Inda koshikalimo

Inda koshikalimo

Eendombwedi daJehova

Hoolola elaka Oshikwanyama

“Lileni naava hava lili”

“Lileni naava hava lili”

“Hekelekafaneni nye mu tungafane keshe umwe nomukwao.” — 1 TES. 5:11.

OMAIMBILO: 121, 75

1, 2. Omolwashike twa pumbwa okukundafana nghee hatu dulu okuhekeleka ovo va nyika oluhodi? (Tala efano pehovelo loshitukulwa.)

SUSI okwa ti: “Hanga oule wodula konima ashike eshi twa filwa omonamati wetu, otwa kala twa nyika oluhodi neenghono.” Omukriste umwe okwa ti kutya konima ashike eshi omukulukadi waye a fya ombadilila, okwa li e udite nai neenghono. Shinyikifa oluhodi, ope na oihopaenenwa ihapu yavamwe ovo navo hava kala va nyika oluhodi ngaashi oyo. Ovanhu vahapu meongalo otashi dulika inava teelela ovaholike vavo va fye fimbo Harmagedon ine uya. Kutya nee owa filwa omuholike woye ile ou shii umwe oo a nyika oluhodi, otashi dulika u lipule kutya: ‘Ongahelipi ovo va nyika oluhodi tava dulu okukwafelwa opo va ungaunge noudjuu wavo?’

2 Otashi dulika wa uda taku tiwa kutya efimbo oli li omuveluli a denga mbada. Ndele mbela osho osha hala lela okutya efimbo loovene otali dulu okuvelula omutima wa teyauka? Omufiyekadi umwe okwa ti: “Onda mona kutya oshi li paushili okupopya kutya osho omunhu ha longifa efimbo laye musho ohashi mu kwafele a veluke.” Ngaashi oshipute shoovene, ouyahame wopamaliudo nao  otau dulu okuveluka ngeenge owa kala hau filwa oshisho nawa. Oshike lela tashi dulu okukwafela ovo va nyika oluhodi va veluke kouyahame wavo wopamaliudo?

JEHOVA ‘OKALUNGA KEHEKELEKO ALISHE’

3, 4. Omolwashike hatu dulu okukala noushili kutya Jehova oku udite ko kutya omunhu oo a nyika oluhodi okwa pumbwa ehekeleko?

3 Nopehe na omalimbililo, Tate wetu womeulu omunahole, Jehova, oye odjo yehekeleko. (Lesha 2 Ovakorinto 1:3, 4.) Jehova, oo e li oshihopaenenwa sha denga mbada shonghenda, okwa shilipaleka oshiwana shaye a ti: “Ame, heeno, Ame mwene handi mu hekeleke.” — Jes. 51:12; Eps. 119:50, 52, 76.

4 Tate wetu omunanghenda naye mwene okwa filwa ovaholike vaye ngaashi Abraham, Isak, Jakob, Moses, nosho yo ohamba David. (Num. 12:6-8; Mat. 22:31, 32; Oil. 13:22) Eendjovo daKalunga otadi tu shilipaleka kutya Jehova okwa teelela nodjuulufi efimbo olo eshi ta ka alulila oonakufya momwenyo. (Job 14:14, 15) Otava ka kala va hafa nove na oukolele muwa. Diladila vali kOmona waKalunga omuholike oo a li a ‘nyakukilwa’ kuXe, kutya okwa li a fya efyo linyanyalifa. (Omayel. 8:22, 30) Eendjovo itadi dulu naanaa okuholola ouyahame oo Jehova a li e udite. — Joh. 5:20; 10:17.

5, 6. Ongahelipi hatu dulu okuhekelekwa kuJehova?

5 Ohatu dulu okukala nelineekelo filufilu kutya Jehova ota dulu oku tu kwafela. Onghee hano, inatu ongaonga okumbubulila Jehova omitima detu okupitila meilikano ngeenge twa nyika oluhodi. Itashi hekeleke tuu okushiiva kutya Jehova oku udite ko ouyahame wetu nohe tu pe ehekeleko olo twa pumbwa! Mbela ohe shi ningi ngahelipi?

6 Onghedi imwe omo Jehova he tu kwafele ‘omokupopilwa komhepo iyapuki.’ (Oil. 9:31) Eenghono daKalunga tadi longo odi li odjo yetwomukumo. Jesus okwa udaneka kutya Xe meulu “ota yandje Omhepo Iyapuki kwaava tave mu indile.” (Luk. 11:13) Susi oo a popiwa pehovelo, okwa ti: “Efimbo lihapu otwa kala ashike hatu i keengolo nokupula Jehova e tu hekeleke. Efimbo keshe ombili yaKalunga oya kala shili nokwaamena omitima nomomadiladilo etu.” — Lesha Ovafilippi 4:6, 7.

JESUS OKU LI OMUPRISTERI OMUKULUNHU OMUNANGHENDA

7, 8. Omolwashike twa pumbwa okukala tu na elineekelo kutya Jesus ote tu hekeleke?

7 Onghenda yaJehova oya li ya ulikwa meendjovo nomeenghatu dOmona waye omunahole, Jesus, eshi a li kombada yedu. (Joh. 5: 19) Jesus okwa li a tumwa opo a hekeleke ovo ve na “omutima wa nyanyaulwa” ‘naaveshe ava va polimana.’ (Jes. 61:1, 2; Luk. 4:17-21) Okwa li a didilikwa mo omolwolukeno nonghenda yaye i na sha novanhu ovo tava mono oixuna nehalo laye lokuxulifa po okumona oixuna kwavo. — Heb. 2:17.

8 Nopehe na omalimbililo, eshi Jesus a li omunyasha, okwa li e na okuungaunga nomafyo ovapambele nosho yo ookaume. Osha fa shili ngaha kutya Josef, xe oo a li te mu tekula, okwa fya eshi Jesus a li natango omunyasha. * Diladila kunghee Jesus omunanghenda tashi dulika eshi a li e na omido omulongo nasha ile 20 nasha, a li e na okuungaunga noluhodi laye mwene, laina, lovamwaxe nosho yo lovamwainakadona.

9. Jesus okwa li a ulika ngahelipi olukeno eshi Lasarus a fya?

9 Eshi Jesus a hovela oukalele waye, okwa li  e na eshiivo lomoule nokwa li ha udile ovanhu oukwao wananghali. Pashihopaenenwa, diladila efimbo olo eshi kaume kaye Lasarus a fya. Nonande Jesus okwa li e shii kutya ote ke mu nyumuna, okwa li a uda nai neenghono eshi a li e wete Maria naMarta va wililwa po koluhodi. Okwa li e udite oukwao wananghali nosha li she mu ningifa a kwene. — John 11:33-36.

10. Omolwashike tu na okukala nelineekelo monghenda yaJesus kunena?

10 Ongahelipi onghenda nehekeleko laJesus tali dulu oku tu kwafela kunena? Omishangwa otadi tu shilipaleka kutya “Jesus Kristus Oye tuu ou onghela nonena nofiyo alushe.” (Heb. 13:8) Molwaashi “Omwene womwenyo” oku udite ko kutya okukala wa nyika oluhodi ohaku kala ngahelipi, “ota dulu okukwafa ava tava hongaulwa.” (Oil. 3:15; Heb. 2:10, 18) Onghee hano, ohatu dulu okukala nelineekelo kutya Kristus ota twikile okukala e udite ko ouyahame wavamwe, oluhodi noku va hekeleka “pefimbo liwa.” — Lesha Ovaheberi 4:15, 16.

‘EHEKELEKO OLO HALI DI MOMISHANGWA’

11. Omishangwa dilipi ho mono tadi hekeleke?

11 Ehokololo li na sha naJesus eshi a li a nyika oluhodi neenghono pefyo laLasarus olo limwe lomomahokololo mahapu taa hekeleke tali hangwa mEendjovo daKalunga dehekeleko. Nomolwaasho “keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nomehekeleko lomomishangwa.” (Rom. 15:4) Ngeenge owa nyika oluhodi, naave oto dulu okumona ehekeleko momishangwa tadi shikula:

  • “Omwene oku li popepi nomitima da teyauka, Ye oha xupifa ava ve nomhepo ya nyanyauka.” — Eps. 34:18, 19.

  • “Ngeenge ndi noshisho shoudjuu meni lange, omahekeleko oye oo a hekeleka omwenyo wange.” — Eps. 94:19.

  • “NOmwene wetu Jesus Kristus Oye mwene naKalunga Tate yetu ou a kala e tu hole nokwe tu pa monghenda ehekeleko laalushe neteelelo liwa, Oye na hekeleke omitima deni, Ye ne mu pamekele meendjovo adishe diwa nomoilonga aishe iwa.” — 2 Tes. 2:16, 17. *

EONGALO OLI LI ODJO YEHEKELEKO LINENE

12. Onghedi imwe ya fimana ilipi hatu dulu okukala odjo yehekeleko kuvamwe?

12 Eongalo lopaKriste oli li odjo imwe yehekeleko kwaavo va nyika oluhodi. (Lesha 1 Ovatessaloniki 5:11.) Ongahelipi to dulu okupameka nokuhekeleka ovo ve na “omhepo yoluhodi”? (Omayel. 17:22) Kaleka momadiladilo kutya ope na “efimbo lokumwena nefimbo lokupopya.” (Omuud. 3:7) Omufiyekadi wedina Dalene okwa ti: “Ovo va nyika oluhodi ova pumbwa okuholola omadiladilo nomaliudo avo. Onghee hano, oshinima sha fimana to dulu okuningila ovo va nyika oluhodi okupwilikina nopehe na oku va kwata melaka.” Junia oo omumwainamati e li di paa ye mwene, okwa ti: “Nonande otashi dulika ito dulu okukufa po oluhodi lavo filufilu, osho sha fimana osho sho kutya owa hala okuuda ko kutya ove udite ngahelipi.”

13. Oshike twa pumbwa okudimbuluka shi na sha noluhodi?

13 Dimbuluka kutya ovanhu ihava shakeneke oluhodi la faafana noku liholola monghedi ya faafana. Omafimbo amwe, omutima womunhu oo ashike hau kala wa wililwa po kouyahame, notashi dulika shi kale shidjuu kuye okupopya omaliudo aye okomutima. Eendjovo daKalunga oda ti: “Omutima tau shiiva oluhodi lao vene, ndele mehafo lao omukwao ita dulu okunyakukwa.” (Omayel. 14:10) Nonande omunhu  a holole nghee e udite, ihashi kala naanaa alushe shipu kuvamwe okuuda ko kutya ota kendabala okutya shike.

14. Ongahelipi hatu dulu okuyandja ehekeleko kwaavo va nyika oluhodi?

14 Oshi shii okuudiwa ko kutya otashi dulu okukala shidjuu okushiiva kutya oshike u na okulombwela omunhu oo a wililwa po koluhodi. Ashike nande ongaho, Ombiibeli oya ti “elaka lovanaendunge tali velula.” (Omayel. 12:18) Ovanhu vahapu ova mona omayele oo taa dulu okulongifa ngeenge tava hekeleke vamwe mokambo Ngeenge umwe oo u hole a fya. * Ashike oshinima hashi kwafele osho to dulu okuninga ‘okulila naava hava lili.’ (Rom. 12:15) Gaby oo omushamane waye a fya, okwa ti: “Omahodi ohaa holola osho ndi udite momutima. Nomolwaasho handi mono ehekeleko ngeenge ookaume tava lili pamwe naame. Pefimbo opo tu opo ihandi kala ndi udite ndi li aame andike moluhodi lange.”

15. Ongahelipi hatu dulu okuhekeleka umwe ngeenge ohatu mono shidjuu oku mu hekeleka odikilila? (Tala yo okamhungu “ Eendjovo diwa dehekeleko.”)

15 Ngeenge ou wete shidjuu okulombwela omunhu odikilila, oto dulu oku mu hekeleka mokushangela okakalata, oe-mail, etumwalaka ile ombapila yehekeleko. Oto dulu oku mu lombwela omushangwa wonhumba oo tau mu hekeleke, mu dimbulukifa oikala ile omaukwatya a nakufya, ile u mu lombwele oinima oyo wa hafela monakudiwa. Junia okwa ti: “Okutuminwa etumwalaka letwomukumo lili pauxupi ile okushivwa ndi ka kale nOmukriste mukwetu oule wokafimbo osha kwafela nge unene. Naasho osha li sha ningifa nge ndi kale ndi udite ndi holike nondi niwe ko nasha naame.”

16. Onghedi imwe ilipi hai pondola mokuhekeleka vamwe?

 16 Ino dimbwa nghee sha fimana okukwatela mo Omukriste mukweni oo a nyika oluhodi meilikano loye nosho yo okwiilikana pamwe naye. Nonande ohashi kala shidjuu okupopya omaliudo oye meilikano monghalo ya tya ngaho, okwiilikana tashi di komutima ponhele yaye, nokuli nonande oto lili nosho yo newi inali yela, otashi dulu okupameka oo a nyika oluhodi. Dalene okwa ti: “Omafimbo amwe ngeenge ovamwameme ve uya okuhekeleka nge ohandi va pula ngeenge otava dulu okwiilikana. Ohava hovele okwiilikana, naluhapu ohashi kala shidjuu okupopya potete, ashike keshe efimbo ngeenge va tumbula oitya yonhumba, ohava ilikana newi lopombada eilikano tali kumu omutima. Eitavelo lavo la pama, ohole yavo nosho yo okunakonasha kwavo okwa kala nokupameka eitavelo lange.”

KALA NOKUHEKELEKA VAMWE

17-19. Omolwashike otwa pumbwa okukala hatu hekeleke vamwe?

17 Ovanhu otava dulu okukala va nyika oluhodi meenghedi da yoolokafana. Onghee hano, kala alushe ho hekeleke vamwe ndele ha mafiku ashike manini opehovelo ngeenge ookaume ile ovapambele vahapu opo ve li, ndele nomeemwedi da landula ko ngeenge vamwe va shuna komalukalwa avo. “Kaume oku na ohole alushe, nomumwaina ta dalwa, a kwafe moluhepo.” (Omayel. 17:17) Ovakriste vakwetu otava dulu okukala odjo yehekeleko linene oule wefimbo kuumwe oo ta ungaunga noluhodi. — Lesha 1 Ovatessaloniki 3:7.

18 Dimbuluka kutya ovo va nyika oluhodi otava dulu okukala ve na ouyahame woluhodi tau etwa kokudimbuluka efiku lehombolo, komusika, komafano, komalipyakidilo ile nokuli keedimba lonhumba, kewi, ile kefimbo lomudo. Oinima ihapu oyo hai ningwa kukaume kopahombo oo e li momwenyo ngaashi okukala poshoongalele ile pedimbuluko, ohai kala i yahameka neenghono. Omumwatate umwe okwa ti: “Konima eshi nda filwa omukulukadi wange, onda li nda teelela efiku lange lotete lokudimbuluka ohombo li kale liyahameka noka sha li shipu. Ashike ovamwatate novamwameme ova li va longekida okavilo kanini kookaume kange vopofingo opo ndi ha kale ndi udite ndi li ame andike.”

19 Kaleka yo momadiladilo kutya ovo va nyika oluhodi inava pumbwa ashike ehekeleko pomafimbo e likalekelwa. Junia okwa ti: “Luhapu ookaume nekwafo olo hali yandjwa pefimbo olo pehe na oivilo ye likalekelwa otali dulu okukala tali tungu. Omafimbo oo inaa teelelwa ohaa kala a fimana noha eta ehekeleko linene. Oshoshili kutya itatu dulu okukufa po oluhodi ile ouyahame oo hau etwa kokufilwa omuholike, ashike ohatu dulu okuhekeleka vamwe mokukatuka eenghatu opo tu kwafele ovo va nyika oluhodi. (1 Joh. 3:18) Gaby okwa ti: “Ohandi pandula shili Jehova omolwovakulunhuongalo ovanahole ovo va kala pamwe naame pomhito keshe eshi nda li moudjuu. Ova kwafela nge shili ndi mone eke laJehova lopahole.”

20. Omolwashike omaudaneko a Jehova e li odjo yehekeleko linene?

20 Itashi hekeleke tuu okushiiva kutya Jehova, Kalunga kehekeleko alishe, ota ka kufa po oluhodi nota ka eta ehekeleko laalushe eshi ‘aveshe ovo va kala meembila tava udu ondaka yaKristus ndele tava hololoka mo!’ (Joh. 5:28, 29) Kalunga okwa udaneka kutya “ota ka hanauna po efyo fiyo alushe, ndele Omwene, Kalunga ta ka feta po omahodi momesho aaveshe.” (Jes. 25:8) Ponhele ‘yokulila naava hava lili’ aveshe ovo ve li kombada yedu otava ka ‘hafa pamwe novahafi.’ — Rom. 12:15.

^ okat. 8 Oshikando shaxuuninwa Josef a tumbulwa osheshi Jesus a li e na omido 12. Eshi Jesus a li a longa oshikumwifilonga shaye shotete eshi a shitukifa omeva omaviinyu, Josef ka li a tumbulwa pefimbo opo nosho yo poiningwanima ya ka landula ko. Eshi a li komuti womahepeko, okwa li e lineekelela omuyapostoli Johannes a file oshisho Maria, osho Jesus a li ita dulu okuninga ngeno Josef okwa li momwenyo. — Joh. 19:26, 27.

^ okat. 14 Tala yo oshitukulwa “Hekeleka ovo va nyika oluhodi, ngaashi Jesus a li a ninga,” mOshungonangelo ye 1 Novemba 2010.