Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) APRILI 2016

Mbela oukalele woye owa fa ngoo omume?

Mbela oukalele woye owa fa ngoo omume?

OUKALELE wetu owa fimana neenghono. Ndele hakeshe umwe oo hatu udifile ha mono kutya owa fimana. Nonande ovanhu ove na ohokwe mwaasho Ombiibeli tai ti, haalushe hava kala ve udite kutya osha fimana okukonakona Ombiibeli nafye.

Natu ka taleni koshihopaenenwa shaGavin. Okwa kala he uya kokwoongala, ashike ka li a hala okukonakona Ombiibeli. Okwa ti kutya okwa li e na eshiivo linini kombinga yOmbiibeli noka li a hala shi shiivike. Okwa li a tila okupulwa a ninge oshilyo shelongelokalunga molwaashi ka li a hala okupukifwa. Ove oto diladila ngahelipi? Osha li ngoo tashi shiiva okukwafela Gavin? Diladila kouwa oo omunhu ha mono momahongo Ombiibeli. Jehova okwa li a lombwela Ovaisrael ta ti: ‘Eendjovo dange nadi kunguluke ngaashi omume, ngaashi odula yomudimbi tai loko oxuluxulu.’ (Deuteronomion 31:19, 30; 32:2) Natu ka konakoneni oinima imwe i na sha nomume nokuyelekanifa oukalele wetu nayo opo tu dule okukwafela nawa “ovanhu aveshe.” — 1 Timoteus 2:3, 4

 OMEITYO LILIPI OUKALELE WETU WA FA OMUME?

Omume ohai wile kanini nakanini. Omume ohai holoka po kanini nakanini eshi oshimuke osho shili momhepo tashi lundulukile mouta vanini vomeva. Ongahelipi eendjovo daJehova da li da ‘kunguluka ngaashi omume’ tai wile? Moses okwa li ha popi noshiwana shaye nonghenda, nondjele nosho yo monghedi oyo tai ulike kutya oku na ko nasha nasho. Ngeenge otwa fimaneka osho vamwe va itavela, kungaho ohatu ka hopaenena Moses. Otu na okukala hatu va ladipike va diladile moule nokuninga omatokolo kuvo vene. Ngeenge otwa ulike kutya otu na ko nasha navo, otava ka kala va halelela okutambula ko eshi hatu va hongo, nokungaho ohatu ka pondola moukalele.

Omume ohai talaleke. Oukalele wetu otau ka talaleka vamwe ngeenge otwa longifa omikalo da yoolokafana opo tu va honge shihapu kombinga yoshili. Omumwatate Chris oo a li a kendabala okuhovela ekonakonombiibeli naGavin, ka li e mu fininika. Ponhele yaasho, okwa kendabala okulongifa omikalo da yoolokafana opo a kwafele Gavin a kale a mangulukila eenghundafana di na sha nOmbiibeli. Chris okwa li a lombwela Gavin kutya Ombiibeli oi na etumwalaka la fimana, nokulihonga kombinga yetumwalaka olo otashi ke mu kwafela a dule okushikula nawa osho tashi kundafanwa pokwoongala. Opo nee, Chris okwe mu yelifila nghee omaxunganeko Ombiibeli e mu kwafela a kale a tomhwa kutya Ombiibeli oi li paushili. Oshidjemo, ova ka kala hava kundafana kombinga yanghee omaxunganeko mahapu Ombiibeli a wanifwa. Eenghundafana odo oda li da talaleka Gavin, nolwanima okwa ka tambula ko ekonakonombiibeli.

Omume ohai mwenyopaleke. Pefimbo lokwenye muIsrael ohamu kala mwa kukuta molwaashi odula ohai dulu okukala inai loka oule weemwedi dihapu. Ngeenge kape na oshimuke osho hashi etwa komume, oimeno ohai nganye fiyo ya fya. Jehova okwa xunganeka nale kutya pefimbo letu otapa ka kala onghalo tai yelekanifwa noshikukuta, ovanhu tava ka fya enota ‘lokuuda eendjovo daKalunga.’ (Amos 8:11) Okwa xunganeka yo kutya ovavaekwa otava ka kala “ngaashi omume hai di kOmwene” eshi tava udifa onghundana iwa yOuhamba tava kwafelwa ‘keedi’ dimwe. (Mika 5:6; Johannes 10:16) Etumwalaka olo hatu udifa olimwe lomomafiloshisho aJehova okuyandja omwenyo kwaavo va fya enota loshili. Mbela otwa lenga ngoo etumwalaka la tya ngaho?

Omume oshali ya dja kuJehova. (Deuteronomion 33:13) Oilonga yetu yokuudifa otai dulu okukala enangekonoupuna kwaavo tava pwilikine. Ekonakonombiibeli ola li enangekonoupuna kuGavin molwaashi ole mu kwafela a mone omanyamukulo omapulo aeshe oo a li e na. Okwa ninga exumokomesho meendelelo, a ninginifwa nopaife ota hafele oilonga yokuudifa onghundana iwa yOuhamba pamwe nomukulukadi waye Joyce.

Eendombwedi daJehova otadi tandaveleke onghundana iwa yOuhamba kedu alishe

KALA WA LENGA OUKALELE WOYE

Okuyelekanifa oilonga yetu yokuudifa nomume otaku tu kwafele yo tu ude ko kutya eenghendabala odo hatu ningi pauhandimwe moukalele oda fimana. Ngahelipi mbela? Okata kamwe komeva itaka kwafa sha naanaa, ndele ngeenge ovahapu otava tutike edu. Sha faafana, osho hatu ningi pauhandimwe moukalele otashi dulika shi monike shinini neenghono. Ashike ngeenge eenghendabala dEendombwedi omamiliyona oda tulwa kumwe, otadi ka ulika kutya oundombwedi owa yandjwa ‘koiwana aishe.’ (Mateus 24:14) Mbela oukalele wetu ou li ngoo enangeko noupuna kuvakwetu la dja kuJehova? Nopehe na omalimbililo, etumwalaka letu otali ka kala ngaashi omume oyo hai wile kanini nakanini, hai talaleke nohai mwenyopaleke.