Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 4 2016

Ovamasorete ova li va tapa noukeka Omishangwa

 OSHIPALANYOLE SHOKOMBADA | NGHEE OMBIIBELI YA XUPA

Ombiibeli oya xupa nonande opa li eenghendabala dokulundulula etumwalaka layo

Ombiibeli oya xupa nonande opa li eenghendabala dokulundulula etumwalaka layo

ESHONGO: Omashongo oo a li a taalelwa kOmbiibeli ngaashi okukulupa nomapataneko e na sha nomishangwatonywa inaa dula okuhanauna po Ombiibeli. Kakele kaasho, ovashangululi novatoloki vamwe ova li va kendabala va lundulule etumwalaka lOmbiibeli. Ova li va kendabala okutoloka Ombiibeli monghedi oyo tai wapalele omahongo avo ponhele yomahongo avo oo a wapalele Ombiibeli. Natu ka taleni koihopaenenwa tai landula:

  • Onhele yelongelokalunga: Pokati kefelemido etivali netine K.O.P., ovashangi vomambo atano otete Omishangwa dOvasamaria ova li va weda muExodus 20:17 outumbulilo “kondudu yaGerisim. Konhele oyo, oko u na okutunga oaltari.” Ovasamaria ova li va ninga ngaho opo Omishangwa di yambidide etungo lotembeli olo la li kondudu yaGerisim.

  • Ehongo loukwatatu: Konima eshi Ombiibeli ya pwa okutolokwa meni lomido 300, omushangi nomutoti po wehongo loukwatatu okwa weda mu 1 Johannes 5:7 oitya ngaashi “meulu, Xe, Ondjovo nOmhepo iyapuki, naava vatatu ove li umwe.” MOmishangwa dikulu dopehovelo kamwa li mu na omautumbulilo oo. Omuhongwanhu wOmbiibeli Bruce Metzger okwa ti: “Okudja mefelemudo etihamano okuyuka komesho, omautumbulilo oo okwa li haa holoka lwoikando momitonywashangwa dOshilatina shikulu.”

  • Edina laKalunga: Ovatoloki vOmbiibeli vahapu ova li va tokola okukufa mo edina laKalunga mOmishangwa ve likolelela koidila yOshijuda omolweenghonopangelo davo. Ova pingena po edina olo nomadinafimaneko ngaashi “Kalunga” ile “Omwene.” Omadinafimaneko oo eshi a longifwa mOmbiibeli itaa ulike ashike kOmushiti, ndele otaa ulike yo kovanhu, koikalunga nokuSatana. — Johannes 10:34, 35; 1 Ovakorinto 8:5, 6; 2 Ovakorinto 4:4. *

NGHEE OMBIIBELI YA XUPA: Nonande potete ovashangululi vOmbiibeli vamwe kava li ve na ko nasha novakengeleledi, vahapu ova li ve na owino muhapu  novadiinini. Pokati kefelemido etihamano netimulongo, Ovamasorete ova li va shangulula Omishangwa dOshiheberi ve di tula metoloko ha li ifanwa Omishangwa dOvamasorete. Ovamasorete ova li va valula oitya nosho yo eendada opo va shilipaleke kutya kamu na osho sha nhukwa po ile sha wedwa po. Ngeenge va li va mona epuko meshangelo likulu olo tava longifa, ova li have li didilike komunghulo wepandja. Ova li yo va anya okulundulula omishangwa dOmbiibeli. Omunawino wOmishangwa dOshiheberi, Moshe Goshen-Gottstein okwa ti: “Ngeenge ove lidopo mokulundula etumwalaka lOmbiibeli otashi ka kala enyono la kwata moiti kuvo.”

Oshitivali, kunena omashangelo e lixwa po ohaa kwafele ovahongwanhu vOmbiibeli va didilike omapuko. Pashihopaenenwa, oule womido omafele ovawiliki vomalongelokalunga ova kala nokuhonga kutya omatoloko avo Oshilatina okwa tolokwa mondjila. Onghee hano, ova li va weda omautumbulilo a puka mu 1 Johannes 5:7 oo twa kundafana lwopehovelo loshitukulwa eshi. Omapuko oo okwa holoka yo metoloko lOshiingilisha lOmbiibeli yoKing James. Ndele eshi omashangelo makulu akwao a monika, okwa li a holola shike? Bruce Metzger okwa ti: “Outumbulilo oo u li mu [1 Johannes 5:7] kau mo momatoloko aeshe onale ngaashi (Oshisyria, Oshicoptic, Oshiarmenia, Oshietiopia, Oshiarabia nOslavonia), kakele ashike mOshilatina.” Naasho osha ningifa ovatoloki vOmbiibeli yo-King James ya pepalekwa nosho yo vEembiibeli dimwe va kufe mo outumbulilo oo wa puka.

Eshangelo likulu lOmbiibeli yomanenge yomo 200 O.P. lwaapo.

Mbela omashangelo onale Ombiibeli okwa ulika kutya etumwalaka lOmbiibeli ola kala nokukwatelwa po? Eshi Omishangwatonywa domEfuta La Fya da li da monika mo 1947, ovahongwanhu ova li va yelekanifa Omishangwa dOshiheberi dOvamasorete nomishangwatonywa odo da shangwa omido omayovi nasha da pita. Umwe womongudu yovanyanyangidi vOmishangwatonywa domEfuta La Fya okwa yelifa kutya “omushangwatonywa umwe otau yandje oumbangi uhe fi okupatanekwa. Novashangululi Ovajuda ova kala nokutoloka Ombiibeli noudiinini nonoukeka moule womido di dule peyovi.”

Ongulumambo imwe yokoDublin, moIreland, oya ongela omishangwatonywa domanenge odo di lile po hanga omambo aeshe Omishangwa dopaKriste dOshigreka, mwa kwatelwa omashangelo omefelemudo etivali, kakele ashike kaao a shangwa omido 100 konima yokushangwa kwOmbiibeli. Emboitya limwe lOmbiibeli ola ti: “Nonande embo lomanenge otali yandje ouyelele muhapu washili u na sha neshangelo, otali ulike yo oinima oyo itai dulu okudimbuwa mondjokonona yokutolokwa kwOmbiibeli.”

“Osha yuka okupopya kutya kape na embo limwe likulu la tolokwa li li paushili ngaashi Ombiibeli”

OSHIDJEMO: Omashangelo oo mahapu nomakulu okwa xwepopaleka Ombiibeli ponhele yoku i hekula. Frederic Kenyon okwa popya kombinga yOmishangwa dopaKriste dOshigreka a ti: “Kape na vali embo limwe likulu li na omashangelo onale la fa Ombiibeli noli na omaumbangi mahapu momashangelo alo, nokape na omuhongwanhu ita dimine kutya oshili yomishangwa oya wana po.” Omuhongwanhu William Henry Green okwa popya kombinga yOmishangwa dOshiheberi a ti: “Osha yuka okupopya kutya kape na embo limwe likulu la tolokwa li li paushili ngaashi Ombiibeli.”

^ okat. 6 Opo u mone ouyelele muhapu, tala Oshiwedelwako A4 nosho yo A5 mo-New World Translation of the Holy Scriptures, tai hangwa ko-www.jw.org.

Lihonga shihapu

Omolwashike Eendombwedi daJehova da nyanyangida o-New World Translation?

Oshike sha ningifa etoloko olo lEendjovo daKalunga li kale le likalekelwa?