Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 6 2016

 OSHIPALANYOLE SHOKOMBADA | OMAMONIKO OO TAA ULIKE KUTYA MEULU OMWA TYA NGAHELIPI

Omapulo kombinga yaavo ve li meulu

Omapulo kombinga yaavo ve li meulu

Mbela owe lipulile nale kutya meulu omwa tya ngahelipi nosho yo kutya oolyelye ve li mo? Ngeenge osho, haave auke ho lipula ngaho. Oule womayovimudo, ovanhu ova kala tava fekele shi na sha naasho. Vamwe ova itavela kutya meulu omu na ovakulu vonale ovo ve na okufimanekwa. Vamwe ohava diladila kutya eulu onhele iwa nomu na ombili, omo mu yadi ovaengeli nosho yo ovanhu vawa ovo va fya nale. Natango vamwe ohava ti kutya eulu olo eumbo loikalunga omamiliyona omafele.

Ovanhu vahapu ohava tu eemhata kutya itatu dulu okukala tu shii keshe shimwe kombinga yeulu, molwaashi kape na oo a ile ko e tu lombwele kombinga yalo. Ashike okutomhafana kwa tya ngaho okwa puka. Jesus Kristus okwa li meulu e li oshishitwa shopamhepo fimbo ine uya kombada yedu. Okwa li a lombwela ovawiliki vomalongelokalunga mefelemudo lotete shi na sha naasho a ti: “Osheshi Ame nda dja keulu hakuwanifa ehalo lange mwene, ndelenee ehalo laau a tuma nge.” Natango Jesus okwa li a yandja ouyelele odikilila kovayapostoli vaye eshi e va lombwela a ti: ‘Meumbo laTate omu na eendjuwo dihapu.’ — Johannes 6:38; 14:2.

Xe yaJesus oKalunga, nedina laye oJehova, “neumbo” laJehova oli li meulu. (Epsalme 83:19) Kape na oo ta dulu okupopya kutya meulu omwa tya ngahelipi e dule Jehova Kalunga naJesus Kristus. Ova yandja ouyelele muhapu kombinga yeulu okupitila momamoniko madidilikwedi oo va li va yandja kovadiinini.

Oshitukulwa tashi landula ko osha kundafana eevelishe dOmbiibeli odo da hokolola osho ovalumenhu vamwe va mona momamoniko mahapu. Eshi to lesha kombinga yomamoniko oo, dimbuluka kutya meulu itatu dulu okumona mo nomesho etu okomutwe ile okukwata oinima oyo i li mo. Onghee hano, ponhele yoku tu yelifila oinima monghedi oyo ita tu dulu okuuda ko, Kalunga okwa longifa omafaneko mapu okuudiwako oo taa ulike kutya meulu omwa tya ngahelipi. Omamoniko oo otae ke tu kwafela tu ude ko kutya oolyelye ve li ‘meendjuwo dihapu’ odo di li meulu.