Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 6 2016

 ONDJOKONONA YONGHALAMWENYO

Okwa tambula ko oshili yOmbiibeli nonande ke na eenyala nomaoko

Okwa tambula ko oshili yOmbiibeli nonande ke na eenyala nomaoko

Ngeenge ovanhu ve udite inava amenwa, ove hole okukwatelela koshinima shonhumba. Ame itandi dulu okuninga ngaho, molwaashi kandi na eenyala ile omaoko. Onda tetwa omaoko eshi nda li ndi na eedula heyali, opo shi xupife omwenyo wange.

Onda dalwa mo 1960, eshi meme a li e na eedula 17. Tate okwe tu fiya po manga inandi dalwa. Fye nameme okwa li hatu di pamwe natatekulu nameekulu moBurg, okadoolopa kanini ka li moGerman Democratic Republic ile moEast Germany. Ovanhu vahapu kava li va itavela muKalunga, novakwanedimo vange navo osho va li va itavela ngaho. Kalunga ka li a fimana kufye.

Eshi handi kulu, onda li handi hafele okukala natatekulu. Okwa kala ha pula nge tu longe pamwe naye oilonga ihapu, ngaashi okulonda komiti ndi ke ko oitai. Onda li ndi hole oilonga oyo eshi nda li okaana. Kanda li ndi na oshisho shasha monghalamwenyo nonda li nda hafa.

ONGHALAMWENYO YANGE OYA LUNDULUKA OMOLWOSHIPONGA

Eshi nda li ndi na eedula heyali, opa li pa ningwa oshinima shinyikifa oluhodi. Onda hangika ashike opo nda hovele ofikola odula onhivali. Fimbo nda li mondjila handi shuna keumbo, onda li nda londa kopala yolusheno. Eshi nda ya pombada eemeta 8, onda dengwa kolusheno ndele handi kala ndihe shi apa ndi li. Eshi nda ka penduka ndi li moshipangelo, okwa li ndi udite omaoko ange a fya. Omaoko ange aeshe okwa li a pya neenghono, nomolwaasho okwa li e na okutetwa ko opo ohonde yange iha kwatwe komukifi. Meme, meekulu natatekulu ova li va nyemata neenghono. Ashike eshi nda li okaana, kanda li ndi udite filufilu kutya okukala ndihe na omaoko otaku ka kuma ngahelipi onghalamwenyo yange aishe.

Eshi nda dja mo moshipangelo, onda shuna kofikola. Ounona kofikola ova li tava shindi nge, tava undula nge noku kupula nge oinima molwaashi kanda li ndi na eshi handi dulu okuninga po opo ndi liamene. Okwa li ndi udite nai unene eshi handi ningwa nai. Opo nee onda li nda tumwa kofikola yoilema koBirkenwerder, oyo ya li omuhandjo wounona voilema. Molwaashi ofikola oya li kokule neumbo, meme, tatekulu nameekulu kava li hava dulu okuuya okutalela nge po. Okwa li ashike handi va mono pomafudo. Oule weedula omulongo da shikula ko, onda ka kala ndihe li vali nameme, nameekulu natatekulu.

NGHEE NDA KULA NDIHE NA EENYALA NOMAOKO

Onde lihonga okulonga oilonga ihapu handi longifa eemhadi dange. Mbela oto diladila kutya omunhu ota kala e udite ngahelipi ta li nofoloko ile nonguto ei kwete nominwe daye dokeemhadi? Onda li nda kendabala okulihonga okuninga ngaho. Onde lihonga yo okulikusha komayoo nokufula eexwiki dange handi longifa eemhadi. Onda li nokuli nda hovela okuudika neemhadi  ngeenge handi popi novanhu. Eemhadi dange oda ninga eenyala dange.

Eshi nda wanifa eedula omulongo nasha, onda li ndi hole okulesha omambo omahepu ounongononi. Omafimbo amwe onda li handi kala handi diladila nda fa ndi wete ngeno ndi na omaoko opaunongononi oo taa pitike nge ndi longe keshe shimwe. Eshi nda li ndi na eedula 14, onda li nda tameka okunwa omakaya. Onda li handi kala ndi udite etumba nonokutya ondi li ngaashi ovanhu aveshe. Onda li nda fa handi ti: ‘Naame ohandi dulu okuninga ngaho. Omakaya ohaa nuwa kovakulunhu, kutya nee ove na omaoko ile hasho.’

Onda kala alushe nde lipyakidila, nokukufa ombinga moinima i lili noku lili. Onda li nda ninga oshilyo shongudu yovanyasha hai ifanwa Free German Youth, ehangano lovanyasha hali pewa omakwafo kepangelo, nonda li nda ninga hamushanga, ndi na oshinakuwanifwa she likalekelwa moshitukulwa shetu. Onda li yo nda waimina ongudu yolwiimbo, handi toto outevo nonda li handi kufa ombinga momaudano oilema. Konima eshi nda dja koilonga yokudeulwa, onda li nda tameka okulonga mehangano li li modoolopa yetu. Eshi handi kulu, onda kala handi djala omaoko opaunongononi molwaashi okwa li nda hala okukala ndi li ngaashi ovanhu vakwetu.

ONDA TAMBULA KO OSHILI YOMBIIBELI

Efiku limwe fimbo nda li nda teelela eshina lokolutenda ndi ye koilonga, pwaame opa li pe uya omulumenhu umwe. Okwa li a pula nge ngeenge onda diladila ngoo nale kutya Kalunga ota dulu okwaalulila nge omaoko ange. Onda li nda kumwa. Oshoshili kutya okwa li nda hala ndi kale vali ndi na omaoko, ashike onda li ndi wete itashi shi shiiva. Molwaashi kanda li nda itavela muKalunga, onda li nda tomwa kutya Kalunga ke ko. Okudja opo, okwa li nda konga po onghedi imwe yokuhenuka omulumenhu oo.

Efiku limwe, omunailonga mukwetu okwa li a pula nge tu ka talele po ovakwanedimo vaye. Fimbo twa li hatu nu okoofi, ovadali vaye ova li va tameka okupopya kombinga yaKalunga, Jehova. Osha li oshikando shange shotete handi udu edina laKalunga. (Epsalme 83:18, NW) Ashike onda li handi patana momutima handi ti: ‘Itaku dulu okukala Kalunga, kashi na nee mbudi kutya edina laye olyelye. Ohandi va ulikile kutya ova puka.’ Molwaashi onda li ndi udite kutya omataleko ange oku li mondjila, onda li nda dimina eenghundafana dOmbiibeli. Onda li nda kumwa molwaashi kanda li nda dula okuyandja oumbangi oo tau ulike kutya Kalunga ke ko.

Eshi twa li hatu konakona omaxunganeko Ombiibeli, eitavelo olo kutya kaku na Kalunga ola enda tali kana mo momadiladilo ange. Omaxunganeko mahapu okwa wanifwa, nonande okwa shangwa omido omafele ile omayovi da pita. Pomhito imwe eshi kwa li hatu ningi eenghundafana dopaMbiibeli, okwa li hatu yelekanifa eenghalo odo di li mounyuni nomaxunganeko oo e li muMateus etukulwa 24, Lukas etukulwa 21 na 2 Timoteus etukulwa 3. Ngaashi ashike omadidiliko a yoolokafana omukifi haa kwafele ndokotola a mone kutya omunaudu ota vele shike, oiningwanima ya yoolokafana oyo ya tumbulwa momaxunganeko oo, oya kwafela nge ndi mone kutya otu li “momafiku axuuninwa” * oo a popiwa mOmbiibeli. Onda li nda kumwa neenghono. Omaxunganeko oo okwa wanifwa moipafi yange.

Onda li nda tomhwa kutya osho handi lihongo oshili. Onda tameka okwiilikana kuJehova Kalunga ndele handi  efa po okunwa omakaya, nonande onda li nda pikwa unene oule weedula di dule pomulongo. Onda li nda twikila nekonakono lange lOmbiibeli oule wodula lwaapo. Mo 27 Aprili 1989, onda li nda ninginifwa meholeko metemba lokulikoshela molwaashi pefimbo opo Eendombwedi oda li da shilikwa moEast Germany.

OKUYANDJA KUVAMWE

Molwaashi otwa li twa shilikwa, otwa li hatu ongala moungudu vanini momaumbo nonda li ashike ndi shii ovaitaveli vakwetu vanini. Ombadilila, onda li nda pitikwa kepangelo ndi ye koWest Germany oko Eendombwedi da li inadi shilikwa. Osho osha li oshikando shange shotete monghalamwenyo okwoongala poyoongalele i na sha nOmbiibeli nokumona ovamwameme novamwatate omayovi. Osho osha li oshimoniwa shitunhula.

Eshi Ekuma laBerlin la teka po, Eendombwedi daJehova kada li vali da shilikwa. Hauxuuninwa, okwa li hatu dulu okulongela Jehova Kalunga twa manguluka. Onda li nda hala okutamununa mo oilonga yange yokuudifa. Ndele onda li nda tila okupopya novanhu ndihe va shii. Onda li ndi udite inandi fimana omolwoulema wange nosho yo eshi nda kala efimbo lile meumbo loilema eshi nda li okaana. Ashike mo 1992, onda li nda kendabala okulonga eevili 60 omwedi umwe. Onda li nda pondola nonda mona ehafo linene. Onda li nda tokola okuninga ngaho omwedi keshe nonda pondola oku shi ninga oule weedula nhatu lwaapo.

Ohandi kaleke momadiladilo eendjovo di li mOmbiibeli tadi ti: “Olyelye oshingone, naame ndi ha kale oshingone?” (2 Ovakorinto 11:29) Nonande ondi li oshilema, natango ondi na omadiladilo nondaka. Onghee ohandi kendabala alushe okukwafela vamwe. Molwaashi kandi na omaoko, ohandi dulu okuuda ko filufilu onghalo yaavo ve na omangabeko. Ondi shi shii kutya omunhu oha kala e udite ngahelipi ngeenge a halelela okuninga oshinima shonhumba osho ita dulu. Ohandi kendabala alushe okutwa omukumo ovo hava kala ve udite ngaho. Okuyandja kuvamwe monghedi ya tya ngaho ohashi hafifa nge.

Okuudifila vamwe onghundana iwa ohashi hafifa nge

JEHOVA OHA KWAFELE NGE KESHE EFIKU

Omafimbo amwe ohandi kala nda polimana. Onda halelela okukala ngaashi ovanhu vakwetu. Ohandi dulu okulonga oilonga ihapu yakeshe fiku kwaame mwene, ashike ohashi kufa efimbo lile, eenghendabala nosho yo eenghono shi dulife ovanhu ovo vehe na oulema. Efiku keshe ohandi kala nda tokola toko kutya: ‘Aishe ohandi i dulu omolwaau ta pameke nge.’ (Ovafilippi 4:13, yelekanifa no-NW.) Efiku keshe Jehova oha pe nge eenghono odo nda pumbwa opo ndi dule okulonga oilonga yakeshe efiku. Ondi shii kutya Jehova ina efa okukwafela nge. Nomolwaasho inandi hala okweefa po oku mu longela.

Jehova okwa nangeka nge noupuna eshi a pange oukwaneumbo, oshinima osho nda li nda hala okudja kounona. Ondi na omukulukadi ito mu pewa luvali, wedina Elke, oo e na ohole nomunalukeno. Kakele kaasho, Eendombwedi daJehova omamiliyona oda ninga ovamwatate novamwameme vopamhepo, oumwainafana womounyuni aushe.

Ame nomukulukadi wange omunahole, Elke

Onda hekelekwa yo keudaneko laKalunga li na sha nOparadisa eshi ta ka ‘shitukifa oinima aishe i ninge ipe,’ mwa kwatelwa omaoko ange. (Ehololo 21:5) Paife ondi udite ko nawa eudaneko olo ngeenge handi diladila shi na sha naasho Jesus a longa eshi a li kombada yedu. Mepakumo leisho, Jesus okwa li a velula oilema nokwa velula okutwi komulumenhu oko ka li ka tetwa ko. (Mateus 12:13; Lukas 22:50, 51) Omaudaneko aJehova nosho yo oikumwifilonga oyo Jesus a longa oya tomha nge ndi itavele kutya mafiku ohandi ka kala ndi li ngaashi nda li.

Ndele enangekonoupuna linenenene olo nda mona, osheshi nda shiiva Jehova Kalunga. Okwa ninga tate nakaume kange, omuhekeleki wange noha pameke nge. Ondi udite ngaashi ohamba David eshi ya ti: ‘Omwene Oye omupameki wange. Onda mona ekwafo, naasho osha nyakula omutima wange.’ (Epsalme 28:7) Onda hala okundalapatela oshili oyo ina ondilo monghalamwenyo yange aishe. Onde i tambula ko nonande kandi na eenyala nomaoko.

^ okat. 17 Opo u mone ouyelele muhapu kombinga yomadidiliko omafiku axuuninwa, tala etukulwa 9 “Mbela otu li ‘momafiku axuuninwa’?” membo Ombibeli otai hongo lela shike? la nyanyangidwa kEendombwedi daJehova notali dulu yo okutapwa ko-www.jw.org/kj.