Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OUYELELE WA FIMANENENA WONDJOKONONA YEENDOMBWEDI DAJEHOVA

Nghee eembuto dotete dOuhamba da li da kunwa moPortugal

Nghee eembuto dotete dOuhamba da li da kunwa moPortugal

ESHI omakufikufi efuta laAtlantic a li tae lidenge moshikepa oyo ya yuka kuEuropa, umwe womovatwaalelwa, George Young, okwa li ta diladila kombinga yoilonga i na sha nOuhamba oyo a longa moBrazil. * Ashike eshi olweendo la li tali twikile, omumwatate Young okwa li a yandja elitulemo koshinakuwanifwa shaye shipe shoku ka udifila koitukulwa inene oyo inai longwa nale, koSpain nokoPortugal. Okwa li ta diladila kutya shimha a fiki, ota ka yandja outraktate 300 000 nota ka unganeka oipopiwa yopaMbiibeli i ka yandjwe komumwatate J. F. Rutherford.

George Young ta tauluka efuta e li moilonga yokuudifa

Mo 1925, eshi omumwatate Young a fika moLisbon pefimbo lokwenye, okwa hanga mo omakuyunguto. Ounashibofa oo wa li wa tukuluka mo 1910, owa li wa xulififa po omulandu wokupangelwa keehamba nowa li wa ningifa Ongeleka yaKatolika ihaa kale vali tai ti pii. Ovakwashiwana ova li va mona emanguluko lihapu, ashike omapiyaano okwa li taa twikile moshilongo omo.

Eshi omumwatate Young a li a ninga omalongekido e na sha noshipopiwa shomumwatate Rutherford, epangelo ola li la tulila po ovakwashiwana eendjidikila molwaashi opa li eenghendabala doku li umba ko koshipundi. Hamushanga wo-British and Foreign Bible Society okwa li a londwela omumwatate Young kutya ota ka shakeneka omapataneko. Ashike nande ongaho, omumwatate Young okwa li a pula epitikilo va longife olupale lokuningila omalideulo mosekundofikola yedina Camões, nova li va pitikwa.

Omafiku 13 Mei osho a fiki omo omumwatate Rutherford a li ta ka yandja oshipopiwa. Ovanhu ova li ve li teelela neenghono. Oshipopiwa shomoipafi shi na oshipalanyole “Nghee to dulu okukala nomwenyo kombada yedu fiyo alushe” osha li sha shiivifwa okupitila momaplakata a natekwa komatungo nosho yo moifokundaneki. Ovapataneki vomalongelokalunga ova li va endelela va nyanyangide oshitukulwa moshifokundaneki shavo tava londwele ovaleshi vasho kutya ope na “ovaprofeti ovanaipupulu.” Ovapataneki ova li tava yandje oumbo poshivelo shonhele oyo yokuningila omalideulo ve na ouyelele u li omhinge nomahongo oo a li taa yandjwa komumwatate Rutherford.

Ndele nande ongaho, ovanhu 2 000 kava li va pitikwa va ye mo, molwaashi kamwa li mu na onhele ya wana. Vamwe ovo va li ve na ohokwe yokupwilikina ova li keemhani odo di li momunghulo wonhele oyo; vamwe ova li koinima oyo hai ningifwa omalideulo.

Haaishe ya li ya enda nawa. Ovapataneki ova li tava ingida mokule nokudenga oipundi kumwe. Ashike omumwatate Rutherford okwa li a ngungumana ndele ta londo koshitaafula opo a udike. Eshi a mana lwomokati koufiku, ovanhu 1 200 ovo va li ve na ohokwe ova li va yandja ouyelele wavo opo va kale hava pewa oishangomwa yopaMbiibeli. Mefiku la shikula ko, oshifokundaneki sho-O Século osha li sha popya kombinga yoshipopiwa shomumwatate Rutherford.

 MuSeptemba 1925, Oshungonangelo yokukonakonwa melaka lOshiputu oya li ya hovelwa okunyanyangidwa moPortugal. (Oshungonangelo yOshiputu oya li hai nyanyangidwa moBrazil.) Pefimbo opo, Virgílio Ferguson, Omukonakonimbiibeli moBrazil, okwa li a ninga omalongekido opo a tembukile koPortugal a ka kwafele moilonga yOuhamba. Pehovelo, okwa li ha longo nomumwatate Young koshitaimbelewa shinini shOvakonakonimbiibeli moBrazil. Inapa pita olule, Virgílio nomukulukadi waye, Lizzie, ova li va ka waimina vali omumwatate Young. Omumwatate Ferguson okwa li a fika pefimbo liwa, molwaashi omumwatate Young okwa li e li pokutembuka a ka udifile koitukulwa imwe, mwa kwatelwa Soviet Union.

Mo 1928, omukanda tau ulike kutya Lizzie naVirgílio Ferguson ova pewa epitikilo

Eshi ovakwaita va dika po epangelo loukanyamukulwa, nomapataneko okwa li a hapupala. Omumwatate Ferguson okwa kala moPortugal, nokwa li a katuka eenghatu opo a amene okangudu kanini kOvakonakombiibeli noku ka twa omukumo omolwoilonga yako. Okwa li a pula epitikilo opo meumbo laye mu kale hamu ningilwa okwoongala pandjikilile. Okwa li a pewa epitikilo olo muOktoba 1927.

Momudo wotete wepangelo loukanyamukulwa, ovanhu 450 lwaapo ova li va waimina ehangano lo-Watch Tower. Shikwao vali, oshili oya li ya tandavela moilonga aishe omo hamu popiwa Oshiputu, ngaashi moAngola, Azores, Cape Verde, East Timor, Goa, Madeira nosho yo moMozambique okupitila moufo nomoumbo.

Mo 1920 nasha, omulumenhu omulininipiki wOmuputu ha longo moshikunino, Manuel da Silva Jordão, okwa li e uya koLisbon. Eshi a li hadi moBrazil, okwa li a pwilikina koshipopiwa shomoipafi shomumwatate Young. Okwa li a mona diva kutya oyo oshili nokwa li a halelela okukwafela omumwatate Ferguson a tamunune mo oilonga yokuudifa. Opo a ninge ngaho, Manuel okwa li a ya moilonga yefimbo li yadi e li omukokolindjila. Molwaashi okupilinda nokwaandjakanekwa kwoishangomwa yopaMbiibeli okwa li kwa unganekwa nawa, eongalo moLisbon ola li tali xumu nawa komesho.

Mo 1934, omumwatate nomumwameme Ferguson ova li ve na okushuna koBrazil. Ndele nande ongaho, eembuto doshili oda li da kunwa. Nonande opa li omapiyaano muEuropa pefimbo loita yopashiwana moSpain nosho yo lOita Itivali yOunyuni, ovapiya vaJehova moPortugal ova kala ovadiinini kuye. Nonande ova kala tava ningi eenghendabala va longe noudiinini, mo 1947 ova li va xwamenena eshi omutumwa oo a mona edeulo kofikola yotete yaGilead, John Cooke, a fika oko. Konima yaasho, omuvalu wovaudifi vOuhamba owa li tau hapupala neendelelo. Nokuli naashi epangelo la li la shilika oilonga yEendombwedi daJehova mo 1962, ovaudifi ova twikila okuhapupala. MuDesemba 1974 eshi Eendombwedi daJehova da tambulwa ko paveta, omwa li ovaudifi ve dulife 13 000 moshilongo osho.

Kunena, ovaudifi vOuhamba ve dulife 50 000 ohava udifa onghundana iwa yOuhamba waKalunga moPortugal nosho yo kounhunu vonhumba oko haku popiwa Oshiputu, mwa kwatelwa Azores naMadeira. Mokati kovaudifi ovo kunena omu na epupi etitatu ile tu tye ovatekulu vaavo va li poshipopiwa shomumwatate Rutherford mo 1925.

Ohatu pandula Jehova nosho yo ovamwatate novamwameme ovadiinini vopefimbo lonale ovo va li va kwatela komesho nouladi oilonga ve li ‘ovapiya vaKristus Jesus mokati kovapaani.’ — Rom. 15:15, 16. — Ouyelele wa fimanenena wondjokonona yEendombwedi daJehova moPortugal.

^ par. 3 Tala oshitukulwa shi na oshipalanyole “Ope na oilonga yeteyo ihapu i na okulongwa” mOshungonangelo yo 15 Mei 2014, ep. 31-32.