Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 5 2016

 OSHIPALANYOLE SHOKOMBADA | OPENI TO DULU OKUMONA EHEKELEKO?

Nghee Kalunga ha hekeleke ovanhu

Nghee Kalunga ha hekeleke ovanhu

Omuyapostoli Paulus okwa ti kutya Jehova * ‘oKalunga kehekeleko alishe, ou te tu hekeleke moudjuu wetu aushe.’ (2 Ovakorinto 1:3, 4) Kungaho, Ombiibeli otai tu shilipaleke kutya ovanhu aveshe otava dulu okukwafelwa kuKalunga nonokutya Tate yetu womeulu ota dulu oku tu hekeleka kashi na nee mbudi kutya ohatu hangwa komaupyakadi a tya ngahelipi.

Opo tu hekelekwe kuKalunga, otu na okuninga po sha. Ongahelipi hatu dulu okumona ekwafo landokotola ngeenge inatu ninga oshilaye tu ye ko kuye? Omuprofeti Amos okwa pula a ti: “Vavali otava kala tuu nokweenda pamwe, fimbo inava udafana tete?” (Amos 3:3) Onghee hano, Omishangwa otadi tu ladipike tadi ti: “Eheneni kuKalunga, opo nee Ye ta ehene kunye.” — Jakob 4:8.

Ongahelipi hatu dulu okukala noushili kutya Kalunga ota ka ehena popepi nafye? Shotete, omolwaashi ohe tu lombwele lwoikando kutya okwa hala oku tu kwafela. ( Tala oshimhungu.) Oshitivali, omolwaashi otu na oumbangi wa yela wovanhu ovo va hekelekwa kuKalunga kunena nosho yo mefimbo lonale.

Ngaashi ovanhu vahapu ovo tava kongo ekwafo laKalunga kunena, ohamba David nayo oya li ya hangwa komaudjuu. David okwa li a ilikana Jehova pomhito imwe a ti: “Uda ondaka yomailikano ange.” Mbela Kalunga okwa li ngoo e mu nyamukula? Heeno. David okwa ti vali: ‘Onda mona ekwafo, osho nee sha nyakula omutima wange.’ — Epsalme 28:2, 7.

ONGHANDANGALA OYO JESUS TA DANA MOKUHEKELEKA AVESHE OVO TAVA LILI

Kalunga okwa pa Jesus oshinakuwanifwa shinene shokuhekeleka ovanhu. Okwa pa Jesus oilonga ‘yokumanga ava ve na omutima wa nyanyaulwa’ nosho yo “okuhekeleka aveshe ava va polimana.” (Jesaja 61:1, 2) Ngaashi sha xunganekwa, Jesus okwa li e hole ovanhu ovo va li ‘hava longo nova lolokifwa.’ — Mateus 11:28-30.

Jesus okwa li a hekeleka ovanhu moku va pa omayele opandunge, mokuungaunga navo nolune, nomafimbo amwe, okwa velula ovanaudu. Efiku limwe omunashilundu umwe okwa li a indila Jesus a ti: ‘Ove ngeenge owa hala, oto dulu okuyelifa nge.’ Jesus okwa li e mu etela onghenda ndele ta ti “Onda  hala, yela.” (Markus 1:40, 41) Opo nee omunashilundu oo okwa li a veluka.

Kunena, Omona waKalunga ke li kombada yedu opo e tu hekeleke e li po komudidi. Ashike Xe, Jehova, ‘Kalunga kehekeleko alishe,’ ota twikile okukwafela ovo ve na omhumbwe. (2 Ovakorinto 1:3) Natu ka tale koinima inhe ya fimanenena oyo Kalunga ha longifa okuhekeleka ovanhu.

  • Ombiibeli. “Keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nomehekeleko lomomishangwa.” — Ovaroma 15:4.

  • Omhepo iyapuki yaKalunga. Okafimbo kaxupi konima yefyo laJesus, eongalo alishe lopaKriste ola li li na ombili. Omolwashike mbela? ‘Ola enda metilo lOmwene nomokupopilwa komhepo iyapuki.’ (Oilonga 9:31) Omhepo iyapuki, eenghono daKalunga tadi longo, oi na eenghono dinene. Kalunga ota dulu oku i longifa opo a hekeleke keshe umwe, kutya nee oku li monghalo ya tya ngahelipi.

  • Eilikano. Ombiibeli oye tu ladipika tai ti: “Kaleni mu he na nande oshisho shasha.” Ponhele yaasho otai ti: ‘Oufyoona weni u shiivifileni Kalunga, nombili yaKalunga ei i dule eendunge adishe, otai ka amena omitima deni nomadiladilo eni.’ — Ovafilippi 4:6, 7.

  • Ovakriste vakwetu otava dulu oku tu hekeleka momafimbo madjuu. Omuyapostoli Paulus okwa ti kutya ovalongi pamwe naye ova li ‘ve mu hekeleka’ eshi a li ‘moudjuu nomokufininikwa.’ — Ovakolossi 4:11; 1 Ovatessaloniki 3:7.

Ndele otashi dulika u lipule kutya mbela osho ohashi ningwa ngahelipi meenghalo dolela. Natu ka taleni nawa koimoniwa yovanhu ovo va li momaudjuu oo a tumbulwa metetekelo. Ngaashi vo, oto dulu okumona kutya Kalunga oha wanifa po natango eudaneko laye lopahole olo tali ti: “Ngaashi ina ta hekeleke omona, osho Ame handi ke mu hekeleka.” — Jesaja 66:13.

^ okat. 3 Jehova olo edina laKalunga ngaashi sha popiwa mOmbiibeli.