Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) FEBRUALI 2017

Omapulo a dja kovaleshi

Omapulo a dja kovaleshi

Omuyapostoli Paulus okwa ti kutya Jehova ‘ite tu efa tu yelekwe nomayeleko e dule eenghono detu.’ (1 Kor. 10:13) Mbela osho osha hala okutya Jehova oha tale komesho yefimbo kutya omayeleko elipi hatu dulu okulididimikila, ye ta hoolola kutya elipi ta ka efa tu pite muo?

Natu ka taleni ngeenge etaleko olo oli li ngoo pandunge. Omumwatate umwe, oo omonamati waye a li e lidipaa, okwa li a pula a ti: ‘Mbela Jehova okwa li a tala komesho yefimbo ngeenge ame nomukulukadi wange ohatu dulu okulididimikila efyo lomonamati wetu oo e lidipaa? Mbela okwa efa oshinima osho shi tu ningilwe molwaashi okwa li e shii kutya ohatu dulu oku shi lididimikila?’ Oshi li ngoo pandunge okudiladila kutya Jehova oha kala a nuna oiningwanima yonhumba yokondadalunde mokukalamwenyo kwetu?

Eshi twa konakona moule eendjovo daPaulus odo tadi hangwa mo 1 Ovakorinto 10:13, otwa fika pexulifodiladilo eli kutya: Kape na etomheno lopamishangwa lokwiitavela kutya Jehova oha tale komesho yefimbo kutya omayeleko elipi hatu dulu okulididimikila, ye ta hoolola kutya elipi ta ka efa tu pite muo. Natu ka taleni komatomheno ane kutya omolwashike hatu dulu okufika pexulifodiladilo olo.

Shotete, Jehova okwa pa ovanhu oshali yemanguluko lokuninga omatokolo. Okwe tu pa ehoololo tu hoolole onghedi yokukalamwenyo oyo twa hala. (Deut. 30:19, 20; Jos. 24:15) Ngeenge otwa hoolola ondjila ya yuka, ota ka wilika eenghatu detu. (Omayel. 16:9) Ashike ngeenge otwa hoolola ondjila ya puka, ohatu ka mona oilanduliko. (Gal. 6:7) Ngeno Jehova oku kale te tu hoololele omayeleko oo tu na okupita muo, kungaho otashi ka kala sha fa ine tu pa oshali yemanguluko lokuninga omatokolo.

Oshitivali, Jehova ihe tu amene koiningwanima oyo hai holoka po ‘efimbo nombadilila.’ (Omuud. 9:11, NW) Oiningwanima inyanyalifi noya nyika oushada ohai dulu okuholoka po molwaashi twa hangika tu li ponhele ya puka pefimbo la puka. Pashihopaenenwa, Jesus okwa li a popya shi na sha noshiningwanima osho sha li sha kwatela mo ovanhu 18 ovo va file eshi va wilwa koshungo, nokwa ulika kutya oinima ya tya ngaho ihai ningwa molwaashi kutya ehalo laKalunga. (Luk. 13:1-5) Onghee hano, kashi li pandunge okudiladila kutya Kalunga oha kala a nuna komesho yefimbo kutya olyelye ta ka xupa ile ta ka fya omolwoiningwanima oyo hai holoka po ombadilila.

Oshititatu, keshe umwe womufye okwa kwatelwa mo momhata yokukala omudiinini. Dimbuluka kutya Satana okwa li a shonga oudiinini wovapiya vaJehova, eshi a ti kutya itatu dulu okukala ovadiinini kuJehova ngeenge twa taalela omayeleko. (Job 1:9-11; 2:4; Eh. 12:10)  Ngeenge Jehova okwe tu kelele tuha taalela omayeleko onhumba molwaashi e wete kutya itatu dulu oku e lididimikila, mbela osho itashi ka weda ko komhata yaSatana eshi a ti kutya ohatu longele ashike Jehova omolwomahalo okuliholamwene?

Oshitine, Jehova ina pumbwa okushiiva keshe shimwe osho hashi tu ningilwa. Ediladilo olo kutya Kalunga oha hoolola komesho yefimbo omayeleko oo hatu ka kala twa taalela, otali yandje ediladilo kutya Jehova oku shii keshe shimwe kombinga yonakwiiwa yetu. Ashike etaleko la tya ngaho ka li li pamishangwa. Oshoshili kutya Kalunga ota dulu okushiiva onakwiiwa. (Jes. 46:10) Ashike Ombiibeli oya ulika kutya oha hoolola noukeka ngeenge tashi uya pokushiiva kombinga yoiningwanima yomonakwiiwa. (Gen. 18:20, 21; 22:12) Jehova oha longifa eenghono daye pandjele dokushiiva onakwiiwa nohe shi ningi nefimaneko omolwemanguluko letu lokuninga omatokolo. Osho osho tu na okukala twa teelela kuKalunga ketu oo a lenga emanguluko letu, naalushe ohe tu pe oiteelelwa yaye te shi ningi pandjele. — Deut. 32:4; 2 Kor. 3:17.

Mbela eendjovo daPaulus odo tadi ti: “Kalunga ite mu efa mu yelekwe nomayeleko e dule eenghono deni” oda hala naanaa okutya shike? Paulus okwa popya osho Jehova ha ningi pefimbo opo hatu yelekwa. * Eendjovo domuyapostoli otadi tu shilipaleke kutya nande otu lihange momayeleko mokukalamwenyo kwetu, Jehova ote ke tu kalela noshisho ngeenge otwe mu lineekela. (Eps. 55:22) Eendjovo daPaulus odo tadi hekeleke oda kanghamena koitwa ivali ya fimanenena.

Shotete, ohatu kala twa taalela omayeleko ‘opanhu.’ Omayeleko oo hatu shakeneke okwa faafana naao ovanhu aveshe hava shakeneke. Omayeleko a tya ngaho ohatu dulu oku e lididimikila ngeenge otwe lineekela muKalunga. (1 Pet. 5:8, 9) Mo 1 Ovakorinto 10:13, Paulus okwa li ta ulike komayeleko oo Ovaisrael va li va taalela eshi va li mombuwa. (1 Kor. 10:6-11) Omayeleko aeshe oo okwa li haa shakenekwa kovanhu aveshe, nOvaisrael ovadiinini ova li tava dulu oku e lididimikila. Paulus okwa li a popya lwoikando ine kutya “vamwe vomuvo” inava dulika. Shi nyikifa oluhodi, Ovaisrael vamwe ova li ve liyandja komahalo a puka molwaashi kava li ve lineekela muKalunga.

Oshitivali, “Kalunga omudiinini.” Ondjokonona otai ulike kutya onghedi omo Kalunga a kala ta ungaunga noshiwana shaye otai holola kutya oha ulike ohole i na oudiinini “kwaava ve mu hole ndele tava diininine oipango yaye.” (Deut. 7:9) Ondjokonona oyo oya ulika yo kutya Kalunga oha wanifa po alushe omaudaneko aye. (Jos. 23:14) Okutala kondjokonona yovapiya vaye ovadiinini ovo ve mu hole nohava dulika kuye otava dulu okukala nelineekelo kutya Jehova ota ka wanifa po omaudaneko aye avali: (1) Ita ka pitika nande va ye momayeleko fiyo oposhitwa opo itava dulu oku e lididimikila, (2) “ota longele yo omhito yokupita mo” muo.

Jehova ohe tu “hekeleke moudjuu wetu aushe”

Ongahelipi Jehova ha longele omhito yokupita momayeleko kwaavo ve mu lineekela? Oshoshili kutya ngeenge oshi li ehalo laye, ota dulu okukufa po eyeleko. Dimbuluka eendjovo daPaulus: Jehova “ota longele yo omhito yokupita mo, opo mu dule oku li humbata.” Meenghalo dihapu, “oha longele omhito yokupita mo” moku tu pa osho twa pumbwa opo tu dule okulididimikila omayeleko nomupondo. Natu ka kundafaneni eenghedi dimwe omo Jehova ta dulu oku tu longela omhito yokupita mo momayeleko:

  • Ohe tu “hekeleke moudjuu wetu aushe.” (2 Kor. 1:3, 4) Jehova ota dulu okulotifa omadiladilo etu, omitima detu nomaliudo etu okupitila mEendjovo daye, momhepo iyapuki nomoikulya oyo hatu pewa okupitila momupiya omudiinini. — Mat. 24:45; Joh. 14:16; Rom. 15:4.

  • Ohe tu wilike nomhepo iyapuki. (Joh. 14:26) Ngeenge tu li momayeleko, omhepo iyapuki otai dulu oku tu kwafela tu dimbuluke omahokololo opaMbiibeli nomafinamhango, opo nee ohatu ka katuka pandunge.

  • Ota dulu okulongifa ovaengeli ponhele yetu. — Heb. 1:14.

  • Ota dulu oku tu kwafela okupitila meendjovo nomoilonga yovaitaveli vakwetu oyo tai dulu okukala i li ‘ehekeleko’ kufye. — Kol. 4:11.

Ohatu dulu okufika pexulifodiladilo lilipi li na sha neityo leendjovo daPaulus odo di li mo 1 Ovakorinto 10:13? Jehova ihe tu hoololele omayeleko oo hatu kala twa taalela. Ashike ngeenge otwa taalela omayeleko monghalamwenyo yetu, ohatu dulu okukala noushili oo kutya: Ngeenge otwe lineekela filufilu muJehova, itaka efa nande tu yelekwe komayeleko e dule eenghono detu; ote ke tu kwafela alushe tu dule oku e lididimikila. Odo kadi fi tuu eendjovo tadi hekeleke!

^ okat. 9 Oshitya shOshigreka osho sha tolokwa “omayeleko” otaku dulu yo okutiwa kutya “omahongaulo.”