Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 5 2016

 OSHIPALANYOLE SHOKOMBADA OPENI TO DULU OKUMONA EHEKELEKO?

Atusheni otwa pumbwa ehekeleko

Atusheni otwa pumbwa ehekeleko

Mbela oto dimbuluka wa li wa punduka fimbo wa li okaana? Tashi dulika wa li we liteta konyala ile wa pulunyuka mongolo. Mbela oto dimbuluka nghee meme woye a li e ku hekeleka? Otashi dulika a li a wapaleka oshipute shoye ndele te shi mange noshilapi. Owa li to kwena, ashike eendjovo dameme woye tadi hekeleke naashi e ku papatela oya li ye ku ningifa u kale u udite u li po xwepo. Pefimbo opo monghalamwenyo yoye, owa li ho mono diva ehekeleko.

Ashike eshi hatu kulu, onghalamwenyo ohai kala unene ya kitakana. Omaupyakadi ohaa kala a kwata moiti, noihashi kala shipu okumona ehekeleko. Ndele shinyikifa oluhodi, omaupyakadi ovakulunhu itaa dulu okukandulwa po noupu noshilapi shokumanga nosho yo epapatelo lomudalakadi. Natu ka tale koihopaenenwa imwe.

  • Mbela owa li wa tila pomhito yonhumba eshi wa kanifa oilonga? Julian okwa ti kutya eshi a lekelwa mo moilonga, okwa kala a polimana neenghono omolwehaluko. Okwa li te lipula ta ti: ‘Ohandi ka fila ngahelipi oshisho oukwaneumbo wange? Nghee ngoo nda kala handi longo noudiinini omido dihapu, omolwashike ofeema i wete ndihe na oshilonga shasha?’

  • Otashi dulika wa nyika oluhodi omolwohombo yoye oyo ya teka? Raquel okwa ti: “Eshi omushamane wange a fiya nge po ombadilila eemwedi 18 da pita, onda li nda nyika oluhodi neenghono. Omutima wange owa li wa teyauka neenghono. Onda li ndi udite ouyahame palutu nopamaliudo. Onda li nda tila neenghono.”

  • Otashi dulika u na omukifi wa kwata moiti, oo tau monika itau xwepopala. Otashi dulika omafimbo amwe ho kala u udite ngaashi tatekulululwa Job oo a ti: “Nda kuta! Inandi hala okukala nomwenyo fiyo alushe.” (Job 7:16) Otashi dulika ho kala u udite ngaashi Luis, omushamane womido 80 nasha, oo a ti: “Omafimbo amwe ohandi kala ndi wete kutya onda teelela ashike okufya.”

  • Ile otashi dulika wa hala ehekeleko omolwefyo lomuholike woye. Robert okwa ti: “Eshi omonamati wange a fila moshiponga shinene shodila, tete kanda li nde shi itavela. Onda ka kala ndi udite ouyahame, ngaashi oo wa popiwa kOmbiibeli u li ngaashi omutima wa tyuulwa keongamukonda.” — Lukas 2:35.

Robert, Luis, Raquel naJulian ova li va mona ehekeleko, nokuli nomeenghalo odo di nyikifa oluhodi. Ova li va hekelekwa kOmunhu a denga mbada, Kalunga Omunaenghono adishe. Kalunga oha hekeleke ngahelipi ovanhu? Mbela naave ote ke ku pa ngoo ehekeleko olo wa pumbwa?