Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Februali 2017

Olyelye ta wilike oshiwana shaKalunga kunena?

Olyelye ta wilike oshiwana shaKalunga kunena?

“Dimbulukweni ovakwatelikomesho veni.” — HEB. 13:7.

OMAIMBILO: 125, 43

1, 2. Konima eshi Jesus a londa a ya meulu, ovayapostoli otashi dulika va li tave lipula kombinga yashike?

POMHITO imwe, ovayapostoli vaJesus ova li komhunda yEemono, tava liamene keulu. Ova li va mona eshi Omwene wavo Jesus, kaume kavo, a yelulwa po nokuningina moilemo. (Oil. 1:9, 10) Oule womido mbali lwaapo fimbo osho inashi ningwa, Jesus okwa kala te va hongo, te va tu omukumo noku va wilika. Eshi a ya meulu, ova li tava ka ninga po shike?

2 Jesus okwa li a pa ovashikuli vaye oshilonga, eshi a ti: ‘[Otamu] ka ninga eendombwedi dange muJerusalem nomuJudea ashishe nomuSamaria nofiyo okominghulo dounyuni.’ (Oil. 1:8) Mbela ova li tava ka dula ngahelipi okuwanifa po oshilonga osho? Oshoshili kutya Jesus okwa li e va shilipaleka kutya ova li tava ka pewa omhepo iyapuki meni lefimbo lixupi. (Oil. 1:5) Ashike oilonga yokuudifa mounyuni aushe oya li ya pumbwa okuwilikwa nokuunganekwa nawa. Pefimbo lonale, Jehova okwa li ha longifa  ovakalelipo vaye ve wetike opo va wilike nokuunganeka oshiwana shaye. Onghee hano, ovayapostoli otashi dulika va li tave lipula kutya: ‘Mbela Jehova ota ka nangeka po omuwiliki mupe?’

3. (a) Konima eshi Jesus a londa a ya meulu, ovayapostoli vaye ovadiinini ova li va ninga etokolo la fimana lilipi? (b)  Oshike hatu ka kundafana moshitukulwa eshi?

3 Meni loivike ivali konima yaasho, ovahongwa vaJesus ova li va konakona Omishangwa, va ilikana va mone ewiliko laKalunga nova li va hoolola Matias a pingene po Judas Iskariot e li omuyapostoli omuti-12. (Oil. 1:15-26) Omolwashike ehoololo olo la li la fimana kuvo nokuJehova? Matias okwa li a wanifa po omhumbwe ya fimana yehangano. * Jesus ka li a hoolola ovayapostoli vaye ve mu waimine ashike ngahenya moukalele waye ndele ova dane onghandangala ya fimanenena moshiwana shaKalunga. Onghandangala oyo va li tava dana oyashike, nongahelipi Jehova a li e va kwafela okupitila muJesus va dule oku i wanifa po? Elongekido lilipi la faafana naalo loshiwana shaKalunga kunena? Nongahelipi hatu dulu ‘okudimbuluka ovo tave tu kwatele komesho,’ unene tuu oilyo ‘yomupiya omudiinini nomunaendunge’? — Heb. 13:7; Mat. 24:45.

OLUTUWILIKI OHALI WILIKWA KOMUWILIKI EHE WETIKE

4. Mefelemudo lotete ovayapostoli novakulunhuongalo ova li tava dana onghandangala ilipi muJerusalem?

4 MOpentekoste yomo 33 O.P., ovayapostoli ova li va hovela okuwilika eongalo lopaKriste. Pomhito imwe, ‘Petrus okwa li a fikama naava omulongo naumwe’ nova li va lombwela ongudu inene yOvajuda novanhu vomoiwana imwe oshili tai xupifa eemwenyo. (Oil. 2:14, 15) Vahapu vomuvo ova li va ninga ovaitaveli, nOvakriste ovo vape ova li va “diinina okukala melongo lovayapostoli.” (Oil. 2:42) Ovayapostoli ovo va li hava ungaunga noyuuyemo yeongalo. (Oil. 4:34, 35) Ova li hava file oshisho eemhumbwe dopamhepo doshiwana shaKalunga, eshi va ti: “Fye vene otwa hala okukala meilikano nomeyakulo leendjovo.” (Oil. 6:4) Nova li va nangeka po Ovakriste va pyokoka va ka udife evaengeli moitukulwa ipe. (Oil. 8:14, 15) Mokweendela ko kwefimbo, ovakulunhuongalo ovavaekwa ova li va waimina ovayapostoli va pashukile omaongalo. Olutuwiliki olo ola li hali yandje omalombwelo komaongalo. — Oil. 15:2.

5, 6. (a) Ongahelipi omhepo iyapuki ya li ya pameka olutuwiliki? (Tala efano pehovelo loshitukulwa.) (b) Ongahelipi Ovaengeli va li va kwafela olutuwiliki? (c) Ongahelipi Eendjovo daKalunga da li da wilika olutuwiliki?

5 Mefelemudo lotete Ovakriste ova li va didilika kutya olutuwiliki ola li tali wilikwa kuJehova okupitila mOmuwiliki wavo, Jesus. Ongahelipi va li tava dulu oku shi didilika mo? Shotete, omhepo iyapuki oya li ya pameka Olutuwiliki. (Joh. 16:13) Ovakriste ovavaekwa aveshe ova li va tililwa omhepo iyapuki, ashike oya li ya kwafela ovayapostoli novakulunhuongalo vomuJerusalem va wanife po oilonga yavo ve li ovapashukili. Pashihopaenenwa, mo 49 O.P., omhepo iyapuki oya li ya wilika olutuwiliki li ninge etokolo li na sha nepitotanda. Omaongalo okwa li a dulika komalombwelo avo ‘nokupamekwa meitavelo, nefiku keshe omuvalu wovakwaneongalo owa hapupala.’ (Oil. 16:4, 5) Onhumwafo oyo i na etokolo olo oya holola yo kutya Olutuwiliki ola kulika oiimati yomhepo yaKalunga mwa kwatelwa ohole neitavelo. — Oil. 15:11, 25-29; Gal. 5:22, 23.

6 Oshitivali, Olutuwiliki ola li la kwafelwa kovaengeli. Fimbo Kornelius ina ninginifwa e li  Omukriste wotete womoiwana imwe ina pita etanda, omwengeli okwa li e mu wilika a tume omuyapostoli Petrus. Konima eshi Petrus a udifila Kornelius novapambele vaye, ova li va tililwa omhepo iyapuki nonande ovalumenhu ovo kava li va pita etanda. Osho osha li sha twa omukumo ovayapostoli novamwatate vamwe va wanife po ehalo laKalunga nova tambule ko ovanhu vomoiwana imwe ovo inava pita etanda meongalo lopaKriste. (Oil. 11:13-18) Natango, ovaengeli ova li va xumifa komesho nokweendelelifa oilonga yokuudifa oyo ya li mepashukilo lolutuwiliki. (Oil. 5:19, 20) Oshititatu, olutuwiliki ola li tali wilikwa kEendjovo daKalunga. Ovakulunhuongalo ovavaekwa ova li hava wilikwa kOmishangwa ngeenge tava ungaunga nomahongo opakalunga ile tava yandje omalombwelo mehangano. — Oil. 1:20-22; 15:15-20.

7. Omolwashike hatu dulu okutya Jesus oye a li ta wilike Ovakriste vonale?

7 Nonande olutuwiliki olo la li tali kwatele komesho omaongalo opehovelo, ova li va dimina kutya Omuwiliki wavo oJesus. Omuyapostoli Paulus okwa shanga a ti: “Oye [Kristus] okwa yandja vamwe va ninge ovayapostoli tu kule moinima aishe muou a ninga omutwe, omuKristus.” (Ef. 4:11, 15) Ponhele yokukala tava ifanwa nedina lomuyapostoli wonhumba, “ovalongwa va ifanwa lwotete Ovakriste.” (Oil. 11:26) Oshoshili kutya Paulus okwa popya efimano ‘lokudiinina omalongo’ ile Omishangwa odo da li da pewa ovayapostoli novalumenhu vamwe ovo va li hava kwatele komesho. Okwa weda ko vali a ti: “Ndelenee onda hala nye mu shiive nokutya, Kristus Oye omutwe wakeshe omulumenhu [mwa kwatelwa oshilyo sholutuwiliki keshe] . . . nomutwe waKristus oKalunga.” (1 Kor. 11:2, 3) Kristus Jesus omutumbalekwa, nonande iha monika, oye ta wilike eongalo mewiliko laJehova Kalunga, oo e li Omutwe waye.

“EI KAI FI OILONGA YOVANHU”

8, 9. Omumwatate Russell okwa li a dana onghandangala ya fimana ilipi lwopexulilo lefelemudo eti-19?

8 Lwopexulilo lefelemudo eti-19, Charles Taze Russell novaendi pamwe naye ova li va kendabala okukaleka po elongelokalunga lashili. Opo va dule okutandavelifa etumwalaka lOmbiibeli momalaka e lili naku lili, o-Zion’s Watch Tower Tract Society oya li ya totwa po mo 1884, nomumwatate Russell oye a li omupresidende. * Okwa li ha konakona Ombiibeli noukeka noka li e na oumbada wokulombwela ovanhu kutya ehongo loukwatatu nomwenyo ihau fi oloipupulu. Okwa li a mona kutya Kristus ota ka aluka e li molupe ihali monika ‘nomafimbo ovapaani’ otaa ka xula mo 1914. (Luk. 21:24) Omumwatate Russell okwa li a longifa efimbo laye, eenghono noimaliwa yaye opo a udifile vamwe oshili. Osha yela kutya omumwatate Russell okwa li ta longifwa kuJehova naJesus, e li omutwe weongalo.

9 Omumwatate Russell ka li a konga efimano movanhu. Mo 1896, okwa li a shanga a ti: “Inatu hala okufimanekwa ile oishangomwa yetu i fimanekwe sha pitilila noinatu hala okwiifanwa Ovafimanekwa ile Oorabbi. Noinatu hala nande ovanhu va kale tava ifanwa nomadina etu.” Lwanima okwa ka popya a ti: “Ei kai fi oilonga yovanhu.”

10. (a) Onaini Jesus a nangeka po “omupiya omudiinini nomunaendunge”? (b) Hokolola nghee Olutuwiliki la enda tali yoololwa ko kehangano lo-Watch Tower Society.

10 Mo 1919, konima yomido nhatu eshi omumwatate Russell a fya, Jesus okwa li a nangeka po “omupiya omudiinini nomunaendunge.” Omolwashike? Opo a pe ovapiya vaye “oikulya pefimbo,” ile tu tye pefimbo la wapala. (Mat. 24:45) Pefimbo olo, opa li okangudu  kovamwatate ovavaekwa ovo va li hava longo keembelewa da kula moBrooklyn, shaNew York, ovo va li hava longekida nokwaandjakaneka eendja dopamhepo kovashikuli vaJesus. Outumbulilo “olutuwiliki” owa hovela okulongifwa moishangomwa yetu okudja mo 1940 nasha, nowa li hau longifwa unene tuu ngeenge taku popiwa ehangano lo-Watch Tower Bible and Tract Society. Ashike mo 1971, Olutuwiliki ola li la yoololwa ko kehangano lo-Watch Tower Society, olo hali ungaunga noinima yopaveta ndele hanoinima yopamhepo noli na ovawiliki valo. Okudja opo, Olutuwiliki ola kala la fikama po movamwatate ovavaekwa ovo vehe fi ovawiliki vo-Watch Tower Society. Omido opo da di ko, ovamwatate vamwe ovo ve li “eedi dimwe” ova kala ve li ovawiliki vehangano olo lopaveta nosho yo omahangano amwe opaveta oo haa longifwa koshiwana shaKalunga, naasho osha ningifa oilyo yOlutuwiliki i kale tai yandje elitulemo kokuyandja ewiliko nehongo lopamhepo. (Joh. 10:16, NW; Oil. 6:4) MOshungonangelo yo 15 Juli 2013 omu na oshitukulwa tashi yelifa kutya “omupiya omudiinini nomunaendunge” okangudu kanini kovamwatate ovavaekwa ovo tava longo ve li Olutuwiliki.

Olutuwiliki mo 1950 nasha

11. Olutuwiliki ohali longo ngahelipi?

11 Olutuwiliki ohali ningi omatokolo a fimana. Mbela ohave shi ningi ngahelipi? Oilyo yolutuwiliki ohai ongala oshivike keshe, naasho ohashi va kwafele va kale hava kundafana noupu nove na oukumwe. (Omayel. 20:18) Omudo keshe, ohava ningi omalufo okukala ovanashipundi pokwoongala kwavo, nomolwaasho kape na oshilyo shOlutuwiliki sha talika ko sha fimana shi dule ikwao. (1 Pet. 5:1) Oilyo yeekomitiye hamano dOlutuwiliki nayo ohai ningi omalufo okukala ovanashipundi. Noshilyo keshe ihashi litale ko shi li omuwiliki wavakwao, ndele onga “omupiya” ta pewa eendja nota wilikwa komupiya omudiinini.

Okudja mo 1919, eshi omupiya omudiinini a nangekwa po, okwa kala ta longekidile ovapiya vaKalunga oikulya yopamhepo (Tala okatendo 10, 11)

“OLYELYE HANO OMUPIYA OMUDIININI NOMUNAENDUNGE?”

12. Molwaashi Olutuwiliki inali nwefwa mo komhepo iyapuki noinava wanenena, epulo lilipi la holoka po?

12 Olutuwiliki inali nwefwa mo komhepo iyapuki yaKalunga noinava wanenena. Nomolwaasho ohava dulu okuninga omapuko ngeenge tashi uya pomahongo Ombiibeli ile eshi tava wilike ehangano. Mo-Watch Tower Publications Index omu na oshitukulwa osho sha tumbula omalunduluko e na sha neudeko letu lopamishangwa okudja mo 1870. Jesus ine tu lombwela kutya omupiya waye omudiinini ota ka longekida eendja dopamhepo nopehe na okuninga omapuko. Ongahelipi hatu dulu okunyamukula epulo laJesus olo tali ti: “Olyelye hano omupiya omudiinini nomunaendunge?” (Mat. 24:45) Oumbangi ulipi tau ulike kutya Olutuwiliki otali wanifa po oshinakuwanifwa osho? Natu ka kundafaneni oinima itatu oyo ya li tai wilike olutuwiliki lomefelemudo lotete.

13. Ongahelipi omhepo iyapuki ya li ya kwafela Olutuwiliki?

13 Omhepo iyapuki. Omhepo iyapuki oya li ya kwafela Olutuwiliki opo li ude ko oshili yOmbiibeli oyo ya li ihe uditiwe ko nale. Pashihopaenenwa, diladila kombinga yomusholondodo wouyelele mupe wopamishangwa oo wa tumbulwa mokatendo ka tetekela. Oshoshili kutya kape na omunhu a wana okupandulwa eshi a yelifa ‘oinima yomoule yaKalunga.’ (Lesha 1 Ovakorinto 2:10.) Olutuwiliki ola endulula eendjovo odo da li da shangwa komuyapostoli Paulus, tadi ti: ‘Oyo tuu ei hatu i tongo yo, haneendjovo tadi longwa kounongo wopanhu, ndelenee odo twe di longwa komhepo.’ (1 Kor. 2:13) Nonande opa kala pe na ovashunimonima nomilaulu dopamhepo oule womafelemido, omhepo iyapuki oya li ya kwafela ovamwatate ovo va ninge exumokomesho neendelelo meudeko lavo moinina yopamhepo okudja mo 1919.

14. PaHololo 14:6, 7, ongahelipi ovaengeli hava yambidida ovapiya vaKalunga kunena?

 14 Ekwafo lovaengeli. Kunena, Olutuwiliki oli na oshinakuwanifwa shinene shokupashukila oilonga yokuudifa mounyuni aushe mwa kwatelwa ovaudifi ve dulife pomamiliyona ahetatu. Omolwashike oilongo oyo ya kala tai xumu komesho? Nopehe na omalimbililo, ovaengeli navo otava kufa ombinga moilonga oyo. (Lesha Ehololo 14:6, 7.) Peemhito dihapu, ovaudifi ohava shakeneke oohandimwe ovo va kala tava ilikana opo va kwafelwe.  * Nonande ope na omapataneko moitukulwa imwe, oilonga yokuudifa nokuninga ovanhu ovahongwa oya tamunuka mo omolweenghono domhepo yaKalunga.

15. Eyooloko lilipi li li pokati kOlutuwiliki novakwatelikomesho vOukwakriste? Yandja oshihopaenenwa.

15 Ova li ve lineekela mEendjovo daKalunga. (Lesha Johannes 17:17.) Natu ka kundafaneni osho sha li sha ningwa mo 1973. MOshungonangelo yOshiingilisha ye 1 Juni 1973 omu na epulo kutya: “Ovanhu ovo inava efa po okushila omakaya mbela ova wana ngoo okuninginifwa?” Enyamukulo: “Omishangwa oda holola kutya inava wana okuninginifwa.” Konima eshi va tofa mo omishangwa donhumba mOmbiibeli, Oshungonangelo oya yelifa kutya omolwashike omunhu oo ha shili omakaya ine livela ombedi e na okukondwa mo  meongalo. (1 Kor. 5:7; 2 Kor. 7:1) Oya popya vali ya ti: “Osho itashi ti okwa ungaungwa naye nonyanya ile monghedi youkanyamukulwa. Onghatu oyo ya kwata moiti oye likolelela kwaasho Kalunga a popya okupitila mEendjovo daye.” Mbela ope na ngoo omalongelokalunga oo haa kala a halelela okushikula filufilu Eendjovo daKalunga, nokuli nonande okuninga ngaho oshi li eshongo koilyo yao? Embo limwe li na sha nomalongelokalunga lokoUnited States ola ti: “Ovawiliki vomalongelokalunga ova kala nokutalulula omahongo avo pandjikilile opo va faafanife eitavelo lavo nomadiladilo oo taa yambididwa koilyo yavo nokovanhu momudingonoko.” Ngeenge Olutuwiliki ola li la efa Eendjovo daKalunga di va wilike ponhele yoinima imwe, mbela olyelye naanaa ta wilike oshiwana shaKalunga kunena?

“DIMBULUKWENI OVAKWATELIKOMESHO”

16. Onghedi imwe ilipi hatu dulu okudimbuluka Olutuwiliki?

16 Lesha Ovaheberi 13:7. Outumbulilo “dimbulukweni” otau dulu yo okutolokwa “okutumbula.” Onghee hano, onghedi imwe omo hatu dulu ‘okudimbuluka ovo tava kwatele komesho’ omokukala hatu tumbula momailikano etu Olutuwiliki. (Ef. 6:18) Kala ho diladila kombinga yoshinakuwanifwa osho ve na shokulongekida oikulya yopamhepo, okupashukila oilonga yokuudifa mounyuni aushe nokuungaunga nomayambidido. Oshoshili kutya otwa pumbwa oku va ilikanena.

17, 18. (a) Ohatu longele kumwe ngahelipi nOlutuwiliki? (b) Oilonga yetu yokuudifa ohai yambidida ngahelipi omupiya omudiinini naJesus?

17 Okudimbuluka Olutuwiliki inashi kwatela mo ashike oku va pandula ndele osha kwatela mo yo okukala hatu dulika komalombwelo avo. Olutuwiliki ohali yandje ewiliko okupitila moishangomwa yetu, pokwoongala, nopoyoongalele. Shimwe vali, Olutuwiliki olo hali nangeke po ovapashukilishikandjo, ovo hava nangeke po ovakulunhuongalo. Ovapashukilishikandjo novakulunhuongalo ohava dimbuluka Olutuwiliki mokukala hava shikula ewiliko olo tava pewa. Atusheni ohatu fimaneke Omuwiliki wetu, Jesus, mokukala alushe hatu dulika kuye nokovalumenhu ovo ta longifa ve tu kwatele komesho. — Heb. 13:17.

18 Onghedi imwe vali omo hatu dimbuluka Olutuwiliki omokukala hatu kufa ombinga pauyadi moilonga yokuudifa. Paulus okwa li a londwela Ovakriste va hopaenene eitavelo laavo tava kwatele komesho mokati kavo. Omupiya omudiinini okwa ulika eitavelo la tongomana mokuxumifa komesho nokutandavelifa nouladi onghundana iwa yOuhamba. Mbela ou li umwe womeedi odo hadi yambidida Olutuwiliki moilonga oyo ya fimana? Oto ka kala wa hafa neenghono eshi Omuwiliki wetu, Jesus, ta ka tya: “Aishe ei mwe i ningila umwe waava ovamwatate vanini, Ame mwe i ningila.” — Mat. 25:34-40.

19. Omolwashike wa tokola toko okudulika kOmuwiliki wetu, Jesus?

19 Eshi Jesus a shuna meulu, ka li a ekelashi ovashikuli vaye. (Mat. 28:20) Okwa li e shii kutya omhepo iyapuki, ovaengeli nEendjovo daKalunga oda li de mu kwafela a wilike ovahongwa vaye eshi a li kombada yedu. Nokunena oha kwafele omupiya omudiinini ngaashi pefimbo lonale. Ovakriste ovavaekwa ‘ohava shikula Odjona keshe apa tai i.’ (Eh. 14:4) Eshi hatu shikula omalombwelo oo tave tu pe, kungaho ohatu dulika kOmuwiliki wetu, Jesus. Mafiku, ote ke tu pa omwenyo waalushe. (Eh. 7:14-17) Oshoshili kutya kape na omunhu ta dulu oku tu udanekela oshinima osho.

^ okat. 3 Osha yela kutya Jehova okwa li a hala okukala e na ovayapostoli 12 ovo tava ka kala monakwiiwa “omakanghameno omulongo naavali” muJerusalem shipe. (Eh. 21:14) Nomolwaasho kasha li sha pumbiwa okupingena po omuyapostoli omudiinini, oo lwanima a mana oweenda waye wokombada yedu.

^ okat. 8 Okudja mo 1955, ehangano olo ola li la shiivika nedina Watch Tower Bible and Tract Society of Pennsylvania.

^ okat. 14 Tala embo Yandja oundombwedi nawanawa’ kombinga yOuhamba waKalunga, epandja 58-59.