Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Jesus okwa li omunhu a tya naanaa ngahelipi?

Jesus okwa li omunhu a tya naanaa ngahelipi?

Kape na omunhu e na efano laJesus. Ke na fiku a fanekelwe ile efano laye li ningwe oshihongwafano. Ashike, oule womafelemido omafano aye okwa kala haa holoka moinima oyo ya ningwa kovafaneki.

Oshoshili kutya ovafaneki ovo kave shii naanaa kutya Jesus okwa li a tya ngahelipi. Onghedi omo Jesus a li a fanekwa oya li ye likolelela komifyuululwakalo, kwaasho omalongelokalunga a itavela naasho ovafaneki va li tava diladila. Ashike nande ongaho, omafano avo okwa li taa dulu okunwefa mo nai etaleko lovanhu li na sha naJesus nosho yo omahongo aye.

Ovafaneki vamwe ohava faneke Jesus a utama a fa omunhu ehe na oukolele, e na eexwiki dile neendjedi dixupi ile tava divilike emono loixuna. Momafano amwe, okwa fanekwa ta monika e likalekelwa, a djalekwa oshikoroni ile a yooloka ko kovanhu aveshe. Mbela omafano aeshe oo otaa holola ngoo shili kutya Jesus osho a li ngaho? Ongahelipi hatu dulu oku shi shiiva? Onghedi imwe omokukonakona omautumbulilo oo e li mOmbiibeli oo taa dulu oku tu kwafela tu ude ko kutya otashi dulika a li a tya naanaa ngahelipi. Otaa dulu yo oku tu kwafela tu kale tu na etaleko la yuka li na sha naye.

‘OWA LONGEKIDILA NGE OLUTU’

Jesus okwa li a popya eendjovo odo meilikano peninginifo laye. (Ovaheberi 10:5; Mateus 3:13-17) Mbela olutu olo ola li la tya ngahelipi? Omido 30 lwaapo komesho yaasho, omweengeli Gabriel okwa li a lombwela Maria kutya: “Ove to ningi omufimba ndele to dala okamati, . . . Omona waKalunga.” (Lukas 1:31, 35) Onghee hano, Jesus okwa li omulumenhu a wanenena, ngaashi Adam a li a shitwa a wanenena. (Lukas 3:38; 1 Ovakorinto 15:45) Otashi dulika Jesus a li e na ondjelo iwa, notashi dulika a li a fa ina Maria oo a li Omujuda.

Jesus okwa li e na eendjedi, molwaashi osha li omufyuululwakalo wOvajuda mokuyelekanifa nOvaroma. Eendjedi daye oda li edidiliko lefimaneko, ashike kada li dile noda li hadi filwa oshisho. Nopehe na omalimbililo, Jesus okwa li ha kulula nawa eendjedi neexwiki daye noku di fila oshisho. Ovanasiri ovo ashike va li ihava kulula ko eexwiki davo, ngaashi Simson. — Numeri 6:5; Ovatokolipangeli 13:5.

Fimbo Jesus ina wanifa omido 30, okwa kala omuhongi womiti, noka li ha longifa oilongifo yoshinanena. (Markus 6:3) Notashi dulika a li e na olutu la pama. Pehovelo loukalele waye, okwa li a “taataa mo aveshe motembeli, pamwe needi neengobe, ndele a tilashi oimaliwa yovakumaani, noitaafula yavo okwe i undulila poshi.” (Johannes 2:14-17) Osha li tashi pula omunhu a kale e na eenghono opo a longe oilonga oyo. Jesus okwa li a longifa olutu olo a li a longekidilwa kuKalunga opo a dule okuwanifa po oshilonga osho e mu pa, eshi a ti: “Ondi na okuudifila oilando imwe yo evaengeli louhamba waKalunga, osheshi olo tuu eli nde li tuminwa.” (Lukas 4:43) Osha li tashi pula eenghono dihapu opo a dule okweenda ta taulula muPalestina ta udifa.

‘ILENI KWAAME, AME OHANDI MU PE ETULUMUKO’

Ohamu yaJesus nokukala ha popiwa naye noupu otashi dulika oyo ya li ya nanena kuye ovanhu aveshe ovo hava ‘longo nova lolokifwa.’ (Mateus 11:28-30) Ohamu nokunakonasha kwaye okwa li kwa tulumukifa  ovanhu ovo va li ve na ehalo lokulihonga kuye ngaashi a li a udaneka. Nokuli nounona ova li va halelela okukala popepi naJesus, nOmbiibeli oya ti: “Okwe va ukata momake aye.” — Markus 10:13-16.

Nonande Jesus okwa li a pita momayeleko fimbo ina fya, mokukala kwaye kali ta monika a nyika oluhodi. Pashihopaenenwa, okwa li a shivwa koshivilohombolo osho sha ningilwa muKana nokwa li a shitukifa omeva a ninge omaviinyu. (Johannes 2:1-11) Peemhito dimwe vali okwa li a honga ovanhu oilihongomwa ihe shi okudimbuwa. — Mateus 9:9-13; Johannes 12:1-8.

Kakele kaasho, eudifo laye ola pa keshe umwe omhito opo a kale a hafa omolweteelelo lomwenyo waalushe. (Johannes 11:25, 26; 17:3) Eshi ovahongwa vaye 70 ve mu lombwela oimoniwa oyo va mona eshi va li tava udifa, okwa ‘hafa pombada’ ndele ta ti: “Hafeni omadina eni eshi a shangelwa meulu.” — Lukas 10:20, 21.

‘NYE HASHO MU NA OKUKALA NGAHO’

Ovawiliki vomalongelokalunga vopefimbo laJesus ova li hava longifa omikalo da yoolokafana opo va yandje elitulemo kuvo vene nokuulika eenghonopangelo davo. (Numeri 15:38-40; Mateus 23:5-7) Mepingafano naasho, Jesus okwa honga ovayapostoli vaye vehe li “pangele.” (Lukas 22:25, 26) Ashike Jesus okwe va londwela a ti: “Lungameni ovanongo vomishangwa, ovo va hokwa okweenda va djala oikutu ile, nove hole okukundilwa poilandelo.” — Markus 12:38.

Mepingafano naasho, Jesus kali he liyoolola ko kongudu yovanhu, novanhu kava li have mu dimbuluka mo peemhito dimwe. (Johannes 7:10, 11) Nokuli nongeenge a li mokati kovayapostoli vaye ovadiinini 11, kali ha kala a yooloka ko kuvo. Judas, omukengeleli, okwa li a xupita Jesus shi li “oshidimbulukifo” shoku mu holola moipafi yovanhu. — Markus 14:44, 45.

Nonande kaku shiivike ouyelele muhapu, oumbangi ou liwetikile kutya Jesus kali e li ngaashi vamwe have mu faneke. Osho sha fimanenena kunena oshosho kutya ohatu mu tale ko ngahelipi, ndele haku yandja elitulemo kutya okwa li naanaa e na eholokepo la tya ngahelipi.

“OKAFIMBO KAXUPI, OUNYUNI ITAU MONO NGE VALI”

Jesus okwa fya nokupakwa mefiku olo eshi a popya eendjovo odo. (Johannes 14:19) Okwa yandja “omwenyo waye u ninge oikulila yavahapu.” (Mateus 20:28) Mefiku etitatu, Kalunga okwe mu nyumuna “pamhepo” ‘ndele te mu efa e liholole, Ye mwene’ kovahongwa vaye vamwe. (1 Petrus 3:18; Oilonga 10:40) Jesus okwa li a tya ngahelipi eshi e lihololela ovahongwa vaye? Osha fa shi li ngaha kutya ka li e na eholokepo la faafana naalo lonale, molwaashi nokuli novahongwa vaye ovo va li pamwe naye kava li ve mu dimbuluka diva. Maria Magdalena okwa li e shii pamwe Jesus omukeleli wepya; novahongwa vaye vavali ovo va li mondjila va yuka kuEmaus, ova li ve shii pamwe omweendanandjila. — Lukas 24:13-18; Johannes 20:1, 14, 15.

Kunena, otu na okutala ko ngahelipi Jesus? Konima yomido 60 eshi Jesus a fya, omuyapostoli waye omuholike Johannes okwa mona emoniko li na sha naye. Johannes ka li a mona nandenande Jesus ta file komushiyakano. Ponhele yaasho, okwa mona “Ohamba yeehamba nOmwene wo vene,” Ohamba yOuhamba waKalunga, oo mafiku ta ka finda omutondi waKalunga mwa kwa telwa eendemoni nosho yo ovakolokoshi nokweetela ovanhu omanangeko noupuna taa kalelele. — Ehololo 19:16; 21:3, 4.