Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Nghee to dulu okufinda ekondjo lopamadiladilo

Nghee to dulu okufinda ekondjo lopamadiladilo

OU LI meponokelo, nomutondi woye munene, Satana, ota longifa keshe oshilwifo sha nyika oshiponga. Oha longifa shike? Omitotolombo. Oshilwifo osho osha nuninwa okuponokela omadiladilo oye ndele ka shi fi olutu loye.

Omuyapostoli Paulus okwa li a lungamena omitotolombo da nyika oshiponga daSatana odo a popya, ashike Ovakriste vamwe kava li ve di lungamena. Pashihopaenenwa, vamwe muKorinto, ova li ve lineekela muvo vene tava diladila kutya ova li va pama moshili nokave na efiku va punduke. (1 Kor. 10:12) Nomolwaasho Paulus a yandja elondwelo, a ti: “Ndelenee onda tila, ngaashi Eva a hongaulwa kekotokelo leyoka, osho omadilongo eni taa nyonauka notaa efa ouyuki noukoshoki mokukala kweni naKristus.” — 2 Kor. 11:3.

Olukeno laPaulus lomoule ola ulika kutya itava dulu okumwenena onghalo ya tya ngaho. Opo u finde ekondjo loye lopamadiladilo, ou na okudidilika mo oshiponga osho hashi etifwa komitotolombo noku liamena.

OMITOTOLOMBO ODA NYIKA OSHIPONGA NGAHELIPI?

Omitotolombo oshike? Moshikundafanwa eshi, oshitya osho osha kwatela mo okutandaveleka ouyelele wa puka nokupukifa onghedi omo ovanhu hava diladila nohava katuka. Vamwe ova yelekanifa omitotolombo “noipupulu, omapukifo, omakoto, okunwefa mo, okupangela omadiladilo nekondjo lopamadiladilo” noku i faafanifa ‘neenghedi inadi koshoka, oshiponga nosho yo oikoti.’ — Propaganda and Persuasion.

Omitotolombo oda nyika ngahelipi oshiponga? Odi li omakoto oo iha didilikwa mo noupu oo hae uya momadiladilo etu, ngaashi ashike omhepo ihai monika yo kai na edimba lasha ya nyika oshiponga. Molwaashi katu shii naanaa kutya omitotolombo oshike, omushiivi  nawa womakwatafano Vance Packard, okwa ti: “Vahapu vomufye ohatu nwefwa mo nokupukifwa ndele ihatu shi didilike mo.” Omuhongwanhu umwe okwa ti kutya koshi yenwefemo olo, ovalumenhu novakainhu ohava tulwa mokatoo ka nyika oshiponga, ‘ngaashi edipao lomihoko, oita, okatongo koukwamuhoko, omalongelokalunga omakwanyanya noinima ihapu ihe fi yopandunge.’— Easily Led— A History of Propaganda.

Ngeenge ovanhu vongaho otava dulu oku tu fufya nomitotolombo davo, mbela Satana ye oshike ta dulu okuninga po? Okwe lihonga eenghedi dovanhu okudja eshi omunhu a shitwa. “Ounyuni aushe” ou li mepangelo laye. Ota dulu okulongifa keshe shimwe opo a tandaveleke oipupulu yaye. (1 Joh. 5:19; Joh. 8:44) Satana okwa pondola ‘mokutwikifa omadiladilo ovanhu’ unene tuu paife eshi ta ‘pukifa ovanhu aveshe kombada yedu.’ (2 Kor. 4:4; Eh. 12:9) Ongahelipi to dulu okukondjifa omitotolombo daye?

PAMEKA OIKELELIFO YOYE

Jesus okwa li a yandja elombwelo li li paunafangwa lokukondjifa omitotolombo, a ti: “Tamu ka shiiva oshili, noshili otai mu mangulula.” (Joh. 8:31, 32) Ndele molwaashi oshili luhapu oya li hai iwa moshipala koita, naave owa fa omukwaita e li mokati kolwoodi la kwata moiti oo a pumbwa odjo yelineekelo nouyelele u shii oku lineekelwa oo tau dulu okukelela ovatondi vehe mu dane mouluvi. Jehova oha yandje ouyelele wa tya ngaho. MOmbiibeli, oto dulu okuhanga mo keshe osho wa pumbwa opo u kondjife omitotolombo daSatana. — 2 Tim. 3:16, 17.

Oshoshili kutya Satana omunaipupulu a shiya ko, oku shii kombinga yaasho. Onghee oha longifa onghalelo yaye yoinima opo a shololife ovanhu vaha leshe Ombiibeli noku i konakona. Ino yulwa komakonda aye. (Ef. 6:11) ‘Mbwalangadjeka’ eshiivo loshili. (Ef. 3:18) Osho otashi pula u ninge eenghendabala da mana mo. Ashike dimbuluka oushili oo wa hololwa komushangi umwe wedina Noam Chomsky eshi a ti: “Kape na ou ta ka tula oshili mouluvi woye. Ou na oku i konga ove mwene.” Onghee hano, “i konga ove mwene” mokukala ho ‘konakona omishangwa omafiku aeshe.’ — Oil. 17:11.

Opo u finde ekondjo loye lopamadiladilo, ou na okudidilika mo oshiponga osho hashi etifwa komitotolombo noku liamena

Kaleka momadiladilo kutya Satana ina hala u diladila nawa ile u tomhafane pandunge. Omolwashike? Odjo imwe oya ti kutya omitotolombo “ohadi pondola neenghono ngeenge ovanhu  ova shololifwa vaha diladile pandunge.” (Media and Society in the Twentieth Century). Onghee hano, ino kala ashike wa wanenwa mokuuda ile mokwiitavela keshe osho to udu. (Omayel. 14:15) Longifa omadiladilo oye oo wa pewa kuKalunga nosho yo eendunge doye dokuyoolola opo u ninge oshili yoye mwene. — Omayel. 2:10-15; Rom. 12:1, 2.

LUNGAMENA OMWIYO WOKUTUKAULA NOKUFINDA

Ovakwaita moita otashi dulika va longife omitotolombo opo va shololife ovatondi ile oku va ningifa vaha kale ve li tula mo. Otava dulu okuningifa ovatondi ve li lwife voovene ile ve va ningife ve litongole ko ketangakwaita. Omukulunhu wetanga lovakwaita Omundowishi okwa li a dimina kutya etomheno limwe eshi va findwa mOita yOtete yOunyuni ololo kutya ovanhu ova li va “pukifwa komitotolombo dovatondi ngaashi ashike shimbungu e li nakavandje.” Satana naye oha longifa eenghedi da tya ngaho opo a pondole mokutukaula ovanhu, pashihopaenenwa, oha kendabala okweeta etukauko pokati kovamwatate novamwameme Ovakriste ile e va ningife ve litongole ko kehangano laJehova molwaashi va mona okuhenouyuki taku ningwa ile va udifwa nai.

Ino pukifwa. Efa Eendjovo daKalunga di ku wilike. Pashihopaenenwa, ngeenge tashi uya pokukaleka po oukumwe pokati kovamwatate novamwameme, Ombiibeli otai ku ladipike u twikile ‘okudima po omanyono’ nokupongolola po okuhaudafana diva. (Kol. 3:13, 14; Mat. 5:23, 24) Ombiibeli otai tu londwele sha yukilila tuhe litongole ko keongalo. (Omayel. 18:1) Pameka oikelelifo yoye oyo ho lwifa nayo omitotolombo daSatana. Lipula kutya: ‘Oshike sha li sha wilika omadiladilo ange eshi nda li nda taalela onghalo ya tya ngaho? Mbela okwa li omhepo younyuni ile omhepo yaKalunga?’ — Gal. 5:16-26; Ef. 2:2, 3.

INO EFA U TEWE OMUKUMO

Omukwaita oo a kanifa oudiinini komuwiliki waye ita ka lwa nawa. Ovo hava xumifa komesho omitotolombo ohava kendabala okuteya po elineekelo nosho yo oukumwe oo hau kala pokati komukwaita nomuwiliki waye. Otava dulu okulongifa omitotolombo ngaashi: “Ito dulu okulineekela ovawiliki voye” nosho yo “ino efa ve ku twale moudjuu.” Osho tashi dulu okunaipika eponokelo la tya ngaho osho sho kutya otava dulu okukonenena omapuko keshe aavo tava wilike. Satana osho naanaa ha ningi. Iha sholola nandenande okukendabala  okunyona po elineekelo loye mewiliko olo Jehova ha yandje.

Oikelelifo yoye oili pi po mbela? Kala wa tokola toko okukanyatela kehangano laJehova nokuyambidida noudiinini ewiliko olo ha yandje, kashi na ne mbudi kutya owa taalela eenghalo dilipi dokuhawanenena. (1 Tes. 5:12, 13) Ino ‘kanifa diva eendunge’ ngeenge wa taalela omaponokelo ovashunimonima oo taa monika a fa a nyika oshiponga ile omapukifo amwe opamadiladilo kashi na nee mbudi kutya okwa fa peni. (2 Tes. 2:2; Tit. 1:10) Landula omayele oo a li a pewa omunyasha Timoteus. Dama koshili oyo we lihonga nokudimbuluka kutya owe i lihonga peni. (2 Tim. 3:14, 15) Oshoshili kutya ope na oumbangi muhapu oo tau ulike kutya oto dulu okukala we lineekela ehangano olo Jehova a kala ta longifa oule womido omafele paife opo li tu wilike mondjila yoshili. — Mat. 24:45-47; Heb. 13:7, 17.

INO EFA OUMBADA U KU NGHUNDIPALEKE

Kaleka momadiladilo kutya haalushe omitotolombo daSatana hadi didilikwa mo. Omafimbo amwe, oha longifa omatilifo okutilifa ovanhu, “onghedi imwe yomeenghedi dikulu odo ha longifa okuxumifa komesho omitotolombo.” (Easily Led—A History of Propaganda). Pashihopaenenwa, omushangi womuBritian wedina Philip M. Taylor okwa shanga kutya Ovasiria ova li hava findi ovatondi vavo “mokulongifa omatilifo.” Satana oha longifa oumbada wokutila ovanhu, okutila okuhepekwa, okutila efyo nosho yo omatilifo amwe e lili opo e ku findile kongudi noku ku shololifa uha longele vali Jehova. — Jes. 8:12; Jer. 42:11; Heb. 2:15.

Ino efa nande Satana a longife omatilifo opo e ku nghundipaleke ile a teye po oudiinini woye. Jesus okwa ti: “Inamu tila ava hava dipaa olutu novehe na vali eshi tava dulu okuninga.” (Luk. 12:4) Kala u na elineekelo la pama meudaneko laJehova loku ku amena noku ku pa “ouyadi weenghono” noku ku kwafela u dule okufinda omatilifo aeshe. — 2 Kor. 4:7-9; 1 Pet. 3:14.

Otashi dulika u shakeneke eenghalo odo tadi tilifa notadi shololifa. Ashike kaleka momadiladilo eendjovo daJehova odo a twa nado Josua omukumo, eshi a ti: “Kala wa pama ndele nyatipala? Ino tila ndele ino haluka, osheshi Omwene Kalunga koye oku li naave keshe apa to i.” (Jos. 1:9) Ngeenge owa hangika koshisho, pula ekwafo diva kuJehova okupitila meilikano to mu lombwele oisho yoye aishe. Oto dulu okukala nelineekelo kutya ‘ombili yaKalunga otai ka amena omutima woye nomadiladilo oye’ opo u dule okukala u na eenghono dokukondjifa omitotolombo adishe daSatana. — Fil. 4:6, 7, 13.

Mbela oto dimbuluka omutotolombo oo wa li wa longifwa kovakalelipo vAsiria, Rabsake, ovo va li ve li omhinge noshiwana shaKalunga? Paulelalela okwa ti kutya, ‘kape na eshi tashi ke va amena momake Ovasiria. Nokuli naKalunga keni, Jehova, ite ke mu amena.’ Okwa popya vali nouladi a ti: ‘Jehova ye mwene okwe tu lombwela tu hanaune po oshilongo eshi.’ Mbela Jehova okwa nyamukula a ti ngahelipi? Okwa ti: “Ino tila eendjovo odo we di uda, da shekifwa nge kovapiya vohamba yaAsiria.” (2 Eeh. 18:22-25; 19:6) Opo ne okwa tuma omwengeli oo a dipaa Ovasiria 185 000 moufiku umwe auke. — 2 Eeh. 19:35.

KALA U NEENDUNGE NOKUPWILIKINA ALUSHE KUJEHOVA

Mbela owa tala ngoo nande onale ofilima, ndele eshi to i tale ou wete omunhu mofilima ta pukifwa nota kengelelwa? Mbela owe lihangele to lipopile to ti: ‘Ino shi itavela! Otave ku fufya!’ Diladila nee ngeno omwengeli te ku ingida te ku lombwele oshinima sha faafana, ta ti: “Ino pukifwa komitotolombo daSatana!”

Ino pwilikina komitotolombo daSatana. (Omayel. 26:24, 25) Pwilikina kuJehova noku mu lineekela mwaaishe oyo to ningi. (Omayel. 3:5-7) Katuka metwokumwe neindilo laye lopahole olo tali ti: “Kala u neendunge, omumwange, hafifa omutima wange.” (Omayel. 27:11) Opo nee ngeenge owa ningi ngaho oto ka finda ekondjo loye lopamadiladilo.