Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Ovanyasha, “Longeni shili . . . mu xupifwe”

Ovanyasha, “Longeni shili . . . mu xupifwe”

“Ngaashi mwa kala hamu dulika alushe, . . . longeni shili nokutila nokukakama mu xupifwe.” — FIL. 2:12.

OMAIMBILO: 133, 135

1. Omolwashike eninginifo li li onghatu ya fimana? (Tala efano pehovelo loshitukulwa.)

OMUDO keshe ohapa ninginifwa ovakonakonimbiibeli omayovi. Vahapu vomuvo ovanyasha veedula omulongo nasha ile vanini . Otashi dulika va kulila moshili. Mbela ou li umwe womuvo? Ngeenge osho, owa wana okupandulwa. Eninginifo oli li oshiteelelwa shOvakriste, noli li onghatu ya fimana yoku ka mona exupifo. — Mat. 28:19, 20; 1 Pet. 3:21.

2. Omolwashike okuliyapulila Jehova kuhe na okutilika ile okuhenukwa?

2 Nonande eninginifo ohali pefa ovanhu omanangeko noupuna mahapu, ola kwatela mo yo oinakuwanifwa. Monghedi ilipi mbela? Efiku wa ninginifwa, owa nyamukula wa ti heeno kepulo kutya, “Pakanghameno lekuliloyambo laJesus Kristus, mbela owe livela ombedi omolwomatimba oye nowe liyapulila Jehova u longe ehalo laye?” Eninginifo loye otali ulike kutya owe liyapulila Jehova. Oli li eudaneko la kwata moiti olo wa udanekela Jehova kutya oto kala u mu hole nokulonga ehalo laye komesho yaaishe. Oli li shili eudaneko la kwata moiti. Mbela oto ke lipa oushima ngeenge owa ningi eudaneko olo? Hasho nandenande. Inashi puka nandenande okukala  meameno laJehova. Diladila kwaashi: Omunhu oo iha longele Jehova oku li koshi yepangelo laSatana. Ondiaboli kai na ko nasha nexupifo loye. Otai ka kala ya hafa ngeenge owe likanifile omwenyo waalushe opo u kale kombinga yayo mokwaanya ounamapangelo waJehova.

3. Omanangeko noupuna elipi ho mono ngeenge owe liyapulile Jehova?

3 Mepingafano nokulongela Satana, diladila komanangeko noupuna oo u na u li Omukriste e liyapulila Jehova nokwa ninginifwa. Molwaashi paife owe liyapulila Jehova, oto dulu okupopya nomukumo shi dulife nale to ti: “Omwene Oye e kwete nge, itandi tila sha. Ovanhu otava ningi nge shike?” (Eps. 118:6) Kape na oufembanghenda munene to dulu okukala u na u dulife okulongela Kalunga nokukala wa hokiwa kuye.

OSHINAKUWANIFWA SHOPAUMWENE

4, 5. (a) Omonghedi ilipi eliyapulo li li oshinakuwanifwa shopaumwene? (b) Omashongo elipi iha hange ashike ovanyasha?

4 U li Omukriste a ninginifwa, ekwatafano loye naJehova kali na sha novapambele, ndele oshinima shopaumwene. Paife oove mwene u na oshinakuwanifwa shexupifo loye, nokuli nonande ou li natango mefiloshisho lovadali voye. Omolwashike sha fimana okukala u shii oshinima osho? Omolwaashi ito dulu okukala u shii kutya omashongo elipi to ka shakeneke monakwiiwa. Pashihopaenenwa, ngeenge owa ninginifwa eshi wa li okaana, otashi dulika u ka kale u na omaliudo amwe nokushakeneka omafininiko eshi to piti mefimbo lokamukondapweyu. Okakadona komido 18 oka ti: “Luhapu okaana ihaka kala ke udite nai ngeenge ina ka lya oshikuki shedalo kofikola, molwaashi oke shii kutya ko oke li umwe womEendombwedi daJehova. Ashike konima yomido donhumba eshi omahalo okuya momilele tae ka dulu eenghono, oka pumbwa okukala ka tomhwa kutya okudulika keemhango daJehova ohashi kala alushe ehoololo la denga mbada.”

5 Ovanyasha havo aveke hava shakeneke omashongo mape. Nokuli naavo va ninginifwa va kula ohava shakeneke omayeleko mahapu oo taa yeleke eitavelo lavo. Omayeleko oo otaa dulu okukala e na sha nohombo, noukolele ile noilonga. Keshe umwe, kashi na nee mbudi kutya oku na omido ngapi, oha shakeneke eenghalo odo tadi pula a kale omudiinini kuJehova. — Jak. 1:12-14.

6. (a) Omonghedi ilipi eliyapulo loye kuJehova tali ti sha? (b) Oshike to lihongo mOvafilippi 4:11-13?

6 Opo u kale omudiinini monghalo keshe to shakeneke, ino dimbwa nande kutya eudaneko loye olo wa ningila Jehova otali ti sha. Osho osha hala okutya owa lombwela Omupangeli weshito alishe kutya oto twikile oku mu longela nokuli nonande ookaume koye ile ovadali voye ova efa po oku mu longela. (Eps. 27:10) Monghalo keshe, oto dulu okupula ekwafo kuJehova opo u kale metwokumwe neliyapulo loye. — Lesha Ovafilippi 4:11-13.

7. Osha hala okutya shike okulonga ‘nokutila nokukakama u xupifwe’?

7 Jehova okwa hala u kale kaume kaye. Ashike otashi pula eenghendabala opo u kaleke po oukaume oo noulongele exupifo loye. Ovafilippi 2:12 ova ti: “Longeni shili nokutila nokukakama mu xupifwe.” Eendjovo odo otadi ulike kutya owa pumbwa okumona nghee to dulu okukaleka po oukaume woye naJehova nokukala omudiinini kuye kashi na nee mbudi kutya oto shakeneke omashongo elipi. Ino kala we lineekela mwoove mwene. Nokuli novapiya vamwe vaJehova vonale navo ova li va ninga omapuko. Ndele eenghatu dilipi to dulu okukatuka opo u ka xupifwe?

EKONAKONOMBIIBELI OLA FIMANA

8. Ekonakonombiibeli lopaumwene ola kwatela mo shike, nomolwashike la fimana?

8 Oukaume naJehova owa kwatela mo eenghedi  mbali domakwatafano, ngaashi okupwilikina nokupopya. Ekonakonombiibeli lopaumwene oli li onghedi yotete omo hatu dulu okupwilikina kuJehova. Osho osha kwatela mo okumona eshiivo mokulesha nokudilonga kEendjovo daKalunga nosho yo koishangomwa ya kanghamena kOmbiibeli. Eshi to ningi ngaho, dimbuluka kutya ekonakonombiibeli kali fi onghedindjikilile. Ino lesha ashike to kopele wa fa to ka shanga ekonakono u pite. Ekonakonombiibeli tali ti sha ola fa naanaa u li molweendo omo to dulu okumona omaukwatya aJehova mape. Osho otashi ku kwafele u ehene popepi naKalunga, ndele naye ta ehene popepi naave. — Jak. 4:8.

Mbela oho popi naJehova shi fike peni? (Tala okatendo 8-11)

9. Oinima ilipi ye ku kwafela pekonakono loye lopaumwene?

9 Ehangano laJehova oli na oilongifo ihapu oyo tai dulu oku ku kwafela u kale ho ningi ekonakonombiibeli tali ti sha. Pashihopaenenwa, “oinyangadalwa yokukonakona Ombiibeli” oyo i li koshi yoshitukulwa “Ovanyasha” ko-jw.org otai dulu oku ku kwafela u lihonge eenghedi dimwe tadi longo di na sha noiningwanima yomOmbiibeli. Natango ko-jw.org, oku na oshitukulwa “Ombiibeli otai hongo lela shike?” osho tashi dulu oku ku kwafela u kale wa tomhwa kwaasho wa itavela. Oitukulwa oyo otai dulu oku ku kwafela u lihonge nghee to dulu okuyelifila vamwe eitavelo loye. Eenghedi dimwe dokukonakona otadi hangwa moshitukulwa “Young People Ask . . . How Can I Make Bible Reading Enjoyable?” mo-Awake! yaAprili 2009. Okukonakona nokudilonga ohaku dana onghandangala ya fimana i na sha nokulilongela exupifo. — Lesha Epsalme 119:105.

EILIKANO OLA FIMANA

10. Omolwashike eilikano li li oshinima sha fimana kOmukriste a ninginifwa?

10 Ekonakono lopaumwene oli li onghedi imwe omo hatu pwilikine kuJehova, ofimbo eilikano li li onghedi omo hatu popi naye. Omukriste ina pumbwa okutala ko eilikano li li oshinima shongaho, ile tali dulu ‘oku mu pefa elao’ a pondole moshinima shonhumba. Ponhele yaasho, eilikano oli li shili onghedi yokupopya nOmushiti wetu. Jehova okwa hala okuuda kufye. (Lesha Ovafilippi 4:6.) Ngeenge otu na oshisho shasha, ohatu dulu okushikula omayele mawa Ombiibeli oo ta ti kutya, “omutengi woye u undulila kOmwene.” (Eps. 55:22) Mbela osho owe shi itavela ngoo shili? Ope na ovamwatate novamwameme omamiliyona ovo tava dulu oku  ku lombwela kutya osho oshe va kwafela. Naave otashi dulu yo oku ku kwafela.

11. Omolwashike u na alushe okupandula Jehova?

11 Eilikano ohali kupe omhito yokuninga shihapu shihe fi ashike okupula Jehova e ku kwafele. Ombiibeli oya ti: “Kaleni mu shii okupandula.” (Kol. 3:15) Omafimbo amwe ohatu dulu okukala twa wililwa po komaupyakadi etu, ndele hatu dimbwa omanangeko noupuna mahapu oo tu na. Omolwashike ito ningi etokolo kutya efiku keshe oto kala ho diladila koinima itatu oyo wa pandula. Opo nee pandula Jehova okupitila meilikano omolwomanangeko noupuna oo. Okakadona komido 18 kedina Abigail, oko ka ninginifwa eshi ka li ke na omido 12, oka ti: “Ondi udite kutya Jehova okwa wana okupandulwa e dulife omunhu keshe meshito. Otu na oku mu pandula pomhito keshe omolwoshali keshe e tu pa. Onda li nda dimbuluka oshinima shimwe osho nda udile kutya: Ngeenge nena otwa penduka tu na ashike momadiladilo oinima oyo twa pandula Jehova onghela, mbela ohatu ka ulika ngahelipi olupandu letu mefiku la shikula ko?” *

EFIMANO LOIMONIWA YOPAUMWENE

12, 13. Omolwashike sha fimana okudiladila kunghee wa makela ouwa waJehova pauhandimwe?

12 Ohamba David yopefimbo lonale, oyo ya li ya pita momayeleko mahapu a kwata moiti, oya li ya imba ya ti: “Makeleni, nye mu tale ouwa wOmwene apa u fike; keshe tuu ou te mu lineekele, oye e nelao.” (Eps. 34:8) Ovelishe oyo oya divilika efimano loshimoniwa shopaumwene. Ngeenge to lesha Ombiibeli ile oileshomwa yetu nongeenge oho kala pokwoongala kwopaKriste, oho udu oimoniwa tai tu omukumo i na sha nanghee Kalunga a kwafela vamwe va kale ovadiinini. Ashike eshi to ningi exumokomesho lopamhepo, owa pumbwa okumona nghee Jehova e ku kwafela monghalamwenyo yoye. Ongahelipi wa makela ouwa waJehova pauhandimwe?

13 Ope na onghedi imwe omo Ovakriste aveshe va makela ouwa waJehova, eshi va shivwa va ehene popepi naye nosho yo nOmona waye. Jesus okwa ti: “Kape na ou ta dulu okuuya kwaame okuninga Tate, ou a tuma nge, te mu shili.” (Joh. 6:44) Mbela ou wete eendjovo odo tadi longo kwoove? Otashi dulika omunyasha a tomhafane kutya, ‘Jehova okwa nana ovadali vange, ame onda shikula mo ashike.’ Ashike eshi we liyapulila Jehova nowa ninginifwa, owa ulika kutya owa mona oufembanghenda wokukala u na ekwatafano naye. Paife oku ku shii nawanawa. Ombiibeli oye tu shilipaleka ya ti: “Ou e hole Kalunga, oye a shiivika kuye.” (1 Kor. 8:3) Kendabala alushe okukala wa lenga nokupandula ondodo yoye oyo u na mehangano laJehova.

14, 15. Ongahelipi oukalele tau dulu oku ku kwafela u pameke eitavelo loye?

14 Onghedi imwe vali to dulu okumakela ouwa waJehova omo ku mona nghee te ku yambidida eshi to lombwele vamwe kombinga yeitavelo loye. Oto dulu okuninga ngaho mokuyandja oundombwedi moukalele nosho yo kofikola. Vamwe ohava mono shidjuu okuudifila oomakula vavo kofikola. Otashi dulika u shii kutya omolwashike. Ku shii kutya otave ke linyenga ngahelipi. Otashi dulika shi kale eshongo unene ngeenge to popi nongudu inene shi dulife ngeenge to popi koumwe noumwe mongudu yeni. Oshike tashi dulu oku ku kwafela?

15 Tete, diladila kutya omolwashike wa tomhwa kwaasho wa itavela. Mbela oitukulwa oyo i li ko-jw.org oi li melaka loye? Ngeenge ku na oushili, oto dulu okukonga efimbo u tale ko. Oya nuninwa i ku kwafele u mone kutya owa itavela  shike, omolwashike we shi itavela nosho yo nghee to dulu okuyelifila vamwe osho wa itavela. Ngeenge eitavelo loye ola pama nowe lilongekida nawa, oto ka kala wa halelela okuyandja oundombwedi kombinga yedina laJehova. — Jer. 20:8, 9.

16. Oshike tashi dulu oku ku kwafela uha ongaonge okupopya shi na sha neitavelo loye?

16 Otashi dulika u ongaonge okupopya shi na sha neitavelo loye nonande owe lilongekida. Omumwameme womido 18, oo a ninginifwa eshi a li e na omido 13, okwa ti: “Ondi shii kutya onda itavela shike, ashike omafimbo amwe ohandi mono shidjuu okupopya kombinga yeitavelo lange.” Okwa ungaunga ngahelipi noupyakadi oo? Okwa ti: “Ohandi kendabala okukala ndihe na oumbada. Ovanafikola vakwetu ohava popi ashike va manguluka kombinga yoinima oyo hava ningi. Naame ondi na okukala nda manguluka ndi ninge sha faafana. Onda li handi popi oshinima osho nda ninga nale, ngaashi, ‘Efiku limwe onda li handi hongo Ombiibeli, ndele . . . ’ Opo nee ohandi twikile noshitwa osho nda hala okupopya. Nonande pehovelo oshitwa kasha li shi na sha nOmbiibeli, vahapu ohava kala va hala okuuda kutya ohandi ningi shike ngeenge handi hongo Ombiibeli. Omafimbo amwe ohava pula omapulo. Apa ngoo pe fike handi longifa onghedi oyo, osho ngoo tashi ningi shipu kwaame. Mokweendelako kwefimbo onda ka kala ndi udite nawa.”

17. Ongahelipi onghedi omo wa tala ko eitavelo loye tai dulu oku ku kwafela u popye navamwe?

17 Ovanhu otava ka pwilikina kwaasho to popi ngeenge ou na ohokwe muvo nowe va fimaneka. Olivia, oo e na omido 17, nokwa ninginifwa eshi a li okaana, okwa ti: “Onda kala alushe nda tila kutya ngeenge meenghundafana onda popi mo sha shi na sha nOmbiibeli, ovanhu otava ka tala nge ko ndihe li nawa.” Lwanima okwa ka kala e na etaleko la yooloka ko. Ponhele yokukala a tila, Olivia okwa ti: “Ovanyasha vahapu kave shii sha kombinga yEendombwedi daJehova. Ofye ashike ve shii tu li Eendombwedi. Onghee hano, onghedi omo hatu katuka oyo ashike tai ka ulika nghee tave ke linyenga. Ongahelipi ngeenge ohatu kala tu na oumbada ile hatu mono shidjuu okupopya kombinga yeitavelo letu, ile ongahelipi ngeenge ohatu kala hatu kakama eshi hatu popi? Otashi dulika ve tu tale ko twa fa tuhe shii osho hatu ningi. Otashi dulika nokuli vaha pwilikine kufye molwaashi ka tu na omukumo. Ashike ngeenge otwa popi nomukumo notu na elineekelo kombinga yaasho twa itavela, hatu shi ningi oshitukulwa sheenghundafana detu, otashi dulika ve ke tu fimaneke.”

LONGENI SHILI MU XUPIFWE

18. Oshike sha kwatelwa mo mokulilongela exupifo?

18 Ngaashi twe shi mona, okulilongela exupifo oshinakuwanifwa sha kwata moiti. Oinima imwe oyo ya kwatelwa mo ongaashi okulesha Eendjovo daKalunga nokudilonga kombinga yado, okwiilikana kuJehova nokudiladila kunghee Jehova e ku nangeka noupuna pauhandimwe. Okutula moilonga oinima oyo otashi ka pameka elineekelo loye lokukala kaume kaJehova. Naasho otashi ke ku linyengifa u popye kombinga yeitavelo loye. — Lesha Epsalme 73:28.

19. Omolwashike eenghendabala odo ho ningi opo u lilongele exupifo tadi ti sha?

19 Jesus okwa ti: “Ngeenge ku na ou a hala okushikula nge, oye ne lixupule ye mwene, ne litwike [omuti waye womahepeko], ye na shikule nge.” (Mat. 16:24) Okuninga omuhongwa mwa kwatelwa okuliyapulila Jehova nokuninginifwa, oku li oshinakuwanifwa shoye u li Omukriste. Naasho otashi kupe fa omanangeko noupuna mahapu paife nosho yo omwenyo waalushe mounyuni mupe waKalunga. Ou na omatomheno paife okulilongela exupifo.

^ okat. 11 Opo u mone ouyelele muhapu, tala oshitukulwa “Young People Ask—Why Should I Pray?” nosho yo omapulo asho ko-jw.org.