Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Konga omamona oshili

Konga omamona oshili

“Likongeleni nemona loipupulu ookaume.” — LUK. 16:9.

OMAIMBILO: 32, 154

1, 2. Omolwashike monghalelo ei yoinima mu na alushe okukala ovanhu vamwe eehepele?

KUNENA omangeshefelo mounyuni okwa nyaya keonga nokae li pauyuki. Ovanyasha ohava kongo oilonga, ndele ihave i mono. Vahapu ova tula eemwenyo davo moshiponga opo va tembukile koilongo oyo ya punapala. Oluhepo ola tandavela mounyuni aushe, nokuli nomoilongo oyo ya xuma komesho. Nomwaka oyo i li pokati koipuna neehepele oya kula neenghono. Ovatengeneki vamwe ova tengeneka kutya ovanhu vanini ovo ve li oipuna elela ove na oupuna u fike pwaao u niwe keepersenda 99 dovanhu kombada yedu. Nonande omuvalu wa tya ngaho oudjuu okwiitavelwa; kape na oo ta kala e li omhinge kutya ovanhu omabiliyona ova hepa neenghono, ofimbo vamwe ve na oinima yopamaliko oyo tai dulu okukala po efimbo lile. Jesus okwa li a didilika oushili oo eshi a popya a ti: “Eehepele omu di kwete alushe mokati keni.” (Mark. 14:7) Omolwashike pehe na oufikepamwe?

2 Jesus okwa li e udite ko kutya omangeshefelo ounyuni ou itaa ka lunduluka fiyo osheshi Ouhamba waKalunga we uya. Opolotika, omalongelokalunga noipindi yomounyuni, oyo ya kalelwa po ‘kovashingifi voipindi’ ovo va popiwa mEhololo 18:3, oi li oshitukulwa shounyuni waSatana. Oshiwana shaKalunga oshe liyoolola ko koinima yopapolitika nokomalongelokalunga oipupulu, ashike vahapu itava dulu okuliyoolola ko filufilu koipindi oyo i li oshitukulwa shounyuni waSatana.

3. Omapulo elipi hatu ka kundafana?

 3 Tu li Ovakriste, otwa pumbwa okukonakona nawa etaleko letu li na sha noipindi younyuni wokunena mokulipula omapulo ngaashi: ‘Ongahelipi handi dulu okulongifa oinima yange yopamaliko opo ndi ulike oudiinini kuKalunga? Ongahelipi handi dulu okuninipika ekwatafano li na sha noipindi younyuni? Oimoniwa ilipi tai ulike kutya oshiwana shaKalunga oshe mu lineekela filufilu nonande oshi li momudingonoko wa tya ngaho?’

EFANEKO LOMUKELELI EHE FI OMUYUKI

4, 5. (a) Omukeleli oo a popiwa mefaneko laJesus okwa li e lihanga monghalo ya tya ngahelipi? (b) Jesus okwa li a pa ovashikuli vaye elondwelo lilipi?

4 Lesha Lukas 16:1-9. Efaneko laJesus li na sha nomukeleli ehe fi omuyuki otali ningifa omunhu a diladile moule. Konima eshi omukeleli a popiwa ile tu tye a feekelwa kutya okwa hanauna po emona, okwa li a katuka ‘pandunge’ opo ‘e likongele emona’ li mu kwafele eshi a kanifa oilonga yaye yokukelela. * Oshoshili kutya Jesus ka li ta ladipike ovahongwa vaye va katuke monghedi ihe li pauyuki opo va dule okuxupa mounyuni ou. Okwa popya kutya omukalo oo owa fa ‘wovana vounyuni ou,’ ashike okwa longifa efaneko olo opo a yelife nawa oshitwa.

5 Jesus okwa li e shi shii kutya ngaashi omukeleli oo e lihanga monghalo idjuu, vahapu vomovashikuli vaye ova pumbwa okukonga ouxupilo mounyuni ou u na oipindi yopamaliko ihe li pauyuki. Okwe va londwela a ti: “Likongeleni nemona loipupulu ookaume, olo ngeenge tali xulu po, opo [Jehova naJesus] ve mu tambule momaumbo aalushe.” Oshike hatu dulu okulihonga kelondwelo laJesus?

6. Otu shi shii ngahelipi kutya oipindi younyuni wokunena ka ya li oshitukulwa shelalakano laKalunga?

6 Nonande Jesus ka li a yelifa kutya omolwashike a ifana emona olo kutya ‘oloipupulu,’ Ombiibeli oye shi yelifa nawa kutya oipindi ka ya li oshitukulwa shelalakano laKalunga. Jehova okwa li a longekidila Adam naEva oipumbiwa ya henena muEden. (Gen. 2:15, 16) Lwanima, mefelemudo lotete eshi omhepo iyapuki ya li ya tililwa meongalo lovavaekwa, “kakwa li nande oumwe a tumbula oshinima ongaashi shaye mwene, osheshi oinima yavo aishe oya tulwa mumwe.” (Oil. 4:32) Omuprofeti Jesaja okwa xunganeka nale efimbo olo eshi ovanhu aveshe tava ka hafela oinima aishe kombada yedu. (Jes. 25:6-9; 65:21, 22) Ashike mokweendelako kwefimbo, ovashikuli vaJesus otava ka pumbwa “eendunge” opo va konge ouxupilo “memona loipupulu” lounyuni wokunena ofimbo tava lalakanene okuhafifa Kalunga.

LONGIFA PANDUNGE EMONA LOIPUPULU

7. Omayele elipi hatu hange muLukas 16:10-13?

7 Lesha Lukas 16:10-13. Omukeleli oo a popiwa mefaneko laJesus okwa li a ninga oukaume omolwouwa waye mwene. Ashike, Jesus okwa ladipika ovashikuli vaye ve likongele emona meulu nelalakano lokuhelihola mwene. Eevelishe odo da landula efaneko laJesus oda kwatakanifa okulongifa “emona loipupulu” noudiinini kuKalunga. Jesus okwa li a hala okutya ohatu dulu okukala “ovadiinini” ile okulongifa nawa omamona oo ngeenge twe a mono. Ngahelipi mbela?

8, 9. Yandja oihopaenenwa yanghee vamwe hava ulike oudiinini ngeenge tava longifa emona loipupulu.

8 Onghedi iwa omo hatu dulu okuulika kutya otu li ovadiinini omokukala hatu yambidida pashimaliwa oilonga yokuudifa mounyuni aushe oyo Jesus a xunganeka. (Mat. 24:14) Okakadona kamwe okanyasha kokuIndia oka li ke na okapakete kashona omo haka tula oimaliwa ikukutu, ponhele yokulanda oudanaukifo. Ngeenge okapakete oka yada, ohaka yandje oimaliwa i ka longifwe  moilonga yokuudifa. Omumwatate umwe muIndia oo e na oshikunino sheekokonata oha twala omayambidido eekokonata kombelewa yokutoloka yOshimalayalam. Molwaashi oku shii kutya ombelewa oya pumbwa okulanda eekokonata; okuyandja eekokonata odikilila otashi ka kwafela omayambidido aye a ye komesho shi dulife okuyandja oshimaliwa. Oo ou li ounongo tau longo. Sha faafana, ovamwatate moGreece ohava yambidida pandjikilile oukwaneumbo waBetel mokuyandja omaadi eemono, omaadi oo haa di momashini nosho yo oikulya imwe vali.

9 Omumwatate wokoSri Lanka, oo paife e li koshilongo shimwe, okwa yandja onhele yaye oyo a li hadi nale i kale hai ningilwa okwoongala noyoongalele nosho yo mu kale hamu di ovo ve li moilonga yefimbo liyadi. Oshi li eliyambo lopashimaliwa komumwatate, ashike oshi li ekwafo la kula kovaudifi vomoshitukulwa. Moshilongo omo oilonga yokuudifa ya shilikwa, ovamwatate ohava yandje omaumbo avo opo a longifwe onga Omalupale Ouhamba, naasho ohashi ningifa ovakokolindjila vahapu nosho yo vamwe ovo ve na oyuuyemo inini va kale hava ongala nopehe na omalipulo opashimaliwa.

10. Omanangeko noupuna amwe elipi hatu mono ngeenge otwa yandje nehalo liwa?

10 Oihopaenenwa oyo ya tumbulwa metetekelo oya ulika nghee oshiwana shaKalunga shi li ‘oshidiinini moinima inini’ ngeenge tashi longifa oinima yopamaliko oyo i dulike filufilu komamona opamhepo. (Luk. 16:10) Ookaume kaJehova ohava kala ve udite ngahelipi ngeenge tava ningi omaliyambo a tya ngaho? Ove udite ko kutya okukala hava yandje nehalo liwa oshi li onghedi imwe yokumona omamona “oshili.” (Luk. 16:11) Omumwameme oo ha yambidida pandjikilile oilonga yOuhamba okwa popya kombinga yenangeko noupuna olo a mona, eshi a ti: “Eshi nda kala handi yandje painiwe nehalo liwa onda mona oinima oyo ya li ya holoka po inandi shi teelela momukokomoko womido. Onda li nda mona kutya apa ngoo pe fike okukala handi yandje painiwe nehalo liwa, osho ngoo ovanhu vakwetu navo tava pe nge. Ohandi dimine po nehalo liwa, handi lididimikile ovanhu nohandi tambula ko okuudifwa nai nosho yo omayele.” Ovanhu vahapu ove lihonga kutya okuyandja nehalo liwa oshi li oupuna wopamhepo. — Eps. 112:5; Omayel. 22:9.

11. (a) Ongahelipi okuyandja nehalo liwa haku ulike “ounongo tau longo”? (b) Efaafano lopashimaliwa lilipi tali dana onghandangala mokati koshiwana shaJehova? (Tala efano pehovelo loshitukulwa.)

11 Okulongifa oinima yopamaliko opo tu xumife komesho oinima yOuhamba ohaku ulike kutya otu na “ounongo tau longo” monghedi vali imwe. Ohashi tu kwafele tu longife eenghalo omo tu li tu kwafele vamwe. Ovo ve na emona lounyuni ou ndele itava dulu okukufa ombinga moilonga yefimbo liyadi ile va tembukile koshilongo shimwe ove shii kutya omayambidido avo ohaa yambidida oukalele wavamwe. (Omayel. 19:17) Omayambidido ehalo liwa ohaa kwafele okutuma oishangomwa nokuyambidida oilonga yokuudifa moitukulwa oyo ya hepa ashike otamu ningwa exumokomesho lopamhepo linene. Oule womido, moilongo ya tya ngaho ngaashi Congo, Madagascar naRwanda, luhapu ovamwatate ohava hoolola pokati kokukala ve na oikulya youkwaneumbo nokukala ve na  Eembiibeli, osho omafimbo amwe hashi pula oimaliwa i fike pondjabi yokoshivike ile yokomwedi. Paife, omolwomayambidido avahapu nosho yo “efaafano” lopashimaliwa, ehangano laJehova ohali yambidida mokutoloka nokutandaveleka Eembiibeli koshilyo keshe shoukwaneumbo nokovakonakonimbiibeli ovo va fya ondjala pamhepo. (Lesha 2 Ovakorinto 8:13-15.) Onghee hano, aveshe ovo hava yandje nosho yo ovo hava tambula otava dulu okupanga oukaume naJehova.

OKUNINIPIKA EKWATAFANO LI NA SHA ‘NOIPINDI YOUNYUNI’

12. Abraham okwa ulika ngahelipi kutya okwa li e lineekela muKalunga?

12 Onghedi imwe omo hatu dulu okupanga oukaume naJehova omokuninipika ekwatafano letu moipindi younyuni nomokulongifa efimbo letu tu konge omamona ‘oshili.’ Abraham, omulumenhu weitavelo wopefimbo lonale, okwa li a fiya po nehalo liwa oshilando shaUr osho sha li sha punapala ndele ta ka kala meetenda nokukaleka po oukaume waye naJehova. (Heb. 11:8-10) Okwa kala alushe ha tale ko Kalunga e li Odjo yemona loshili; ine likongela nandenande omamona oo taa ulike kutya ine lineekela muye. (Gen. 14:22, 23) Jesus okwa twa omufindo eitavelo la tya ngaho, eshi a lombwela omulumenhu omunyasha woshipuna, a ti: “Ngeenge wa hala okuwana wa pwa, inda u ka landife po aishe ei u i kwete, u i yandje keehepele, ndele to kala u nemona meulu, ndele ila, u shikule nge.” (Mat. 19:21) Omulumenhu oo ka li e na eitavelo la fa laAbraham, ashike vamwe ova li va ulika elineekelo lavo muKalunga filufilu.

13. (a) Elondwelo lilipi Paulus a li a pa Timoteus? (b) Ongahelipi hatu dulu okutula moilonga omayele aPaulus kunena?

13 Timoteus okwa li omulumenhu e na eitavelo. Konima eshi a ifana Timoteus “omukwaita muwa waKristus Jesus,” Paulus okwe mu lombwela a ti: “Kape na omukwaita te lipyakidile oipalwifa, osheshi a hala okuwapalela ou, e mu shivila moukwaita.” (2 Tim. 2:3, 4) Ovashikuli vaJesus vokunena, mwa kwatelwa etangakwaita lovalongi vefimbo li yadi ve dulife pomiliyona, ova tula moilonga omayele aPaulus e na sha nokutamununa mo oukalele wavo she likololela keenghalo davo. Ngeenge tava kondjifa omafininiko oo ta xwaxwamekwa kounyuni oo we va dingilila, ohava dimbuluka efinamhango olo tali ti: “Naau e noikolo ta ningi omupika waau e mu pa eengele.” (Omayel. 22:7) Satana ine tu halela sha shiwa; okwa hala ashike tu longife efimbo letu neenghono detu tu li ovapika voipindi younyuni ou. Omatokolo amwe ota dulu oku tu kaleka momwiyo wopashimaliwa oule womido. Omaumbo manene, omikuli, eehauto dondilo, nosho yo eehango odo hadi kala di na oinima ihapu otadi dulu okweetifa po omafininiko manene opashimaliwa. Ohatu ulike ounongo tau longo ngeenge hatu kaleke onghalamwenyo yetu i li paunafangwa nokuninipika oinakuwanifwa noilandomwa yetu, nokukala ovapiya vaKalunga ponhele yokukala ovapika voipindi younyuni ou wokunena. — 1 Tim. 6:10.

14. Omatokolo oludi lilipi a pumbiwa? Yandja oihopaenenwa.

14 Okukaleka onghalamwenyo yetu paunafangwa osha kwatela mo okulitulila po omalalakano. Ovalihomboli vamwe ova li va tota po ongeshefa tai xumu komesho. Ashike, ehalo lavo lokushuna moilonga yefimbo li yadi ola li le ve linyengifa va landife po ongeshefa, ombautu yavo nosho yo oinima imwe yopamaliko. Opo nee ova li ve liyamba va ka kwafele moilonga yokutunga keembelewa da kula koWarwick, moNew York. Ova li va mona enangekonoupuna le likalekelwa loku ka longa kObetel pamwe nokamonakadona kavo nosho yo noshitenya shavo, noivike imwe pamwe novadali vomushamane ovo navo va kufa ombinga moilonga yokutunga koWarwick. Omumwameme omukokolindjila moColorado, shaU.S.A., okwa li a mona oilonga yetata fiku mombaanga. Ovalongi vomombaanga ova li  va hafela oilonga yaye nova li ve mu pula a longe omafiku aeshe noku mu lombwela kutya ondjabi yaye otai ka hapupalifwa lutatu. Ashike molwaashi oilonga oyo okwa li tai mu imbi a yandje elitulemo koukalele, okwa li a anya eetepo olo. Oyo oi li ashike oihopaenenwa inini yomaliyambo oo a ningwa kovapiya vaJehova. Omatokolo a tya ngaho okupitifa komesho oinima yOuhamba otaa ulike kutya otwa lenga oukaume wetu naKalunga nosho yo omamona opamhepo shi dulife osho oipindi younyuni ou tai dulu okuyandja.

NGEENGE OINIMA YOPAMALIKO TAI XULU PO

15. Omamona elipi ha eta ehafo linene?

15 Oinima yopamaliko ihai kala alushe euliko kutya otwa nangekwa noupuna kuKalunga. Jehova oha nangeke noupuna ovo ve li “oipuna yoilonga iwa.” (Lesha 1 Timoteus 6:17-19.) Pashihopaenenwa, eshi Lucia * a li a mona kutya koAlbania oku na omhumbwe yovaudifi, okwa li a tembukila koAlbania okudja kuItaly mo 1993 nopehe na eyambidido lasha, e lineekela muJehova filufilu. Okwa li e lihonga elaka lOshialbania nokwa kwafela ovanhu ve dulife 60 fiyo va ninginifwa. Nonande vahapu vomoshiwana shaKalunga ihava udifa moitukulwa oyo hai eta oidjemo iwa ya fa oyo, keshe shimwe osho hatu ningi tu kwafele vamwe va mone nova kale mondjila oyo tai twala komwenyo oshi li oshinima osho fye navo hatu ka kala twa lenga fiyo alushe. — Mat. 6:20.

16. (a) Onghalelo yoipindi younyuni ou oya taalela onakwiiwa ilipi? (b) Eudeko letu li na sha nonakwiiwa oli na okukuma ngahelipi etaleko letu li na sha noinima yopamaliko?

16 Jesus okwa popya a ti: ‘Ngeenge emona loipupulu tali xulu po,’ ndele ina popya kutya otashi dulika ‘li xule po.’ (Luk.16:9) Ombaanga noikwamaxupilo oya wa pedu momafiku aa axuuninwa nokai fi sha okuyelekanifa naasho tashi ka ningwa monakwiiwa i li popepi mounyuni aushe. Onghalelo aishe yaSatana ngaashi opolotika, omalongelokalunga noikwaipindi younyuni waye otai ka xula po. Omuprofeti Hesekiel naSefanja ova li va xunganeka kutya oshingoldo noshisiliveli oyo ye lineekelwa kounyuni itai ka kala vali i na ongushu. (Hes. 7:19; Sef. 1:18) Mbela ohatu ka kala tu udite ngahelipi ngeenge otwa fiki pexulilo lokukalamwenyo kwetu mounyuni ou, ndele hatu didilike kutya mboli otwa xutwifa emona loshili omolwokulalakanena “emona loipupulu”? Ohatu ka kala tu udite ngaashi omulumenhu oo a kala nokulongela oimaliwa ihapu onghalamwenyo yaye aishe, ndele mboli oimaliwa oyo kai fi yoshili. (Omayel. 18:11) Oshoshili kutya emona la tya ngaho otali xulu po, onghee hano, inatu xutwifwa nande omhito ei ‘mokulikongela nemona loipupulu ookaume’ meulu. Keshe osho hatu ningi tu xumife komesho Ouhamba waJehova ohashi tu pameke pamhepo.

17, 18. Ookaume kaKalunga ova teelela onakwiiwa ya tya ngahelipi?

17 Eshi Ouhamba waKalunga tau ke uya, okuhiila nokufuta omaumbo otaku ka xula po, oikulya otai ka kala yoshali noya henena noitapa ka futwa oimaliwa tu kale ke po oukolele wetu. Oukwaneumbo waJehova wokombada yedu otau ka hafela onghalamwenyo ya denga mbada. Oingoli, oishiliveli noikwamamanya otai ka kala yokufeweka, ndele itai ka tuvikilwa i dale oimaliwa. Oinima oyo i na ongushu ngaashi oipilangi, omamanya nosho yo oitenda otai ka kala yoshali opo tu i tungife omaumbo mawa elela. Ookaume ketu otave ke tu kwafela nopehe na okufutwa oimaliwa. Onghedi ipe yokuhafela eeshali dopaushitwe kombada yedu otai ka kala onghedi yetu yokukalamwenyo.

18 Osho oshi li ashike oshitukulwa shefyuululo olo li na ondilo ihe fi okuyelekwa laavo ve likongela nemona loipupulu ookaume meulu. Ovalongeli vaJehova vokombada yedu otava ka kala va hafa neenghono eshi tava ka uda eendjovo daJesus edi tadi ti: “Onye ovanangekwa noupuna vaTate, ileni, mu ka fyuulule [Ouhamba] ou mwe u longekidilwa, keshito lounyuni.” — Mat. 25:34.

^ okat. 4 Jesus ina ulika kutya epopyo olo ola li paushili. Oshitya shOshigreka “popiwa” ile tu tye okufeekelwa osho shi li mu Lukas 16:1 otashi yandje ediladilo kutya ouyelele oo wa popilwa omukeleli ka wa li woshili. Ashike Jesus okwa li ta yandje elitulemo konghedi omo omukeleli e li nyenga ndele hakomatomheno kutya omolwashike a tewa moilonga.

^ okat. 15 Ondjokonona yonghalamwenyo yaLucia Moussanett oyi li mo-Awake! yo 22 Juni 2003, ep. 18-22.