Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) DESEMBA 2016

Jehova oha yandje ondjabi kwaava tave mu kongo

Jehova oha yandje ondjabi kwaava tave mu kongo

“Osheshi ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi.” — HEB. 11:6.

OMAIMBILO: 85, 134

1, 2. (a) Ohole oya pambafana ngahelipi neitavelo? (b) Omapulo elipi hatu ka kundafana?

OTU hole Jehova “osheshi Oye a kala e tu hole tete.” (1 Joh. 4:19) Opo a ulike ohole yaye yomoule, okwa hoolola okunangeka noupuna ovapiya vaye ovadiinini. Ngeenge otwa kala tu hole Jehova, eitavelo letu ota li ka kala la pama, noitatu ka kala ashike twa itavela kutya oko e li ndele ohatu ka kala yo tu shii kutya iha dopa okuyandja ondjabi kovapiya vaye. — Lesha Ovaheberi 11:6.

2 Okuyandja ondjabi oshi li oshitukulwa shomaukwatya aJehova. Ngeenge inatu tomhwa kutya Jehova ota ka yandja ondjabi kwaava have mu kongo katu na eitavelo, molwaashi “eitavelo olo elineekelo la pama okulineekela osho tashi teelelwa.” (Heb. 11:1) Eitavelo ola kwatela mo okukala twa teelela omanangeko noupuna oo Kalunga e tu udanekela. Mbela ongahelipi hatu dulu okumona ouwa mokukala tu na eteelelo londjabi? Ongahelipi Jehova a li a yandja ondjabi kovapiya vaye vopefimbo lonale nokunena? Natu ka kundafaneni omapulo oo.

JEHOVA OKWA UDANEKA OKUNANGEKA NOUPUNA OVAPIYA VAYE

3. Eudaneko lilipi hatu hange muMalakia 3:10?

3 Jehova oku na oshinakuwanifwa shokuyandja ondjabi kovapiya  vaye ovadiinini, nomolwaasho ote tu shivi tu lalakanene omanangeko noupuna aye. Ombiibeli otai ti: “‘Yelekeni nge nye mu tale,’ Omwene womatanga ovakwaita ta ti, ‘ngeenge ihandi ke mu yeululila omakende keulu ndele handi ke mu lokifila enangeko noupuna la wanenena.’” (Mal. 3:10) Ohatu ulike olupandu letu lomoule eshi hatu tambula ko osho Jehova e tu pa nehalo liwa.

4. Omolwashike hatu dulu okukala twe lineekela eudaneko laJesus olo li li muMateus 6:33?

4 Jesus okwa li a shilipaleka ovahongwa vaye kutya ngeenge ova kala va pitifa komesho Ouhamba, Kalunga ote ke va yambidida. (Lesha Mateus 6:33.) Eudaneko laJesus ola li le likolelela kondjokonona yaJehova yokukala omulineekelwa filufilu. Jesus okwa li eshi kutya omaudaneko aJehova ihaa ponyo nandenande. (Jes. 55:11) Sha faafana, nafye ohatu dulu okukala noushili kutya ngeenge otwa kulike eitavelo letu muJehova ote ke tu wanifila eudaneko laye olo tali ti; “Ame ihandi ku efa noitandi ku fii po nande.” (Heb. 13:5) Ohatu dulu okukwatakanifa eendjovo odo da nwefwa mo naasho Jesus a li a popya kombinga yokukonga tete Ouhamba waKalunga nouyuki waye.

Jesus okwa li a ulika kutya ovahongwa vaye otava ka pewa ondjabi omolwomaliyambo avo (Tala okatendo 5)

5. Omolwashike enyamukulo laJesus kuPetrus tali pameke eitavelo?

5 Pomhito imwe omuyapostoli Petrus okwa li a pula Jesus a ti: “Fye otwa fiya ko oinima aishe, notwe ku shikula; ohatu mono shike?” (Mat. 19:27) Ponhele yokuhanyena Petrus eshi e mu pula epulo olo, Jesus okwa li a lombwela ovahongwa vaye kutya otava ka pewa ondjabi omolwomaliyambo avo. Ovayapostoli ovadiinini nosho yo vamwe otava ka pangela pamwe naye meulu. Ashike ope na natango ondjabi. Jesus okwa ti: “Keshe ou a fiya ko omolwedina lange omaumbo ile ovamwaxe ovalumenhu ile ovamwaina ovakainhu  ile xe ile ina ile ovana ile omapya, oye te ke i mona ko ihapu i dule ei, nomwenyo waalushe ote u fyuulula.” (Mat. 19:29) Ovahongwa vaye ova li tava ka mona omanangeko noupuna mahapu e dule nokuli omaliyambo oo kwa li tashi dulika va ninga. Mbela ooxe, ooina, ovamwaxo ovalumenhu, ovamwanyoko ovakainhu novana vopamhepo inava fimana ve dule oinima aishe oyo mwa fiya po omolwOuhamba?

“EKANGHAMIFO LOMWENYO”

6. Omolwashike Jehova a udanekela ovapiya vaye ondjabi?

6 Ondjabi oyo Jehova a udanekela ovalongeli vaye, ohai va kwafele ve lididimike eshi oudiinini wavo tau yelekwa. Kakele kokukala tava hafele omanangekonoupuna opamhepo paife, ovapiya vaJehova Kalunga ovadiinini ova teelela nodjuulufi omanangeko noupuna omonakwiiwa. (1 Tim. 4:8) Onghee hano, okukala twa tomhwa kutya Jehova oha pe ‘ondjabi ovo tave mu kongo,’ otashi ke tu kwafela tu kale twa pama meitavelo. — Heb. 11:6.

7. Ongahelipi eteelelo hali dulu okukala lafa ekanghamifo?

7 Jesus okwa popya mEudifo lokOmhunda a ti: “Hafeni nye mu nyakukwe pombada, osheshi ondjabi yeni oinene meulu; osho ngaha va li va taata ovaprofeti, ve mu tetekela.” (Mat. 5:12) Kakele kwaavo tava ka pewa ondjabi meulu, eteelelo lomwenyo waalushe moparadisa kombada yedu oli li etomheno lokukala tu na ‘ehafo linene.’ (Eps. 37:11; Luk. 18:30) Kashi na nee mbudi kutya ohatu ka kala kombada yedu ile omeulu eteelelo letu otali dulu okukala “ekanghamifo lomwenyo la pama nola kwatelela.” (Heb. 6:17-20) Ngaashi ashike ekanghamifo hali kaleke oshikepa i na omakanghameno pefimbo loshikungulu, eteelelo letu londjabi nalo otali dulu oku tu kwafela tu kaleke omadiladilo, omaliudo noupamhepo wetu u na omakanghameno, naasho otashi dulu oku tu kwafela tu lididimikile omaupyakadi.

8. Ongahelipi eteelelo tali dulu okuxwepopaleka oisho yetu?

8 Eteelelo letu olo la kanghamena kOmbiibeli ohali xwepopaleke oisho yetu yonghalamwenyo. Omaudaneko aKalunga okwa fa omaadi opamhepo oo haa pepaleke omitima detu ngeenge tu na oisho. Itashi tu hekeleke tuu eshi hatu ‘undulile omitengi detu kuJehova’ nokukala tu shii kutya ‘ote tu kalele noshisho!’ (Eps. 55:23) Ohatu dulu okukala nelineekelo la kola kutya Kalunga ota “dulu okulonga shihapuhapu kombada yaai hatu i indile nohatu i diladila.” (Ef. 3:20) Didilika kutya inaku tiwa shihapu ndele okwa ti “shihapuhapu”!

9. Ongahelipi hatu dulu okukala noushili kutya Jehova ote ke tu nangeka noupuna?

9 Opo tu ka pewe ondjabi, otwa pumbwa okukala tu na eitavelo la kola muJehova nokukala hatu dulika kewiliko laye. Moses okwa li a lombwela oshiwana shaIsrael a ti: “Omwene ote ke ku nangeka noupuna unene medu olo Omwene Kalunga koye ote ke li ku pa efyuululo u li nangale; ngeenge ho pwilikine shili ondaka yOmwene Kalunga koye u diinine shili oipango aishe ei ame ohandi ku lombwele nena eli. Osheshi Omwene Kalunga koye ote ku nangeke noupuna ngaashi e ku udanekela.” (Deut. 15:4-6) Mbela ou na ngoo elineekelo filufilu kutya Jehova ote ke ku nangeka noupuna ngeenge owa twikile oku mu longela noudiinini? Nopehe na omalimbililo, Jehova ote ke ku nangeka noupuna shili.

JEHOVA OKWA LI E VA PA ONDJABI

10, 11. Ongahelipi Jehova a li apa Josef ondjabi?

10 Ombiibeli oya shangwa omolwouwa wetu. Oi na oihopaenenwa ihapu yanghee Kalunga a li a yandja ondjabi kovapiya vaye ovadiinini. (Rom. 15:4) Josef okwa li oshihopaenenwa sha denga mbada. Omolwomhangela yomeholeko oyo ya li ya ningwa kovamwaina nosho yo okukengelelwa  komukainhu womwene waye, okwe ke lihanga e li modolongo muEgipti. Mbela Kalunga okwa li a efa po Josef? Ahowe. “Omwene okwa li naJosef nokwe mu monifila ouwanghenda . . . Omwene okwa li pamwe naye. Ndele keshe eshi sha longwa kuye Omwene okwe shi nangeka noupuna.” (Gen. 39:21-23) Nonande Josef okwa li e li momayeleko, okwa li a teelela Jehova nelididimiko.

11 Konima yomido donhumba, Farao okwa li a mangulula Josef modolongo ndele te mu ningi omupangeli omutivali muEgipti. (Gen. 41:1, 37-43) Konima eshi omukulukadi waye e mu dalela ovanamati vavali, “Josef okwa luka oshiveli Manasse, osheshi ye okwa tile: ‘Kalunga okwa dimbwifa nge oluhepo lange alishe nosho yo eumbo alishe latate. Nondenge okwe i luka Efraim, osheshi oye okwa tile: ‘Kalunga okwa pange oludalo moshilongo shoudjuu wange.’” (Gen. 41:51, 52) Molwaashi Josef okwa kala omudiinini kuKalunga, okwa li a pewa ondjabi nomanangeko noupuna oo kwa li a ningifa Ovaisrael novaEgipti va xupifwe. Josef okwa li a mona kutya Jehova okwe mu pa ondjabi nokwe mu nangeka noupuna. — Gen. 45:5-9.

12. Ongahelipi Jesus a li a dula okukala omudiinini nonande okwa li ta yelekwa?

12 Jesus Kristus naye okwa kala ha dulika kuJehova nonande eitavelo laye okwa li tali yelekwa, naJehova okwa li e mu pa ondjabi. Oshike sha li she mu kwafela? Eendjovo daKalunga oda ti: “Ou kwa li a hepekelwa [komuti womahepeko] omolwehafo e li tulikilwa, nokwa li e he na ko na sha nomasheko.” (Heb. 12:2) Jesus okwa li a mona ehafo eshi a yapulifa edina laKalunga. Natango, okwa li a hokiwa kuXe nokwa li e mu pa ondjabi nosho yo omaufembanghenda mahapu. Ombiibeli oya popya kutya Jesus okwa “kala omutumba kolulyo lolukalwapangelo laKalunga.” Natango oya popya kutya “Kalunga okwe mu lenga nokwe mu luka edina li li kombada yomadina aeshe.” — Fil. 2:9.

JEHOVA IHA DIMBWA OILONGA YETU

13, 14. Jehova oha kala e udite ngahelipi eshi hatu mu longele?

13 Ohatu dulu okukala noushili kutya Jehova oha pandula eenghendabala keshe odo hatu ningi opo tu mu longele. Oku shii oupyakadi ile omalipulo keshe oo hatu kala tu na. Oha kala e tu uditile olukeno ngeenge twa wililwa po koupyakadi wopashimaliwa, woukolele ile wopamaliudo naasho ohashi shunifa pedu oilonga iyapuki oyo hatu mu longele. Ohatu dulu okukala nelineekelo la kola molukeno laJehova olo ha ulikile ovapiya vaye ovadiinini. — Lesha Ovaheberi 6:10, 11.

14 Kaleka yo omadiladilo kutya, ohatu dulu okupopya ‘nOmuudi womailikano’ tu na elineekelo kutya ota ka pwilikina komailikano etu. (Eps. 65:3) “Xe yefilonghenda naKalunga kehekeleko alishe” ote ke tu yambidida pamhepo nosho yo pamaliudo okupitila movaitaveli vakwetu. (2 Kor. 1:3) Jehova oha kala a hafa ngeenge tu uditile vamwe olukeno. “Ou ta filonghenda eehepele, ota tulike kOmwene. Ndele Ye ote ke mu alulila oshilonga shaye shiwa.” (Omayel. 19:17; Mat. 6:3, 4) Onghee hano, ngeenge hatu kwafele ovo ve na omhumbwe nopehe na okuliholamwene, Jehova oha tale ko oilonga yetu iwa onga e na eengunga kufye. Nokwa udaneka kutya ote ke tu pa ondjabi.

ONDJABI PAIFE NOFIYO ALUSHE

15. Ondjabi ilipi wa teelela nodjuulufi? (Tala efano pehovelo loshitukulwa.)

15 Ovakriste ovavaekwa ove na etimaumbwile lokuka pewa ‘oshishani shouyuki, tave ke shi pewa mefiku linya kOmwene, omutokoli omuyuki.’ (2 Tim. 4:7, 8) Keshe umwe ota ka tambula ko nehalo liwa eteelelo olo Jehova e  mu pa. ‘Eedi dimwe’ omamiliyona oda teelela nodjuulufi ondjabi yomwenyo waalushe moparadisa kombada yedu omo ‘tava ka hafela ombili inene.’ — Joh. 10:16; Eps. 37:11.

16. Ehekeleko lilipi hatu hange mu 1 Johannes 3:19, 20?

16 Omafimbo amwe otashi dulika tu kale tu udite kutya ihatu longo shihapu, ile twa limbililwa ngeenge Jehova okwa hafela ngoo eenghendabala detu. Otashi dulika nokuli tu ka limbililwe ngeenge otwa wana ngoo okupewa ondjabi yonhumba. Inatu dimbwa nande kutya, “Kalunga Oye e dule omutima wetu, noinima aishe oku i shii.” (Lesha 1 Johannes 3:19, 20) Oha yandje ondjabi omolwoilonga keshe iyapuki oyo hatu mu longele tashi di komutima hatu linyengifwa keitavelo nokohole, kashi na nee mbudi kutya otashi monika shinini kuye. — Mark. 12:41-44.

17. Omanangeko noupuna elipi hatu hafele paife?

17 Nonande otu li momafiku axuuninwa yonghalelo yaSatana youkolokoshi, Jehova oha nangeke noupuna ovapiya vaye. Oha shilipaleke kutya ovalongeli vaye vashili otava hafele eendja dopamhepo odo da henena. (Jes. 54:13) Ngaashi Jesus a udaneka, Jehova okwe tu pa ondjabi paife eshi e tu efa tu kale oshitukulwa shoukwaneumbo waye wovamwatate novamwameme vopamhepo ovo ve li mounyuni aushe. (Mark. 10:29, 30) Shimwe vali, ovo tava longele Kalunga ova pewa omanangeko noupuna kuhe na vali okukala nombili yopamadiladilo va wanenwa nova hafa. — Fil. 4:4-7.

18, 19. Ovapiya vaJehova ohava kala ve uditile ngahelipi ondjabi oyo hava pewa?

18 Ovapiya vaJehova mounyuni aushe otava dulu okupopya kombinga yondjabi iwa oyo e va pa. Pashihopaenenwa, Bianca wokoGermany okwa ti: “Itandi mane okupandula Jehova omolwekwafo olo a pange eshi nda li ndi na oisho ihapu nokwa kala alushe pamwe naame. Mounyuni omwa nyata nomwa kolokosha. Ashike eshi handi ehene popepi elela naJehova, ohandi kala ndi udite nda amenwa momaoko aye. Eshi handi ningi omaliyambo omolwaye, oha nangeke nge noupuna lwomafele.”

19 Natango, natu ka taleni koshihopaenenwa shomumwameme Paula wokoCanada oo e na omido 70 nokwa ngabekwa komukifi oo wa kuma ekipa lombuda hau ifanwa spina bifida. Okwa ti: “Nonande ihandi dulu okweenda, osho inashi hala kutya oukalele wange owa ngabekwa. Ohandi ningi eenghendabala ndi udife meenghedi da yooloka fana, ngaashi okuudifa mongodi nosho yo okuyandja oundombwedi wohangelela. Opo ndi dule okulitwa omukumo, ohandi kala ndi na okambo ke na omishangwa nosho yo omadiladilo a dja moishangomwa yetu, oo handi dulu okulesha efimbo nefimbo. Okambo oko ohandi ka ifana ‘Okambo kange kexupifo.’ Etekomukumo olopokafimbo ngeenge otwa kala hatu yandje elitulemo komaudaneko aJehova. Jehova ohe tu kwafele alushe kashi na nee mbudi kutya otu li meenghalo da tya ngahelipi.” Otashi dulika onghalo yoye ya yooloka ko kwaayo yaBianca naPaula. Ashike oto dulu okudiladila kunghee Jehova e ku nangeka noupuna nanghee apa vamwe ondjabi. Kashi hafifa tuu okukaleka momadiladilo nghee Jehova te ku pe ondjabi paife nanghee teke ku pa ondjabi monakwiiwa!

20. Oshike twa teelela nodjuulufi ngeenge otwa twikile okulongela Jehova nomutima aushe?

20 Ino dimbwa kutya omailikano oye taa di komutima nokupopya wa manguluka naKalunga oshi na “ondjabi inene.” Oto dulu okukala noushili kutya shimha wa ‘wanifa ehalo laKalunga, oto ka pewa eshi we shi udanekelwa.’ (Heb. 10:35, 36) Onghee hano, natu twikileni okupameka eitavelo letu nokulongela Jehova nomutima aushe, tu na elineekelo kutya Jehova ote ke tu pa ondjabi. — Lesha Ovakolossi 3:23, 24.