Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Auguste 2016

Konga oshinima osho shi dule oshingoli

Konga oshinima osho shi dule oshingoli

Mbela owe litwa ngoo nande onale oshipambu shoshingoli? Ovanhu ashike vanini ve shi litwa. Ashike ovanhu omamiliyona ova mona oshinima shi na ongushu shi dulife oshingoli. Oshinima osho, osho ounongo wopaKalunga oo “itau landwa noshigoldoelela.” — Job 28:12, 15.

OHATU dulu okutya ovakonakoni vOmbiibeli ova fa ovanhu ovo hava kongo oshingoli. Ovakonakoni ovo ova pumbwa okulonga noudiinini nokutwikila okukonga momishangwa opo va mone ounongo oo u he shi okuyelekwa. Oshike hatu dulu okulihonga meenghedi nhatu omo oshingoli hashi kongwa?

TETE OHO MONO OKAPAMBU KOSHINGOLI!

Kala nee wa fa to ende komunghulo womulonga ndele to mono okanima taka vilima eshi taka dengwa keenhe detango. Owa kanghama nowa tunhukwa eshi wa mona okapambu koshingoli. Okapambu oko okanini ke dulike komutwe wokati kokapalwa noka pumba ka fa okawe kondilo. Nope he na omalimbililo, oto ka talaatala u tale ngeenge ope na vali oupambu vahapu.

Sha faafana, otashi dulika to dimbuluka efiku limwe olo umwe womovapiya vaJehova a li e uya peumbo leni opo mu kundafane etumwalaka li na sha neteelelo olo tali hangwa mOmbiibeli. Otashi dulika to dimbuluka nawanawa eshi wa mona tete okapambu koshingoli kopamhepo, oku shi popya pafaneko. Osho otashi dulika sha ningwa eshi wa mona oshikando shoye shotete edina laKalunga, Jehova, mOmbiibeli. (Eps. 83:19) Ile otashi dulika sha ningwa eshi we lihonga kutya oto dulu okuninga kaume kaJehova. (Jak. 2:23) Okudja opo owa didilika kutya owa mona oshinima shi na ongushu shi dulife oshingoli. Nowa li wa halelela okulihonga oinima ihapu yopamhepo oyo tai fanekwa koupambu voshingoli.

OWA MONA VAHAPU!

Oupambu ile oungumutulu vanini voshingoli omafimbo amwe ohave liongele momilonga ile opo hapa kunguluka omeva. Peemhito dimwe, ovo hava longo noudiinini otashi dulika va hange mo oshingoli i na ongushu yeedola omayovi.

Eshi wa hovela okukonakona Ombiibeli nEendombwedi daJehova, otashi dulika wa li u udite wa fa omukongi woshingoli oo ta kongo monhele omo mu na oshingoli shihapu. Okudilonga kovelishe novelishe ohashi weda ko keshiivo loye nohashi ku kwafele u kule pamhepo. Eshi wa kala wa halelela okuteka mo sha momamona eeshili dOmbiibeli, owe lihonga nghee to dulu okweehena popepi naJehova nokulikaleka mohole yaye u na eteelelo lomwenyo waalushe. — Jak. 4:8; Jud. 20, 21.

Ngaashi omukongi woshingoli ha longo noudiinini opo a mone oshingoli, mbela oho longo ngoo noudiinini opo u lihonge eeshili dOmbiibeli di na ondilo?

Ngaashi ashike omukongi woshingoli ha kala a halelela okumona oshingoli, naave otashi dulika wa kala to kongo noudiinini opo u mone omamona opamhepo.  Konima eshi we lihonga omahovelohongo Ombiibeli, otashi dulika wa li we linyengifwa u katuke eenghatu fiyo osheshi we liyapulila Jehova nokuninginifwa. — Mat. 28:19, 20.

TWIKILA OKUKONGA!

Omukongi woshingoli otashi dulika a hange oupambu vahapu voshingoli momamanya makulu. Momamanya oo ohamu kala oshingoli shihapu osho tashi dulu okukufwa mo ngeenge okwa nyanyaulwa nokutataulwa. Ngeenge we shi tale potete fimbo inashi yelifwa, otashi dulika uha mone kutya oshingoli. Omolwashike mbela? Omolwaashi omamanya oo e na ongushu ohaa kala e na eegrama 10 doshingoli she lixwapo. Nonande ongaho, omukongi woshingoli oha kala e wete kutya eenghendabala daye otadi ti sha lela.

Konima eshi omunhu e li honga “omahovelolongo aKristus,” okwa pumbwa okutwikila okuninga eenghendabala. (Heb. 6:1, 2) Owa pumbwa okulonga noudiinini pefimbo lekonakonombiibeli loye opo u mone mo oitwa ipe nosho yo oilihongomwa tai hongo. Ndele mbela oshike to dulu okuninga opo u shilipaleke kutya ekonakonombiibeli loye lopaumwene otali ti sha nonande owa kala nokukonakona Omishangwa oule womido dihapu?

Kala u na ehalo lokulihonga. Kala ho yandje elitulemo komauyelele oo to lihongo. Twikila okuninga eenghendabala da mana mo opo nee oto ka mona ounongo newiliko lopaKalunga. (Rom. 11:33) Opo u hapupaleke eshiivo loye lOmishangwa, kala ho longifa oilongifo yokukonga omauyelele oyo i li melaka loye. Kala nokukonga ewiliko olo wa pumbwa nosho yo omanyamukulo komapulo opaMbiibeli oo u na. Pula vamwe kutya omishangwa dilipi ile oitukulwa ilipi unene ye va kwafela noye va twa omukumo. Kala ho lombwele vamwe oitwa oyo wa hafela mekonakono loye lEendjovo daKalunga.

Oshoshili kutya elalakano loye kali fi ashike okukala wa hala okuhapupalifa eshiivo. Omuyapostoli Paulus okwa londwela a ti kutya “okushiiva otaku nenepekifa.” (1 Kor. 8:1) Onghee hano, longa noudiinini u kale omulininipiki nokukala wa pama meitavelo. Elongelokalunga loukwaneumbo nekonakonombiibeli lopaumwene olo hali ningwa pandjikilile otali ke ku kwafela u kale metwokumwe nomifikamhango daJehova noku ku linyengifa u kwafele vamwe. Komesho yaaishe, oto ka kala wa hafa molwaashi owa likola oshinima shi na ongushu shi dule oshingoli. — Omayel. 3:13, 14.

Lihonga shihapu

OSHUNGONANGELO — OSHIFO SHOKUKONAKONWA

Mbela itamu dulu okuninga Elongelokalunga lOukwaneumbo monghedi tai shambula?

Tala kutya ovanhu vamwe ohave li ningi ngahelipi moilongo i lili noku lili opo u mone ouyelele waasho wa hala okuninga.