Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) APRILI 2016

“Elididimiko nali kale li noshilonga sha wana”

“Elididimiko nali kale li noshilonga sha wana”

“Elididimiko nali kale li noshilonga sha wana, opo mu kale mwa wana mu he noshipo nomu he na eshi mwe shi pumbwa.” — JAKOB 1:4.

OMAIMBILO: 135139

1, 2. (a) Oshike hatu lihongo kelididimiko laGideon novakwaita vaye 300? (Tala efano pehovelo loshitukulwa.) (b) Pa Lukas 21:19, omolwashike elididimiko la fimana?

KALA nee ngeno wa fa u wete olwoodi lipyu nolilolola olo la li pokati kovakwaita Ovaisrael novatondi vavo. Ovakwaita Ovaisrael ova li tava wilikwa komutokolipangeli Gideon. Gideon novakwaita vaye ova li va taataa Ovamidian novayambididi vavo oufiku aushe oshinano sheekilometa 32 lwaapo. Ombiibeli oye tu lombwela kutya oshike sha ka ningwa po lwanima, eshi ya ti: “Gideon e uya kuJordan, ye novalumenhu omafele atatu ava va li puye, va tauluka va loloka omolwokutaata.” Ashike fiyo opopo kava li va findana molwoodi olo. Ova li ve na okutwikila okulwifa ovakwaita ovo 15 000. Kava li ve na okusholola molwaashi ovatondi ovo ova kala nokufininika Ovaisrael oule womido dihapu. Onghee hano, Gideon novakwaita vaye ova li va twikila okutaataa ovatondi vavo, nolwaxuuninwa ove ke va finda. — Ovatokolipangeli 7:22; 8:4, 10, 28.

2 Nafye ohatu lu olwoodi lipyu nolilolola. Ovatondi vetu  ova kwatela mo Satana, ounyuni waye nosho yo okuhawanenena kwetu. Vamwe vomufye otwa kala nokulwifa ovatondi ovo oule womido dihapu. Ndele kekwafo laJehova, otwa findana momalwoodi mahapu. Ashike inatu findana natango olwoodi laxuuninwa. Omafimbo amwe otashi dulika tu loloke okulwa ile okuteelela exulilo longhalelo ei youkolokoshi. Jesus okwe tu londwela kutya ohatu ka hangwa komapataneko nokomayeleko madjuu momafiku axuuninwa. Ashike okwa ti yo kutya ngeenge ohatu lididimike, ohatu ka findana. (Lesha Lukas 21:19.) Elididimiko oshike? Oshike tashi ke tu kwafela tu lididimike? Oshike hatu lihongo kwaavo va li ve lididimika? Nongahelipi hatu dulu okupitika ‘elididimiko li kale li noshilonga sha wana’? — Jakob 1:4.

ELIDIDIMIKO OSHIKE?

3. Elididimiko oshike?

3 Okukala nelididimiko otashi ti shihapu shihe fi ashike okulididimikila oudjuu. Osha kwatela mo onghedi omo hatu diladila naamo tu uditile omayeleko. Elididimiko ohali tu kwafele tu kale ovaladi, ovadiinini notu na onheni. Embo limwe lomauyelele ola ti kutya elididimiko oukwatya oo hau tu kwafele tu kale neteelelo la twa, notuha sholole ngeenge twa hangwa komayeleko. Otali tu kwafele tu diinine notuha tengauke nokuli nongeenge tu li momayeleko a kwata moiti. Ohali tu pe yo omhito yokukala twa fa twa pita mo nale momayeleko nonande omo tu li, nokuyandja elitulemo kelalakano letu, ndele hakouyahame wetu.

4. Omolwashike hatu tile kutya elididimiko ola kanghamena kohole?

4 Ohole ohai tu linyengifa tu lididimike. (Lesha 1 Ovakorinto 13:4, 7.) Omeenghedi dilipi mbela? Ohole yetu yokuhola Jehova ohai tu kwafele tu lididimikile keshe osho ta pitike shi ningwe. (Lukas 22:41, 42) Ohole yokuhola ovamwatate ohai tu kwafele tu lididimikile okuhawanenena kwavo. (1 Petrus 4:8) Ohole yokuhola ookaume ketu kopahombo ohai tu kwafele tu lididimikile “oudjuu” oo hau hange ovalihomboli aveshe, naasho otashi ka pameka eehombo. — 1 Ovakorinto 7:28.

OSHIKE TASHI KE KU KWAFELA U LIDIDIMIKE?

5. Omolwashike Jehova oye aeke a wana oku tu kwafela tu lididimike?

5 Indila Jehova e ku pe eenghono. Jehova ‘oKalunga kelididimiko nokehekeleko.’ (Ovaroma 15:5) Oye aeke e udite ko pauyadi onghalo yetu, omaliudo etu nosho yo onakudiwa yetu. Onghee hano, oku shii lelalela osho twa pumbwa opo tu lididimike. Ombiibeli oya ti: “Ava, have mu tila, ote va wanifile eshi va hala, nonghuwo yavo ohe i udu, ndee te va xupifa.” (Epsalme 145:19) Ndele mbela ongahelipi Kalunga ta dulu okunyamukula omailikano etu opo e tu pameke tu lididimike?

Jehova oo e tu shii nawa, oku shii kutya oshike lela twa pumbwa opo tu lididimike

6. Ngaashi Ombiibeli ya udaneka, ongahelipi Jehova te tu longele “omhito yokupita mo” momayeleko?

6 Ngeenge hatu indile Jehova e tu kwafele tu lididimike, ohe tu pe “omhito yokupita mo.” (Lesha 1 Ovakorinto 10:13.) Osho ohe shi ningi ngahelipi? Omafimbo amwe otashi dulika a kufe po eyeleko. Ashike peemhito dihapu  ohe tu pameke opo tu dule “okulididimika moudjuu keshe” nehafo. (Ovakolossi 1:11) Ndele molwaashi Jehova oku tu shii nawa palutu, pamadiladilo nomangabeko etu opamaliudo, kape na fiku a efe onghalo i tu djuupalele neenghono fiyo osheshi itatu dulu vali oku i lididimikila.

7. Longifa efaneko u yelife kutya omolwashike twa pumbwa oikulya yopamhepo opo tu lididimike.

7 Pameka eitavelo loye noikulya yopamhepo. Omolwashike sha fimana okulya oikulya yopamhepo? Natu shi faneke ngaha: Omunhu oo ta londo komhunda ile, mefiku okwa pumbwa okulya oikulya ya wana okuliwa omafiku atatu ile ane opo a mone eenghono doku ka fika koxulo yayo. Sha faafana, otwa pumbwa okulya oikulya yopamhepo ya wana opo tu lididimike notu hange elalakano letu. Otu na okukala twa tokola toko okulongifa efimbo letu mokukonakona Ombiibeli paumwene nokukala pokwoongala. Okuninga ngaho, otashi ke tu kwafela tu mone osho twa pumbwa opo tu pameke eitavelo letu. — Johannes 6:27.

8, 9. (a) Pa Job 2:4, 5, oshike sha kwatelwa mo ngeenge twa hangwa komayeleko? (b) Ngeenge owa hangwa komashongo, oshiningwanima shilipi to dulu okudiladila kusho?

8 Dimbuluka kutya ou na okukala omudiinini kuKalunga. Ngeenge twa hangika komayeleko, ohapa kala shihapu sha kwatelwa mo shihe fi ashike okumona oixuna kwetu. Oudiinini wetu kuKalunga ohau yelekwa. Onghedi omo hatu linyenge ngeenge tu li momaupyakadi ohai holola ngeenge otwa tala ko ngoo Jehova e li Omupangeli weshito alishe. Osho otashi shiiva ngahelipi? Satana oo e li omutondi waJehova noku na ondubo nepangelo laye, okwa sheka Jehova eshi a ti kutya ovanhu ohava longele ashike Jehova omolwokuliholamwene. Satana okwa ti: “Omunhu keshe osho e shi na, te shi yandjele omwenyo waye.” Opo nee Satana okwa popya vali shi na sha naJob a ti: “Ndele shamha to nane eke loye u kume omakipa aye nombelela yaye, ye ote ke ku liteeka shili moipafi yoye.” (Job 2:4, 5) Mbela paife Satana okwa lunduluka okudja eshi a popya eendjovo odo? Hasho nandenande. Lwanima konima yomido dihapu eshi Satana a li a umbwa mo meulu, okwa ka kala natango ta lundile ovapiya vaKalunga ovadiinini. (Ehololo 12:10) Kunena, Satana natango onghee ngoo ta ti kutya ovanhu ohava longele Kalunga omolwomatomheno okuliholamwene. Satana ina hala nandenande tu tambule ko Kalunga e li omupangeli wetu noina hala tu mu longele.

9 Ngeenge oto mono oixuna omolwomaupyakadi, diladila koshiningwanima tashi shikula. Natu tye nee Satana neendemoni ova ama kombinga imwe. Otava tale osho to ningi, notava ti kutya oto ka sholola. Kombinga ikwao oku na Jehova, Ohamba yetu Jesus Kristus, ovavaekwa ovo va nyumunwa novaengeli omayovi. Navo ove wete kutya oto kendabala, ashike otave ku tu omukumo. Ova hafa eshi ve wete kutya oto lididimike nou li omudiinini kuJehova. Opo nee owa uda Jehova te ku lombwele ta ti: “[Kala] u neendunge, omumwange, hafifa omutima wange, opo nee handi dulu okunyamukula ovalundili vange.” — Omayeletumbulo 27:11.

Jesus okwa kala ta yandje elitulemo kondjabi oyo a li ta ka pewa ngeenge e lididimike

10. Ngaashi Jesus, oshike u na okuyandja elitulemo kusho ngeenge to lididimikile omayeleko?

 10 Yandja elitulemo kondjabi. Diladila nee ngeno to i molweendo lile, ndele oku to i oto ka fika ko ashike ngomongula. Osho osha hala okutya ou na okweenda oufiku aushe. Ndele nonande okwa laula fokofoko, ou shii kutya oto ka mona vali ouyelele ngeenge okwa shi. Onghalamwenyo otai dulu okuyelekwa nolweendo la tya ngaho. Otashi dulika to ka hangwa keenghalo didjuu, noto ka kala u wete wa wililwa po komaupyakadi oye. Jesus naye okwa li ta dulu okukala e udite ngaho. Eshi a li ta valelwa komuti womahepeko, okwa li a ninipikwa nokwa li mouyahame ulula. Olo oli na okukala olo la li efimbo lidjuu neenghono monghalamwenyo yaye. Oshike sha li she mu kwafela e lididimike? Ombiibeli oya ti kutya okwa li a tala ‘kehafo e li tulikilwa’ ile tu tye e li tuvikililwa. (Ovaheberi 12:2, 3) Jesus okwa kala ta yandje elitulemo kondjabi omolwelididimiko laye, naasho sha fimanenena oshosho kutya okwa yapulifa edina laKalunga nokuyambidida oufemba waye wokupangela. Okwa kala e shii kutya eyeleko laye olopakafimbo nondjabi oyo ta ka pewa meulu otai kalelele. Kunena, omashongo oo to shakeneke otashi dulika e ku wilile po noku ku yahameka, ndele ino dimbwa kutya oopakafimbo ashike.

“OVO VE LIDIDIMIKA”

11. Omolwashike tu na okukala hatu konakona oimoniwa yaavo “ve lididimika”?

11 Hafye atuke hatu kondjo nokulididimika. Opo a ladipike Ovakriste ve lididimikile omashongo mahapu oo hava etelwa kuSatana, omuyapostoli Petrus okwa shanga a ti: “Mu lwifeni mwa pama meitavelo, nye mu kale mu shi shii, novamwaxo yo ve li mounyuni ove nokuhumbata omahepeko a tya ngaha.” (1 Petrus 5:9) Oimoniwa yaavo “ve lididimika” otai tu hongo nghee tu na okukala ovadiinini, tai tu kwafele tu mone kutya ohatu dulu okupondola, notai tu dimbulukifa kutya ohatu ka mona ondjabi omolwoudiinini wetu. (Jakob 5:11) Natu ka kundafaneni oihopaenenwa imwe. [1] — Tala eshangelo lopexulilo loshitukulwa.

12. Oshike hatu lihongo koshihopaenenwa shovakerubi ovo va li va tulwa moshikunino shaEden?

12 Ovakerubi ovaengeli ovo ve na ondodo ya kula. Konima eshi Adam naEva va nyona, Jehova okwa pa ovaengeli vamwe oshinakuwanifwa shipe kombada yedu. Oshinakuwanifwa osho osha yooloka ko filufilu kwaasho va kala ve na meulu. Oshihopaenenwa shavo otashi tu hongo nghee tu na okulididimika ngeenge otwa pewa oshinakuwanifwa shidjuu. Ombiibeli oya ti kutya Jehova “okwa tula ovakerubi koushilo woshikunino shaEden, ve nomaongamukonda a xwama omundilo taa taima, vo va kelele omhito yokuya komuti womwenyo.” [2] (Tala eshangelo lopexulilo  loshitukulwa.) (Genesis 3:24) Ombiibeli inai tya kutya ovakerubi ova li tava ngongota ile ve udite va tumbala unene nokulonga oshilonga osho shipe. Kava li ve wete shififa oudja ile va sholole. Ponhele yaasho, ova kala tava longo oshilonga shavo fiyo osheshi ve shi manifa tashi dulika pefimbo lEyelu, omido di dulife pe 1 600 lwaapo.

13. Oshike sha kwafela Job e lididimikile omashongo?

13 Omulumenhu omudiinini Job. Omafimbo amwe otashi dulika u ude nai molwaashi kaume koye ile umwe moukwaneumbo weni a popya sha she ku teya omukumo. Ile pamwe to vele unene ile to mono oixuna molwaashi umwe oo u hole a fya. Ashike, kashi na nee mbudi kutya oshike she ku ningilwa, oshihopaenenwa shaJob otashi dulu oku ku hekeleka. (Job 1:18, 19; 2:7, 9; 19:1-3) Job ka li e shii kutya omaupyakadi aye oo a li mahapu nokwa holoka ombadilila otaa dilile peni, ashike ina sholola nande. Oshike she mu kwafela e lididimike? Oshinima shotete, okwa li e hole Jehova, nokwa li ha tila oku mu nyemateka. (Job 1:1) Job okwa li a hala okuhafifa Kalunga kashi na nee mbudi kutya eenghalo otadi mu endele nawa ile onai. Shikwao vali, Jehova okwa li a kwafela Job a mone kutya Ye omunaenghono moku mu lombwela kombinga yoinima imwe oyo a shita. Osho osha li sha kwafela Job a kale a tomhwa filufilu kutya Jehova ota ka xulifa po omaupyakadi aye pefimbo la wapala. (Job 42:1, 2) Naasho osho sha li sha ningwa po. Ombiibeli oya ti: ‘NOmwene okwa alulila Job aishe, noku i hapupalifa luvali i dule inya yotete.’ Job okwa kala ko fiyo ‘a kuta okukalamwenyo.’ — Job 42:10, 17.

14. Metwokumwe no 2 Ovakorinto 1:6, ongahelipi elididimiko laPaulus la kwafela vamwe?

14 Omuyapostoli Paulus. Mbela oto mono oixuna molwaashi to patanekwa ile to hepekwa? Mbela ou li omukulunhuongalo ile omupashukilishikandjo nou wete wa wililwa po koinakuwanifwa yoye ihapu? Ngeenge osho, oshihopaenenwa shaPaulus otashi  dulu oku ku kwafela. Paulus okwa hepekwa neenghono, nokwa li alushe he lipula novamwatate meongalo. (2 Ovakorinto 11:23-29) Ashike Paulus ka li a sholola, noshihopaenenwa shaye osha li sha pameka vakwao. (Lesha 2 Ovakorinto 1:6.) Elididimiko loye nalo otali dulu okutwa vamwe omukumo.

ELIDIDIMIKO LOYE NALI KALE ‘LI NOSHILONGA SHA WANA’

15, 16. (a) Elididimiko oli na ‘oshilonga’ sha wana shilipi? (b) Yandja oihopaenenwa yanghee hatu dulu okweefa ‘elididimiko li kale li noshilonga sha wana.’

15 Omuhongwa Jakob okwa li a nwefwa mo a shange ta ti: “Elididimiko nali kale li noshilonga sha wana, opo mu kale mwa wana mu he noshipo nomu he na eshi mwe shi pumbwa.” (Jakob 1:4) Ongahelipi elididimiko tali dulu okukala li “noshilonga” shalo sha wana mufye? Ngeenge tu li meyeleko, otashi dulika tu mone kutya otwa pumbwa okukala nelididimiko, hatu pandula notu na ohole. Ngeenge hatu lididimikile eyeleko, ohatu lihongo okuulika omaukwatya oo shi dulife nale, nokungaho ohatu ka xwepopaleka oukwatya wetu wopaKriste.

Ngeenge otwe lididimikile omayeleko, oukwatya wetu wopaKriste ohau xwepopala (Tala okatendo 15, 16)

16 Molwaashi elididimiko otali dulu oku tu kwafela tu ninge Ovakriste va pyokoka, kashi li pandunge tu nyone omhango yaJehova opo tu dje meshongo. Pashihopaenenwa, ngeenge oto kondjo nomadiladilo a nyata, ino liyandja keyeleko. Pula Jehova e ku kwafele u henuke omadiladilo a tya ngaho. Mbela ope na umwe meumbo leni he ku pataneke? Ino sholola! Kala wa tokola okutwikila okulongela Jehova. Ngeenge owa ningi ngaho, elineekelo loye muJehova otali ka kala la pama. Dimbuluka kutya, opo tu kale twa hokiwa kuJehova, otu na okulididimika. — Ovaroma 5:3-5; Jakob 1:12.

17, 18. (a) Longifa efaneko u yelife nghee sha fimana okulididimika fiyo exulilo. (b) Elineekelo lilipi hatu dulu okukala tu na eshi exulilo tali ehene popepi?

17 Otu na okulididimika, haule ashike wokafimbo konhumba, ndele fiyo exulilo. Diladila nee ngeno oshikepa tai ningine. Opo ovatwaalelwa ovo ve li mo va xupe, ove na okuyowa fiyo okomunghulo. Ngeenge umwe okwa sholola okuyowa, ota fi omeva. Sha faafana, ngeenge omunhu okwa sholola nonande okwa li ta hale okufika, naye ota fi omeva. Ngeenge otwa hala okuya mounyuni mupe, otwa pumbwa okukala hatu lididimike. Natu kaleni tu na oikala ya fa yaPaulus oo a ti: “Ihatu fi ounye.” — 2 Ovakorinto 4:1, 16.

18 Ngaashi Paulus, otwa tomhwa filufilu kutya Jehova ote ke tu kwafela tu lididimike fiyo exulilo. Paulus okwa ti: “Muei aishe ohatu findi nokufindilila omolwaau e tu hole. Osheshi ondi shi shii shili, haefyo ile omwenyo, haovaengeli ile ovapangelinghono, haai yopaife ile ei yokomesho, haenghono, haouule wopombada ile ouule woposhi, hashishitwa nande shimwe tashi dulu oku tu tukula mohole yaKalunga yomuJesus Kristus, Omwene wetu.” (Ovaroma 8:37-39) Oshoshili kutya omafimbo amwe otashi dulika tu loloke. Ashike natu hopaeneneni Gideon novakwaita vaye. Ova li va loloka, ndele inava sholola. Ombiibeli oya ti: “Ova li va tauluka” va shikule ko. — Ovatokolipangeli 8:4

^ [1] (okatendo 11) Oto ka mona tashi pameke ngeenge owa konakona nghee oshiwana shaKalunga hashi lididimike kunena. Pashihopaenenwa, mo-Yearbook (embo lokomudo) lomo 1992, 1999 nolomo 2008 omu na olaporta tai tu omukumo i na sha novamwatate vokoEtiopia, Malawi nokoRussia.

^ [2] (okatendo 12) Ombiibeli inai popya kutya ovakerubi vangapi va li va pewa oshilonga osho.