Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Omolwashike hatu kulupa nohatu fi?

Omolwashike hatu kulupa nohatu fi?

KALUNGA ka li a lalakanena ovanhu va kale tava fi. Ovadali vetu votete, Adam naEva, ova li va shitwa va wanenena nova li tava dulu okukala nomwenyo fiyo alushe. Oumbangi ou li wetikile mwaasho Jehova a li a lombwela Adam shi na sha nomuti oo wa li moshikunino shaEden.

Kalunga okwa li a lombwela Adam a ti: “Osheshi efiku tuu olo to li [komuti oo], ou na okufya shili.” (Genesis 2:17) Ngeno Kalunga okwa li a shita Adam a kulupe nosho yo a fye, ngeno ine mu pa oshipango osho. Adam okwa li e shii kutya ita fi ngeenge okwa kala ina lya ko komuti oo.

KALUNGA KA LI A LALAKANENA OVANHU VA KALE TAVA FI

Adam naEva kava li ve na okulya komuti oo molwaashi moshikunino omwa li oiimati ihapu oyo va li tava dulu okulya. (Genesis 2:9) Ngeno kava lile komuti oo, ngeno ova ulika kutya ohava dulika kuKalunga oo e va shita. Natango, ngeno ova ulika kutya Kalunga oye aeke a wana oku va pangela.

OMOLWASHIKE ADAM NAEVA VA FYA?

Opo tu mone enyamukulo li na sha naasho, otwa pumbwa okukonakona osho sha ningwa po. Satana okwa li a longifa eyoka opo e va pukife. Ombiibeli oya ti: “Ndele eyoka la li la lungama li dule oifitukuti aishe yomoixwa ei Omwene Kalunga a ninga. Ndele lo ola pula omwalikadi: Kalunga okwa ti shili: ‘Inamu lya komiti adishe domoshikunino?’” — Genesis 3:1.

Opo nee Eva okwa nyamukula a ti: “Ohatu li oiimati yomiti domoshikunino, ndelenee oiimati yomuti wopokati koshikunino Kalunga okwa ti: ‘Inamu i lya, nye inamu i kuma, muha fye.’” Opo nee eyoka ola tya komwalikadi: “Nye itamu fi shili. Kalunga oku shi shii nokutya, ngeenge mwe i li, omesho eni otaa pashuka, ndele tamu shiiva ouwa nowii, ngaashi Kalunga.” Kungaho, Satana okwa li ta ti kutya Jehova omunaipupulu noine va halela ouwa. — Genesis 3:2-5.

Eva okwa li a itavela oipupulu oyo a li a lombwelwa. Opo nee okwa tala komuti oo. Omuti ou omuwa nokulya notau hafifa omesho, ndele ye okwa kufa oiimati yao ndele ta li. Ombiibeli oya ti: “Ndele ta pe yo omulumenhu waye, ndele ye okwa lya.” — Genesis 3:6.

Kalunga okwa li a lombwela Adam a ti: “Osheshi efiku tuu olo to u li, ou na okufya shili.” — GENESIS 2:17

Osha li sha handukifa Kalunga eshi va li inava dulika kuye. Okwa li a ninga po shike? Jehova okwa lombwela Adam a ti: “Oto shuna medu, osheshi omo wa kufwa. Osheshi oove edu, ndele oto ka ninga edu.” (Genesis 3:17-19) Omolwokunyona kwaye, “efimbo olo alishe Adam a kala nomwenyo, ola li omido omafele omugoi nomilongo nhatu, eshi ye a fya.” (Genesis 5:5) Konima eshi a fya, ka li a ya meulu ile konhele imwe i lili. Ofimbo Jehova ine mu shita, ka li po nandenande. Onghee eshi a fya, okwa shuna medu omo a dile. Ke po va li nandenande. Ka shinyikifa tuu oluhodi!

 OMOLWASHIKE INATU WANENENA?

Omolwokuhadulika kwavo kuKalunga, kava li vali va wanenena nova kanifa etimaumbwile lokukala fiyo alushe. Osho osha li she va etela oilanduliko inyikifa oluhodi noludalo lavo alishe ola li la fyuulula oulunde nokuhawanenena. Ovanhu aveshe ova kumwa omolwokuhadulika kwavo. Ovaroma 5:12 ova ti: “Ngaashi oulunde wa etwa mounyuni komunhu umwe [Adam], nefyo okoulunde, osho nee efyo ole uya movanhu aveshe, shaashi aveshe va nyona.”

Ombiibeli oya popya kutya oulunde nefyo oi li ngaashi “oshikutu shokutuvikila ovanhu aveshe; noshituviko tashi tuvike oiwana aishe.” (Jesaja 25:7) Oshikutu shokutuvikila ovanhu aveshe oshi li ngaashi oudiyo oo u li apeshe noitau dulu okuhenukwa. Oshoshili kutya atushe ohatu “file muAdam.” (1 Ovakorinto 15:22) Natango, ovanhu otave lipula epulo olo Omuyapostoli Paulus a li a pula a ti: “Olyelye ta mangulula nge molutu eli lefyo?” Mbela ope na ou ta dulu oku tu mangulula mo mefyo? — Ovaroma 7:24.