Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) MARSA 2016

Ongahelipi hatu dulu okuxumifa komesho oukumwe wetu wopaKriste?

Ongahelipi hatu dulu okuxumifa komesho oukumwe wetu wopaKriste?

“Muou olutu alishe ngaashi la tulwa kumwe notali kwatelwa kumwe.” — OVAEFESO 4:16.

OMAIMBILO: 53, 107

1. Oshike sha li shididilikwedi moilonga yaKalunga okudja pehovelo leshito?

JEHOVA naJesus ova kala hava longele kumwe okudja pehoveloelela leshito. Jehova okwa shita Jesus fimbo ina shita oinima aishe, nokonima Jesus okwa ka longa pamwe naye ‘nokwa li puye ngaashi omunongoelela.’ (Omayeletumbulo 8:30) Ovapiya vaJehova navo ohava longele kumwe moilonga yavo. Pashihopaenenwa, Noa noukwaneumbo waye ova li va longela kumwe eshi va tunga onguluwato. Lwanima, Ovaisrael ova li va longela kumwe eshi va tunga etwali, ve li pangulula mo naashi va kala tava tembuka nalo. Potembeli, ova li va imba pamwe nokushika oishikomwa opo va tange Jehova nomaimbilo mawa. Oshiwana shaJehova okwa li sha dula okuninga oinima aishe oyo molwaashi osha li sha longela kumwe. — Genesis 6:14-16, 22; Numeri 4:4-32; 1 Omafimbo 25:1-8.

2. (a) Oshike sha li sha tongomana shi na sha neongalo lopaKriste lotete? (b) Omapulo elipi hatu ka kundafana?

 2 Ovakriste vomefelemudo lotete navo ova li hava longele kumwe. Omuyapostoli Paulus okwa yelifa kutya nonande okwa li ve na okudula noinakuwanifwa ya yoolokafana, ova li hava longele kumwe. Aveshe okwa li va shikula Omuwiliki wavo, Jesus Kristus. Paulus okwa li e va faafanifa nolutu olo li na oitukulwa ihapu ya yoolokafana oyo hai longele kumwe aishe. (Lesha 1 Ovakorinto 12:4-6, 12.) Ongahelipi shi na sha nafye kunena? Ongahelipi hatu dulu okulongela kumwe eshi hatu kufa ombinga moilonga yokuudifa, meongalo nosho yo moukwaneumbo?

LONGELENI KUMWE MOILONGA YOKUUDIFA

3. Oshike omuyapostoli Johannes a li a mona memoniko laye?

3 Mefelemudo lotete, omuyapostoli Johannes okwa li a mona memoniko ovaengeli vaheyali tava shiki omanghuma. Eshi omweengeli omutitano a shika enghuma laye, Johannes okwa mona “onyofi ya wa meulu, ya wila kombada yedu.” “Onyofi” oyo oya longifa oshapi i patulule omuvelo wombwili. Tete mombwili oyo omwa dja omwifi, nokonima momwifi omwa li mwa dja oshihomo shoshipaxu. Ponhele yokuhanauna po omiti ile oimeno, oshihomo shoshipaxu osho osha ponokela ovanhu “ava ve he nedidiliko laKalunga moipala yavo.” (Ehololo 9:1-4) Johannes okwa li e shii kutya oshihomo shoshipaxu otashi dulu okuhanauna neenghono molwaashi osha li sha longa oushada muEgipti pefimbo laMoses. (Exodus 10:12-15) Oshipaxu osho Johannes a li a mona otashi faneke Ovakriste ovavaekwa ovo va kala nokuudifa etumwalaka la kwata moiti li na sha nomalongelokalunga oipupulu. Ova li va waiminwa komamiliyona ovanhu ovo ve na eteelelo lokukala nomwenyo waalushe kombada yedu. Ovavaekwa nosho yo ovo ve na eteelelo lomwenyo waalushe kombada yedu ohava udifa va hangana. Oilonga oyo ohai kwafele ovanhu vahapu va fiye po omalongelokalunga oipupulu nova manguluke ko kenwefemo laSatana.

Ohatu udifa mounyuni aushe molwaashi otu na elongelokumwe

4. Oshilonga shilipi oshiwana shaKalunga shi na okulonga, nomonghedi ilipi shi na oku shi ninga?

4 Otu na oshinakuwanifwa shokuudifila ovanhu mounyuni aushe ‘evangeli lOuhamba’ fimbo exulilo inali uya. Ei kai fi tuu oilonga ihapu! (Mateus 24:14; 28:19, 20) Otu na okushiva aveshe ovo va ‘fya enota lomeva omwenyo,’ sha hala kutya okuhonga ovanhu aveshe oshili yOmbiibeli ovo ve na ohokwe. (Ehololo 22:17) Ohatu ka pondola ashike ngeenge ohatu longo ‘moukumwe’ nokulongela kumwe meongalo. — Ovaefeso 4:16.

5, 6. Ongahelipi hatu kala twa hangana eshi hatu udifa onghundana iwa?

5 Opo tu udifile ovanhu vahapu ngaashi tashi dulika, otwa pumbwa okuunganekwa nawa moilonga yetu yokuudifa. Ewiliko olo hatu mono okudja meongalo otali dulu oku tu kwafela tu ninge ngaho. Ngeenge twa dja pelongekido loilonga yomomapya, ohatu i tu ka udifile ovanhu kombinga  yonghundana iwa yOuhamba. Ohatu va pe yo oishangomwa ya kanghamena kOmbiibeli. Nopehe na omalimbililo, ohatu yandje oishangomwa omamiliyona mounyuni aushe. Omafimbo amwe ohatu pulwa tu kufe ombinga moikonga ye likalekelwa yokuudifa. Ngeenge to longo oshilonga osho, owa hangana novaudifi omamiliyona mounyuni aushe ovo tava udifa etumwalaka la faafana. Oto longo yo pamwe novaengeli, ovo hava kwafele oshiwana shaKalunga shi udife onghundana iwa. — Ehololo 14:6.

6 Ihashi kala tuu shitunhula okulesha membo lokomudo kombinga yoidjemo yoilonga yokuudifa mounyuni aushe! Ohatu kala twa hangana mounyuni aushe ngeenge hatu shivi ovanhu ve uye koyoongalele. Poyoongalele, atushe ohatu pwilikine kouyelele wa faafana. Oipopiwa, oinyandwa nomauliko ohai tu ladipike tu pe Jehova osho sha denga mbada. Ohatu kala yo twa hangana pamwe novamwatate novamwameme mounyuni aushe ngeenge tu li pEdimbuluko omudo keshe. (1 Ovakorinto 11:23-26) Ohatu ongala atushe mefiku la faafana, mo 14 Nisan, konima yeningino letango opo tu ulike kutya otwa pandula unene Jehova kwaasho e tu ningila nokudulika koshipango shaJesus. Oivike oyo hai tetekele Edimbuluko, ohatu longo pamwe opo tu shive ovanhu vahapu ngaashi tashi dulika va ka ongale pamwe nafye poshiningwanima osho sha fimanenena.

7. Ngeenge otwa kala hatu longo moukumwe, ohatu ka dula okuninga shike?

7 Oshipaxu shimwe itashi dulu okuhanauna osho ashike. Nafye ngeenge ihatu longo moukumwe, itatu dulu okuudifila ovanhu aveshe. Ndele molwaashi ohatu longo twa hangana, ohatu dulu okulombwela ovanhu omamiliyona kombinga yaJehova nokukwafela vamwe ve mu tange noku mu fimaneka.

LONGELENI KUMWE MEONGALO

8, 9. (a) Paulus okwa li a longifa efaneko lilipi opo a honge Ovakriste va kale moukumwe? (b) Ongahelipi hatu dulu okuulika kutya otu na elongelokumwe meongalo?

8 Paulus okwa li a yelifila Ovaefeso nghee eongalo la fikama po, eshi a ti kutya aveshe meongalo ove na ‘okukula moinima aishe.’ (Lesha Ovaefeso 4:15, 16.) Paulus okwa longifa oshihopaenenwa sholutu opo a yelife kutya Omukriste keshe ota dulu okukwafela eongalo li kale moukumwe nokushikula Jesus oo eli Omutwe weongalo. Okwa ti kutya oitukulwa aishe yolutu ohai longo ya ‘kwatelwa kumwe komufipa keshe, keshe tuu oshinhimbu shi fike pashiyelekifo shasho.’ Onghee hano, kashi na nee mbudi kutya otu li ovanyasha, ovakulunhu, otu na oukolele ile hasho, oshike osho keshe umwe ta dulu okuninga?

Ongahelipi to dulu okuxumifa komesho oukumwe meongalo leni?

9 Jesus okwa nangeka po ovakulunhuongalo va kwatele komesho momaongalo, nokwa hala tu kale twe va fimaneka nokudulika kuvo. (Ovaheberi 13:7, 17) Ndele haalushe hashi kala shipu okudulika. Nomolwaasho otwa pumbwa okupula ekwafo kuJehova opo omhepo yaye iyapuki i tu kwafele tu kale hatu liufa kewiliko olo hatu pewa kovakulunhuongalo. Ngeenge otwa kala ovalininipiki  nohatu longele kumwe novakulunhuongalo, otashi ka kwafela eongalo li xume komesho. Ohatu ka kala twa hangana, nohole yetu yokuholafana otai ka kala ya xwama.

10. Ongahelipi ovayakuliongalo hava kwafele opo eongalo li kale li na oukumwe? (Tala efano pehovelo loshitukulwa.)

10 Ovayakuliongalo navo otava dulu okukwafela opo eongalo li kale li na oukumwe. Ohatu pandula oilonga yavo youdiinini eshi hava kwafele ovakulunhuongalo. Pashihopaenenwa, ohava shilipaleke kutya otu na oishangomwa ya wana oku ka longifa moukalele nohava hambelele ovo vape pokwoongala. Ohava longo yo noudiinini ngeenge tashi uya pokuwapaleka Olupale lOuhamba noku li kaleka monghalo iwa. Ngeenge hatu longele kumwe navo, ohatu xumifa komesho oukumwe nelongelokumwe eshi hatu longele Jehova. — Yelekanifa nOilonga 6:3-6.

11. Oshike ovanyasha tava dulu okuninga opo eongalo li kale li na oukumwe?

11 Ovakulunhuongalo vamwe ova kala tava longo noudiinini meongalo oule womido dihapu. Ndele paife omolwoukulupe, otashi dulika itava dulu okulonga vali shihapu ngaashi nale. Ovamwatate ovanyasha otava dulu oku va kwafela. Ngeenge ova deulwa, otava dulu okutambula ko oinakuwanifwa ya wedwa po meongalo. Konahiya ovayakuliongalo ovo hava longo noudiinini otava dulu okunangekwa po ve li ovakulunhuongalo. (1 Timoteus 3:1, 10) Ovakulunhuongalo vamwe ovanyasha ova ninga exumokomesho neendelelo, nopaife otava longo ve li ovapashukilishikandjo notava kwafele ovamwatate novamwameme momaongalo mahapu. Ohatu pandula keliyambo lovamwatate va tya ngaho. — Lesha Epsalme 110:3; Omuudifi 12:1.

LONGELENI KUMWE MOUKWANEUMBO

12, 13. Oshike tashi dulu okukwafela aveshe moukwaneumbo va kale hava longele kumwe?

12 Oshike tashi dulu okukwafela oukwaneumbo u kale u na elongelokumwe? Okukala hau ningi Elongelokalunga lOukwaneumbo oshivike keshe. Ngeenge ovadali nounona ohava kongo eemhito dokulihonga pamwe kombinga yaJehova, otava ka kala ve holafane neenghono. Peemhito da tya ngaho, otava dulu okukala have lideula osho tava ka tya moukalele, nokungaho otava ka kala ve lilongekidila nawa oukalele. Ngeenge tamu tale oilyo youkwaneumbo weni tai udifa notai ulike kutya oi hole Jehova noya hala oku mu hafifa, otashi ka xumifa komesho oukumwe moukwaneumbo.

Ngeenge ovalihomboli ove hole Jehova nohave mu longele pamwe, otava ka kala va hafa nove na oukumwe

13 Ongahelipi omushamane nomukulukadi tava dulu okulongela kumwe? (Mateus 19:6) Ngeenge ovalihomboli ove hole Jehova nohave mu longele pamwe, otava ka kala va hafa nove na oukumwe. Ovalihomboli ove na yo okukala hava ulikilafana ohole ngaashi Abraham naSara, Isak naRebekka nosho yo Elkana naHanna va li hava ningi. (Genesis 26:8; 1 Samuel 1:5, 8; 1 Petrus 3:5, 6) Kungaho, otava ka kala ve na oukumwe nove na ekwatafano liwa naJehova. — Lesha Omuudifi 4:12.

Elongelokalunga lOukwaneumbo ohali kwafele ovanyasha novakulunhu va kale moukumwe (Tala okatendo 12, 15)

14. Ngeenge omushamane ile omukulukadi woye iha longele Jehova, oshike to dulu okuninga po opo u pameke ohombo yeni?

 14 Ombiibeli oya yelifa kutya katu na okuhombolafana nomunhu oo iha longele Jehova. (2 Ovakorinto 6:14) Ndele ovamwatate novamwameme vamwe ova hombola ile va hombolwa kovanhu ovo vehe fi Eendombwedi daJehova. Vamwe otashi dulika va hangwa va hombola ile va hombolwa nale ofimbo inava tambula ko oshili. Ofimbo vamwe tashi dulika ookaume kavo kopahombo va li Eendombwedi, ndele tava fiye po oshili. Ovakriste ovo ve li meenghalo da tya ngaho, otava dulu okuninga ngaashi tava dulu opo va kaleke po eehombo davo mokukala hava dulika komayele Ombiibeli. Ashike haalushe hashi kala shipu. Pashihopaenenwa, Mary okwa kala ta longele Jehova pamwe nomushamane waye, David. Ndele lwanima, David okwa efa po okukala ha i kokwoongala. Ashike Mary okwa kala ta kendabala okukala omukulukadi e neenghedi diwa noku ulika omaukwatya opaKriste. Okwa li nokuli a honga ovana vaye vahamano kombinga yaJehova nokwa twikila okukala ha i kokwoongala nokoyoongalele. Konima yeedula eshi ounona va kula nokufiya po eumbo, Mary okwa twikila okulongela Jehova nonande osha li shidjuu kuye unene tuu eshi ounona va ya. Lwopokati opo, David okwa hovela okukala ha lesha oifo oyo Mary a kala he mu fiile. Lwanima, okwa li a hovela okukala vali ha ongala. Okatekulu kaye kokamati komido hamano oka kala alushe hake mu valekele oshipundi, nongeenge fiku olo ine uya kokwoongala, ohake mu lombwele kutya, “Tatekulu, onda li nde ku djuulukwa nena kokwoongala.” Xuuninwa, David okwa li a alukila kuJehova konima yomido 25, nopaife ye nomukulukadi waye ova hafa eshi tava longele Jehova pamwe.

15. Ongahelipi ovalihomboli ovanamido tava dulu okukwafela ovalihomboli ovanyasha?

15 Satana ota ponokele omaukwaneumbo kunena. Nomolwaasho sha fimanenena kovashamane novakulukadi ovo tava longele Jehova va kale hava longele kumwe. Taleni  kutya oshike osho tamu dulu okuninga po opo mu pameke ohombo yeni, kashi na nee mbudi kutya omwa kala mwa hombola oule wefimbo li fike peni. Ovalihomboli ovanamido otava dulu okutulila po ovalihomboli ovanyasha oshihopaenenwa shiwa. Otamu dulu okukala hamu shivi ovalihomboli ovanyasha ve mu waimine pelongelokalunga loukwaneumbo weni. Kungaho, otava ka mona kutya kashi na nee mbudi kutya ovanhu ova kala va hombola efimbo li fike peni, ova pumbwa alushe okuulikilafana ohole nokukala ve na oukumwe. — Titus 2:3-7.

“ILENI, FYE TU LONDENI KOMHUNDA YOMWENE”

16, 17. Ovo tava longele Kalunga ve li moukumwe kunena ove na eteelelo lihafifa lilipi?

16 Eshi Ovaisrael va li hava i koivilo kuJerusalem, ova li have limange oukuni kumwe. Ova li hava longekida oinima oyo va pumbwa opo va ye momalweendo a tya ngaho, nova li hava ende pamwe nokukwafelafana. Ngeenge va fiki kotembeli, ova li hava tange nokulongela Jehova pamwe. (Lukas 2:41-44) Kunena, eshi hatu lilongekidile oku ka kala mounyuni mupe, otwa pumbwa okukala twa hangana nohatu longele kumwe filufilu. Mbela owa pumbwa okuxwepopala moshinima osho?

17 Ovanhu mounyuni kave na elongelokumwe nove hole okutamanana kombinga yakeshe shimwe. Ndele fye otu li ovanelao eshi Jehova e tu kwafela tu kale tu nombili notu udite ko oshili. Oshiwana shaJehova mounyuni aushe ohashi mu longele monghedi oyo a hokwa, nosha hangana shi dulife nale nonande oshi li momafiku axuuninwa. Ngaashi sha xunganekwa kuJesaja nokuMika, ohatu i pamwe “komhunda yOmwene.” (Jesaja 2:2-4; lesha Mika 4:2-4.) Itatu ka kala tuu twa hafa neenghono eshi ovanhu aveshe kombada yedu monakwiiwa tava ka kala tava longele Jehova ‘moukumwe’!