Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2017

“Lineekela Jehova, u longe ouwa”

“Lineekela Jehova, u longe ouwa”

‘Lineekela Jehova, u longe ouwa, nou diinine oshili!’ EPS. 37:3.

OMAIMBILO: 133, 63

1. Jehova okwa shita ovanhu tava dulu okuninga oinima ya yoolokafana ilipi?

JEHOVA okwa shita ovanhu tava dulu okuninga oinima ya yoolokafana. Okwe tu pa oukwatya wokudiladila opo tu dule okukandula po omaupyakadi notu ninge eemhangela di na sha nonakwiiwa. (Omayel. 2:11) Okwe tu pa eenghono tu wanife po eemhangela detu notu dule okuhanga omalalakano etu. (Fil. 2:13) Okwe tu shita yo tu na omaliudo; tu shii osho shili mondjila naasho sha puka, notaa dulu oku tu kwafela tu henuke okuninga omapuko nosho yo okuninga omalunduluko ngeenge otwa punduka. — Rom. 2:15.

2. Jehova kwa teelela tu longife ngahelipi okudula kwetu?

2 Jehova okwa teelela tu kale hatu longo ouwa. Omolwashike mbela? Omolwaashi oku tu hole, noku shii kutya ngeenge otwa kala hatu longo ouwa otashi ke tu etela ehafo. Jehova ote tu kumaida okupitila mEendjovo daye tu kale hatu longa ouwa. Pashihopaenenwa, okwa ti: “Eemhangela dovadiinini tadi eta ouwa auke”; “longa ashishe to shi dulu neenghono doye.” (Omayel. 21:5; Omuud. 9:10)  Okwe tu lombwela vali a ti: “Fimbo tu nomhito, tu ningileni aveshe ouwa” notu “yakulafaneni keshe tuu noshalinghenda.” (Gal. 6:10; 1 Pet. 4:10) Jehova okwa hala tu longe ngaashi hatu dulu opo tu mone ouwa pauhandimwe, navamwe va dule yo okumona ouwa.

3. Ovanhu ove na omangambeko ashike?

3 Jehova oku shii kutya ovanhu ova ngabekwa. Itatu dulu okuxulifa po okuhawanenena, oulunde nefyo noitatu dulu okupangela vamwe molwaashi atushe otu na emanguluko. (1 Eeh. 8:46) Kashi na neembudi kutya otu na ounongo ile owino u fike peni, ohatu ka kala alushe tu li ngaashi ounona kuJehova. — Jes. 55:9.

Ngeenge to ungaunga nomaupyakadi, “lineekela Jehova u longe ouwa”

4. Oshike hatu ka kundafana moshitukulwa eshi?

4 Monghalo keshe, otwa pumbwa okuliameka kewiliko laJehova, nokukala twe mu lineekela opo e tu yambidide noku tu ningile osho itatu dulu okuninga kufye vene. Otu na okulonga ngaashi hatu dulu mokukala hatu katuka eenghatu di li mondjila opo tu kandule po omaupyakadi nokukwafela vamwe. (Lesha Epsalme 37:3.) Atusheni otwa pumbwa ‘okulineekela muJehova nokulonga ouwa’; otwa pumbwa yo ‘okudiinina oshili.’ Natu ka kundafaneni kutya oshike hatu lihongo moshihopaenenwa shaNoa, David nosho yo shovapiya vamwe vaJehova ovadiinini ovo va li ve mu lineekela nova li va ninga omatokolo e li mondjila. Ohatu ka mona kutya oshike va li itava dulu okuninga naasho va li tava dulu okuninga, nanghee va li va katuka metwokumwe nasho.

NGEENGE TWA DINGILILWA KOUKOLOKOSHI

5. Hokolola onghalo oyo Noa a li a taalela.

5 Noa okwa li mounyuni u ‘yadi oukolokoshi’ noluhaelo. (Gen. 6:4, 9-13) Okwa li e shii kutya mafiku Jehova ota ka xulifa po ounyuni oo woukolokoshi. Ndele nande ongaho, Noa otashi dulika a li a lulilwa keenghalo da tya ngaho dovahenakalunga. Monghalo ya tya ngaho, Noa okwa li a didilika kutya ope na oinima imwe oyo a li ita dulu okuninga nayo ta dulu okuninga.

Omapataneko e na sha nokuudifa (Tala okatendo 6-9)

6, 7. (a) Oshike osho Noa a li ita dulu okuninga? (b) Ongahelipi tu li monghalo ya faafana naayo yaNoa?

6 Osho Noa a li ita dulu okuninga: Nonande Noa okwa kala ta udifa nouladi etumwalaka laJehova lelondwelo, ka li ta dulu okufininika ovakolokoshi ovo va li ve mu dingilila va tambule ko etumwalaka olo, noka li yo ta dulu okuningifa Eyelu li uye diva. Noa okwa li e na  okukala e lineekela muJehova kutya ota ka wanifa po eudaneko laye lokuxulifa po oukolokoshi te ke shi ninga pefimbo la wapala. — Gen. 6:17.

7 Nafye otu li mounyuni u yadi oukolokoshi notu shii kutya Jehova okwa udaneka oku u xulifa po. (1 Joh. 2:17) Onghee hano, itatu dulu okufininika ovanhu va tambule ko ‘onghundana iwa yOuhamba’ noitatu dulu oku endelelifa ‘oudjuu munene’ u hovele. (Mat. 24:14, 21) Ngaashi Noa, nafye otwa pumbwa okukala twa pama meitavelo notu na elineekelo kutya mafiku Jehova ota ka yukifa oinima. (Eps. 37:10, 11) Otwa tomhwa kutya Jehova ota ka hanauna po ounyuni ou mefiku olo a nuna. — Hab. 2:3.

8. Ongahelipi Noa a li a yandja elitulemo kwaasho ta dulu okuninga? (Tala efano pehovelo loshitukulwa.)

8 Osho Noa a li ta dulu okuninga: Ponhele yokusholola omolwoinima oyo a li ita dulu okuninga, okwa kala ta yandje elitulemo kwaasho a li ta dulu okuninga. E li “omuudifi wouyuki,” okwa kala tau udifa nouladi etumwalaka lelondwelo olo a li a pewa. (2 Pet. 2:5) Kape na omalimbililo osho osha li she mu kwafela a kale neitavelo la pama. Kakele kokuudifa, okwa kala ta longifa eenghono nomadiladilo aye opo a dule okuwanifa po oshilonga osho a pewa kuKalunga shokutunga ongulu yomomeva. — Lesha Ovaheberi 11:7.

9. Ongahelipi hatu dulu okulandula oshihopaenenwa shaNoa?

9 Ngaashi Noa, nafye ohatu kendabala tu kale “ovaladi moilonga yOmwene.” (1 Kor. 15:58) Oilonga ya tya ngaho otai dulu okukala ya kwatela mo okutunga nokukaleka po eenhele dokwoongalela, okuliyamba mokukwafela koyoongalele inini naai yakula ile okukwafela koshitaimbelewa ile keembelewa dokutoloka. Ohatu kala twe lipyakidila noilonga yokuudifa notu shii kutya oilonga oyo ohai pameke eteelelo letu lomonakwiiwa. Omumwameme umwe omudiinini okwa ti: “Ngeenge to popi navamwe kombinga yomanangeko noupuna Ouhamba waKalunga, oho mono kutya ovapwilikini ihava kala ve na eteelelo lasha nohava kala ve wete kutya omaupyakadi avo kae na fiku a ka xule po.” Oshoshili kutya, okukufa ombinga moilonga yokuudifa ohaku pameke etaleko letu li na sha nonakwiiwa notu kale twa tokola tuha sholole mefiyafanepo lomwenyo. — 1 Kor. 9:24.

 NGEENGE TWA PUNDUKA

10. Hokolola onghalo oyo David a li a taalela.

10 Jehova okwa popya kombinga yOhamba David e li ‘omulumenhu e mu hokwa komutima waye.’ (Oil. 13:22) David okwa kala omudiinini monghalamwenyo yaye nonande pomhito imwe okwa li a nyona sha kwata moiti. Okwa li a ya moluhaelo naBatseba. Shinyikifa oluhodi, okwa li a kendabala okuholeka enyono laye mokuunganeka omushamane waBatseba, Uria, a dipaelwe molwoodi. Molwaashi David oye a unganeka Uria a dipawe, osha fa ashike oye e mu dipaa. (2 Sam. 11:1-21) Enyono laDavid ole ke uya poluhaela. (Mark. 4:22) Mbela David okwa li e linyenga ngahelipi?

Omanyono omonakudiwa (Tala okatendo 11-14)

11, 12. (a) Konima eshi David a nyona, oshike osho a li ita dula okuninga? (b) Ngeenge otwe livele ombedi shili, ohatu dulu okukala nelineekelo kutya Jehova ote ke tu ningila shike?

11 Osho David a li ita dula okuninga: David ka li ta dulu okuningulula osho a li a ninga noka li ta dulu okuhenuka oilanduliko yenyono laye. Oshoshili kutya David okwa li e na okukala noilanduliko imwe monghalamwenyo yaye aishe. (2 Sam. 12:10-12, 14) Okwa li a pumbwa eitavelo nokukala e na elineekelo kutya ngeenge okwe livele ombedi shili, Jehova ote ke mu dimina po noku mu kwafela e lididimikile oilanduliko yeenghatu daye.

12 Molwaashi inatu wanena, atusheni ohatu nyono. Omanyono amwe ohaa kala a kwata moiti. Meenghalo dimwe, otashi dulika itatu dulu okuningulula omapuko etu notu na ashike okukala noilanduliko. (Gal. 6:7) Ohatu dulu okukala nelineekelo kutya ngeenge otwe livele ombedi shili, Jehova ote ke tu yambidida ngeenge tu li moudjuu nokuli nonande fimbo limwe ofye vene twe u likongela. — Lesha Jesaja 1:18, 19; Oilonga 3:19.

13. Ongahelipi David a li a dula okukala vali a pama pamhepo?

13 Osho David a li ta dulu okuninga: David okwa li a efa Jehova e mu kwafele opo a kale vali a pama pamhepo. Onghedi imwe omo kwa li e shi ninga omokutambula ko omapukululo oo a li a pewa komukalelipo waJehova, omuprofeti Natan. (2 Samuel 12:13) David okwa li yo a ilikana kuJehova, ta hepaulula omanyono aye nokuulika kutya okwe livela ombedi shili opo a kale a hokiwa vali kuJehova. (Eps. 51:1-17) Ponhele yokukala e udite etimba, okwa li e lihonga kenyono laye. Ka li vali a endulula omapuko aye. Okwa ka fya e li omudiinini noudiinini waye ou li medimbulukifo laJehova. — Heb. 11:32-34.

14. Oshike hatu lihongo moshihopaenenwa shaDavid?

14 Oshike hatu lihongo moshihopaenenwa shaDavid? Ngeenge otwa ninga enyono la kwata moiti, otwa pumbwa okulivela ombedi shili nokupula Jehova e tu dimine po. Otu na okuhepaulula omatimba etu kuye. (1 Joh. 1:9) Otwa pumbwa yo okuya kovakulunhuongalo ovo tava dulu oku tu pa ekwafo lopamhepo. (Lesha Jakob 5:14-16.) Ngeenge otwa kala hatu tambula ko omalongekido aJehova, ohatu ka ulika kutya otwe lineekela meudaneko laye loku tu velula pamhepo noku tu dimina po. Onghee hano, otu na okukala hatu lihongo komapuko etu, hatu tu twikile okulongela Jehova nokukala twa tala konakwiiwa tu na elineekelo. — Heb. 12:12, 13.

NGEENGE TU LI MEENGHALO DIMWE DI LILI

Omaupyakadi e na sha noukolele (Tala okatendo 15)

15. Oshike hatu lihongo moshihopaenenwa shaHanna?

15 Oto dulu okudiladila kovapiya vamwe ovadiinini vonale ovo va li ve lineekela muJehova opo va katuke eenghatu dili mondjila. Pashihopaenenwa, Hanna ka li ta dulu okuungaunga noupyakadi wokuhamona ounona, kuye mwene. Ashike okwa li e na elineekelo kutya Jehova ote ke mu hekeleka. Okwa li a twikila oku mu longela ketwalihangano noku mu mbubulila omutima waye okupitila meilikano. (1 Sam. 1:9-11) Mbela osho kashi fi tuu oshihopaenenwa  shiwa kufye? Eshi hatu ungaunga nomaupyakadi e na sha noukolele ile nomashongo amwe oo e dule eenghono detu, ohatu dike Jehova oisho yetu, tu na lineekela kutya ote ke tu fila oshisho. (1 Pet. 5:6, 7) Ohatu ningi keshe osho hatu dulu opo tu mone ouwa pokwoongala kwopaKriste nosho yo momafiloshisho amwe opamhepo. — Heb. 10:24, 25.

Ounona ihava dulika (Tala okatendo 16)

16. Ovadali otava dulu okulihonga shike moshihopaenenwa shaSamuel?

16 Ongahelipi shi na sha novadali ovo ve na ounona va fiya po oshili? Omunamido Samuel ka li ta dulu okufininika omonamati waye woshiveli a kale omudiinini komifikamhango douyuki odo a li e mu honga. (1 Sam. 8:1-3) Okwa li e na okweefela oinima momake aJehova. Ndele nande ongaho, Samuel okwa li a dula okukanyatela oudiinini waye nokukala ta hafifa Xe womeulu, Jehova. (Omayel. 27:11) Kunena, ovadali Ovakriste vahapu navo ove li monghalo ya faafana. Ohava kala ve na elineekelo ngaashi Xe womeyele lomumati a kanene. Jehova oha kala alushe e lilongekida okutambula ko ovo ve livela ombedi. (Luk. 15:20) Natango, ovadali va tya ngaho ohava longo noudiinini opo va kale ovadiinini kuJehova, ve na elineekelo kutya oihopaenenwa yavo otai ke linyengifa ovana vavo va alukile moshiunda.

Oiniwe inini (Tala okatendo 17)

17. Omolwashike oshihopaenenwa shomufiyekadi ohepele tashi tu omukumo?

17 Diladila komufiyekadi ohepele wopefimbo laJesus. (Lesha Lukas 21:1-4.) Ka li e na osho ta dulu okuninga po shi na sha nokuhenouyuki okwo kwa li taku longwa motembeli. (Mat. 21:12, 13) Otashi dulika ka li yo e na osho ta dulu okuninga po lela opo a xwepopaleke oiniwe yaye. Ndele nande ongaho, okwa li a yandja omayambidido nehalo liwa “ousenda vavali” ovo va li “oipalwifa aishe ei kwa li e i kwete.” Omukainhu oo omudiinini okwa li a ulika kutya okwe lineekela Jehova nomutima waye aushe, nokwa li e shii kutya ngeenge okwa kala a pitifa komesho oinima yopamhepo, Jehova ota ka fila oshisho eemhumbwe daye dopalutu. Eitavelo lomufiyekadi ola li le mu linyengifa a yambidide elongekido lelongelokalunga lashili. Sha faafana, nafye otu na elineekelo kutya ngeenge otwa kongo tete Ouhamba, Jehova ote ke tu pa keshe osho twa pumbwa. — Mat. 6:33.

18. Yandja oshihopaenenwa shomupiya waJehova wokunena oo a li e na etaleko la yuka.

18 Ovakriste vahapu kunena ohava ningi sha faafana mokukala ve lineekela Jehova nohava katuka eenghatu di li mondjila. Natu ka taleni koshihopaenenwa shomumwatate Malcolm, oo a kala omudiinini fiyo osheshi a fya mo 2015. Oule womido odo va kala tava longele Jehova nomukulukadi waye, ova kala hava piti meenghalo didjuu. Okwa ti: “Ihatu dulu okushiiva lela kutya oshike tashi ka ningwa po monghalamwenyo yetu molwaashi otai dulu okulunduluka noinatu shi teelela ile nokuli idjuupale. Ashike Jehova oha nangeke noupuna ovo have mu lineekele.” Malcolm okwa yandja omayele a ti: “Ilikana u kale ho longo noudiinini nou pondole moilonga yaJehova. Kala ho yandje elitulemo kwaasho to dulu okuninga ndele ha kwaasho ito dulu okuninga.” *

19. (a) Omolwashike omushangwa wetu womudo 2017 tau wapalele? (b) Ongahelipi to ka tula moilonga omushangwa womudo 2017 monghalamwenyo yoye?

19 Eshi onghalelo yoinima younyuni ou tai “ehena komesho mowii,” otu na okukala twe lilongekida okutaalela omaudjuu manene. (2 Tim. 3:1, 13) Osha fimana neenghono shi dulife nale okuninga eenghendabala opo tuha wililwe po komaupyakadi. Otwa pumbwa okukulika elineekelo la pama muJehova ngeenge hatu katuka eenghatu keshe. Omushangwa wetu womudo 2017 oo tau ti: ‘Lineekela Jehova, u longe ouwa,’ itau wapalele tuu! — Eps. 37:3.

Omushangwa wetu womudo 2017: “Lineekela Jehova, u longe ouwa”— Epsalme 37:3

^ okat. 18 Tala Oshungonangelo yo 15 Oktoba 2013, epandja 17-20.