Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Auguste 2016

Omapulo a dja kovaleshi

Omapulo a dja kovaleshi

Omolwashike ovatondi vaJesus va li hava komangele onghedindjikilile yokulikosha keenyala?

Oyo oya li ashike onghedi imwe omo ovatondi vaJesus va li tava kendabala okumona omapuko muye nomovahongwa vaye. Omhango yaMoses oya li ya kwatela mo oipango ihapu youkoshoki wopamifyuululwakalo ngaashi etiko lomaxu, oshilundu, nosho yo okuungaunga nomidimba dovanhu nodoinamwenyo. Oya li yo i na omilandu dokulikoshola. Osho osha li tashi dulu okuningwa okupitila mokuyandja eyambo, mokulikosha ile mokushashamina. — Lev., etuk. 11-15; Num., etuk. 19.

Ovahongi Ovajuda ova li hava fatulula oshinima keshe shi na sha neemhango odo. Odjo imwe oya popya kutya keshe oludi lokuhenoukoshoki okwa li ku na okushiivika kutya okwe u ya po ngahelipi nongahelipi taku dulu okutandavela, oinima noilongifo oyo tai dulu okukala ya nyatekwa ile inai nyatekwa nosho yo eenghedi domifyuululwakalo odo da pumbiwa opo omunhu a kosholwe.

Ovo vali omhinge naJesus ova li ve mu pula kutya: “Oshike ovalongwa voye ihava diinine eenghulunghedi dovakulunhu, ndele hava li nomake inaa koshoka?” (Mark. 7:5) Ovatondi ovo vomomalongelokalunga kava li ngeno va hala kutya okulya neenyala inadi koshwa inaku koshoka. Onga omufyuululwakalo, ovanongo vomishangwa ova li ve na okutilwa omeva keenyala fimbo inava lya. Odjo oyo ya popiwa metetekelo oya popya vali kutya eemhango odo oda li yo da popya kutya oikwatelwa ilipi tai ka longifwa okutila umwe omeva, omeva aa peni e na okulongifwa notaa wapalele, olyelye e na oshinakuwanifwa shokutila omeva nokutya fiyo openi omeva e na okutilwa.

Jesus okwa li e linyenga monghedi oyo tai ulike kutya eemhango adishe dovanhu odanafangwa. Tete okwa li a lombwela ovawiliki velongelokalunga lOshijuda vomefelemudo lotete kutya: “Jesaja okwe mu xunganekela da twa, nye ovanaihelele, ngaashi kwa shangwa: Oshiwana eshi ohashi fimaneke nge nomilungu, ndele omitima dasho odi li kokule naame [Jehova]. Ndelenee ohava fimaneke nge hamungaho nokulonga omalongo oipango yovanhu. Otamu ekeleshi oshipango shaKalunga, nye tamu diinine eenghulunghedi dovanhu ngaashi hamu diinine omakosho eenheka nomaholo, nohamu longo vali [shi lili] sha fa eshi.” — Mark. 7:6-8.