Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2017

Oto dulu okukala omulininipiki nonande ou li momayeleko

Oto dulu okukala omulininipiki nonande ou li momayeleko

‘Enda nelininipiko pamwe naKalunga.’ — MIKA 6:8.

OMAIMBILO: 48, 95

1-3. Omuprofeti oo a dja kuJuda okwa li a dopa okuninga shike, noshidjemo osha li shike? (Tala efano pehovelo loshitukulwa.)

PEFIMBO lepangelo lOhamba Jerobeam, Jehova okwa li a tuma omuprofeti wokuJuda a twale etumwalaka letokolo kohamba yaIsrael ishunimonima. Omuprofeti oo omulininipiki okwa li a twala etumwalaka laJehova, naJehova okwa li e mu amena kuJerobeam oo a li omuhandunhu. — 1 Eeh. 13:1-10.

2 Mondjila yaye yokushuna keumbo, okwa li a shakeneka nomulumenhu omukulupe hadi popepi noshilando shaBetel. Omulumenhu oo okwa li te liti kutya ye omuprofeti waJehova. Okwa li a ningifa omulumenhu omunyasha aha dulike kelombwelo laJehova olo tali ti kutya ‘ina lya ko omungome ile a nwe ko omeva kuIsrael noina shuna nondjila oyo e uya nayo.’ Jehova ka li e shi hafela. Lwanima eshi omuprofeti waye ta shuna keumbo, okwa li a hangika konghoshi ndele tai mu dipaa. — 1 Eeh. 13:11-24.

3 Omolwashike omuprofeti oo a li omulininipiki e ke linenepeka ndele ta efa a pukifwe komukulupe oo? Ombiibeli inai popya kutya omolwashike. Ashike otashi dulika a li a dimbwa filufilu kutya okwa  li e na ‘okweenda nelininipiko pamwe naKalunga.’ (Lesha Mika 6:8.) MOmbiibeli, okweenda pamwe naJehova otashi yandje ediladilo lokukala we mu lineekela, lokuyambidida ounamapangelo waye nokulandula ewiliko laye. Omunhu omulininipiki oha kala eshi kutya ota dulu okukala e na ekwatafano laalushe naXe omunahole nomunaenghono adishe. Omuprofeti okwa li ta dulu okupula Jehova a yelife omalombwelo aye, ashike Ombiibeli inai popya kutya osho a li a ninga. Omafimbo amwe, nafye otu na okuninga omatokolo a kwata moiti, ashike otashi dulika tuha kale tu wete kutya etokolo lilipi li li mondjila. Okukonga ewiliko kuJehova nelininipiko otashi ke tu kwafela tu henuke okuninga omapuko a kwata moiti.

4. Oshike hatu ka kundafana moshitukulwa eshi?

4 Moshitukulwa sha dja ko, otwe lihonga kutya omolwashike natango elininipiko la fimana kOvakriste nola kwatela mo shike. Omeenghalo dilipi elininipiko letu tali dulu okuyelekwa? Ongahelipi hatu dulu okukulika oukwatya oo muwa opo tu dule okukala ovalininipiki nonande otu li momayeleko? Opo tu mone omanyamukulo komapulo oo, ohatu ka kundafana eenghalo nhatu odo tadi dulu okuyeleka elininipiko letu, nohatu ka mona nghee hatu dulu okukatuka pandunge monghalo keshe. — Omayel. 11:2.

NGEENGE EENGHALO DETU DA LUNDULUKA

5, 6. Ongahelipi Barsillai a li a ulika elininipiko?

5 Omalunduluko oo haa ningwa monghalamwenyo yetu ile moilonga yetu oyo hatu longele Jehova otaa dulu okuyeleka elininipiko letu. Eshi David a li a shiva Barsillai oo a li e na omido 80, e uye a kale naye mombala, Barsillai otashi dulika a li a tunhukwa unene. Ngeno okwa li a tambula ko eshivo olo, ngeno otashi dulika a li ta ka twikila okuhafela eendafano nohamba. Ashike Barsillai ka li e li tambula ko. Omolwashike mbela? Molwaashi okwa li a kulupa, okwa lombwela David kutya ina hala oku mu pa omutengi. Okwa li a lombwela omona waye Kimham, a ye ponhele yaye. — 2 Sam. 19:31-37.

6 Elininipiko ola li la kwafela Barsillai a ninge etokolo li li mondjila. Ka li a anya eshivo laDavid molwaashi ngeno e udite kutya ina wana okukala nohamba ile molwaashi a hala okulikalela a hafele opendjela yaye. Okwa li a tambula ko omalunduluko oo nokukala eshi omangabeko aye. Ka li a hala okuninga oshinima osho ita dulu okuninga. (Lesha Ovagalati 6:4, 5.) Ngeenge otwa kala hatu yandje elitulemo keendodo detu noketumbalo, otashi ke tu ningifa tu kale tu na oikala yokuliholamwene, omhepo yefiyafanepo notashi dulika tu ka kale twa nyemata. (Gal. 5:26) Elininipiko ohali tu kwafele tu kale hatu yandje elitulemo kokudula kwetu nosho yo keenghendabala odo hatu ningi opo tu fimaneke Kalunga nokuninga ngaashi hatu dulu tu kwafele vamwe. — 1 Kor. 10:31.

7, 8. Ongahelipi elininipiko tali dulu oku tu kwafela tu henuke okuliameka keendunge detu vene?

7 Oshinakuwanifwa keshe ohashi uya nomaufembanghenda mahapu naasho otashi dulu okuyeleka elininipiko letu. Eshi Nehemia a li a uda kombinga youpyakadi wovanhu muJerusalem, okwa li a ilikana kuJehova nomutima aushe. (Neh. 1:4, 11) Jehova okwa li e mu nangeka noupuna, eshi Ohamba Artasasta ya li ye mu nangeka po e li omupangeli. Kakele komaliko noufembanghenda oo a li e na, Nehemia ka li e liameka keendunge daye mwene nokokudula kwaye. Okwa kala nokweenda pamwe naKalunga, nokwa twikila okukonga ewiliko mokukonakona Omhango yaKalunga. (Neh. 8:1, 8, 9) Nehemia ka li e wete e na eenghonopangelo e dule vamwe, ponhele yaasho okwa kala he va yakula noiniwe yaye. — Neh. 5:14-19.

8 Oshihopaenenwa shaNehemia otashi ulike nghee elininipiko tali dulu oku tu kwafele tu  kale inatu lineekela mufye vene ngeenge oinakuwanifwa yetu oya lunduluka ile ngeenge twa pewa oinakuwanifwa ya wedwa po. Omukulunhuongalo ngeenge okwa kala e lineekela meendunge daye mwene ota dulu okuhovela okukala ha ungaunga noinima yeongalo nopehe na okupula tete ekwafo kuJehova. Vamwe otashi dulika va ninge tete etokolo opo nee lwanima tava pula Jehova a nangeke noupuna etokolo lavo. Mbela osho otashi ulike ngoo oukwatya welininipiko? Omunhu omulininipiki ota ka dimbulukwa alushe omufika waye naJehova nosho yo onghandangala oyo ta dana mehangano laJehova. Okudula kwetu hako kwa fimana unene. Ngeenge otwa taalela omayeleko, otu na okukala twa lungama opo tuha kale twe lineekela meendunge detu vene. (Lesha Omayeletumbulo 3:5, 6.) Tu li oshitukulwa shoukwaneumbo waJehova, otwe lihonga okukala hatu wanifa po oinakuwanifwa yetu moukwaneumbo ile meongalo, ndele ihatu limonikifa kutya otu na ondodo yopombada ile oinakuwanifwa i dule yavamwe. — 1 Tim. 3:15.

NGEENGE HATU KEMBAULWA ILE HATU TUMBALEKWA

9, 10. Ongahelipi elininipiko tali dulu oku tu kwafela tu lididimike ngeenge hatu kembaulwa?

9 Otashi dulu okukala shidjuu okupangela omaliudo etu unene tuu ngeenge hatu kembaulwa. Hanna okwa li ha lili molwaashi Peninna, oo a li nyamunghwao, okwa kala noku mu shinda nokushindilila e mu handukife. Hanna okwa li e holike komushamane waye, ashike okwa li ongadji. Lwanima, eshi a li ta ilikana kotembeli, omupristeli omukulunhu Eli okwa li a fika pexulifodiladilo kutya okwa kolwa. Didilika kutya elininipiko laHanna ole mu kwafela a kale a ngungumana nokwa li a nyamukula omupristeli Eli nefimaneko. Eilikano laye tali kumu omutima ola shangwa mOmbiibeli. Meilikano laye omu na omautumbulilo taa ulike eitavelo la kola, olupandu nomahambelelo. — 1 Sam. 1:5-7, 12-16; 2:1-10.

10 Elininipiko otali dulu yo oku tu kwafela tu ‘dule owii onouwa.’ (Rom. 12:21) Onghalamwenyo  mounyuni waSatana kaiwa, nomolwaasho otu na okukondjifa tuha nwefwe mo kelihumbato lovakolokoshi. (Eps. 37:1) Oshiyahameka neenghono ngeenge opa holoka okuhaudafana pokati kovamwatate novamwameme. Omunhu omulininipiki ota ka hopaenena Jesus. Ombiibeli oya ti: “[Jesus] ina tuka eshi a tukwa . . . , ndelenee e liyandja kwaau ta tokola sha yuka.” (1 Pet. 2:23) Jesus okwa li e shii kutya ehandu olaJehova. (Rom. 12:19) Ovakriste otava londwelwa va kale ovalininipiki novaha ‘alulilafane owii.’ — 1 Pet. 3:8, 9.

11, 12. (a) Ongahelipi elininipiko tali dulu oku tu kwafela tu ungaunge nokambweenga ile nokupandulwa sha pitilila? (b) Ongahelipi elininipiko tali dulu oku tu kwafela ngeenge tashi uya pokudjala nokuliwapeka nosho yo melihumbato letu?

11 Ngeenge omunhu ote tu mbweenga ile te tu pandula sha pitilila, otashi dulu okuyeleka elininipiko letu. Natu konakoneni oshihopaenenwa shaEster sha denga mbada shanghee a li e linyenga kwaasho sha li sha ningwa po. Okwa li muwa unene nokwa li e na onghalamwenyo youdjeko moule womudo. Okwa kala ha kala novakainhu ovanyasha vahapu va dja moitukulwa longo yOuhamba waPersia ovo va li ve na omhepo yefiyafanepo opo va kale va hokiwa kohamba. Ashike nande ongaho, Ester okwa kala e na efimaneko nokwa ngungumana. Ka li omulinenepeki nokuli nokonima eshi a hoololwa a ninge omukainhu wohamba. — Est. 2:9, 12, 15, 17.

Mbela onghedi yetu yokudjala nokuliwapeka otai ulike ngoo kutya otwa fimaneka Jehova nosho yo vamwe, ile ohai ulike okuhenakonasha? (Tala okatendo 12)

12 Elininipiko ohali tu kwafele alushe tu djale nokuliwapeka monghedi yefimaneko nokukala alushe tu na elihumbato liwa. Ngeenge alushe otwa kala tu na “omhepo yombili noyelimweneneno,” ovanhu otava ka nanenwa kufye eshi ihatu linenepeke ile ihatu yukifa unene elitulemo kufye vene. (Lesha 1 Petrus 3:3, 4; Jer. 9:23, 24) Eenghatu detu ohadi holola osho shi li momitima detu. Pashihopaenenwa, otashi dulika tu diladile kutya ohatu hafele oinakuwanifwa yetu ye likalekelwa, hatu ungaunga noiholekwa ile tu na oufembanghenda wokulonga pamwe novamwatate ovo ve na oinakuwanifwa meongalo. Ile otashi dulika tu kale hatu yelifa nawa oinima nelalakano lokupandulwa nonande vamwe ova kufa yo ombinga moshinima osho. Natango, Jesus okwe tu tulila po oshihopaenenwa sha denga mbada. Eendjovo dimwe odo a li a popya oda li da shangwa ile da tumbulwa mOmishangwa dOshiheberi. Okwa li a popya monghedi yelininipiko opo ovapwilikini vaye va shiive kutya osho a li ta popi osha dja kuJehova ndele inashi dja mounongo waye mwene. — Joh. 8:28.

NGEENGE TU LI MOMALIMBILILO

13, 14. Ongahelipi elininipiko tali dulu oku tu kwafela tu ninge omatokolo?

13 Elininipiko letu otali dulu okuyelekwa ngeenge opa ningwa omalunduluko. Eshi omuyapostoli Paulus a li e li muKesarea, omuprofeti Agabus okwa li e mu lombwela kutya ngeenge okwa i kuJerusalem ota ka tulwa modolongo, ile otashi dulika noku li a dipawe. Molwaasho ovamwatate ova li va tila, ova li va pula Paulus aha ye ko. Ashike, Paulus ka li a sholola ile a kale e lineekela muye mwene noka li a kwatwa koumbada. Okwa li e lineekela muJehova filufilu nokwa li e lilongekida okuwanifa po oshinakuwanifwa shaye, keshe apa Jehova a hala a ye. Eshi ovamwatate ve shi uda, ova li va efa Paulus a ye kuJerusalem. — Oil. 21:10-14.

14 Elininipiko otali dulu yo oku tu kwafela tu ninge omatokolo e li mondjila nonande itatu dulu okushiiva kutya oidjemo otai ka kala ya tya ngahelipi. Pashihopaenenwa, ngeenge otu li moilonga yefimbo li yadi, oshike tashi ke tu ningilwa ngeenge otwa kwatwa kouyahame wa kwata moiti? Ongahelipi ngeenge ovadali vetu ovanamido ova pumbwa ekwafo letu? Ngeenge otwa kulupa, ongahelipi hatu ke lifila oshisho? Katu na apa hatu dulu okumona omanyamukulo okondadalunde komapulo oo. (Omuud. 8:16, 17) Elineekelo letu muJehova otali ke tu  kwafela tu kale hatu tambula ko omangabeko etu. Konima eshi twa ninga omapekapeko nokupula ekwafo kuvamwe nosho yo okukonga ewiliko okupitila meilikano, otwa pumbwa okukatuka eenghatu metwokumwe newiliko laJehova. (Lesha Omuudifi 11:4-6.) Jehova ote ke tu nangeka noupuna note ke tu wilika tu hange omalalakano etu. — Omayel. 16:3, 9.

OKUKULIKA OUKWATYA WELININIPIKO

15. Ongahelipi okukala tu na olupandu kuJehova taku dulu oku tu kwafela tu kale ovalininipiki?

15 Molwaashi elininipiko ohali tu etele omauwa mahapu, ongahelipi hatu dulu oku li kulika shi dulife nale? Natu ka konakoneni eenghedi nhe omo hatu dulu oku li kulika. Shotete, ohatu ka kala tu na elininipiko la tongomana notwa fimaneka Jehova, ngeenge otwa kala tu na olupandu omolwomaukwatya aye a denga mbada nosho yo ododo yaye. (Jes. 8:13) Dimbuluka kutya, ohatu ende pamwe naKalunga Omunaenghono adishe, ndele hanomweengeli ile nomunhu. Oushili oo otau tu linyengifa ‘tu lininipike koshi yeke laKalunga linaenghono.’— 1 Pet. 5:6.

16. Ongahelipi okudilonga kohole yaKalunga taku ke tu linyengifa tu kale ovalininipiki?

16 Oshitivali, okudilonga kohole yaJehova otashi ke tu kwafela tu kale ovalininipiki. Omuyapostoli Paulus okwa popya kutya Jehova okwa tala ko oinhimbu yolutu oyo ya talika ko inai fimana i li ya ‘fimana unene.’ (1 Kor. 12:23, 24) Sha faafana, Jehova oku na ko nasha nomunhu keshe kashi na neembudi kutya otu na omangabeko elipi. Ihe tu yeleke navamwe ile a kale ehe tu hole vali ngeenge otwa ningi omapuko. Omolwohole yaJehova ohatu kala tu udite twa amenwa eshi hatu mu longele tu li mehangano laye.

17. Ohatu ka mona ouwa ulipi ngeenge otwa kala hatu yandje elitulemo komauwa avamwe?

17 Oshititatu, olupandu letu li na sha nonghandangala oyo hatu dana mehangano laJehova otali ka kula eshi hatu hopaenene Kalunga ketu, mokukala hatu yandje elitulemo komaukwatya mawa avamwe. Ponhele yokukala hatu konga omapuko muvamwe ile tu kale twa hala alushe ofye ashike tu kwetele oinima komesho, ohatu ka kala ovalininipiki ngeenge otwa kala hatu kongo omayele kuvamwe nokukatuka metwokumwe nao. (Omayel. 13:10) Ohatu kala twa hafa pamwe navo, nohatu ka pewa oinakuwanifwa ya wedwa po. Ohatu ka hambelela Jehova eshi ta nangeke noupuna ‘ovamwatate mounyuni.’ — 1 Pet. 5:9.

18. Ongahelipi hatu dulu okudeula eliudo letu li kale tali wilikwa komafinamhango Ombiibeli?

18 Oshitine, ngeenge otwa kala hatu deula eliudo letu li kale tali wilikwa komafinamhango Ombiibeli, ohatu ka kala hatu ningi oinima monghedi ya yuka noi shii okufimanekwa. Ohatu ke lihonga okukala hatu tale ko oinima ngaashi Jehova he i tale ko. Ngeenge otwa kala hatu konakona pandjikilile, hatu ilikana nokutula moilonga osho hatu lihongo, ohatu ka kala tu na eliudo liwa. (1 Tim. 1:5) Otu na yo okukala twa pitifa komesho ouwa wavamwe. Jehova okwa udaneka kutya ngeenge otwa ningi ngaho, ote ke ‘tu yambidida’ tu twikile okukulika elininipiko nosho yo omaukwatya amwe opaKalunga. — 1 Pet. 5:10.

19. Oshike tashi ke tu kwafela tu kale ovalininipiki fiyo alushe?

19 Ounhwa owa li wa ningifa omuprofeti wokuJuda a kanife omwenyo waye nosho yo omufika waye muwa naKalunga. Nonande ohatu yelekwa ohatu dulu okukala ovalininipiki. Ovapiya ovadiinini vonale naavo ve li ovalininipiki kunena ova ulika kutya ohatu dulu okukala ovalininipiki. Ngeenge otwa kala hatu ende pamwe naJehova, ohatu ka kulika elininipiko shi dulife nale. (Omayel. 8:13) Kashi na neembudi kutya ohatu dana onghandangala ilipi mehangano laJehova, oshi li oufembanghenda okweenda pamwe naJehova. Kala wa lenga oufembanghenda oo, ndele to twikile okuninga ngaashi to dulu u ende pamwe naJehova fiyo alushe.