Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Konyala oilyo yomalongelokalunga aeshe manene oya itavela kutya omwenyo womunhu ihau fi

 OSHIPALANYOLE SHOKOMBADA | OMBIIBELI OTAI TI NGAHELIPI KOMBINGA YOMWENYO NOSHO YO EFYO?

Epulo tali limbililike

Epulo tali limbililike

OVANHU ove na omataleko mahapu a yoolokafana e na sha nomwenyo nosho yo efyo. Vamwe ove udite kutya ngeenge ova fi, otava ka kala nomwenyo, tashi dulika ve li molupe limwe ile konhele imwe. Vamwe ove udite kutya otava ka dalululwa va ka kale nomwenyo vali. Vamwe ohava diladila yo kutya efyo olo exulilo longhalamwenyo.

Otashi dulika wa itavela shimwe shi lili shi na sha naasho, she likolelela kunghee wa tekulwa ile keputuko leni. Molwaashi ope na omadiladilo a yoolokafana neenghono e na sha naasho hashi ningwa po pefyo, mbela ope na omunhu wonhumba ile opo hatu dulu okumona omanyamukulo e shii okulineekelwa nooshili kepulo olo tali limbililike?

Oule womafelemido, ovawiliki vomalongelokalunga ova kala tava hongo kutya omwenyo womunhu ihau fi. Konyala oilyo yomalongelokalunga aeshe manene, ngaashi Ovakriste, Ovahindu, Ovajuda, Ovamoslema nosho yo amwe, oya itavela kutya omwenyo womunhu ihau fi, nohau xupu po ngeenge olutu la fi ndele tau ka kala monhele omo hamu kala oishitwa yopamhepo. Mepingafano naasho, Ovabuddha ova itavela kutya okupitila mokudalululwa lwoikando, eenghono, ile eenghono dopamadiladilo odo di li momunhu otadi dulu okuya monghalo yehafo linene hai ifanwa Nirvana.

Omolwomahongo oo, ovanhu vahapu mounyuni ova itavela kutya efyo ohali yeululile omunhu omhito yoku ka kala nomwenyo kounyuni umwe u lili. Onghee hano, vahapu ove wete kutya efyo oli li oshitukulwa sha fimana shonghalamwenyo, nonokutya okufya oku li oshitukulwa shehalo laKalunga. Ndele mbela Ombiibeli otai ti shike kombinga yaasho? Alikana lesha oshitukulwa tashi landula. Enyamukulo otashi dulika li ku kumwife.