Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo  |  No. 6 2016

 OSHIPALANYOLE SHOKOMBADA | OMAMONIKO OO TAA ULIKE KUTYA MEULU OMWA TYA NGAHELIPI

Omamoniko e na sha naavo ve li meulu

Omamoniko e na sha naavo ve li meulu

Ombiibeli oya hokolola omamoniko mahapu mahokwifa oo tae tu kwafele tu kale twa fa tu wete meulu omo ihatu dulu okumona nomesho etu okomutwe. Ohatu ku ladipike u a konakone noukeka. Nonande oinima imwe oyo ya hokololwa momamoniko oo oyopafaneko, omafaneko otaa dulu oku ku kwafela u kale wa fa u wete ovo hava kala meulu nou ude ko yo kutya otava dulu oku tu ningila shike.

JEHOVA OMUKOMBADAMBADA

“Meulu omwa kala olukalwapangelo nomolukalwapangelo okwa kala umwe omutumba. Ndele ou a kala omutumba okwa li a fa emanya layaspis nolasardis, nolukwalwapangelo ola dingililwa kouta wodula, nolupe lao ola fa osmaragid.” — Ehololo 4:2, 3.

‘Opa li pa dingililwa kevadimo. Ngaashi outa wodula hau monika moilemo mefiku lodula, osho ngaha evadimo le shi dingilila la li. Osho olupe levadimo lOmwene la li mokutala.’ — Hesekiel 1:27, 28.

Omamoniko oo a li a pewa omuyapostoli Johannes nomuprofeti Hesekiel, otaa faneke ewapalo laKalunga Jehova, Omukombadambada, noinima oyo hatu dulu okufaneka noupu momadiladilo etu, ngaashi omamanya taa vema, outa wodula nosho yo olukalwapangelo la wapala. Otae tu hololele kutya Jehova oku na eholokepo likumwifi, la wapala, lihokwifa notali tulumukifa.

Omamoniko oo e na sha naKalunga otaa tu kumwe neendjovo domupsalme umwe oo a ti: “Omwene omunene, noku nokufimanekwa pombada, oha tilika komesho yookalunga aveshe; osheshi ookalunga aveshe voiwana, ovo oikalunga, ndelenee Omwene Oye Omushiti womaulu. Etumbalopangelo noshinge otai mu tetekelele, eenghono nevilimo otai yadifa ouyapuki woye.” — Epsalme 96:4-6.

Nonande Jehova Omukombadambada, ote tu shivi tu kale hatu popi naye okupitila meilikano note tu shilipaleke kutya ota ka pwilikina kufye. (Epsalme 65:3) Kalunga oku tu hole nohe tu file oshisho neenghono, nomolwaasho omuyapostoli Johannes a popya oshili eshi a ti: “Kalunga Oye ohole.” — 1 Johannes 4:8.

JESUS OKU LI NAKALUNGA

“[Omuhongwa Stefanus], okwa li e yadi Omhepo Iyapuki, nokwe liamena keulu ndee ta mono oshinge shaKalunga naJesus e li ofika kolulyo laKalunga. Ndele okwa tya: Taleni, ame ndi wete eulu la yeuluka nOmona wOmunhu e li ofika kolulyo laKalunga.” — Oilonga 7:55, 56.

Omafiku manini fimbo Stefanus ina mona emoniko olo, Jesus okwa li a dipaifwa kovawiliki vOvajuda ovo Stefanus a li ta popi navo. Emoniko olo ola li la koleka kutya Jesus oku na omwenyo nonokutya okwa nyumunwa nokwa tumbalekwa. Omuyapostoli  Paulus okwa popya shi na sha naasho a ti: ‘Jehova okwa nyumuna Jesus movafi ndele e mu tula omutumba kolulyo laye momaulu, kombada yomapangelo aeshe nomauhamba meenghonopangelo neenghono noumwenepangelo nakeshe tuu edina hali tumbulwa hamefimbo eli alike lopaife lounyuni ou, ndelenee mulinya tali uya.’ — Ovaefeso 1:20, 21.

Kakele kokupopya kombinga yondodo yaye yopombada, Omishangwa otadi ulike yo kutya Jesus oha file oshisho ovanhu neenghono, ngaashi Jehova. Pefimbo loukalele waJesus wokombada yedu, okwa li a velula ovanaudu, oilema nokwa nyumuna oonakufya nokuli. Okwa ulika ohole yaye inene yokuhola Kalunga novanhu okupitila mefyo laye lopayambo. (Ovaefeso 2:4, 5) Molwaashi Jesus oku li kolulyo laKalunga, mafiku ota ka ulika eenghonopangelo daye eshi ta ka pa ovanhu ovaduliki omanangeko noupuna mounyuni aushe.

OVAENGELI OVAKALELE VAKALUNGA

“Fimbo handi [omuprofeti Daniel] shi tale, okwa dikwa omalukalwapangelo, ndele Omuxungu [Jehova] ta kala omutumba. . . . eyovi lwomayovi ove mu longela, nomayovi omulongo lwomayovi omulongo ova kala ofika koshipala shaye.” — Daniel 7:9, 10.

Memoniko olo li na sha neulu, Daniel ina mona ashike omweengeli umwe, ndele okwa mona ovaengeli vahapuvahapu. Emoniko olo ka la li tuu likumwifi neenghono! Ovaengeli ovo oishitwa yopamhepo i na oshinge, eendunge nosho yo eenghono. Ova tukulwa paendodo, ngaashi ovaserafi novakerubi. Ombiibeli oya tumbula ovaengeli lwoikando i dule po 250.

Ovaengeli kave fi ovanhu ovo va li kombada yedu. Kalunga okwa shita ovaengeli nale fimbo ovanhu inava shitwa. Eshi edu tali shitwa, ovaengeli ova hangwa va shitwa nova li tava ingida va hafa. — Job 38:4-7.

Onghedi imwe omo ovaengeli ovadiinini hava yakula Kalunga oyo okukufa ombinga moilonga ya fimanenena oyo tai longwa kombada yedu kunena, okuudifwa kwonghundana iwa yOuhamba waKalunga. (Mateus 24:14) Okukufa ombinga kwavo moilonga oyo okwa ulikwa memoniko olo la li la monika komuyapostoli Johannes, eshi a ti: “Nda mona omwengeli umwe a tuka pokati keulu ou e kwete evangeli laalushe li nokuudifilwa kombada yedu  novapaani aveshe nomapata aeshe nomalaka aeshe noiwana aishe.” (Ehololo 14:6) Nonande ovaengeli ihava popi novanhu kunena ngaashi va li ve shi ninga omafimbo amwe mefimbo lonale, ohava wilike ovo tava udifa onghundana iwa va ye kovanamitimadiwa.

SATANA OTA PUKIFA OVANHU OMAMILIYONA

“Meulu omwa tukuluka olwoodi; Mikael [Jesus Kristus] novaengeli vaye va lwifa ongadu. Nongadu novaengeli vaye ova lwa yo, ndele ova nyengwa, nonhele yokukala kwavo meulu inai monika vali. Nongadu inene ya ekelwashi, eyoka likulu, la ifanwa ondiaboli naSatana, ou ta hongaula ounyuni aushe, okwa ekelwa pedu, novaengeli vaye ova ekelwashi yo . . . pamwe naye.” — Ehololo 12:7-9.

Pomhito imwe meulu kamwa li ombili. Pehovelo lokushitwa kwovanhu, omweengeli umwe okwa li a halelela okulongelwa, ndele ta hoolola okukala ita dulika kuJehova, nokuninga Satana, tali ti “Omupataneki.” Konima yefimbo, ovaengeli vamwe vali ova li ve mu waimina ndele tava ningi eendemoni. Molwaashi ovakolokoshi neenghono, otava pataneke Jehova filufilu nova nwefa mo ovanhu vahapu va kale ihava dulika kewiliko laJehova lopahole.

Satana neendemoni daye ova nyonauka novakwanyanya. Ove tonde ovanhu nova etifa okumona oixuna kuhapu neenghono kombada yedu. Pashihopaenenwa, Satana okwa dipaa oimuna novapiya vomulumenhu omudiinini Job. Natango, okwa dipaa ounona omulongo vaJob mokweetifa “omhepo inene” i hanaune po eumbo omo va li. Konima yaasho, Satana okwa li a etela Job ‘oidinda ii koshi yomhadi fiyo okombada yomutwe.’ — Job 1:7-19; 2:7.

Ashike nande ongaho, Satana ota ka hanaunwa po mafiku. Okudja eshi a umbwa mo meulu, oku shii kutya oku na ko ‘okafimbo kaxupi kongaho.’ (Ehololo 12:12) Satana okwa tokolwa, naasho oshi li onghundana iwa neenghono.

OVO VA DJA KOMBADA YEDU

“[Jesus] we va kulilila Kalunga nohonde yoye mukeshe oludi nelaka novanhu noiwana, ndele we va ningila Kalunga ketu ouhamba novapristeri, ndele tava ka kala nokupangela kombada yedu.” — Ehololo 5:9, 10.

Ngaashi ashike Jesus a nyumunwa okudja kombada yedu a ka kale nomwenyo meulu, ope na yo vamwe ovo navo hava nyumunwa va ka kale meulu. Jesus okwa lombwela ovayapostoli vaye ovadiinini a ti: ‘Ohandi ke mu longela onhele. Ohandi aluka, ndele handi mu ile, nanye yo mu kale apa Ame ndi li.’ — Johannes 14:2, 3.

 Ovo tava i meulu, otava i mo nelalakano. Otava ka kala ovapangeli pamwe naJesus vepangelo lOuhamba, olo hauxuuninwa tali ka pangela ovanhu aveshe kombada yedu noku va etela omanangeko noupuna. Ouhamba oo oo Jesus a li a lombwela ovashikuli vaye va ilikane u uye moshihopaenenwa sheilikano, a ti: “Tate yetu ou u li meulu! Edina loye nali yapulwe; ouhamba woye nau uye; ehalo loye nali wanifwe kombada yedu yo ngaashi meulu.” — Mateus 6:9, 10.

OVO VE LI MEULU OTAVA KA NINGA SHIKE?

“[Ame omuyapostoli Johannes] nda uda ondaka inene ya dja meulu, tai ti: Tala, etwali laKalunga oli li povanhu, . . . ndele ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” — Ehololo 21:3, 4.

Emoniko lopaxunganeko olo otali ulike kefimbo olo eshi epangelo lOuhamba waKalunga, olo la fikama po muJesus naavo va nyumunwa okudja kombada yedu, tali ka xulifa po epangelo laSatana nokuninga edu oparadisa. Oinima oyo ya kala tai etele ovanhu okumona oixuna noluhodi linene itai ka kala po vali. Efyo nalo itali ka kala po vali nokuli.

Ndele mbela ongahelipi shi na sha novanhu omabiliyona ovo va fya ndele itava ka nyumuninwa omwenyo womeulu? Otava ka nyumunwa va ka kale nomwenyo fiyo alushe mOparadisa kombada yedu. — Lukas 23:43.

Omamoniko oo otae tu shilipaleke kutya Jehova Kalunga nOmona waye, Jesus Kristus, nosho yo ovaengeli ovadiinini naavo va kulilwa kedu, ohave tu file oshisho neenghono nove tu halela ouwa. Opo u lihonge shihapu kutya otava ka ninga shike, ohatu ku shivi u ninge ekwatafano nEendombwedi daJehova ile u ye konhele yetu yokointaneta, www.jw.org/kj, ndele to tape embo Ombibeli otai hongo lela shike?