwifo shokuliamena kovanhu vakwao. Ove shii kutya ovo ve lineekela muKalunga, mokukala metwokumwe nomafinamhango Ombiibeli, ohava mono eameno lashili notali kalelele. — Eps. 97:10; Omayel. 1:33; 2:6, 7.

Pefimbo loudjuu munene, Ovakriste otava ka kala ve lineekela muJehova noitava ka kendabala okuliamena vo vene

^ okat. 5 Otashi dulika Omukriste a tokole okukala e noshilwifo shaye (ngaashi outa wanangongo ile ondjebo) shokuya nasho moukongo opo a mone oikulya ile shokuliamena nasho koilyani. Pefimbo olo oilwifo ya tya ngaho itai longifwa, oshiwa opo kai kale i na oikuti, tashi dulika nokuli i pangululwe mo nokutuvikilwa nawa. Moitukulwa omo shihe li paveta okukala u na ondjebo, ya shilikwa ile hai pashukilwa monghedi imwe vali, Omukriste oku na okudulika komhango. — Rom. 13:1.

^ okat. 8 Shi na sha noshinima shokulikelela kekwatonghonga, tala oshitukulwa “How to Prevent Rape” mo-Awake! yo 8 Marsa 1993.

^ okat. 10 Ouyelele umwe u na sha nokutambula ko oilonga oyo ya kwatela mo okulonga noilwifo otau hangwa mOshungonangelo ye 1 Novemba 2005 epandja 31; nosho yo yo 15 Juli 1983 epandja 25-26.