Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2017

“Shi yandja kovalumenhu ve shi kulineekelwa”

“Shi yandja kovalumenhu ve shi kulineekelwa”

“Shi yandja kovalumenhu ve shi kulineekelwa, va wana oku shi longa vakwao yo.” — 2 TIM. 2:2.

OMAIMBILO: 123, 53

1, 2. Ovanhu vahapu ohava tale ko ngahelipi oilonga yavo?

OVANHU luhapu ohave liholola she likolelela koilonga oyo hava longo. Vahapu ohava ti kutya oilonga ile ondodo oyo omunhu e na oyo hai holola kutya okwa fimana shi fike peni. Momihoko dimwe, ngeenge owa hala okushiiva omunhu wonhumba, tete oho mu pula kutya, “Oho longo peni?”

2 Ombiibeli nayo oya hokolola ovanhu she likolelela koilonga oyo va li hava longo. Oya popya kombinga “yaMateus, omufendelifi”; “Simon, omushiki woipa”; “naLukas, omuhakuli omuholike.” (Mat. 10:3; Oil. 10:6; Kol. 4:14) Oinakuwanifwa yopamhepo ile omaufembanghenda nao ohaa holola yo shihapu kombinga yovanhu. Ohatu lesha mOmbiibeli kombinga yOhamba David, omuprofeti Elia nomuyapostoli Paulus. Ovalumenhu ovo ova li va lenga oinakuwanifwa oyo va li va pewa kuKalunga. Sha faafana, ngeenge nafye otu na oinakuwanifwa, otu na okukala twe i lenga.

3. Omolwashike ovanamido va pumbwa okudeula ovanyasha? (Tala efano pehovelo loshitukulwa.)

3 Vahapu vomufye otu hole oilonga oyo hatu longo nohatu kala twa halelela okutwikila nao. Shinyikifa oluhodi, okudja kuAdam, epupi  keshe ohali kulupa ndele tali pingenwa po kulikwao. (Omuud. 1:4) Efimbo opo la di ko, elunduluko olo ola etela Ovakriste vashili omashongo. Oilonga yoshiwana shaJehova oya hapupala shi dulife nale. Eshi hatu hovele noilonga imwe ipe, ohapa tulwa eenghedi dipe omo oinima yonhumba i na okuningwa, naasho ohashi ningifa pa kale ta pa longifwa exumokomesho mouteknologi. Ovamwatate ovanamido otashi dulika va kale ve wete shidjuu okukala tava endele pamwe nomalunduluko oo. (Luk. 5:39) Nonande haalushe hashi kala ngaho, ovanyasha otashi dulika ve na ondjungu neenghono ve dule ovanamido. (Omayel. 20:29) Nomolwaasho, oshi li pandunge ovamwatate ovanamido va kale hava deulile ovanyasha oinakuwanifwa ya wedwa po. — Lesha Epsalme 71:18.

4. Omolwashike hashi kala shidjuu kuvamwe okuyandja oinakuwanifwa? (Tala oshimhungu “ Omolwashike ovanhu vamwe ihava yandje oinakuwanifwa.”)

4 Ovo tava kwatele komesho otashi dulika va kale ve wete shidjuu okuyandja oinakuwanifwa kovanyasha. Vamwe ohava kala va tila okukanifa oinakuwanifwa oyo hava hafele. Vamwe ohava diladila kutya ovanyasha itava dulu okuwanifa po oinakuwanifwa. Vamwe otashi dulika va tomhafane kutya kave na efimbo lokudeula vamwe. Kakele kaasho, ovanyasha ove na okulididimika ngeenge ove wete itava pewa oinakuwanifwa ihapu.

5. Omapulo elipi hatu ka kundafana moshitukulwa eshi?

5 Natu ka konakoneni omapulo avali kombinga yokuyandja oinakuwanifwa. Lotete, ongahelipi ovamwatate ovanamido tava dulu okukwafela ovanyasha va tambule ko oinakuwanifwa ya wedwa po, nomolwashike sha fimana? (2 Tim. 2:2) Etivali, omolwashike ovanyasha va pumbwa okukala ve na etaleko liwa eshi tava kwafele ovamwatate ovo ve na owino muhapu nokulihonga kuvo? Tete, natu ka kundafaneni nghee Ohamba David ya li ya kwafela omonamati a wanife po oshinakuwanifwa osho sha fimana.

DAVID OKWA LI A LONGEKIDA NOKUYAMBIDIDA SALOMO

6. Ohamba David oya li ya hala okuninga shike, naJehova okwa li a ninga po shike?

6 Konima eshi David a kala onhauki oule womido, okwa ka ninga Ohamba ndele ta kala ha di mombala. Molwaashi kapa li pe na “ongulu”  ile otembeli ya yapulilwa Jehova, David okwa li a hala okutungila Jehova otembeli. Okwa li a lombwela omuprofeti Natan a ti: “Tala, ame ohandi kala mongulu yomiti domisenderi, ndelenee oshikefa shehangano lOmwene oshi li koshi yeefaila.” Natan okwa nyamukula a ti: “Ninga ashishe to diladila momutima woye osheshi Kalunga oku li naave.” Jehova okwa li a wilika Natan a lombwele David kutya: “Haave to ka tungila nge ongulu yokukala mo.” Nonande Jehova okwa li a shilipaleka David pahole kutya ota ka twikila noku mu nangeka noupuna, Jehova okwa li a tokola kutya omonamati waDavid oye ta ka tunga otembeli. Mbela David okwa li e linyenga ngahelipi? — 1 Omaf. 17:1-4, 8, 11, 12; 29:1.

7. David okwa li e linyenga ngahelipi kewiliko laJehova?

7 David ka li ta diladila kutya kashi fi oshinakuwanifwa shaye shokutunga otembeli nomolwaasho okwa li a kufa ombinga muko. Etungo olo ola li la shiivika onga otembeli yaSalomo, ndele kai fi yaDavid. Nonande otashi dulika David a li a nyika oluhodi eshi ina wanifa po vali ehalo laye, okwa li a yambidida pauyadi okutungwa kwotembeli. Okwa li a unganeka oilonga ndele ta ongele oshingoldo, oshisiliveli, oshikushu, oshivela nomiti. Shimwe vali, okwa li a twa Salomo omukumo, eshi a ti: “Paife, hano omumwange, Omwene na kale naave, u kale nelao mokutunga ongulu yOmwene Kalunga koye, ngaashi e ku xunganeka.” — 1 Omaf. 22:11, 14-16.

8. Omolwashike David a li ta dulu okufika pexulifodiladilo kutya Salomo ka li a wana okutungila Jehova otembeli, ndele oshike kwa li a ninga po?

8 Lesha 1 Omafimbo 22:5. David otashi dulika a li ta diladila kutya Salomo ka li a wana okupashukila oilonga oyo ya fimana yokutunga otembeli. Otembeli oya li tai ka kala “inene,” naSalomo pefimbo opo okwa li ‘omunyasha noka li e na ounghulungu.’ Ashike David okwa li e shi kutya Jehova ota ka yambidida Salomo a wanife po oshinakuwanifwa osho a li e mu pa. Okwa li a yandja elitulemo kwaashi ta dulu okuninga opo a kwafele nokulongekida oitungifo ihapu.

MONA EHAFO OLO HALI DI MOKUDEULA VAMWE

Ohashi kala shihafifa okumona ovalumenhu ovanyasha tava tambula ko oinakuwanifwa ya wedwa po (Tala okatendo 9)

9. Ongahelipi ovanamido tava dulu okumona ehafo mokuyandja oinakuwanifwa kovanyasha? Shi yelifa.

9 Ovamwatate ovanamido kave na okukala ve udite nai ngeenge efimbo lokuyandja oinakuwanifwa yavo kovalumenhu ovanyasha ola fiki. Ohashi kala shiwa ngeenge ovanyasha ova deulwa opo va wanife po oinakuwanifwa yavo. Ovalumenhu ovo va nangekwa po ove na okukala va hafa ngeenge ovanyasha ovo va deula ova kala va pyokoka. Oku shi faneka, natu tye nee omudali ota longo omonamati okushinga otuwa. Eshi omonamati a li okaana okwa kala ha tale xe eshi ta shingi. Eshi omumati a kula, xe okwa li e mu yelifila kutya otuwa ohai shingwa ngahelipi. Lwanima eshi a wanifa omido odo omunhu a ufwa opo a kale e na omukanda wokushinga, okwa hovela okushinga, naxe ohe mu pe ouyelele wa wedwa po. Omafimbo amwe otashi dulika va kale hava ningi omalufo okushinga, ashike mokweendela ko kwefimbo omonamati otashi dulika oye a kale ha shingile xe eshi ta ende ta kulupa.  Omudali omunandunge oha kala a tunhukwa eshi omonamati te mu yakula mo noku udite kutya ina pumbwa okukala te mu pashukile efimbo alishe. Sha faafana, ovalumenhu ovanamido ohava kala ve udite etumba ngeenge ova deulila ovalumenhu ovanyasha oinakuwanifwa meongalo.

10. Moses okwa li e uditile ngahelipi efimano neenghonopangelo odo a li e na?

10 Tu li ovanamido, otu na okuhenuka okukala tu na ondubo. Didilika nghee Moses a li e linyenga eshi vamwe ovo va li mokamba yOvaisrael va li va hovela okukala tave lihumbata va fa ovaprofeti. (Lesha Numeri 11:24-29.) Josua, omukaleli po waMoses, okwa li a hala oku va kelela. Okwa li ta diladila kutya ova li tava dinifa ondodo neenghonopangelo daMoses. Ashike Moses okwe mu nyamukula a ti: “Ove u na efupandubo molwange? Akutu ovanhu aveshe vOmwene ngeno ovaxunganeki, Omwene opo a yandje omhepo yaye kombada yavo!” Moses okwa li a mona eke laJehova monghalo oyo. Ponhele yokulitumbaleka, Moses okwa li a ulika kutya okwa hala omaano aeshe omhepo iyapuki a pewe ovapiya aveshe vaJehova. Ngaashi Moses, mbela ihatu kala twa hafa ngeenge vamwe ova pewa oinakuwanifwa ipe oyo tashi dulika ngeno ofye twa li tu na oku i pewa?

11. Omumwatate umwe okwa ti shike eshi a yandja oshinakuwanifwa shaye?

11 Kunena, otu na oihopaenenwa ihapu yovamwatate ovo va longa noudiinini oule womido nova kwafela vamwe opo va tambule ko oinakuwanifwa ipe. Pashihopaenenwa, omumwatate Petrus okwa kala moilonga yefimbo li yadi oule womido di dule 74, omido 35 okwa kala ta longele koshitaimbelewa moEurope. Hauxuuninwa okwa kala omupashukili woilonga moBetel. Paife Paulus, omulumenhu omunyasha oo a kala ta longo pamwe nomumwatate Petrus oule womido, oye ta wanifa po oshinakuwanifwa osho ponhele yaye. Eshi Petrus a pulwa kutya okuudite ngahelipi eshi haye vali ta wanifa po oshinakuwanifwa osho, okwa ti: “Onda hafa neenghono molwaashi ope na ovamwatate ovo va deulilwa oinakuwanifwa ya wedwa po notava longo noudiinini opo ve i wanife po.”

NATU KALE TWA LENGA OVANAMIDO OVO VE LI MOKATI KETU

12. Oshike hatu lihongo mehokololo laRehabeam?

12 Konima eshi Salomo a fya, omona Rehabeam oye a li a ninga ohamba. Eshi Rehabeam a li a pumbwa omayele a nghee e na okuwanifa po oinakuwanifwa yaye, okwa li tete a pula ovakulunhu. Ashike nande ongaho ka li a landula epukululo lavo. Ponhele yaasho, okwa li a tambula ko omayele ovanyasha ovo a kula navo, vo ovo a ninga ovayandjimayele vaye. Oidjemo oya li inyikifa oluhodi. (2 Omaf. 10:6-11, 19) Oshike hatu lihongo mehokololo olo? Oshi li pandunge okupula omayele kovakulunhu ovo ve na owino noku a tambula ko. Nonande ovanyasha otashi dulika va kale ve udite tava imbwa okuninga oinima yonhumba omolwonghedi omo ya li hai ningwa nale, kave na okweendelela va ekelashi omayele oo tava pewa kovakulunhu.

13. Ongahelipi ovanyasha tava dulu okukala hava longele kumwe novanamido?

13 Ovanyasha vamwe otashi dulika va kale tava unganeke oilonga oyo ya kwatela mo ovamwatate ovanamido. Nonande otashi dulika oinakuwanifwa yavo i kale ya yooloka ko kwaai yonale, ofimbo inava ninga omatokolo otava ka dula okumona ouwa mounongo nomoimoniwa yovamwatate ovanamido. Paulus, oo a tumbulwa metetekelo nokwa li a pingena po Petrus onga omupashukili woilonga yaBetel, okwa ti: “Ohandi kufa efimbo opo ndi pule omumwatate Petrus omayele, nohandi ladipike vamwe osho va kale hava ningi.”

14. Oshike hatu lihongo melongelokumwe olo la li pokati kaTimoteus nomuyapostoli Paulus?

14 Timoteus, omulumenhu omunyasha, okwa longo pamwe nomuyapostoli Paulus oule womido  dihapu. (Lesha Ovafilippi 2:20-22.) Paulus okwa li a shangela Ovakorinto a ti: “Nde mu tumina Timoteus, ou omumwange omuholike nomudiinini mOmwene, oye te mu dimbulukifa okweenda kwange muKristus, nhumbi handi longo apeshe nomeongalo keshe.” (1 Kor. 4:17) Eendjovo odo otadi ulike nghee Paulus naTimoteus va li hava longele kumwe nove na ekwatafano liwa. Paulus okwa li ha kufa efimbo opo a honge Timoteus ‘omadimbulukifo okweenda muKristus.’ Timoteus okwa li ha kala e na ehalo lokulihonga naPaulus okwa kala nokuli e mu hole noku na elineekelo kutya otaka dula okufiloshisho Ovakriste vomuKorinto pamhepo. Ovakulunhu nava hopaenene oshihopaenenwa osho shiwa mokukala tava deulile vamwe oinakuwanifwa meongalo.

ATUSHENI OHATU DANA ONGHANDANGALA MEHANGANO LAJEHOVA

15. Ongahelipi omayele aPaulus oo kwa li a pa Ovakriste vokuRoma taa dulu ku tu kwafela ngeenge pa ningwa omalunduluko?

15 Kunena ope na omalunduluko mahapu a tunhula taa ningwa. Oshitukulwa shehangano laJehova shokombada yedu otashi hapupala meenghedi dihapu, ashike opa ningwa omalunduluko mahapu. Molwaashi omalunduluko oo ohae tu kumu pauhandimwe, otwa pumbwa okukala ovalininipiki nokukaleka momadiladilo ouwa waJehova ndele hauwa wetu vene. Okuninga ngaho ohashi xumifa komesho oukumwe. Paulus okwa li a shangela Ovakriste vokuRoma a ti: “Ohandi mu lombwele, keshe umwe mokati keni mu he lidiladilile kombada yaashi she mu yeleka, ndele kendabaleni okudiladila pandjele, keshe tuu ou pauhapu weitavelo laye, olo Kalunga e li mu pa. Osheshi ngaashi tu kwete molutu lumwe tu na oinhimbu ihapu, ndele oinhimbu aishe kai na oshilonga shimwe ashike, osho yo nafye nande tu li po vahapu, ofye olutu lumwe muKristus.” — Rom. 12:3-5.

16. Oshike osho ovanamido, ovanyasha novakainhu tava dulu okuninga opo va kaleke po ombili noukumwe mehangano laJehova?

16 Kashi na nee mbudi kutya otu li meenghalo dilipi, atusheni natu kale hatu longo opo tu xumife komesho Ouhamba waJehova. Ovanamido, deuleni ovanyasha va kale hava longo oinakuwanifwa oyo mu na. Ovamwatate ovanyasha, kaleni hamu tambula ko oinakuwanifwa, kaleni ovaladi nomu na etaleko liwa ngeenge ta mu pewa omayele kovanamido. Ovakainhu, kaleni hamu hopaenene omukulukadi waAkuila, Priskilla, oo a li ha yambidida omushamane waye noudiinini nonande eenghalo davo oda li da lunduluka. — Oil. 18:2.

17. Jesus okwa li e na elineekelo lilipi movahongwa vaye, nokwa li e va deulila shike?

17 Jesus oku li oshihopaenenwa sha denga mbada ngeenge tashi uya pokudeulila vamwe oinakuwanifwa ya wedwa po. Okwa li e shi kutya oilonga yaye yokuudifa kombada yedu otai ka xula navamwe otava ka twikila oku i longa. Nonande ovahongwa vaye kava li va wanenena, okwa li e ve lineekela nokwe va lombwela kutya otava ka longa oilonga inene i dule ei a longa. (Joh. 14:12) Okwa li e va deula nawanawa, nova li va tandavelifa onghundana iwa mounyuni aushe. — Kol. 1:23

18. Omanangeko noupuna elipi twa teelela, notu na okuninga shike paife?

18 Konima eshi Jesus a yandja omwenyo waye u li oikulila, okwa li a nyumuninwa omwenyo womeulu omo a ka pewa oilonga ihapu mwa kwatelwa eenghonopangelo di dule “epangelo kombada yomapangelo aeshe nomauhamba meenghonopangelo.” (Ef. 1:19-21) Ngeenge otwa fi ovadiinini fimbo Harmagedon ine uya, ohatu ka nyumuninwa mounyuni mupe wouyuki, omo ta mu ka kala oilonga ihapu i tunhula. Paife ope na oilonga oyo ya fimana yokuudifa onghundana iwa nokuninga ovanhu ovahongwa oyo atusheni tu na okukufa ombinga muyo. Atusheni, kutya nee ovanyasha ile ovanamido, ‘natu kaleni ovaladi moilonga yOmwene.’ — 1 Kor. 15:58.