Inda koshikalimo

Inda koshikalimo

Eendombwedi daJehova

Hoolola elaka Oshikwanyama

“Wanifa osho we shi udaneka”

“Wanifa osho we shi udaneka”

“Eano loye li wanifila Omwene.” — MAT. 5:33.

OMAIMBILO: 63, 59

1. (a) Omutokoli Jefta naHanna ova li va ninga shike sha faafana? (Tala efano pehovelo loshitukulwa.) (b) Omapulo elipi taa ka nyamukulwa moshitukulwa eshi?

JEFTA okwa li ependa nomuwiliki muwa, ofimbo Hanna okwa li omukainhu ha dulika, omulininipiki nomudiinini koilonga yaye yomeumbo. Kakele kokulongela Kalunga umwe, oshike sha li sha ningifa Omutokoli Jefta naHanna omukulukadi waElkana va kale va faafana? Aveshe ova li va ninga eano kuKalunga nove li wanifa po noudiinini. Kunena ove li oihopaenenwa iwa kovalumenhu novakainhu ovo va hoolola okwaana kuJehova. Ashike nande ongaho, opa holoka omapulo a fimana ngaashi: Eano oshike? Osha kwata moiti shi fike peni okwaana kuKalunga? Oshike hatu lihongo moshihopaenenwa shaJefta naHanna?

2, 3. (a) Eano oshike? (b) Ombiibeli oya popya shike kombinga yokwaana kuKalunga?

2 Ngaashi sha popiwa mOmbiibeli, eano oli li eudaneko la fimana olo hali ningilwa Kalunga. Omunhu oha udaneke okuninga oshinima shonhumba, okuyandja omaano, okulonga oilonga yoludi lonhumba ile okulikaleka kokule noinima yonhumba. Eano ohali ningwa tashi di komutima nonehalo liwa. Ashike nande ongaho, eano oliyapuki noli na ongushu momesho aKalunga molwaashi omunhu oha ane kutya ota ka ninga oshinima shonhumba ile ite ke shi ninga. (Gen. 14:22, 23; Heb. 6:16, 17) Omishangwa oda popya shike  kombinga yanghee okwaana kuKalunga sha kwata moiti?

3 Omhango yaMoses oya ti: “Omunhu ngeenge ta udanekele Omwene eudaneko ile ta ane eano . . . oye e he nokulundulula eendjovo daye. Ye e nokushakenifa adishe odo okanya kaye ka tonga.” (Num. 30:2) Lwanima, Salomo okwa li a nwefwa mo a shange ta ti: “Ove eshi wa udanekela Kalunga eudaneko, ou na oku li wanifa diva, osheshi Ye ita hokwa omalai. Wanifa osho we shi udaneka.” (Omuud. 5:4) Jesus okwa li a koleka nghee sha kwata moiti okuninga eano eshi a ti: “Mwa udile ooxokulu va lombwelwa: ‘Ino ana oipupulu, ndele eano loye li wanifila Omwene.’” — Mat. 5:33.

4. (a) Osha kwata moiti shi fike peni okwaana kuKalunga? (b) Oshike hatu ke lihonga kombinga yaJefta naHanna?

4 Osha yela kutya osha kwata moiti okuningila Kalunga omaudaneko. Onghedi omo hatu ungaunga nomaudaneko etu ohai kumu ekwatafano letu naJehova. David okwa shanga a ti: “Elipipo ta itavelwa okuya kombada yomhunda yOmwene? Oyou. . . . iha ameke nande omwenyo waye koungaho, noiha fufya mokwaana kwaye.” (Eps. 24:3, 4) Jefta naHanna ova li va udaneka shike, nongahelipi va li va dula okuwanifa po omaudaneko avo?

OVA WANIFA PO EUDANEKO LAVO NOUDIININI KUKALUNGA

5. Jefta okwa li a udanekela shike Jehova, noshidjemo osha li shike?

5 Jefta okwa kala omudiinini keudaneko olo a li a ningila Jehova eshi a li ta ka lwifa Ovaammoni ovo va li tava tilifa oshiwana shaKalunga. (Ovatok. 10:7-9) Molwaashi okwa li a halelela okufindana, Jefta okwa udanekela omwene a ti: “Ove ngeenge to yandje meke lange ovana vaAmmoni, opo nee keshe ou ta piti mo monhu yeumbo tete, ame ngeenge handi aluka nombili kovana vaAmmoni, ta ka ninga wOmwene.” Mbela oshidjemo osha li shike? Ovaammoni ova li va findika, nokamonakadona kaJefta oko ka li ka pita mo tete meumbo ka ka shakeneke xe eshi a aluka kolwoodi. Oko ka li ‘ta ka ka ninga kOmwene.’ (Ovatok. 11:30-34) Mbela osho osha li tashi ka tya shike kokamonakadona kaJefta?

6. (a) Jefta nokamonakadona kaye ova li va dula ngahelipi okuwanifa po eudaneko olo a ningila Kalunga? (b) Eendjovo odo di li muDeuteronomion 23:21, 23 nosho yo mEpsalme 15:4 otadi tu dimbulukifa shike kombinga yokuninga eano kuKalunga?

6 Opo okamonakadona kaJefta ka wanife po eudaneko laxe, oka li ke na okulongela Jehova efimbo li yadi kotembeli. Mbela Jefta okwa li a ninga eudaneko ine shi diladila? Ahowe, otashi dulika a li e shii kutya omonakadona waye oye te ke mu shakeneka eshi ta di koita. Ashike nande ongaho, aveshe ova li va nyika oluhodi nova li ve na okuninga omaliyambo. Eshi Jefta a mona okamonakadona kaye, “okwa pombaula oikutu yaye” ndele ta ti kutya okwa nyika oluhodi. Omona waye ‘okwa lila oukadona waye.’ Omolwashike? Jefta ka li e na omonamati, nokamonakadona kaye ewifa itaka ka hombolwa ke mu dalele outekulu. Kungaho, kapa li vali onghedi omo epata la li tali dulu okutandavela. Ashike osho hasho sha li oshinima sha fimanenena kuvo. Jefta okwa li a popya a ti: “Ame nda makulila Omwene okanya kange, ndele ihandi dulu okulialula.” Nomona waye okwe mu nyamukula a ti: “Ninge nge ngaashi okanya koye ke di pitifa mo.” (Ovatok. 11:35-39) Kashi na nee mbudi kutya osha li tashi pula shike, aveshe ova li ovadiinini nova li va wanifa po eudaneko olo va li va ningila Kalunga Omukombadambada. — Lesha Deuteronomion 23:21, 23; Epsalme 15:4.

7. (a) Hanna okwa li a udaneka shike nomolwashike, noshidjemo osha li shike? (b) Eudaneko laHanna ola li tali ka tya shike kuSamuel? (Tala eshangelo lopedu.)

7 Hanna naye okwa li omudiinini nokwa wanifa  po eudaneko olo a li a ningila Jehova. Okwa li a ningila Jehova eudaneko eshi a li a nyika oluhodi neenghono molwaashi okwa li ongadji nokwa li a taalela omasheko taa twikile. (1 Sam. 1:4-7, 10, 16) Hanna okwa li a mbubulila Kalunga omutima waye nokwe mu udanekela a ti: “Omwene womatanga ovakwaita, ove ngeenge to tale oluhepo lomupiya woye omukainhu, ndele to dimbulukwa nge, ndele ito dimbwa omupiya woye omukainhu okaana okalume, opo nee ame ohandi ke ka yandja kOmwene ka ninge kOmwene omafiku aeshe omokukala kwako. Noshimbi itashi ke uya komutwe wako.” * (1 Sam. 1:11) Eindilo laHanna ola li la nyamukulwa, nokwa li a dala okamonamati koshiveli. Okwa li a hafa neenghono. Ashike ka li a dimbwa eudaneko olo a li a ningila Kalunga. Eshi a dala okaana okamati, okwa ti: “Ame nde ka indila kOmwene.” — 1 Sam. 1:20.

8. (a) Ongahelipi Hanna a li a dula okuwanifa po eudaneko laye? (b) Eendjovo daDavid odo di li mEpsalme 61 otadi tu dimbulukifa shike kombinga yoshihopaenenwa shaHanna?

8 Diva konima eshi Samuel a tova, Hanna okwa li a wanifa po eudaneko olo a li a ningila Kalunga eshi Samuel a li e li pokuwanifa omido nhatu. Ka li a diladila okulundulula omadiladilo aye. Okwa kufa Samuel ndele te mu twala kOmupristeri Omukulunhu Eli ketwalihangano lokuSilo, ndele ta ti: “Okaana aka okamati onde ka indila kOmwene, nOmwene okwa pange eshi nde shi mu indila. Onghee hano nda hala yo oku ka yandja kOmwene omafiku aeshe okukala kwako.” (1 Sam. 1:24-28) “Nomumati Samuel okwa kula pOmwene.” (1 Sam. 2:21) Mbela osho osha li tashi ka kuma ngahelipi Hanna? Okwa li e hole neenghono okamonamati kaye, ashike ka li ta ka kala pamwe nako efiku keshe eshi taka ende taka kulu. Diladila nghee tashi dulika a li a djuulukwa oku mu papatela, okudana pamwe naye noku mu tekula a dule okuhafela okumona eshi omonamati waye ta kulu. Ashike nande ongaho, Hanna ka li e li pa oushima eshi a wanifa po eudaneko olo a li a udanekela Kalunga. Omutima waye owa kuwilila Jehova. — 1 Sam. 2:1, 2; lesha Epsalme 61:1, 5, 8.

Oto wanifa po ngoo omaudaneko oo wa ningila Jehova?

9. Omapulo elipi taa ka nyamukulwa?

9 Molwaashi paife otu udite ko nghee sha kwata moiti okuudanekela Kalunga, natu ka kundafaneni omapulo taa shikula: Tu li Ovakriste, omaudaneko elipi tashi dulika tu ninge? Nongahelipi hatu dulu okukala twa tokola toko okukala metwokumwe nomaudaneko etu?

ELIYAPULO LOYE

Eliyapulo (Tala okatendo 10)

10. Eudaneko lilipi la fimanenena olo Ovakriste tava dulu okuninga, nola kwatela mo shike?

10 Eudaneko la fimanenena olo Ovakriste tava dulu okuninga olo okuliyapulila Jehova onghalamwenyo yavo. Omolwashike sha fimana? Omolwaashi oho udanekele Jehova okupitila meilikano kutya oto ke mu longela fiyo alushe, ka shi na nee mbudi kutya otashi pula shike. Okutala keendjovo daJesus, omunhu ohe ‘lixupula ye mwene’ mokulonga osho shiwa nokulonga ehalo laKalunga komesho yaaishe monghalamwenyo yaye. (Mat. 16:24) Okudja efiku olo e liyapulila Jehova, oha ningi ‘wOmwene.’ (Rom. 14:8) Keshe umwe oo e liyapulila Jehova na kale e shi tala ko shi li oshinima sha kwata moiti, ngaashi ashike omupsalme oo a popya kombinga yomaudaneko oo a ningila Kalunga, a ti: “Omwene ohandi mu ningile shike, ndi mu alulile ouwa aushe, ou a longela nge? Omaudaneko ange onda hala ndi a wanifile Omwene, heeno, ndi a wanifile moipafi yoshiwana shaye ashishe.” — Eps. 116:12, 14.

11. Okuninginifwa kwoye okwa ulika shike?

11 Mbela owe liyapulila Jehova nowe shi ulika moipafi okupitila meninginifo? Ngeenge osho,  owa ninga nawa! Efiku olo wa ninginifwa, owa li wa pulwa moipafi yeendombwedi ngeenge owe liyapulila Jehova nou udite ko kutya “eliyapulo loye neninginifo loye otali ku didilikifa u li umwe womEendombwedi daJehova noto longo metwokumwe nehangano laye tali wilikwa komhepo yaye?” Omanyamukulo oye a yela okwa ulika moipafi kutya owe liyapulila Jehova filufilu nowa wana okuninginifwa u li omupiya waye. Efiku olo, Jehova ka li tuu a hafa neenghono!

12. (a) Omapulo elipi twa pumbwa okulipula? (b) Omaukwatya elipi a popiwa kuPetrus tu na okulalakanena?

12 Eninginifo oli li ashike ehovelo, nomolwaasho twa hala okutwikila okukala metwokumwe neliyapulo letu eshi hatu longele Kalunga noudiinini. Onghee hano, otashi dulika tu lipule kutya ‘Onda ninga exumokomesho li fike peni okudja eshi nda ninginifwa? Mbela ohandi twikile ngoo okulongela Jehova nomutima aushe? (Kol. 3:23) Mbela ohandi ilikana ngoo nokulesha Eendjovo daKalunga, ohandi kala ngoo pokwoongala nokukufa ombinga moukalele pandjikilile? Ile pamwe ope na osho sha kala tashi shunifa pedu omalipyakidilo ange opamhepo?’ Omuyapostoli Petrus okwa yelifa kutya ohatu dulu okuhenuka okukala inatu lipyakidila vali ngeenge otwa twikile okukulika eshiivo letu li na sha neitavelo, okukala hatu lididimike nokukala  tu na etilokalunga. — Lesha 2 Petrus 1:5-8.

13. Omukriste oo e liyapulila Jehova nokwa ninginifwa okwa pumbwa okukaleka shike momadiladilo?

13 Itatu dulu okulundulula eudaneko letu li na sha neliyapulo ngeenge otwa kala ihatu wanifa po osho twe mu udanekela. Ngeenge omunhu okwa efa po okulongela Jehova ile okukala metwokumwe nonghedi yokukalamwenyo yopaKriste, ita dulu okutya ka li e liyapulila Jehova neninginifo laye kala li li na oshilonga. * Okwa li a ulika kutya okwe liyapulila Kalunga oye aeke. Omunhu a tya ngaho ota ka kala e na ondjo kuJehova nokeongalo omolwomanyono a kwata moiti oo a ninga. (Rom. 14:12) Ino ‘efa po ohole yoye yotete.’ Ponhele yaasho, otwa hala okuwanifilwa eendjovo daJesus odo tadi ti: “Oilonga yoye ondi i shii, nohole yoye neitavelo loye, neyakulo loye nelididimiko loye, nongaashi oilonga ei yoye yaxuuninwa oi dule inya yotete mouhapu.” (Eh. 2:4, 19). Natu twikileni okukala metwokumwe neudaneko letu opo tu hafife Jehova.

EANO LOYE LOHOMBO

Eano lohombo (Tala okatendo 14)

14. Eudaneko etivali la fimanenena lilipi omunhu ta dulu okuninga, nomolwashike?

14 Eudaneko etivali la fimana olo omunhu ta dulu okuninga eano lohombo. Omolwashike mbela? Omolwaashi ohombo oiyapuki. Ovafuko ohava ane koshipala shaKalunga nomoipafi yeendombwedi. Ohava udaneke kutya otava ka kala ve holafane, tava hafele ohombo nokukala va fimanekafana ‘ofimbo aveshe ve li momwenyo kombada yedu, metwokumwe nelongekido laKalunga li na sha nohombo.’ Vamwe otashi dulika ihava popi filufilu eendjovo da fa odo, ashike natango ohava ane koshipala shaKalunga. Ohava ningi omushamane nomukulukadi, nove na okukala mohombo fimbo aveshe ve li momwenyo. (Gen. 2:24; 1 Kor. 7:39) Jesus okwa ti: “Hano eshi Kalunga e shi tula kumwe, inashi kufwa kumwe komunhu,” kutya nee okomushamane ile okomukulukadi. Nomolwaasho ovo tava i mohombo ove na okukaleka momadiladilo kutya okuteya ohombo kashi fi ehoololo. — Mark. 10:9.

15. Omolwashike Ovakriste ve na okuhenuka omhepo younyuni yokukala vehe na ko nasha nohombo?

15 Oshoshili kutya kape na ohombo ya wanenena. Keshe ohombo oi na ovanhu vavali inava wanenena. Nomolwaasho Ombiibeli ya popya kutya ovo tava hombola ‘otave ke lietela oudjuu’ omafimbo nomafimbo. (1 Kor. 7:28) Shi nyikifa oluhodi, ovanhu vahapu mounyuni ove na oikala yokuhenakonasha ngeenge tashi uya kohombo. Ngeenge va taalela oupyakadi mohombo, ihava ningi eenghendabala va kandule po omaupyakadi, ohava fiye po ashike ookaume kavo kopahombo. Ashike, oyo hayo onghedi omo Ovakriste ve na okuungaunga neehombo davo. Okuteya eano lohombo osha faafana nokupopya oipupulu, naKalunga okutonde ovo hava popi oipupulu. (Lev. 19:12; Omayel. 6:16-19) Omuyapostoli Paulus okwa ti: “Ove ngeenge we limangeleka kumwe nomukainhu, ino konga emangululo.” (1 Kor. 7:27) Paulus okwa li a popya ngaho molwaashi okwa li e shii kutya Jehova oku tonde ovo tava teya ohombo shihe li pauyuki. — Mal. 2:13-16.

16. Ombiibeli oya ti shike kombinga yokuteya ohombo nokutopoka?

16 Jesus okwa popya kutya ope na ashike etomheno limwe lopamishangwa lokuteya ohombo, ngeenge kaume kopahombo oo a kengelelwa okwa tokola aha dimine po kaume kaye oo a ya moluhaelo. (Mat. 19:9; Heb. 13:4) Ongahelipi kombinga yokutopoka? Ombiibeli oya yandja omayele a yela moshinima osho.  (Lesha 1 Ovakorinto 7:10, 11.) Kape na etomheno lopamishangwa ovalihomboli va topoke. Ovalihomboli vamwe Ovakriste ova tala ko eenghalo dimwe di li omatomheno okutopoka, ngaashi ngeenge omwenyo ile oupamhepo u li moshiponga ile kaume kopahombo omushunimonima. *

17. Ongahelipi ovalihomboli Ovakriste tava dulu okupameka ohombo yavo?

17 Ngeenge ovalihomboli ova pula omayele kovakulunhuongalo kombinga yomaupyakadi omohombo, ovakulunhuongalo ova pumbwa oku va pula ngeenge ova tala ngoo okavidio What Is True Love? nova konakona ngoo pamwe okambo Oukwaneumbo weni otau dulu okukala wa hafa. Omolwashike? Omolwaashi oilongifo oyo ivali oya divilika efinamhango lopakalunga olo la kwafela vahapu va pameke eehombo davo. Ovalihomboli vamwe ova ti: “Eshi twa hovela okukala hatu konakona okambo oko, otwa kala twa hafa mohombo yetu shi dulife nale.” Omukainhu oo ohombo yavo ya li i li pokuteka nokwa kala a hombolwa oule womido 22, okwa ti: “Atushe otwa ninginifwa, ashike otwa li tu na omadiladilo a yoolokafana. Okavidio oko oka li ke u ya pefimbo la wapala.” Mbela owa hombola ile owa hombolwa? Kendabala okutula moilonga omafinamhango aJehova mohombo yoye. Ngeenge owa ningi ngaho otashi ke ku kwafela u kale metwokumwe neano loye lohombo wa hafa.

EANO LAAVO VE LI MOILONGA YEFIMBO LI YADI YE LIKALEKELWA

18, 19. (a) Ovadali vahapu Ovakriste ohava ningi shike? (b) Oshike she likalekelwa shi na sha naavo ve li moilonga yefimbo li yadi ye likalekelwa?

18 Mbela owa didilika ngoo kutya oshike vali Jefta naHanna va li ve na sha faafana? Omaudaneko avo okwa li a ningifa omonakadona waJefta nomonamati waHanna va ka longe oilonga iyapuki noye likalekelwa kotembeli. Naasho osha li tashi ulike kutya ova li ve na onghalamwenyo tai ti sha. Kunena, ovadali vahapu Ovakriste ohava ladipike ovana vavo vaye moilonga yefimbo li yadi ye likalekelwa nova kale tava yandje elitulemo kokulongela Kalunga monghalamwenyo yavo. Ovadali ovo va ninga ngaho ova wana okupandulwa. — Ovatok. 11:40; Eps. 110:3.

Eano laavo ve li moilonga yefimbo li yadi ye likalekelwa (Tala okatendo 19)

19 Paife ope na ovanhu 67 000 lwaapo ovo ve li oilyo yElongekido lomounyuni aushe lEendombwedi daJehova li na sha novalongi vefimbo li yadi ve likalekelwa. Vamwe ove li moilonga yaBetel, vamwe ovatungi ile ovapashukilishikandjo, vamwe ohava hongo eefikola di lili noku lili ile ovakokolindjila ve likalekelwa ile ovatumwa ile ovapashukili veenhele omo hamu ningilwa oyoongalele ile eefikola dOmbiibeli. Aveshe ohava kala metwokumwe “nEano lokudulika nokukala wa wanenwa,” omo va ana kutya otava ka kala tava longo oshilonga keshe osho tava pewa opo va xumife komesho oilonga yOuhamba, va kale nonghalamwenyo yanafangwa noitave ke likongela oilonga pehe na epitikilo. Oilonga oyo hava longo oyo ye likalekelwa, ndele havanhu. Ohave shi tale ko sha kwata moiti okukala metwokumwe neano lavo ofimbo ve li moilonga yefimbo li yadi ye likalekelwa.

20. Oshike tu na okuninga ‘efiku nefiku,’ nomolwashike?

20 Omaudaneko angapi oo twa kundafana wa ningila Kalunga? Otashi dulika wa didilika kutya omaudaneko aeshe oo wa ningila Jehova okwa kwata moiti. (Omayel. 20:25) Ngeenge owa dopa okukala metwokumwe nomaudaneko oo wa ningila Jehova, otashi dulu okweeta oilanduliko ya kwata moiti. (Omuud. 5:6) Onghee hano, natu twikileni ‘okwiimbila edina laJehova omahambelelo alushe fiyo alushe, tu wanife omaudaneko etu efiku nefiku.’ — Eps. 61:8.

^ okat. 7 Hanna okwa li a udaneka kutya okaana oko ta ka dala otaka ka ninga Omunasiri onghalamwenyo yako aishe, sha hala kutya itaka hombola, ndele otake ke liyapulila Jehova noku mu longela moilonga yaye. — Num. 6:2, 5, 8.

^ okat. 13 Okutala keenghatu odo ovakulunhuongalo hava katuka opo va shilipaleke ngeenge omunhu okwa wana okuninginifwa, itashi ka kala pandunge komuninginifwa a tale ko eninginifo laye lihe na oshilonga.