Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OSHITUKULWA SHOKUKONAKONWA 2

Hambeleleni Jehova meongalo

Hambeleleni Jehova meongalo

“Nomokati keongalo ohandi ku hambelele.” — EPS. 22:22.

EIMBILO 59 Tangeni Jah

EXUKU LOSHITUKULWA *

1. David okwa li e uditile ngahelipi Jehova, naasho osha li she mu linyengifa a ninge shike?

OHAMBA David oya shanga ya ti: “Omwene, Oye omunene nonakufimanekwa unene.” (Eps. 145:3) Okwa li e hole Jehova, nohole ya tya ngaho oya li ye mu linyengifa a hambelele Kalunga “nomokati keongalo.” (Eps. 22:22; 40:5) Nopehe na omalimbililo, ou hole Jehova noto tu kumwe neendjovo daDavid odo tadi ti: “Oove Omwene Kalunga katate Israel, u hambelelwe alushe fiyo alushe!” — 1 Omaf. 29:10-13.

2. (a) Ongahelipi hatu dulu okuhambelela Jehova? (b) Vamwe ohava taalele omashongo elipi, noshike hatu ka konakona?

2 Kunena, onghedi imwe hatu dulu okuhambelela Jehova omokuyandja omatyekosha pokwoongala kwopaKriste. Ashike oshi li eshongo kovamwatate novamwameme vahapu. Ohava kala va hala okukufa ombinga pokwoongala, ndele ohava kala va tila. Oshike tava dulu okuninga po opo vaha kale va tila? Eenghedi tadi longo dilipi tadi dulu oku tu kwafela tu yandje omatyekosha taa tungu? Fimbo inatu nyamukula omapulo oo, tete natu ka konakoneni omatomheno anhe a fimana kutya omolwashike hatu yandje omatyekosha pokwoongala.

OMATOMHENO MOLWAASHI HATU YANDJE OMATYEKOSHA POKWOONGALA

3-5. (a) Ngaashi sha yelifwa mOvaheberi 13:15, omolwashike hatu yandje omatyekosha pokwoongala? (b) Mbela atushe otu na okuyandja omatyekosha a faafana? Shi yelifa.

3 Jehova okwe tu pa oufembanghenda woku mu hambelela. (Eps. 119:108) Omatyekosha oo hatu yandje pokwoongala oku li oshitukulwa ‘shomahambeleloyambo’ etu, nokape na oo ta dulu  oku a yandja ponhele yetu. (Lesha Ovaheberi 13:15.) Mbela Jehova okwa teelela keshe umwe womufye a yandje eyambo ile etyekosha la faafana? Ahowe.

4 Jehova oku shii kutya okudula nosho yo eenghalo detu oda yoolokafana, nokwa lenga neenghono omayambo oo hatu dulu oku mu pa. Diladila komayambo Ovaisreal oo a li a tambula ko. Ovaisrael vamwe ova li tava dulu okuyandja odi ile oshikombo. Ashike Omuisrael oo a li ohepele okwa li ta dulu okuyandja “omalyamono avali ile eenghutyona mbali.” Nongeenge Omuisrael ka li ta dulu okuyandja mbali domeenghuti odo, Jehova okwa li ha tambula ko “okilograma youfila wa nakwa.” (Lev. 5:7, 11) Oufila owa li u na ombilixa, ndele Jehova okwa li natango a lenga eyambo la tya ngaho, shimha ashike wa li “wa nakwa” nawa.

5 Nokunena, Kalunga ketu omunanghenda ina lunduluka. Ngeenge hatu yandje omatyekosha, ina teelela atushe tu kale ovanongo mokupopya ngaashi Apollos ile hatu tomho ovanhu ngaashi Paulus. (Oil. 18:24; 26:28) Ashike Jehova okwa hala tu yandje omatyekosha shi fike pokudula kwetu. Dimbuluka omufiyekadi oo a li a yandja ousenda vavali. Jehova okwa li e mu lenga molwaashi okwa li a yandja osho sha denga mbada shi fike pokudula kwaye. — Luk. 21:1-4.

Okuyandja omatyekosha ohaku tu etele ouwa nosho yo ovo tava pwilikine (Tala okatendo 6-7) *

6. (a) She likolelela kOvaheberi 10:24, 25, omanyamukulo oo haa yandjwa pokwoongala otashi dulika e tu kume ngahelipi? (b) Ongahelipi to dulu okuulika olupandu omolwomanyamukulo oo hae ku tu omukumo?

6 Ohatu twaafana omukumo ngeenge hatu yandje omatyekosha etu. (Lesha Ovaheberi 10:24, 25.) Atushe ohatu hafele okuuda omatyekosha a yoolokafana pokwoongala kwetu. Ohatu hafele omatyekosha ounona e li paunafangwa notaa di komutima. Ohatu tuwa omukumo ngeenge umwe ta yandje etyekosha nohamu kombinga yoshili oyo e lihonga. Otu hole ovo hava yandje omatyekosha “nouladi,” nokuli nonande ove na eehoni ile opo tave lihongo elaka letu. (1 Tes. 2:2) Ongahelipi hatu dulu oku va pandula omolweenghendabala davo? Ohatu dulu oku va pandula konima yokwoongala omolwomatyekosha avo taa tungu. Onghedi imwe hatu dulu oku va pandula omokuyandja omatyekosha. Inatu pumbwa ashike okutuwa omukumo pokwoongala, ndele otwa pumbwa yo okutwa vamwe omukumo. — Rom. 1:11, 12.

7. Ohatu mono ouwa ngahelipi ngeenge hatu yandje omatyekosha?

7 Ohatu mono ouwa fye vene ngeenge hatu  yandje omatyekosha. (Jes. 48:17) Ngahelipi mbela? Shotete, ngeenge otwa hala okuyandja etyekosha, otashi ke tu linyengifa tu lilongekidile nawa okwoongala. Ngeenge otwe lilongekida nawa, ohatu ka kala tu na eudeko lomoule lEendjovo daKalunga. Ngeenge otwa kala tu na eudeko lomoule, ohatu ka tula moilonga noupu osho twe lihonga. Oshitivali, ohatu ka hafela unene okwoongala molwaashi ohatu kufa ombinga meenghundafana. Oshititatu, molwaashi ohashi pula eenghendabala tu yandje etyekosha, luhapu konima yokwoongala ohatu dimbuluka oitwa oyo twa popya.

8-9. (a) Ngaashi sha popiwa muMalakia 3:16, Jehova oha kala e uditile ngahelipi omatyekosha etu? (b) Eshongo lilipi tashi dulika natango vamwe va taalele?

8 Ohatu hafifa Jehova ngeenge hatu holola eitavelo letu. Ohatu dulu okukala noushili kutya Jehova oha pwilikine kufye nokwa lenga neenghono eenghendabala detu odo hatu ningi opo tu yandje omatyekosha pokwoongala. (Lesha Malakia 3:16.) Oha ulike olupandu laye moku tu nangeka noupuna eshi hatu ningi eenghendabala tu mu hafife. — Mal. 3:10.

9 Osha yela kutya otu na omatomheno mawa okuyandja omatyekosha pokwoongala. Natango vamwe otashi dulika va kale va tila okuyelula omake avo. Ngeenge osho u udite ngaho ino teka omukumo. Natu ka konakoneni omafinamhango amwe Ombiibeli, oihopaenenwa yonhumba nosho yo eenghedi dimwe tadi longo odo tadi dulu oku tu kwafela tu yandje omatyekosha mahapu pokwoongala.

OKUUNGAUNGA NOUMBADA

10. (a) Vahapu vomufye otu na oumbada ulipi? (b) Omolwashike okukala noumbada ku li edidiliko liwa?

10 Mbela oho kala wa tila efimbo keshe ngeenge to diladila okuyelula eke loye u yandje etyekosha? Ngeenge osho, haave auke. Oushili oyoo kutya vahapu vomufye ohatu kala twa tila ngeenge hatu yandje etyekosha. Opo u dule okuungaunga noumbada oo hau ku imbi u yandje omatyekosha, owa pumbwa okudidilika mo osho hashi u etifa. Mbela oho kala wa tila kutya oto dimbwa osho wa hala okupopya ile kutya oto ka popya oshinima sha puka? Mbela oho lipula kutya etyekosha loye itali ka kala liwa ngaashi omatyekosha  avamwe? Oumbada oo otau dulu okukala edidiliko liwa. Otau ulike kutya ou mu lininipiki nowa tala ko vamwe ve ku dule. Jehova oku hole oukwatya oo. (Eps. 138:6; Fil. 2:3) Ndele Jehova okwa hala yo mu mu hambelele nokutunga ovamwatate novamwameme pokwoongala. (1 Tes. 5:11) Oku mu hole note ke mu pa ouladi oo mwa pumbwa.

11. Ombiibeli oya popya shike osho tashi dulu oku tu kwafela?

11 Diladila kwaasho Ombiibeli tai ti. Oya ti kutya atushe ohatu ningi omapuko mokupopya. (Jak. 3:2) Ndele Jehova nosho yo ovaitaveli vakwetu inava teelela tu kale twa wanenena. (Eps. 103:12-14) Ove tu hole molwaashi otu li onga oilyo youkwaneumbo umwe. (Mark. 10:29, 30; Joh. 13:35) Ove shii kutya omafimbo amwe ohatu pukifa omandola eshi hatu yandje omatyekosha.

12-13. Oshike hatu lihongo moshihopaenenwa shaNehemia noshaJona?

12 Diladila koihopaenenwa imwe yopaMbiibeli oyo tai dulu oku ku kwafela u ungaunge noumbada. Diladila kuNehemia. Okwa li ha longo mouhamba wohamba inaenghono. Nehemia okwa li a nyika oluhodi eshi a uda kutya ohotekuma nosho yo omivelo daJerusalem oda ngumaunwa po. (Neh. 1:1-4) Diladila kunghee tashi dulika a li a tila eshi ohamba ye mu pula a popye kutya omolwashike a nyika oluhodi. Nehemia okwa li a ilikana diva ndele ta nyamukula. Ohamba oya li ya ninga shihapu i kwafele oshiwana shaKalunga. (Neh. 2:1-8) Diladila vali kuJona. Eshi Jehova a li e mu lombwela a ka udifile ovakalimo vomuNinive, okwa li a tila ndele tai onhapo. (Jona 1:1-3) Ashike kekwafo laJehova, okwa li a wanifa po oshinakuwanifwa shaye. Neendjovo odo Jona a li a popya oda li da kwafela unene Ovaninive. (Jona 3:5-10) Oshihopaenenwa shaNehemia oshe tu honga kutya osha fimana okwiilikana fimbo inatu nyamukula. Noshihopaenenwa shaJona oshe tu honga kutya Jehova ota dulu oku tu kwafela tu mu longele kashi na nee mbudi kutya otwa tila shi fike peni. Mbela ope na ngoo eongalo tali ka kala litilifi ngaashi Ovaninive?

13 Eenghedi tadi longo dilipi tadi dulu oku ku kwafela u yandje omatyekosha taa tungu pokwoongala? Natu ka konakoneni omaetepo onhumba.

14. Omolwashike twa pumbwa okulilongekidila nawa okwoongala kwetu, notashi dulika tu na oku shi ninga naini?

14 Lilongekidila okwoongala keshe. Ngeenge owe lilongekida nawa komesho yefimbo, oto ka kala wa manguluka okuyandja omatyekosha. (Omayel. 21:5) Oshoshili kutya ihatu lilongekidile okwoongala pefimbo la faafana. Eloise, omufiyekadi oo e na omido 80 nasha, oha hovele okulilongekida Oshungonangelo yokukonakonwa pehovelo loshivike. Okwa ti: “Ohandi hafele unene okwoongala ngeenge onde lilongekida komesho yefimbo.” Joy oo ha longo oilonga yefiku alishe yokulikongela omboloto, okwe litulila po efimbo lokukonakona Oshungonangelo yaye mOlomakaya. Okwa ti: “Ohandi dimbuluka noupu ngeenge onde lilongekida ku na efimbo lixupi.” Ike, omukulunhuongalo e lipyakidila noku li yo omukokolindjila, okwa ti: “Onda mona kutya  oshiwa kwaame okulilongekida handi longifa efimbo lixupi momukokomoko woshivike ponhele yokulilongekida oshitukulwa ashishe pefimbo limwe.”

15. Ongahelipi to dulu okulilongekidila nawa okwoongala?

15 Oshike sha kwatelwa mo mokulilongekidila nawa okwoongala? Ofimbo ino hovela okulilongekida ilikana Jehova e ku pe omhepo yaye iyapuki. (Luk. 11:13; 1 Joh. 5:14) Opo nee, longifa ominute dinini u tale osho to lihongo mo mokukonakona oshipalanyole, oupalanyole vanini, omafaneko nosho yo oimhungu. Eshi to konakona okatendo keshe, lesha omishangwa dihapu odo da etwa mo ngaashi to dulu. Dilonga kouyelele, ndele to yandje elitulemo le likalekelwa koitwa oyo wa hala oku ka yandja omatyekosha. Ngeenge owe lilongekida nawa oto ka mona ouwa notashi ka kala shipu kwoove okuyandja omatyekosha. — 2 Kor. 9:6.

16. Oilongifo ilipi i li melaka olo u shii, noho i longifa ngahelipi?

16 Ngeenge otashi shiiva, longifa oilongifo yopaelektronika oyo i li melaka olo u shii. Jehova okwe tu pa oilongifo oyo tai dulu oku tu kwafela tu lilongekidile okwoongala okupitila mehangano laye. O-JW Library® ohai tu kwafele tu tapele oishangomwa yokukonakonwa moikwaelektronika yetu. Opo nee ohatu dulu okukonakona, okulesha ile okupwilikina koshitukulwa efimbo keshe. Vamwe ohave lilongekida pefimbo lomusha koilonga ile kofikola ile ngeenge ve li molweendo tava longifa o-JW Library. O-Watchtower Library nosho yo ONGULUMAMBO YOKOINTANETA oye shi ningifa shipu okuninga omapekapeko oitwa oyo twa hala okukonakona moule moshitukulwa.

Onaini we litulila po efimbo lokulilongekidila okwoongala? (Tala okatendo 14-16) *

17. (a) Omolwashike sha fimana okulilongekida omatyekosha mahapu? (b) Oshike we lihonga mokavidio, Ninga kaume kaJehova — Lilongekida etyekosha loye?

17 Ngeenge otashi shiiva, lilongekida omatyekosha mahapu moshitukulwa keshe. Omolwashike? Omolwaashi haalushe to ka tumbulwa ngeenge wa yelula eke loye. Otashi dulika vamwe va yelule omake avo pefimbo la faafana, notashi dulika omukwatelikomesho a tumbule po umwe womuvo. Opo okwoongala ku pwe pefimbo, omukwatelikomesho otashi dulika aha tumbule keshe umwe. Onghee ino uda nai ile u teke omukumo ngeenge okwa kala ine ku pa omhito diva. Ngeenge owe lilongekida omatyekosha mahapu, oto ka kala u na eemhito dihapu dokukufa ombinga moshikundafanwa. Omatyekosha oo we lilongekida otaa dulu okukwatela mo okulesha omushangwa. Ngeenge oto dulu lilongekida yo okuyandja omatyekosha to longifa oitya yoye mwene. *

18. Omolwashike tu na okuyandja omatyekosha e li pauxupi?

18 Yandja omatyekosha e li pauxupi. Luhapu  omatyekosha oo haa tungu ohaa kala a xupi noku li paunafangwa. Onghee kaleka omatyekosha oye pauxupi. Kendabala oku a yandja meni leesekonde 30 lwaapo. (Omayel. 10:19; 15:23) Ngeenge owa kala ho yandje omanyamukulo pokwoongala oule womido dihapu, osha fimana oku tula po oshihopaenenwa shiwa mokukaleka omatyekosha oye pauxupi. Ngeenge oho popi oinima ihapu to kwata ominute dihapu, vamwe otashi dulika va ude nai tava diladila kutya itava dulu okuyandja omatyekosha ngaashi oye. Natango omatyekosha oo e li pauxupi ohaa yandje omhito opo ovanhu vahapu va kufe ombinga pokwoongala. Ngeenge owa tumbulwa tete, yandja etyekosha li li paunafangwa nola nyamukula epulo. Ino kendabala okupopya oitwa aishe oyo i li mokatendo. Konima ngeenge enenediladilo lokatendo ola kundafanwa, oto dulu okuyandja etyekosha koitwa vali imwe. — Tala oshimhungu “ Oshike handi dulu okuyandja etyekosha kusho?

19. Ongahelipi omukwatelikomesho ta dulu oku ku kwafela, ndele ou na okuninga shike?

19 Shiivifila omukwatelikomesho kutya owa hala okuyandja etyekosha pokatendo konhumba. Ngeenge owa hala okuninga ngaho, ou na okulombwela omukwatelikomesho ofimbo okwoongala inaku hovela. Ngeenge efimbo lokuyandja etyekosha pokatendo oko ola fiki, yelula diva eke loye mokule opo omukwatelikomesho e ku mone.

20. Okwoongala okwa faafana ngahelipi nokuhafela oikulya pamwe nookaume?

20 Kala wa tala ko okwoongala ku li ngaashi oikulya oyo to hafele pamwe nookaume vawa. Diladila nee ngeno ookaume vamwe meongalo tava ningi okavilo nove ku pula u longekide oikulya i li paunafangwa. Oto ke linyenga ngahelipi? Otashi dulika u kale wa tila, ashike oto ka ninga ngaashi to dulu opo u twaalele oikulya oyo aveshe tava ka hafela. Jehova, oo e tu shiva, okwe tu longekidila oinima ihapu iwa pokwoongala kwetu. (Eps. 23:5; Mat. 24:45) Noha kala a hafa ngeenge twe mu etela oshali i li paunafangwa, shi fike pwaasho hatu dulu okuyandja. Onghee lilongekida nawa ndele to yandje omatyekosha ngaashi to dulu. Nokungaho ito ka lya ashike koshitaafula shaJehova ndele oto ka tukulilafana yo oshali neongalo.

EIMBILO 2 Jehova olo edina loye

^ par. 5 Ngaashi omupsalme David, atushe otu hole Jehova nohatu hafele oku mu hambelela. Otu na omhito ye likalekelwa yokuulika ohole yetu yokuhola Jehova ngeenge twa shakene pokwoongala. Ashike vamwe vomufye ohatu mono shidjuu okuyandja omatyekosha pokwoongala. Ngeenge owa taalela eshongo olo, oshitukulwa eshi otashi ke ku kwafela u shiive kutya omolwashike ho kala wa tila nanghee to dulu okufinda oumbada wa tya ngaho.

^ par. 17 Tala okavidio Ninga kaume kaJehova — Lilongekida etyekosha loye, ko-jw.org. Tala koshi yoshipalanyole OISHANGOMWA > OUVIDIO.

^ par. 63 OMASHANGELO OMAFANO: Oilyo yeongalo tai hafele eenghundafana dOshungonangelo.

^ par. 65 OMASHANGELO OMAFANO: Oilyo imwe yeongalo oyo ya li ya ulikwa pehovelo tai kufa ombinga mOshungonangelo yokukonakonwa. Nonande oi na eenghalo da yoolokafana, aishe oye litulila po efimbo lokulilongekidila okwoongala.