Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JULI 2016

Omolwashike tu na ‘okukala oupafi’?

Omolwashike tu na ‘okukala oupafi’?

“Kamu shi shii efiku lilipi po Omwene weni te uya.” — MAT. 24:42.

OMAIMBILO: 136129

1. Yelifa kutya omolwashike sha fimana okukala tu shii kutya efimbo ongapi noshike tashi ningwa po? (Tala efano pehovelo loshitukulwa.)

NATU tye nee ou li poshoongalele nou wete ovili yokuhovela i li pokudenga, ou shii kutya efimbo ola fika lokukala omutumba nokuhafela omusika oyo hai hovele. Efimbo ola fika lokupwilikina komusika iwa oyo ya longekidwa kovamwatate, naunene tuu okulongekida omadiladilo nosho yo omitima detu omolwoipopiwa oyo tai shikula ko. Ndele mbela ongahelipi ngeenge vamwe itava yandje elitulemo, tava endaenda ile tava popi nookaume kavo noinava didilika kutya efimbo ola fika? Osha yela kutya inava kala oupafi va mone kutya efimbo ongapi naasho tashi ningwa po, ngaashi ngeenge omunashipundi e li komutune, omusika tai dana novanhu ove li omutumba. Oshiningwanima osho otashi tu kwafele tu kale nolupandu loshiningwanima sha fimana, osho tashi pula atushe tu kale tu shi osho tashi ke tu ningilwa monakwiiwa i li popepi. Oshiningwanima osho oshilipi po?

2. Omolwashike Jesus a lombwela ovahongwa vaye ‘va kale oupafi’?

2 Eshi Jesus a li ta popi kombinga ‘yexulilo longhalelo yoinima,’ okwa li a ladipika ovahongwa vaye ta ti: “Kaleni mwa lungama,  pashukeni . . . osheshi inamu shiiva efimbo olo onaini tali uya.” Konima yaasho okwe va ladipika lwoikando ta ti: “Kaleni oupafi.” (Mat. 24:3; lesha Mark 13:32-37.) Ehokololo laMateus kombinga yoshikundafanwa osho ola holola kutya Jesus okwa kala nokuladipika ovashikuli vaye va kale oupafi eshi vali a ti: “Kaleni oupafi, osheshi kamu shi shii efiku lilipi po Omwene weni te uya. . . . kaleni mwe lilongekida, osheshi Omona wOmunhu te uya efimbo tuu olo inamu mu teelela.” Okwa ti yo vali: “Kaleni hano oupafi, osheshi inamu shiiva efiku notundi.” — Mat. 24:42-44; 25:13.

3. Omolwashike hatu yandje elitulemo kelondwelo laJesus?

3 Tu li Eendombwedi, otwa tala ko elondwelo laJesus la kwata moiti. Otu shi shii kutya otu li ‘mefimbo lexulilo’ nokaku na vali efimbo lihapu “oudjuu unene” u hovele. (Dan. 12:4; Mat. 24:21) Ohatu mono oita inyanyalifa, elihumbato lii, oukakombolilifa, edundakano lomalongelokalunga, omhumbwe yoikulya, omikifi nosho yo omakakamo edu keembinga neembinga mounyuni. Otu shi shii kutya oshilonga shikumwifi shokuudifa Ouhamba otashi longwa mounyuni aushe kovapiya vaJehova. (Mat. 24:7, 11, 12, 14; Luk. 21:11) Otwa teelela nodjuulufi oku ka mona osho euyo lOmwene tali ka tya kufye nosho yo nghee tali ka wanifa po elalakano laKalunga. — Mark. 13:26, 27.

OKUTEELELA EFIMBO LI FIKE

4. (a) Omolwashike hatu dulu okwiitavela kutya paife Jesus oku shii kutya Harmagedon ote uya naini? (b) Nonande katu shii kutya oudjuu munene otau hovele naini, oushili ulipi tu na?

4 Otu shi shii kutya omutumba woshoongalele keshe ou na efimbo lokuhovela. Ashike fye nande natu kendabale, itatu dulu okushiiva kondadalunde kutya omudo ulipi, efiku ile ovili oyo oudjuu munene tau ka hovela. Eshi Jesus a li kombada yedu okwa tile: “Efiku olo notundi oyo kaku na ou e i shii, nande ovaengeli vomeulu, ile Omona, oTate Oye aeke.” (Mat. 24:36) Ashike Kristus okwa pewa eenghono meulu a lwife ounyuni waSatana. (Eh. 19:11-16) Onghee hano oshi li mondjila okufika pexulifodiladilo kutya paife Jesus oku shii kutya Harmagedon ote uya naini. Ashike fye katu shi shii. Osha fimana okukala oupafi fiyo osheshi oudjuu munene wa hovela. Ashike Jehova ina kala ha tengeneke efimbo olo oshiningwanima osho tashi ka ningwa. Okwa nuna kondadalunde efiku olo exulilo tali uya. Ota valula efimbo olo la xupa ko opo oudjuu munene u hovele nehovelo lao “itali fyaala ko,” ile tu tye itali kala ko. (Lesha Habakuk 2:1-3.) Ongahelipi hatu dulu okukala noushili kutya osho oshoshili?

5. Yandja oshihopaenenwa osho tashi ulike kutya omaxunganeko aJehova ohaa wanifwa po alushe pefimbo.

5 Omaxunganeko aJehova okwa kala nokuwanifwa alushe pefimbo. Diladila kwaashi a li a xupifa Ovaisrael moupika waEgipti kutya okwa li e shi ninga peufwafimbo laye lokondadalunde. Shi na sha nomafiku 14 aNisan omudo 1513 K.O.P., Moses okwa popya eendjovo edi ta ti: “Ndele omido 430 eshi da pita, mefiku tuu olo, omatanga ovakwaita vOmwene a dja mo mOshilongo shaEgipti.” (Ex. 12:40-42) “Omido 430”oda hovela eshi ehangano olo Jehova a ninga naAbraham la tameka okuya moilonga mo 1943 K.O.P. (Gal. 3:17, 18) Konima yefimbo, Jehova okwa ka lombwela Abraham ta ti: “Kala u shi shii kokutya, oludalo loye otali ka kala ovanailongo medu li he fi lavo. Oko tava ka ninga ovapika nokuhepekwa omido omafele anhe.” (Gen. 15:13; Oil. 7:6) Omido “omafele anhe” dokuhepekwa oda hovela mo 1913 K.O.P. eshi Ismael a li ta shindi Isak pefimbo olo ta tovo, noda ka xula eshi Israel a dja mo moupika waEgipti mo 1513 K.O.P. (Gen. 21:8-10; Gal. 4:22-29) Osha yela kutya komesho yomafelemido anhe, Jehova okwa kala  nale a tula po efimbo laye lokumangulula oshiwana shaye.

6. Omolwashike hatu dulu okukala noushili kutya Jehova otaka xupifa oshiwana shaye?

6 Josua oo a li umwe womwaavo va xupifwa moupika waEgipti, okwa li a dimbulukifa oshiwana shaIsrael ta ti: “Ndele nye mu nokushiiva nomutima weni aushe nomwenyo weni aushe nokutya, kape na nande ondjovo imwe yomeendjovo adishe diwa Omwene Kalunga keni e mu tonga ya kala inai wanifwa. Adishe de mu wanifilwa, kape na nande imwe inai wanifwa.” (Jos. 23:2, 14) Ohatu dulu okukala noushili kutya eudaneko laJehova loku tu xupifa moudjuu munene itali ka kala inali wanifwa. Ashike, ngeenge otwa hala okuxupa pehanauno longhalelo ei, otu na okukala oupafi.

OKUKALA OUPAFI OKWA FIMANA OPO TU KA XUPE

7, 8. (a) Onghandangala ilipi ya li hai danwa kovanangeli vopefimbo lonale noshike hatu lihongo mo mwaasho? (b) Yandja oshihopaenenwa shaasho sha li tashi dulu okuningwa po ngeenge ovanangeli ova kofele moilonga.

7 Ohatu dulu okulihonga oshilihongomwa shanghee sha fimana okukala oupafi moiningwanima yonale. Monale, oilando ya kula ngaashi Jerusalem, oya kala ya dingililwa komakuma male. Omakuma okwa li haa amene oshiwana kovatondi nokwa li yo e na eenhele dimwe da yeluka pombada opo va mone osho tashi linyenge momudingonoko. Ovanangeli ova li hava tulwa peenhele donhumba pombada yekuma loshilando nosho yo poivelo omutenya noufiku. Ovanangeli ovo ova li hava shiivifile oshiwana kombinga yoiponga oyo ya li tashi dulika i hange oshilando. (Jes. 62:6) Omunangeli okwa li e na okukala e li oupafi nokwa pashuka molwaashi oshilonga shaye okwa li tashi ti omwenyo ile efyo. — Hes. 33:6.

8 Omunandjokonona Josefus Omujuda okwa tile kutya, momudo 70 O.P., omatangakwaita aRoma okwa li a kwata ko Oshungo yaAntonia, oyo ya kwatakanifwa nekuma laJerusalem, molwaashi ovakeleli vopoivelo ova li va kofa. Okudja opo, Ovaroma ova li va tondokela kotembeli ndele tave i tomeke omundilo. Osho sha li oshitukulwa shaxuuninwa shoudjuu munenenene oo wa li inau hanga nande onale Jerusalem noshiwana shOvajuda.

9. Oshike osho ovanhu vahapu kunena vehe shii?

9 Oilongo ihapu kunena oi na ovakwaita ovo hava pashukile eengaba doshilongo nosho yo oinima yopauteknologi oyo hai va kwafele va mone keshe osho tashi linyenge ngaashi naanaa “ovanangeli” vonale va li hava ningi. Ohava tale osho tashi uya mo moshilongo nosho yo ovatondi ovo tashi dulika va etele ovakwashiwana oshiponga. Ashike ovanangeli ovo vokunena ohava dulu ashike okudidilika mo omatilifo oo taa di kovanhu ile komapangelo opanhu. Kave shii nokutya oshike tashi ningwa kOuhamba waKalunga womeulu unaenghono oo tau pangelwa kuKristus. Epangelo olo mafiku tali ka lwifa omapangelo aeshe kombanda yedu. (Jes. 9:6, 7; 56:10; Dan. 2:44) Mepingafano naasho, ngeenge otwa kala twa pashuka notu li oupafi pamhepo, ohatu ka kala twe lilongekidila efiku letokolo kashi nee mbudi kutya otali uya naini. — Eps. 130:6.

LUNGAMENA OSHO TASHI DULU OKU KU IMBA U KALE OUPAFI

10, 11. (a) Oshike tu na okulungamena, nomolwashike? (b) Oshike she ku itavelifa kutya Ondiaboli oya nwefa mo ovanhu ve lipwililikile omaxunganeko Ombiibeli?

10 Natu tye nee ngeno omunangeli wonhumba okwa kala oupafi oufiku aushe. Opo nee omunangeli okwa ka loloka ndele ta kwatwa keemhofi eshi e li pokudimbuka. Sha faafana, eshi hatu ehene popepi nexulilo longhalelo ei yoinima, osho ngoo tashi ende tashi ningi shidjuu kufye okukala oupafi. Kashi nyikifa tuu oluhodi ngeenge otwa dopa okukala oupafi!  Natu ka kundafaneni oinima itatu i na enwefemo lii oyo ngeenge inatu lungama tai dulu oku tu ningifa tuha kale twa pashuka notu li oupafi.

11 Ondiaboli otai hekele ovanhu meemhofi dopamhepo. Diva fimbo Jesus ina fya, okwa li a londwela ovahongwa vaye lwoikando itatu kombinga ‘yomupangeli wounyuni ou.’ (Joh. 12:31; 14:30; 16:11) Jesus okwa li e shii kutya Ondiaboli otai ka kaleka ovanhu momilaulu dopamadiladilo opo vaha mone kutya omaxunganeko aKalunga omonakwiiwa oshinima sha endelela. (Sef. 1:14) Ondiaboli oya twikifa ovanhu pamadiladilo okupitila momalongelokalunga oipupulu. Oshike wa didilika meenghundafana doye navamwe? Mbela ‘eendunge [dovanhu] inadi twikifwa’ kOndiaboli shi na sha nexulilo longhalelo ei yoinima nosho yo kutya Kristus ota pangele mOuhamba waKalunga? (2 Kor. 4:3-6) Olungapi ho udu ovanhu tava ti: “Inandi hala”? Luhapu ngeenge hatu kendabala oku va yelifila shi na sha nonakwiiwa, ihava kala va hala.

12. Omolwashike tuhe na okweefa Ondiaboli i tu pukife?

12 Ino efa oikala yokuhena ko nasha yavamwe i ku teye omukumo ile i ku shololife u kale oupafi molwaashi ou shi shii ove mwene kutya efiku otali uya. Paulus okwa shangela ovamwaxe ta ti: “Nye vene omu shi shii nawanawa nokutya, efiku lOmwene otali uya,” okwa weda ko ta ti kutya otali uya “ngaashi omulunga moufiku.” (Lesha 1 Ovatessaloniki 5:1-6.) Jesus okwe tu londwela a ti: “Nanye yo osho mu kale mwe lilongekida, osheshi Omona wOmunhu ote uya motundi ei inamu i teelela.” (Luk. 12:39, 40) Mafiku Satana ota ka pukifa ovanhu vahapu va itavele kutya ope na “ombili [neameno, NW].” Ote ke va pukifa moku va itavelifa kutya oinima aishe otai ende nawa mounyuni. Ongahelipi shi na sha nafye? Efiku letokolo itali ke tu ‘hanga ngaashi omulunga’ ngeenge otwa kala twa ‘pashuka notu li ovalidiliki.’ Nomolwaasho tu na okulesha Eendjovo daKalunga efiku keshe nokudilonga kwaasho Jehova te tu lombwele.

13. Ongahelipi omhepo younyuni ya kuma ovanhu, nongahelipi hatu dulu okuhenuka enwefemo la nyika oshiponga la tya ngaho?

13 Omhepo younyuni otai eta eemhofi dopamhepo. Vahapu ove lipyakidila ashike noinima yavo yopaumwene ndele tava kala vehe shii “omhumbwe yavo yopamhepo.”  (Mat. 5: 3NW) Ova pwila ashike mokulikongela oinima yopamaliko oyo i li mounyuni omu oyo tai xwaxwameke “okahalu kombelela nokahalu komesho.” (1 Joh. 2:16) Shikwao vali, oinima yomalihafifo otai xwaxwameke ovanhu va kale ve ‘hole ouhalu mwii,’ nomayeleko okuwanifa po ouhalu wa tya ngaho otaa ningi mahapu omudo keshe. (2 Tim. 3:4) Nomolwaasho Paulus a lombwela Ovakriste a ti kutya ‘ombelela yeni inamu i yakulila okahalu,’ molwaashi osho ohashi eta eemhofi dopamhepo. — Rom. 13:11-14.

14. Elondwelo lilipi la popiwa muLukas 21:34, 35?

14 Ponhele yokutambula ko omhepo younyuni, ohatu tambula ko monghalamwenyo yetu omhepo yaKalunga oyo hai tu pe eudeko la yela li na ko nasha naasho tashi ka ningwa monakwiiwa. [1] (1 Kor. 2:12) Ashike otu shi shii nawa kutya oshipu okukwatwa keemhofi dopamhepo. Oinima yanafangwa otai dulu oku tu pofipaleka ngeenge otwa efa i tu manene po efimbo lomalipyakidilo opamhepo. (Lesha Lukas 21:34, 35.) Vamwe otashi dulika ve tu sheke molwaashi tu li oupafi, ashike osho hasho shi kala etomheno lokukofa pamhepo. (2 Pet. 3:3-7) Ponhele yaasho, natu kale hatu endafana nOvakriste vakwetu pokwoongala opo hapa kala omhepo yaKalunga.

Mbela oto ningi ngoo eenghendabala wa mana mo opo u kale oupafi pamhepo? (Tala okatendo 11-16)

15. Oshike sha li sha ningilwa Petrus, Jakob naJohannes, nongahelipi osho tashi dulu oku tu ningilwa?

15 Okuhawanenena kwetu otaku dulu oku tu ningifa tuha kale oupafi. Jesus okwa li e shii kutya ovanhu inava wanenena ove na eamo lokuliyandja kounghundi wombelela. Diladila kwaasho sha li sha ningwa po moufiku oo fimbo Jesus ina dipawa. Opo a kale omudiinini, Jesus okwa li e na okupula eenghono kuXe womeulu. Jesus okwa li a ladipika Petrus, Jakob naJohannes va “kale oupafi” ofimbo ye ta ilikana. Ashike kava li va didilika kutya osho sha li tashi ka ningwa po osha kwata moiti. Ponhele yokukala oupafi pamwe nOmwene wavo, ova li ve liyandja kounghundi wombelela, ndele tava kofa. Nonande Jesus okwa li a loloka, okwa kala e li oupafi ta ilikana kuXe. Ovalongwa vaye ovo a li navo osho yo va li ve na okuninga. — Mark. 14:32-41.

16. Jesus okwe tu lombwela tu ‘kale oupafi’ ngahelipi she li kolela kuLukas 21:36?

16 ‘Okukala oupafi’ pamhepo inashi hala ashike okutya okukala u na omalinyengotomheno mawa. Omafiku manini ofimbo oshiningwanima shomuGetsemane inashi ningwa, Jesus okwa li a lombwela ovahongwa vaye ovo tuu ovo va indile kuJehova. (Lesha Lukas 21: 36.) Onghee hano opo tu kale oupafi pamhepo, otu na okukala hatu ilikana alushe. — 1 Pet. 4:7.

KALA ALUSHE U LI OUPAFI

17. Ongahelipi hatu dulu oku shilipaleka kutya otwe lilongekidila osho tashi uya monakwiiwa i li popepi?

17 Molwaashi Jesus okwa ti kutya exulilo otali “uya efimbo tuu olo [inatu] mu teelela,” paife halo efimbo lokukofa pamhepo ile lokutaataa oinima yomounyuni oyo tai xumifwa komesho kuSatana ile oyo ombelela yetu ya hala. (Mat. 24:44) Kalunga naKristus ove tu lombwela okupitila mOmbiibeli osho tashi ka ningwa monakwiiwa i li popepi nosho yo nghee hatu dulu okukala oupafi. Otu na okupashukila oupamhepo wetu, ekwatafano letu naJehova nosho yo oinima yOuhamba oyo tu na okupitifa komesho. Otu na okukala hatu tale kefimbo nosho yo koiningwanima oyo tai ningwa opo tu kale twe lilongekida. (Eh. 22:20) Eemwenyo detu oda kwatelwa mo!

^ [1] (okatendo 14) Tala etukulwa 21 lembo Ouhamba waKalunga otau pangele!