Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) FEBRUALI 2016

Lihonga kovapiya vaJehova ovadiinini

Lihonga kovapiya vaJehova ovadiinini

“Nashike shimwe Omwene ta pula kuove, nokutya u ninge eshi sha yuka nokuhola efilonghenda nokweenda nelininipiko pamwe naKalunga koye.” — MIKA 6:8.

OMAIMBILO: 6343

1, 2. Ongahelipi David a li a ulika kutya omudiinini kuKalunga? (Tala efano pehovelo loshitukulwa.)

SAUL novakwaita vaye 3 000 ova li tava kongo David mombuwa yaJuda ve mu dipae. Ndele fiku limwe oufiku, David novalumenhu ava a li navo ove ke lihanga ponhele yonhumba opo Saul novakwaita vaye va onga onhanda nova kofa. Opo nee David na Abisai ova li ve linyovaeka, tava pitilile ovakwaita va yuka apa pe na Saul. Abisai okwa li a nongofolela David ta ti: “Efe nge, ndi mu twe eonga laye, li shimbame medu ndi mu twe lumwe aluke, haluvali.” Ashike David ka li e mu pitika a dipae Saul. David okwa li a lombwela Abisai a ti: “Ino mu dipaa, osheshi olyelye a efiwa ina handukilwa, eshi a kuma omuvaekwa wOmwene”? David okwa ti vali: “Omwene na amene nge, ame ndi ha kume neke lange omuvaekwa wOmwene!” — 1 Samuel 26:8-12.

2 David okwa li e shii kutya oshike e na okuninga opo a kale omudiinini kuJehova. Okwa li e shii kutya oku na okufimaneka  Saul, noina diladila nokuli oku mu yahameka. Omolwashike mbela? Omolwaashi Saul okwa hoololwa kuKalunga a ninge ohamba yaIsrael. Ngaashi ashike pefimbo lonale, kunena Jehova okwa hala ovapiya vaye aveshe va kale ovadiinini kuye nova fimaneke ovo a pitika va kale ve na eenghonopangelo. — Lesha Mika 6:8.

3. Ongahelipi Abisai a li omudiinini kuDavid?

3 Abisai okwa li a fimaneka David molwaashi okwa li e shii kutya Kalunga okwe mu ninga ohamba. Ashike konima eshi David a ninga ohamba, okwa li a nyona sha kwata moiti. Okwa li a ya momilele nomukulukadi waUria ndele ta lombwele Joab a tule Uria komesho molwoodi a dipawe. (2 Samuel 11:2-4, 14, 15; 1 Omafimbo 2:16) Joab okwa li omumwaina waAbisai, onghee hano otashi dulika Abisai a li a uda kombinga yaasho David a ninga, ndele nande ongaho okwa li a twikila okufimaneka David. Shikwao vali, Abisai okwa li omukulunhu wetangakwaita, nokwa li ta dulu okulongifa eenghonopangelo daye e lininge ohamba, ndele osho ine shi ninga. Ponhele yaasho, okwa li a yakula David nokwa li e mu amena kovatondi vaye. — 2 Samuel 10:10; 20:6; 21:15-17.

4. (a) Ongahelipi David a kala oshihopaenenwa shiwa shokukala omudiinini kuKalunga? (b) Oihopaenenwa vali ilipi hatu ka kundafana?

4 David okwa kala omudiinini kuJehova okukalamwenyo kwaye akushe. Eshi a li omunyasha, okwa li a dipaa omutongolume Goliat, oo a li ta sheke Jehova noshiwana shaIsrael. (1 Samuel 17:23, 26, 48-51) Eshi David a li ohamba, omuprofeti waJehova naNatan okwa li e mu pukulula omolwokunyona kwaye. David okwa li a dimina enyono laye nokwa li e livela ombedi diva nopehe na okwoongaonga. (2 Samuel 12:1-5, 13) Lwanima eshi David a ninga omunamido, okwa li a yandja oinima i na ondilo opo i kwafele mokutunga otembeli yaJehova. (1 Omafimbo 29:1-5) Osha yela kutya, nonande David okwa li a nyona sha kwata moiti monghalamwenyo yaye, ina efa okukala omudiinini kuKalunga. (Epsalme 51:6, 12; 86:2) Moshitukulwa eshi ohatu ka kundafana oshihopaenenwa shaDavid nosho yo shavamwe ovo va li ko pefimbo laye, nokulihonga nghee hatu dulu okukala ovadiinini kuJehova shi dulife umwe e lili. Nohatu ka kundafana yo omaukwatya amwe vali oo tae tu kwafele tu ninge ngaho.

OTO KA KALA NGOO OMUDIININI KUJEHOVA?

5. Oshilihongomwa shilipi hatu lihongo kepuko laAbisai?

5 Eshi Abisai a li a hala okudipaa Saul, okwa li ta kendabala okukala omudiinini kuDavid. Ndele molwaashi David okwa li e shii kutya osha puka okuningila owii “omuvaekwa wOmwene,” ka li a efa Abisai a dipae ohamba Saul. (1 Samuel 26:8-11) Osho otashi tu hongo oshilihongomwa sha fimana, osho kutya: Ngeenge hatu tokola kutya okulyelye twa hala okukala ovadiinini, otu na okudiladila kutya omushangwa wOmbiibeli ulipi tau tu kwafele monghalo oyo.

Osha fimana okukala ovadiinini kuJehova shi dulife kuumwe e lili

6. Nonande oshi li paushitwe okukala ovadiinini koilyo yomaukwaneumbo etu nokookaume ketu, omolwashike tu na okulungama?

6 Oshi li paushitwe okukala omudiinini kuumwe oo tu hole, ngaashi kaume ketu ile oshilyo shoukwaneumbo wetu. Ndele molwaashi inatu wanenena, omaliudo etu otaa dulu oku tu pukifa. (Jeremia 17:9) Onghee hano, ngeenge umwe oo tu hole okwa ningi oshinima sha puka ndele ta fiye po oshili, otu  na okudimbuluka kutya osha fimana okukala ovadiinini kuJehova shi dulife kuumwe e lili. — Lesha Mateus 22:37.

7. Ongahelipi omumwameme umwe a kala omudiinini kuKalunga eshi a li monghalo idjuu?

7 Ngeenge umwe moukwaneumbo weni okwa kondwa mo meongalo, oto dulu okuulikila Jehova kutya ou li omudiinini kuYe. Pashihopaenenwa, Anne oo e na ina a kondwa mo meongalo, okwa li a dengelwa kuina oo te mu lombwele kutya okwa hala oku mu talela po. [1] (Tala eshangelo pexulilo loshitukulwa.) Ina yaAnne okwa li a lombwela Anne kutya okwa nyemata eshi oilyo youkwaneumbo waye inai hala vali okupopya naye. Osho osha li sha nyemateka Anne, ndele ta lombwele ina kutya ote ke mu nyamukula ta shange ombapila. Fimbo Anne ina shanga ombapila, okwa li a dilonga komafinamhango amwe Ombiibeli. (1 Ovakorinto 5:11; 2 Johannes 9-11) Opo nee mombapila oyo a shanga okwa li a yelifila ina nombili kutya oye a fiya po oukwaneumbo eshi a nyona nokwa anya okulivela ombedi. Anne okwa li a lombwela ina kutya ota ka kala ashike a hafa vali ngeenge okwa alukile kuJehova. — Jakob 4:8.

8. Omaukwatya elipi taa dulu oku tu kwafela tu kale ovadiinini kuJehova?

8 Ovapiya vaKalunga ovadiinini vopefimbo laDavid navo ova li ovalininipiki, ve na onghenda novaladi. Natu tale kutya ongahelipi omaukwatya oo taa dulu oku tu kwafela tu kale ovadiinini kuJehova.

NATU KALE OVALININIPIKI

9. Omolwashike Abner a li a hala okudipaa David?

9 Omona waSaul Jonatan nondjai yetangakwaita laIsrael, Abner, ova li va mona eshi David a eta omutwe waGoljat kohamba Saul. Jonatan okwa li a ninga kaume kaDavid nokwa ka kala omudiinini kuye. (1 Samuel 17:57–18:3) Ashike Abner ka li a fimaneka David. Shikwao vali, lwanima okwa ka yambidida nokuli Saul oo a li a hala okudipaa David. (1 Samuel 26:1-5; Epsalme 54:3) Jonatan naAbner aveshe ova li ve shi shii kutya Kalunga okwa li a hala David oye a ninge ohamba oyo tai shikula Saul. Ndele konima eshi Saul a fya, Abner ka li a yambidida David. Ponhele yokuyambidida David, Abner okwa li a hala okuninga omona waSaul Isboset ohamba. Nolwanima otashi dulika Abner ye mwene kwa li a hala okuninga ohamba, nomolwaasho kwa li a nangala nomwalikadi  wohamba Saul. (2 Samuel 2:8-10; 3:6-11) Omolwashike Jonatan naAbner va li ve na omataleko a yoolokafana e na sha naDavid? Omolwaashi Jonatan okwa li omudiinini kuJehova nokwa li omulininipiki, ashike Abner hasho a li ngaho.

10. Omolwashike Absalom a li ehe fi omudiinini kuKalunga?

10 Absalom omona wohamba David naye ka li omudiinini kuKalunga molwaashi ka li omulininipiki. Molwaashi okwa li a hala okuninga ohamba, okwa li e likongela “etemba neenghambe novalumenhu omilongo nhano ve mu pitile komesho.” (2 Samuel. 15:1) Okwa li yo a yula omitima dOvaisrael vahapu va kale ovadiinini kuye. Okwa li yo ta kendabala okudipaa xe nonande okwa li eshi shii nawa kutya Jehova oye a ninga David ohamba yaIsrael. — 2 Samuel 15:13, 14; 17:1-4.

11. Ongahelipi hatu dulu okumona ouwa momahokololo opaMbiibeli e na sha naAbner, Absalom naBaruk?

11 Ngeenge omunhu ke fi omulininipiki nokwe lihalela eenghonopangelo, ohashi kala shidjuu kuye okukala omudiinini kuKalunga. Oshoshili kutya otu hole Jehova, noinatu hala okukala tu lihole fye vene tu fe Abner naAbsalom. Onghee hano, otu na okukala twa lungama opo tuha kale twe lihalela oimaliwa ihapu ile oilonga oyo tashi dulika tai tu ningifa tu kale tu udite twa fimana. Osho otashi dulika shi ka kume ekwatafano letu naJehova. Pomhito imwe, hamushanga waJeremia wedina Baruk okwa li e lihalela oshinima osho ehe na, noka li vali a hafa eshi ta longele Jehova. Opo nee Jehova okwa pukulula Baruk a ti: “Tala, osho nde [shi] tunga ohandi shi ngumauna po naashi nda twika po ohandi shi duda mo. Ndele eshi otashi hange edu alishe. Ndele ove oto lihalele oinima inene? Ino i lihalela.” (Jeremia 45:4, 5) Baruk okwa li a pwilikina komayele aJehova. Nafye kunena otu na okukala hatu pwilikine kuJehova molwaashi mafiku ota ka hanauna po ounyuni ou wa nyonauka.

Ngeenge owa lombwele omumwatate a ka konge ekwafo diva kovakulunhuongalo, kungaho oto ulike kutya ou li omudiinini kuJehova

12. Yelifa kutya omolwashike itatu dulu okukala ovadiinini kuKalunga ngeenge otu lihole unene.

12 Omumwatate wedina Daniel wokuMexico okwa li e na okuninga etokolo la kwata moiti kutya okulyelye ta kala omudiinini. Okwa li a hala okuhombola omunhu oo iha longele Jehova. Daniel okwa ti: “Onda kala handi mu shangele nokuli nokonima eshi nda ninga omukokolindjila.” Ndele lwanima okwa ka didilika kutya okwa kala ashike ta ningi osho a hala omolwokulihola mwene. Ka li  omudiinini kuJehova nokwa li a pumbwa okukala omulininipiki. Opo nee okwa li a lombwela omukulunhuongalo umwe kombinga yokakadona oko. Daniel okwa ti: “Okwa kwafela nge ndi mone kutya, opo ndi kale omudiinini kuKalunga, ondi na okweefa po okuka shangela. Onda li nda ilikana lwoikando ihapu, nda kwena luhapu, ndele handi efa po okuka shangela. Opo nee diva konima yefimbo, oukalele owa li wa etela nge ehafo linene.” Paife Daniel ota longo e li omupashukilishikandjo noku na omukulukadi oo e hole Jehova.

OKUKALA OVADIININI KUKALUNGA OHAKU TU KWAFELE TU KALE OVANANGHENDA

Ngeenge owa didilike kutya kaume koye okwa nyona sha kwata moiti, mbela oto ke mu ladipika ngoo a ka konge ekwafo kovakulunhuongalo? (Tala okatendo 14)

13. Ongahelipi Natan a dula okukala omudiinini kuKalunga nosho yo kuDavid?

13 Ngeenge otwa kala ovadiinini kuJehova, ohatu dulu yo okukala ovadiinini kuvakwetu noku va kwafela monghedi ya denga mbada. Omuprofeti Natan okwa kala omudiinini kuJehova nosho yo kuDavid. Eshi David kwa li a kufa po omukainhu wovanhu nokudipaifa omushamane waye, Jehova okwa li a tuma omupiya waye Jonatan a pukulule David. Natan okwa li omuladi noha dulika kuJehova. Ashike okwa li e shi ninga nelungi nokwa popya naDavid monghedi yefimaneko. Okwa li a hala oku mu kwafela a ude ko kutya omanyono aye okwa kwata moiti. Okwa li e mu hokololela ehokololo lomulumenhu oshipuna oo a vaka po okadi komulumenhu umwe ohepele oko akeke a li e na. Eshi David edi uda, okwa handukila oshipuna omolwoilonga yasho ii oyo sha longa. Opo nee Natan okwa lombwela David ta ti: “Omulumenhu ou oove!” Opo nee David okwa didilika diva kutya okwa nyona kuJehova. — 2 Samuel 12:1-7, 13.

14. Ongahelipi to dulu okukala omudiinini kuJehova nosho yo kookaume nokovapambele voye?

14 Naave oto dulu okukala tete omudiinini kuJehova nosho yo kuvamwe mokuungaunga nawa navo. Pashihopaenenwa, natu tye nee ou na oumbangi wa yela kutya omumwatate wonhumba okwa nyona sha kwata moiti. Ndele otashi dulika wa hala okukala omudiinini kuye, unene tuu ngeenge omwa panga oukaume naye ile oku li oshilyo shoukwaneumbo weni. Ashike ou shi shii yo kutya osha fimanenena okukala omudiinini kuJehova. Nafye otu na okudulika kuJehova nokukala hatu ungaunga novamwatate nelungi ngaashi naanaa Natan a li a ninga. Lombwela omumwatate a ka konge ekwafo kovakulunhuongalo diva nokupopya navo diva ngaashi tashi dulika. Nongeenge ite shi ningi, va lombwela ove mwene. Ngeenge owa ningi ngaho, otashi ku kwafele u kale omudiinini kuJehova. Ashike owa kenukila yo omumwaxo molwaashi ovakulunhuongalo ota ve mu kwafele a kale vali e na ekwatafano liwa naJehova. Ovakulunhuongalo otave ke mu pukulula nombili noneyavelelo. — Lesha Leviticus 5:1; Ovagalati 6:1.

OTWA PUMBWA OULADI OPO TU KALE OVADIININI KUKALUNGA

15, 16. Omolwashike Husai a li a pumbwa ouladi opo a kale omudiinini kuKalunga?

15 Husai okwa li umwe womookaume kohamba David ovadiinini. Eshi ovanhu va li va hala  okuninga Absalom ohamba, Husai okwa li a pumbwa ouladi wokukala omudiinini kuDavid nosho yo kuKalunga. Okwa li eshi shii kutya Absalom okwe uya kuJerusalem novakwaita vaye, na David okwa ya onhapo. (2 Samuel 15:13; 16:15) Husai okwa li a ninga po shike? Mbela okwa li a hauluka David ndele ta yambidida Absalom? Ahowe. Nonande David okwa li a kulupa novanhu vahapu ova li va hala oku mu dipaa, Husai okwa kala omudiinini kuye molwaashi oku shi shii kutya Jehova okwa hoolola David a ninge ohamba. Onghee hano, Husai okwa li a ya komhunda yeemono a ka shakeneke David. — 2 Samuel 15:30, 32.

16 David okwa li a pula Husai a shune kuJerusalem nokuliningifa a fa kaume kaAbsalom opo a itavelife Absalom a pwilikine komayele aHusai ponhele yomayele aAhitofel. Husai okwa li a katuka nouladi nokwa tula omwenyo waye moshiponga opo a dulike kuDavid noku kale omudiinini kuJehova. David okwa li a ilikana opo Jehova a kwafele Husai, naasho osho naanaa sha ka ningwa po. Absalom okwa li a pwilikina komayele aHusai ponhele yomayele aAhitofel. — 2 Samuel 15:31; 17:14.

17. Omolwashike twa pumbwa ouladi opo tu kale ovadiinini?

17 Otwa pumbwa ouladi opo tu kale ovadiinini kuJehova nokudulika kuye ponhele yokulonga osho ovapambele vetu, ovanailonga pamwe nafye ile osho ovakwanepangelo va hala tu longe. Pashihopaenenwa, Taro wokuJapan okwa kala ha ningi keshe shimwe opo a hafife ovadali vaye. Okwa kala ha dulika kuvo nokwa kala omudiinini kuvo, hamolwaashi ashike e na oku shi ninga ndele ohe shi ningi molwaashi oku va hole. Ndele eshi a hovela okukonakona Ombiibeli nEendombwedi daJehova, ovadali vaye kava li ve shi hafela nandenande. Eshi osha li she mu nyemateka nokwa li shidjuu oku va lombwela kutya okwa tokola okuya kokwoongala. Taro okwa ti: “Okwa li va kelela nge oule womido ndihe va talele po vali molwaashi ova li va handuka. Onda li nda ilikana opo ndiha lundulule etokolo lange. Paife etaleko lavo ola lunduluka nohandi va talele po luhapu. — Lesha Omayeletumbulo 29:25.

18. Ouwa ulipi wa mona moshitukulwa eshi?

18 Nafye ngeenge otwa kala ovadiinini kuJehova, ohatu ka kala tu udite twa wanenwa ngaashi David, Jonatan, Natan naHusai. Inatu hala okukala twa fa Abner naAbsalom ovo vali vehe fi ovadiinini. Oshoshili kutya inatu wanenena nohatu ningi omapuko. Ashike natu ulikileni Jehova kutya okukala ovadiinini kuye osho oshinima sha fimanenena monghalamwenyo yetu.

^ [1] (okatendo 7) Omadina amwe hao ovanhu ovo lelalela.